
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓡꓰ ꓕꓱ ꓡꓱ ꓐꓯ ꓔ ꓡꓳ꓿ ꓮꓽ ꓟ ꓥˍ ꓟꓲ ꓮꓽ ꓐ ꓮ ꓟ꓾ ꓬꓲ ꓦꓲ ꓢꓲ ꓟ꓾ ꓤ ꓫꓵ. ꓤ ꓠꓱ ꓐꓴ ꓔꓯ ꓥꓪ ꓢꓶ. ꓟꓽ ꓞꓲ ꓠꓲ, ꓠꓵˍ ꓠꓬ ꓥꓪ ꓛꓳꓽ ꓒꓯ, ꓬꓰ ꓟꓽ ꓒꓵꓽ꓿ ꓮꓽ ꓟ ꓥ ꓟꓲ ꓥꓪ ꓗ ꓠꓯ. ꓖꓼ ꓢꓴ ꓠꓬ ꓚꓲ. ꓛꓬ ꓡꓯꓼ ꓐꓳ ꓔꓶ. ꓓꓴ ꓔꓯ ꓑꓱ. ꓢꓲ ꓠꓬꓲ ꓬꓲ ꓗ ꓠꓯ. ꓖꓼ ꓠ ꓔˍ ꓡꓳ꓾ ꓐꓰ ꓐꓯ ꓔ ꓡꓳ꓿ ꓮ ꓫꓵꓽ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓙꓵꓽ ꓗ ꓕꓱ ꓟ ꓔꓯ ꓔꓶ ꓔ ꓡ꓿ ꓬꓲ ꓗ ꓠꓯ. ꓖꓼ ꓢꓴ ꓠꓬ ꓧꓶ. ꓕꓯ ꓬꓲ ꓚꓲ. ꓛꓬ ꓡꓯꓼ ꓐꓳ ꓔꓶ. ꓓꓴ ꓑꓱ. ꓢꓲ ꓠꓬꓲ ꓮ ꓙꓵꓽ ꓟ ꓕꓯꓽ ꓢꓲ ꓬꓲ ꓔꓯ ꓠꓲ, ꓠꓵ ꓠ ꓗ, ꓡꓳ꓾ ꓐꓰ ꓙꓵꓽ ꓗ ꓬꓲ ꓪꓴ. ꓕꓲꓽ ꓟ ꓔꓶ ꓔ ꓡꓳ꓿
(ꓡꓴ‐ꓘ 14ꓽ25‐33) ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓟ. ꓟꓲꓽ ꓕꓱ ꓟ ꓣꓳ ꓠ ꓠ, ꓓꓴ ꓥ ꓡꓳ꓿ ꓞꓳ ꓤ ꓮ ꓟꓬ, ꓠꓬ ꓢꓲ ꓒ ꓬꓰ‐ꓢꓴ ꓗ ꓠꓯ. ꓛꓳꓻ ꓔꓬ ꓡꓳ꓿ ꓢꓲ ꓒ ꓬꓰ‐ꓢꓴ ꓐꓯ ꓖꓶˍ ꓟ ꓓꓵꓽ ꓙꓽ ꓮʼ ꓓꓴ꓾ ꓢꓲ ꓒ ꓬꓰ‐ꓢꓴ ꓖꓶ ꓜꓽ ꓖꓶ ꓓꓳꓻˍ ꓟ ꓓꓵꓽ ꓙꓽ ꓟꓶ ꓓꓴ꓾ ꓢꓲ ꓒ ꓬꓰ‐ꓢꓴ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓙꓻ ꓖꓴ ꓫꓱꓽ ꓐ ꓡ ꓢꓴ ꓬꓲ ꓗ ꓠꓯ. ꓢꓲ ꓗꓪ ꓞꓳ ꓤ ꓮ ꓟꓬ, ꓖꓼ ꓔꓴ ꓡˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓪ ꓔꓯ ꓐꓯ ꓖꓶˍ ꓡꓳ꓿ ꓮꓽ ꓟ ꓥˍ ꓟꓲ ꓥꓪ ꓗ ꓠꓯ. ꓖꓼ ꓠꓲ, ꓫꓵˍ ꓠꓬ ꓮ ꓙꓵꓽ ꓟ ꓕꓯꓽ ꓢꓲ ꓬꓲ ꓔꓯ ꓠꓲ, ꓠꓵ ꓠ ꓗ, ꓡꓳ꓿ ꓚꓲ. ꓛꓬ ꓡꓯꓼ ꓐꓳ ꓔꓶ. ꓓꓴ ꓑꓱ. ꓢꓲ ꓠꓬꓲ ꓬꓲ ꓗ ꓠꓯ. ꓖꓼ ꓠ ꓗ, ꓡꓳ꓾ ꓐꓰ ꓐꓯ ꓔ ꓡꓳ꓿
ꓢꓲ ꓒ ꓬꓰ‐ꓢꓴ ꓬꓲ ꓤꓶ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓥꓪ. ꓠꓬꓲꓽ ꓟ ꓐꓰ ꓑ ꓑ ꓥꓪꓽ ꓑꓬ ꓟ ꓔꓯ ꓓꓵꓽ ꓙ ꓟꓶ ꓓꓴ ꓬꓰ ꓖꓶˍ ꓕꓯ ꓡ ꓞꓳ ꓥꓪꓽ ꓔꓴ ꓣꓳ ꓟꓽ ꓞꓲ ꓔꓯ ꓖꓶ ꓜꓽ ꓖꓶ ꓓꓳꓻˍ ꓕꓯ ꓞꓳ ꓤ ꓥꓪꓽ ꓔꓴ ꓣꓳ ꓬꓲ ꓗ ꓠꓯ. ꓖꓼ ꓡˍ ꓡꓳ꓿ ꓖꓳ ꓟ ꓠꓯꓸꓼ ꓘꓴꓽ ꓗꓪ 72 ꓣꓳ ꓬꓲ ꓛꓳꓽ ꓒꓯ, ꓒꓬꓱꓼ ꓡˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓫꓵꓽ ꓬꓲ ꓧꓪꓽ ꓜꓽ ꓠ, ꓟ ꓐꓱ ꓶ ꓐꓯˍ ꓕꓯ 72 ꓣꓳ ꓟ ꓮ ꓙꓵꓽ ꓔꓷ, ꓛꓰ, ꓙꓰˍ ꓡꓳ꓿ ꓬꓲ ꓛꓳꓽ ꓒꓯ, 12 ꓣꓳˍ ꓡꓰꓽ ꓤꓰ ꓞ, ꓡꓳ꓿
ꓕꓱ ꓟˍ ꓡꓰ ꓐꓰ ꓖꓰ‐ꓢꓰ‐ꓟ‐ꓠꓲ ꓐꓱ ꓗꓪ ꓫꓵꓽ ꓚꓵ. ꓓꓳ ꓢꓲ ꓪꓽ ꓘꓴ ꓙꓰˍ ꓕꓯ ꓥ ꓟꓲ ꓬꓲ ꓛꓳꓽ ꓒꓯ, ꓕꓲ ꓣꓳ ꓟ ꓔꓷ, ꓙꓰˍ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓯꓼ ꓐꓳ ꓔꓶ. ꓓꓴ ꓑꓱ.ˍ ꓟ ꓙ ꓖꓴ ꓗꓪ ꓒꓲ‐ꓕꓱ ꓐꓰ ꓬꓳ‐ꓦ ꓔꓬ ꓡꓳ꓿ ꓡꓳ, ꓬꓰˍ ꓕꓯ ꓢꓲ ꓒ ꓬꓰ‐ꓢꓴ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓫꓵꓻˍ ꓟ ꓦꓬꓼ ꓠꓬꓲ ꓗꓪ ꓬꓳ‐ꓦ ꓕꓲ ꓣꓳˍ ꓡꓰꓽ ꓤꓰ ꓡꓰˍ ꓡꓳ꓿ ꓖꓳ ꓡꓱ ꓠꓬꓲ ꓡꓯꓼ ꓐꓳ ꓔꓶ. ꓓꓴ ꓐꓰ ꓠꓶꓽ ꓡˍ ꓕꓯ ꓡ ꓞꓳ ꓠꓬ ꓮ ꓟꓬ, ꓐꓽ ꓡꓰˍ ꓡꓳ꓿ ꓪ ꓜꓽ ꓪ ꓓꓳꓻ꓾ ꓪ ꓖꓪꓽˍ ꓟ ꓦꓬꓼ ꓠꓬꓲ ꓗꓪ ꓠꓬ ꓞꓳ ꓤ ꓮ ꓟꓬ, ꓡꓳꓽ ꓡˍ ꓡꓳ꓿ ꓢꓲ ꓒ ꓬꓰ‐ꓢꓴ ꓖꓳ ꓟ ꓔꓯ ꓢꓷ.ˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓠꓬ ꓬꓲ ꓗ ꓠꓯ. ꓖꓼ ꓠꓲ, ꓫꓵˍ ꓥꓳ ꓐꓯˍ ꓠꓬ ꓡꓯꓼ ꓐꓳ ꓔꓶ. ꓓꓴ ꓑꓱ. ꓠ ꓗ, ꓡꓳ꓾ ꓐꓰ ꓬꓲ ꓡꓰ ꓐꓯ ꓖꓶ ꓡˍ ꓡꓳ꓿ ꓡꓯꓼ ꓐꓳ ꓔꓶ. ꓓꓴ ꓐꓯˍ ꓟ ꓮ ꓫꓵꓽ ꓥ ꓡ꓿ ꓢꓲ ꓒ ꓬꓰ‐ꓢꓴ ꓗ ꓠꓯ. ꓣꓳ ꓖꓼ ꓛꓳ ꓔꓬ ꓕꓯ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓪꓴ‐ꓢ ꓥꓳ ꓐꓰ ꓣꓷꓠ. ꓔ ꓕꓯ ꓕꓲ ꓖ ꓕꓲ ꓘꓴ ꓗꓪ ꓣꓳ ꓕꓲ ꓔꓲ, ꓬꓰ ꓠꓲ, ꓟꓽ ꓫꓵ ꓫꓵꓽ ꓡꓯꓼ ꓐꓳ ꓔꓶ. ꓓꓴ ꓕꓱ ꓟ ꓣꓳ ꓑꓱ. ꓠ ꓗ, ꓡꓳ꓿ ꓕꓲ ꓘꓴ ꓟꓽ ꓥ ꓕꓲ ꓘꓴ꓾ ꓕꓲ ꓔꓳ. ꓟꓽ ꓥ ꓕꓲ ꓔꓳ. ꓗꓪ ꓠꓬ ꓣꓳ ꓮ ꓡꓲ ꓥˍ ꓟꓲ ꓫ. ꓙꓵˍ ꓟ ꓙꓳˍ ꓥꓳ꓿ ꓣꓳ ꓪꓴ. ꓠꓶ. ꓣꓳ ꓓꓵꓽ ꓙꓽ ꓚꓱ, ꓠꓬ ꓕꓱ ꓟ ꓥꓳ ꓐꓰ ꓓꓵꓽ ꓙꓽˍ ꓥ ꓟꓲ ꓪꓴ‐ꓢ ꓐꓯ ꓘꓶꓽ ꓪꓴ‐ꓢ ꓙꓵꓽ ꓗ ꓠꓬ ꓕꓱ ꓡꓱ ꓟꓽ ꓥ ꓐꓰ ꓐꓯ ꓖꓶ ꓡˍ ꓫꓵꓽ꓾ ꓣꓳ ꓠꓲ, ꓡꓶꓽ ꓐꓰ ꓬꓲ ꓠꓲ, ꓡꓶꓽ ꓟꓽ ꓫꓱ. ꓡꓯ ꓘꓳ ꓟ꓾ ꓣꓳ ꓠꓲ, ꓫꓵˍ ꓟ ꓐꓰ ꓬꓲ ꓠꓲ, ꓫꓵˍ ꓟ ꓟꓽ ꓫꓱ. ꓡꓯ ꓘꓳ ꓟ ꓕꓱ ꓡꓱ ꓓꓳ ꓡˍ ꓡꓳ꓿