ꓕꓲ ꓠ ꓡꓲ ꓕꓲ ꓠ ꓠꓽ ꓢ ꓠꓬꓲ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓜꓲ ꓡꓯ ꓘꓳ ꓟ ꓙꓵꓹ ꓗꓪ ꓔꓲꓺ ꓒ ꓪ ꓔꓲ ꓡꓰ ꓥꓳ ꓡꓳꓸ ꓓꓴ ꓙꓴ-ꓐꓲ-ꓡꓲ ꓘꓳꓼ ꓚꓱꓹ ꓔꓯ ꓟꓳꓸ ꓖꓷ-ꓢꓷ-ꓟ-ꓠꓲ ꓗꓪ ꓢꓲ ꓒ ꓬꓰ-ꓢꓴ ꓔꓯ ꓣꓴ ꓡ ꓕꓯ ꓟꓽ ꓔꓱꓹ ꓟ꓾ ꓙꓳꓺ ꓔꓬ ꓟ꓾ ꓕꓲ ꓣꓳ ꓕꓵꓼ ꓡꓰ ꓔꓬ ꓐꓰ ꓓꓵꓽ ꓙ ꓟ ꓐꓰ ꓪꓴ-ꓢ ꓔꓬ ꓡꓳ ꓐꓯ_ ꓟ ꓕꓱ ꓟꓬ ꓫꓵ ꓓꓵꓽ ꓙ ꓡꓰ_ ꓟ ꓚꓱꓹ ꓔꓯ ꓔꓱꓹ ꓕ ꓢꓯꓼ ꓖꓶ ꓔ ꓡꓳ=
ꓢꓲ ꓒ ꓬꓰ-ꓢꓴ ꓠꓬ ꓬꓲ ꓔꓯ ꓣꓴ ꓡ ꓕꓯ ꓙꓳꓺ ꓔꓬ ꓟ ꓕꓲ ꓣꓳ ꓡꓲꓹ ꓙꓰ ꓠ ꓢꓯꓼ ꓕꓵꓼ ꓢꓴ ꓕꓲ ꓣꓳ ꓐꓰ ꓬꓳ-ꓦ ꓡꓰ ꓐꓳ ꓔ ꓟ ꓢꓲ ꓫꓬ ꓕꓳ ꓶ ꓗꓪ ꓟꓽ ꓐꓯ ꓔ ꓟ ꓥ ꓡꓳ= ꓖꓳ ꓟ ꓡꓰ ꓐꓰ ꓪꓴꓽ ꓓꓰ ꓡꓰ_ ꓟ ꓠꓵꓻ ꓠꓲꓹ ꓔꓯ ꓟꓸ ꓖꓶ_ ꓟ ꓞꓳ ꓡꓯꓸ ꓤ ꓕꓲ ꓣꓳ ꓡꓰ ꓐꓰ ꓖꓳ ꓕꓲ ꓙꓵꓹ ꓔꓯ ꓑꓶꓸ ꓑꓶꓸ ꓡꓰ ꓔ ꓔꓳꓹ ꓗꓷ ꓟ ꓥ ꓡꓳ=
ꓖꓳ ꓕꓲ ꓙꓵꓹ ꓗꓪ ꓮ ꓡꓰ ꓫꓵ ꓔꓳꓹ ꓜꓳ ꓡ ꓟ ꓔꓯ ꓬꓲ ꓢꓷꓸ ꓔ ꓡꓳ꓾ ꓕꓱ ꓟ ꓔꓯ ꓬꓲ ꓒꓶꓸ ꓑꓶꓸ ꓡꓰ ꓔ ꓔꓳꓹ ꓢꓲ ꓠꓬꓲ ꓙꓳꓺ ꓟ ꓐꓰ ꓔꓷꓹ ꓙꓰ_ ꓟ ꓟꓽ ꓬꓰ꓾ ꓬꓲ ꓚꓲ ꓛꓬ ꓣꓴ ꓡ ꓢꓴ ꓠꓯꓼ ꓗꓪ ꓡꓯ ꓙꓱ ꓗꓷ ꓟ ꓥ ꓡꓳ= ꓔ ꓔꓳꓹ ꓟꓽ ꓐ ꓡ ꓟ ꓑꓶ ꓓꓴ꓾ ꓢꓯꓼ ꓐ ꓟ ꓑꓶ ꓓꓴ ꓟꓽ ꓥ꓾ ꓮ ꓘꓶꓸ ꓠꓲꓹ ꓠꓵ ꓟ ꓒꓶ ꓓꓴ ꓕꓱ ꓟ ꓔꓯ ꓘꓳꓹ ꓣꓴ ꓗꓷ ꓟ ꓥ ꓡꓳ= ꓟꓲ ꓠꓯ ꓞꓳ ꓤ ꓮ ꓙꓵ ꓚꓬꓴ ꓙ ꓟꓶ ꓠꓹ ꓟ ꓐꓱ ꓶ ꓬꓲ ꓚꓲ ꓛꓬ ꓡꓯ ꓙꓱ ꓗꓷ ꓟ ꓥ ꓡꓳ= ꓕꓱ ꓟ ꓠꓬ ꓠꓯ ꓞꓲꓹ ꓟ ꓙꓵꓹ ꓗꓪ ꓥ ꓟꓲ ꓬꓲ ꓟꓶ ꓗꓪ ꓛꓲ ꓠꓵꓻ ꓠꓲꓹ ꓔꓬ ꓟ ꓔꓯ ꓢꓷꓸ ꓙ ꓟꓳ ꓙ ꓟꓸ ꓖꓶ ꓗꓷ ꓟ ꓥ ꓡꓳ=
ꓕꓱ ꓬꓲ ꓠꓯꓹ ꓟ ꓚꓱꓹ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓠꓴ ꓪ ꓧꓪ ꓔ ꓟ ꓠꓬ ꓥꓪ ꓥ ꓡꓳ꓾ ꓐꓰ ꓐꓯ ꓕꓯ ꓣꓴ ꓡ ꓢꓴ ꓟꓯꓼ ꓐꓴ ꓠꓬ ꓟꓲ ꓠꓯ ꓗꓪ ꓡꓱꓸ ꓡꓰ_ ꓡꓳ=ꓕꓱ ꓗꓪ ꓬꓲ ꓠꓯꓹ ꓟ ꓠꓬ ꓥꓪ ꓥ ꓡꓳ꓾ ꓐꓰ ꓐꓯ_ ꓟ ꓥ ꓡꓳ꓾ ꓕꓱ ꓟ ꓠꓬ ꓪꓴ-ꓢ ꓐꓰ ꓐꓯ ꓔ ꓟ ꓥ ꓡꓳ= ꓕꓱ ꓗꓪ ꓪꓴ-ꓢ ꓔꓬ ꓡꓳ꓾ ꓕꓱ ꓟ ꓠꓬ ꓣꓳ ꓟꓲ ꓠꓯ ꓞꓳ ꓤ ꓐꓴ ꓢꓷꓸ ꓠ ꓔ ꓟ ꓠꓬ꓾ ꓣꓳ ꓔꓯ ꓒꓰꓹ ꓗꓷ ꓡꓺꓳ ꓐꓰ ꓓꓵꓽ ꓙ ꓔꓬ ꓕꓯ ꓙꓳꓺ ꓓꓴ ꓔꓳꓹ ꓜꓳ ꓔꓬ ꓕꓯ ꓟꓽ ꓔꓱ ꓐꓰ ꓓꓵꓽ ꓙ ꓔꓬ ꓕꓯ ꓖꓳ ꓗꓪ ꓪꓴ-ꓢ ꓔꓬ ꓡꓳ꓾ ꓐꓯ_ ꓟ ꓢꓷꓸ ꓠ ꓔ ꓡꓳ= ꓖꓳ ꓕꓲ ꓙꓵꓹ ꓖꓳ ꓕꓲ ꓔꓶꓸ ꓗꓪ ꓐꓰ ꓠꓯ ꓞꓲꓹ ꓟ ꓔꓯ ꓔꓳꓹ ꓢꓲ ꓠꓬꓲ ꓔꓱꓹ ꓟ ꓠꓵꓻ ꓠꓲꓹ ꓠꓬꓲ ꓟꓳ ꓓꓴ ꓡꓯ ꓖꓶ ꓠꓹ ꓟ ꓙꓵꓹ ꓗꓷ ꓡ ꓥꓳ=
ꓣꓳ ꓤꓶꓻ ꓗꓪ ꓠꓯ ꓞꓲꓹ ꓟ ꓙꓵꓹ꓾ ꓮ ꓙꓵ ꓐꓬ ꓡꓰ ꓓꓴ ꓙꓵꓹ ꓗꓪ ꓙꓲ ꓢꓴ ꓢꓲ ꓤ ꓐꓴ ꓥꓳ ꓡꓳꓸ ꓓꓴ ꓔꓯ ꓪꓴꓸ ꓓꓵ ꓒꓳꓹ ꓗꓷ ꓓꓴ ꓟꓽ ꓥ꓾ ꓓꓵꓽ ꓙ ꓞꓷꓹ ꓓꓴ ꓕꓲ ꓟ ꓡꓰ ꓥ ꓡꓳ= ꓪꓴ-ꓢ ꓠꓬ ꓣꓳ ꓔꓳꓹ ꓜꓳ ꓡ ꓟ ꓫ ꓙꓵ ꓟꓷꓼ ꓙꓵ ꓓꓴ ꓗꓪ ꓐꓰ ꓗ ꓗꓷ ꓡꓺꓳ ꓫꓵ ꓟꓽ ꓥ꓾ ꓕꓱ ꓫ ꓙꓵ ꓟꓷꓼ ꓙꓵ ꓓꓴ ꓔꓯ ꓔꓳꓹ ꓐ ꓡꓰ ꓠꓹ ꓟ꓾ ꓠꓵꓻ ꓠꓲꓹ ꓐꓰ ꓢꓯꓼ ꓪ ꓔꓯ ꓖꓶ ꓡ ꓟ ꓥ ꓡꓳ= ꓕꓱ ꓟ ꓔꓯ ꓪ ꓟꓶ ꓠꓹ ꓟ ꓠꓬ ꓪꓽ ꓘꓴ ꓕꓯ ꓢꓲ ꓟꓶ ꓡ ꓟ ꓥ ꓡꓳ=
ꓢꓲ ꓒ ꓬꓰ-ꓢꓴ ꓠꓬ ꓬꓲ ꓔꓯ ꓣꓴ ꓡ ꓕꓯ ꓥ ꓟꓲ ꓬꓲ ꓐꓱ ꓶ ꓟꓽ ꓙꓬ ꓫꓸ ꓫꓸ ꓬꓲ ꓛꓳ ꓒꓯꓹ ꓐꓴ ꓚꓬꓴ ꓙ ꓠꓹ ꓟ ꓐꓱ ꓶ ꓡꓰ ꓓꓵ ꓙ ꓔꓬ ꓟ ꓥ ꓡꓳ꓾ ꓕꓱ ꓟ ꓠꓬ ꓬꓲ ꓔꓱꓹ ꓟ ꓠꓵꓻ ꓠꓲꓹ ꓐꓰ ꓬꓲ ꓬꓰ_ ꓟ ꓬꓲ ꓪꓴ ꓓꓰ ꓡꓰ ꓟ ꓠꓵꓻ ꓠꓲꓹ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓖꓳ ꓕꓲ ꓙꓵꓹ ꓐꓱ ꓶ ꓬꓲ ꓕꓲ ꓤꓶꓻ ꓡꓱꓼ ꓙ ꓖꓶ ꓔ ꓟ ꓥ ꓡꓳ= ꓖꓳ ꓟ ꓑꓶ ꓓꓴ ꓬꓲ ꓑꓶ ꓑꓶ ꓡꓰ ꓔ ꓔꓳꓹ ꓐ ꓡ ꓟ ꓥ ꓡꓳ= ꓠꓵꓻ ꓠꓲꓹ ꓐꓰ ꓬꓰ ꓟ ꓟꓬꓱꓽ ꓠꓬ ꓞꓳꓸ ꓡꓰ ꓫꓵ ꓟꓽ ꓥ꓾ ꓠꓵꓻ ꓠꓲꓹ ꓐꓰ ꓐꓲ ꓞꓲꓼ ꓡꓰ ꓟ ꓔꓯ ꓬꓲ ꓢꓷꓸ ꓟ ꓥ ꓡꓳ= ꓖꓳ ꓟ ꓑꓶ ꓓꓴ ꓔꓱꓹ ꓟ ꓥꓳ ꓡꓳꓸ ꓓꓴ ꓠꓬ ꓫ ꓙꓵ ꓟꓷꓼ ꓙꓵ ꓓꓴ ꓔꓯ ꓪꓴꓸ ꓓꓵ ꓒꓳꓹ ꓡꓰ ꓓꓴ ꓟꓽ ꓥ꓾
ꓣꓳ ꓤꓶꓻ ꓠꓯꓼ ꓗꓪ ꓕꓲ ꓣꓳ ꓕꓵꓼ ꓔꓬ ꓡꓳ ꓐꓰ ꓓꓵ ꓙ ꓔꓬ ꓟ꓾ ꓣꓳ ꓤꓶꓻ ꓐꓱ ꓶ ꓙ ꓖꓶ ꓔꓬ ꓟ ꓙꓵꓹ ꓗꓪ ꓣꓳ ꓢꓯꓼ ꓟꓬ ꓐꓱ ꓶ ꓗꓽ ꓕ ꓔꓬ ꓟ ꓙꓵꓹ ꓗꓪ ꓢꓲ ꓒꓽ ꓠꓬ ꓣꓳ ꓔꓯ ꓶꓼ ꓓꓳ ꓫꓱꓹ ꓓꓳ ꓗꓪ ꓐꓰ ꓛꓳ ꓫꓱꓽ ꓠꓹ ꓟ ꓢꓯꓼ ꓖꓶ ꓔ ꓡꓳ= ꓢꓲ ꓒ ꓬꓰ-ꓢꓴ ꓔꓯ ꓣꓴ ꓡ ꓕꓯ ꓐꓵ ꓞꓲ ꓟꓽ ꓐ ꓔꓷꓹ ꓙꓰ ꓡꓰ ꓟ ꓞꓳ ꓡꓱ ꓤ ꓕꓲ ꓣꓳ ꓬꓲ ꓐꓱ ꓔꓯ ꓟꓳꓸ ꓕꓱ ꓟ ꓡꓰ ꓐꓰ ꓣꓳ ꓤꓶꓻ ꓗꓪ ꓥ ꓟꓲ ꓔꓳꓹ ꓜꓳ ꓠꓬꓲ ꓐꓭ_ ꓥꓳ꓾ ꓠꓯꓹ ꓞꓲꓹ ꓟ ꓙꓵꓹ ꓣꓳ ꓔꓯ ꓣꓴ ꓡ ꓟ ꓙꓵꓹ ꓗꓪ ꓕꓱ ꓟ ꓡꓰ ꓐꓰ ꓪꓴ-ꓢ ꓐꓯ ꓘꓶꓽ ꓶꓼ ꓓꓳ ꓫꓱꓸ ꓓꓳ ꓔꓯ ꓒꓱꓹ ꓗꓷ ꓢꓲ꓾ ꓘꓰꓹ ꓙꓰ_ ꓟ ꓥ ꓡꓳ= ꓕꓱ ꓟꓬ ꓛꓲ ꓠꓲꓹ ꓠꓵꓻ ꓟꓽ ꓐ ꓡ ꓐꓰ ꓓꓵꓽ ꓙ ꓠꓬꓲ ꓗꓴꓸ_ ꓡꓳ=
ꓕꓱ ꓬꓲ ꓐꓱ ꓗꓪ ꓐꓰ ꓞꓳ ꓡꓯꓸ ꓤ ꓠꓬ ꓠꓱꓸ ꓐꓯꓼ ꓬꓲ ꓐꓱ ꓕꓲ ꓟ ꓗꓪ ꓐꓵꓽ ꓞꓲ ꓒꓴ ꓒꓴ ꓖꓪ ꓢꓲ ꓢꓲ ꓒ ꓬꓰ-ꓢꓴ ꓢꓯꓸ ꓬꓲꓼ ꓡ ꓟ ꓔꓯ ꓚꓺ ꓖꓶ ꓟꓸ ꓖꓶ_ ꓟ ꓟꓳ ꓪ ꓡꓳ= ꓕꓱ ꓟ ꓠꓬ ꓣꓳ ꓙꓵꓻ ꓠꓲꓹ ꓥꓳ ꓡꓳꓸ ꓓꓴ ꓥ ꓡꓳ= ꓮ ꓫꓵ ꓑꓶ ꓓꓴ ꓐꓯ ꓠꓬ ꓕꓱ ꓞꓳ ꓡꓯꓸ ꓤ ꓬꓰ_ ꓟ ꓔꓯ ꓪꓴ-ꓢ ꓡꓰ ꓖꓽ ꓖꓶ_ ꓟ ꓡꓰ ꓐꓰ ꓣꓳ ꓔꓯ ꓥ ꓟꓲ ꓖꓽ ꓖꓶ_ ꓡꓳ= ꓣꓳ ꓔꓯ ꓬꓲ ꓠꓯꓼ ꓗꓪ ꓛꓳ ꓫꓱꓽ ꓠꓹ ꓟ ꓬꓲ ꓚꓱꓹ ꓖꓶ_ ꓡꓳ꓾ ꓣꓳ ꓤꓶꓻ ꓔꓯ ꓠꓱꓸ ꓐꓯꓼ ꓢꓴ ꓐꓱ ꓶ ꓬꓰ ꓙ ꓔꓳꓹ ꓙ ꓐ ꓡ ꓢꓴ ꓬꓰ ꓖꓶ_ ꓡꓳ꓾ ꓬꓲ ꓡꓰ ꓧꓳꓽ ꓪꓴꓸ ꓟꓴ ꓖꓶ_ ꓡꓳ=
ꓕꓱ ꓕꓲ ꓫꓵ ꓠꓽ ꓠꓬ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓮꓣꓳ ꓠꓯꓼ ꓗꓪ ꓪ ꓟꓶ ꓔ ꓟ ꓣꓱ ꓛꓰ ꓗꓪ ꓐꓰ ꓔꓳꓹ ꓜꓳ ꓡ ꓟ ꓮ ꓙꓵ ꓔꓯ ꓔꓳꓹ ꓐ ꓡꓰ ꓠꓹ ꓟ꓾ ꓔꓳꓹ ꓜꓳ ꓡ ꓟ ꓔꓯ ꓣꓳ ꓙꓵꓽ ꓟꓽ ꓐ ꓡ ꓟ ꓙꓵꓹ ꓗꓪ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓛꓳ ꓫꓱꓽ ꓔꓬ ꓟ ꓙꓵꓹ ꓗꓪ ꓠꓵꓻ ꓠꓲꓹ ꓔꓯ ꓢꓲꓺ ꓣꓴ ꓟ ꓠꓬ ꓐꓲ ꓜꓲꓼ ꓡꓰ ꓟ ꓥꓳ= ꓠꓯ ꓞꓲꓹ ꓟ ꓙꓵꓹ ꓦꓬꓼ ꓠꓬꓲ ꓗꓪ ꓪꓴ-ꓢ ꓠꓵꓻ ꓠꓲꓹ ꓔꓬ ꓟ ꓔꓯ ꓟꓸ ꓖꓶ ꓔ ꓡꓳ= ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓪ ꓟꓶ ꓠꓹ ꓟ ꓣꓳ ꓐꓱ ꓶ ꓙ ꓖꓶ ꓔꓬ ꓟ ꓔꓯ ꓣꓳ ꓥꓳ ꓡꓳꓸ ꓓꓴ ꓗꓪ ꓐꓰ ꓢꓷꓸ ꓡꓰ ꓝꓲ_ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓟ ꓥ ꓡꓳ=
