ꓟꓲ ꓠꓯ ꓗꓪ ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓔꓯ ꓠꓬꓲ ꓡꓳ. ꓗꓪ ꓫꓵ ꓠ, ꓟ ꓑꓮꓲ ꓦꓬꓼ ꓠꓬꓲ (World Day of Prayer the care for Creation)

9 ꓦ ꓟ 1 ꓠꓬꓲ 2025 ꓘꓳꓼ ꓕꓯ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓟꓲ‐ꓚꓲ‐ꓠ ꓢ‐ꓢꓲ‐ꓠ ꓘꓴꓽ ꓗꓪ ꓟꓬꓱꓽ ꓬꓰ ꓔꓬ ꓟ Commission ꓕꓲ ꓟ ꓡꓲ ꓕꓲ ꓟ ꓗꓪ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓮ ꓙꓵꓽ ꓐꓰ (World Day of Prayer the care for creation) ꓑꓮꓲꓼ ꓦꓬꓼ ꓠꓬꓲ ꓔꓯ ꓬꓰ ꓗꓷꓳ꓿

ꓕꓱ ꓑꓮꓲꓽ ꓔꓯ ꓧꓳꓽ ꓪꓴ. ꓟꓴ ꓢꓴ ꓠꓬ KMSS ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓔꓲꓺ ꓒ ꓒꓳ‐ꓡꓳ ꓔꓴ‐ꓮꓪꓠꓖ ꓗꓪ ꓐꓰ ꓧꓳꓽ ꓪꓴ. ꓟꓴ ꓗꓷ ꓟ ꓥ ꓡꓳ꓿ ꓝꓮꓲ ꓔꓲꓺ ꓒ ꓡꓰ ꓟꓲ ꓠꓯ ꓗꓪ ꓪꓴ‐ꓢ ꓡꓰ ꓚꓰꓼ ꓔ ꓟ  ꓮ ꓙꓵꓽ ꓔꓯ ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓲ, ꓠꓵ ꓠ, ꓟ ꓫ. ꓕꓱ ꓗꓷ ꓟ ꓥ ꓡꓳ꓿

ꓝꓮꓲ ꓟꓲ‐ꓢ ꓔꓲ ꓖꓶ ꓟ ꓙꓵ, ꓕꓯ ꓔꓲꓺ ꓒ  ꓦꓲꓠꓚꓰꓠꓔ ꓢꓧꓮꓠ‐ꓡꓴꓟ ꓗꓪ ꓐꓰ ꓟ. ꓟꓲꓽ ꓚꓺ ꓗꓷ ꓟ ꓥ ꓡꓳ꓿

ꓔꓲꓺ ꓒ ꓦꓲꓠꓚꓰꓠꓔ ꓡꓰ ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓬ ꓪꓴ‐ꓢ ꓡꓰ ꓚꓰꓼ ꓔ ꓟ ꓢꓯ. ꓫꓵꓽ ꓢꓯ. ꓙꓲ ꓮ ꓙꓵꓽ ꓔꓯ ꓒꓵꓽ ꓠ, ꓟ ꓐꓰ ꓣꓳ ꓒꓽ ꓕꓲ ꓗꓪ ꓙꓳ ꓟ ꓢꓲ, ꓜꓲ ꓡꓳ ꓜꓲ ꓮ ꓙꓵꓽ ꓔꓯ ꓮꓽ ꓔꓳ ꓔꓳ ꓟꓽ ꓐꓬ ꓡꓰ ꓠ, ꓟ ꓢꓯꓼ ꓕꓵꓼ ꓠ, ꓟ ꓢꓯꓼ ꓖꓶ ꓔ ꓟ ꓥ ꓡꓳ꓿

ꓝꓮꓲ ꓣꓳ ꓠꓬ ꓪꓴ‐ꓢ ꓡꓰ ꓚꓰꓼ ꓔ ꓟ ꓢꓯ. ꓫꓵꓽ ꓢꓯ. ꓙꓲ ꓔꓯ ꓜꓽ ꓡꓳ ꓓꓳꓻ ꓡꓳ ꓗꓪ ꓛꓲ ꓢꓰꓼ ꓠ, ꓟ ꓐꓰ ꓙꓼ ꓣꓱ ꓢꓲ ꓠꓬꓲ ꓟꓽ ꓢꓰꓼ ꓠ, ꓟ ꓐꓰ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓟꓬꓱꓽ ꓮ ꓙꓵꓽ ꓔꓯ ꓠꓽ ꓗꓷ ꓠ, ꓟ ꓐꓯ ꓔ ꓟ ꓥ ꓡꓳ꓿

ꓪꓴ‐ꓢ ꓡꓰ ꓣꓳ ꓟꓲ ꓠꓯ ꓡ ꓞꓳ ꓔꓯ ꓮ ꓘꓶ. ꓒꓵꓽ ꓟ ꓟꓲ ꓠꓯ ꓔꓯ ꓖꓶ ꓔ ꓟ ꓥ ꓡꓳ꓿ ꓪꓴ‐ꓢ ꓡꓰ ꓣꓳ ꓟꓲ ꓠꓯ ꓞꓳ ꓤ ꓔꓯ ꓟꓲ ꓠꓯ ꓗꓪ ꓐꓰ ꓚꓰꓼ ꓔ ꓟ ꓥ ꓡꓳ꓿

ꓬꓲꓻ ꓙꓬ꓾ ꓪꓴ‐ꓢ ꓡꓰ ꓣꓳ ꓟꓲ ꓠꓯ ꓡ ꓞꓳ ꓔꓯ ꓢꓯ. ꓔꓬ ꓠ, ꓟ ꓬꓲꓻ ꓙꓬ ꓔꓯ ꓚꓰꓼ ꓖꓶ ꓔ ꓟ ꓥ ꓡꓳ꓿ ꓝꓮꓲ ꓟꓲ ꓦꓲꓻ ꓔꓯ ꓥ ꓟꓲ ꓪꓴ‐ꓢ ꓡꓰ ꓚꓰꓼ ꓖꓶ ꓔ ꓢꓲ ꓠꓬꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓯꓼ ꓦꓻ ꓟ ꓙꓵ, ꓔꓯ ꓮ ꓘꓶ. ꓙꓲ_ ꓟ ꓟꓲ ꓦꓲꓻ ꓔꓯ ꓪꓴ‐ꓢ ꓖꓶ ꓚꓰꓼ ꓖꓶ ꓔ ꓟ ꓥ ꓡꓳ꓿

ꓪꓴ‐ꓢ ꓡꓰ ꓮ ꓘꓶ. ꓒꓵ_ ꓟ ꓔꓯ ꓣꓳ ꓟꓲ ꓠꓯ ꓡ ꓞꓳ ꓐꓱ ꓶ ꓚꓰꓼ ꓖꓶ ꓔ ꓟ ꓪꓴ. ꓠꓬꓲ ꓣꓳ ꓢꓯ. ꓔꓬ ꓟ ꓙꓵ, ꓕꓯ ꓣꓳ ꓣꓱ ꓫꓵꓽ ꓣꓱ ꓙꓰ ꓔꓯ ꓤ ꓟꓳ ꓢꓲ ꓠꓬꓲ ꓛꓲ ꓡ ꓟ ꓣꓳ ꓤ ꓣꓳ ꓠꓱ ꓤꓶꓻ ꓗꓪ ꓣꓳ ꓮ ꓡꓰ ꓐꓰ ꓡꓯꓼ ꓫꓴꓻ ꓖꓶ ꓠ, ꓟ ꓚꓱ, ꓔꓯ ꓣꓳ ꓓꓵꓽ ꓙ ꓢꓲ ꓠꓬꓲ ꓢꓯ. ꓔꓬ ꓠ, ꓟ ꓐꓯ ꓔ ꓟ ꓥ ꓡꓳ꓿

ꓝꓮꓲ ꓟꓶ‐ꓡꓲ‐ꓕꓲ ꓬꓲꓻ ꓙꓬ ꓗꓪ ꓐꓰ ꓐꓵ ꓡ ꓟ ꓢꓲ, ꓗꓪ ꓐꓰ ꓫꓬ, ꓔ ꓟ ꓡꓯꓼ ꓐꓳ ꓔꓶ. ꓓꓴ ꓥ ꓡꓳ꓿ ꓕꓱ ꓟ ꓠꓬ ꓟꓲ ꓠꓯ ꓡ ꓞꓳ ꓐꓴ ꓡꓰ ꓟꓵꓽ ꓘꓳꓼ ꓔꓯ ꓒꓳ, ꓡ ꓝꓲˍ ꓟ ꓟꓬꓱꓽ ꓮ ꓟꓬ, ꓖꓶ ꓗꓷ ꓟ ꓪꓴ. ꓠꓬꓲ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓢꓯ. ꓔꓬ ꓟ ꓟꓲ ꓠꓯ ꓔꓯ ꓠꓲ, ꓠꓵ ꓡꓯ ꓐꓰ ꓔꓲꓺ ꓒ ꓪ ꓔꓲ Francis ꓡꓰ Laudatosi ꓕꓳ ꓶ ꓗꓪ ꓐꓳ ꓔ ꓟ ꓥ ꓡꓳ ꓐꓰ ꓢꓷ. ꓪ ꓡꓳ꓿ ꓑꓮꓲꓽ ꓔꓯ ꓥ ꓟꓲ ꓗ, ꓛꓲ ꓛꓲ ꓡꓰ ꓬꓰ ꓓꓳ ꓡꓰ ꓟ ꓥ ꓡꓳ꓿