ꓧꓶꓽ ꓗꓴꓷꓼ ꓗꓪ ꓙꓰꓢꓴꓲꓔ ꓔꓲꓺ ꓒ ꓜꓴꓻ ꓐꓴ ꓪꓴ‐ꓢ ꓶꓼ ꓓꓳ ꓫꓱ, ꓓꓳꓽ ꓚꓺ ꓟ ꓚꓱ, (The Jesuit in China)
ꓧꓶꓽ ꓗꓴꓷꓼ ꓗꓪ ꓙꓰꓢꓴꓲꓔ ꓔꓲꓺ ꓒ ꓜꓴꓻ ꓗꓪ ꓐꓰ ꓪꓴ‐ꓢ ꓶꓼ ꓓꓳ ꓫꓱ, ꓓꓳꓽ ꓚꓺ ꓟ ꓚꓱ, ꓥ ꓡꓳ꓿ ꓙꓲꓻ ꓫꓬ ꓢꓴ ꓝꓣꓮꓠꓚꓲꓢ ꓫꓮꓦꓲꓰꓣ ꓪꓴ‐ꓢ ꓟꓬꓱꓽ ꓬꓰˍ ꓠ, ꓟ ꓧꓶꓽ ꓗꓴꓷꓼ ꓗꓪ ꓙꓰ ꓥ ꓟꓲ ꓬꓲ ꓠꓬ ꓧꓶꓽ ꓗꓴꓷꓼ ꓗꓪ ꓟꓽ ꓛꓲ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓲꓻ ꓫꓬ ꓢꓴ ꓝꓣꓮꓠꓚꓲꓢ ꓬꓲ ꓚꓵ. ꓧꓶꓽ ꓗꓴꓷꓼ ꓗꓪ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓔꓲꓺ ꓒ ꓣꓲꓚꓧꓮꓣꓓ ꓠꓬ ꓧꓶꓽ ꓗꓴꓷꓼ ꓙꓰ ꓗꓷ ꓟ ꓥ ꓡꓳ꓿ ꓬꓲ ꓔꓯ ꓧꓶꓽ ꓗꓴꓷꓼ ꓗꓪ ꓪꓴ‐ꓢ ꓟꓬꓱꓽ ꓟꓯ ꓠ, ꓟ ꓙꓵꓽ ꓪ ꓖꓶ ꓗꓷꓳ꓿
ꓮꓓ 1578 ꓘꓳꓼ ꓕꓯ ꓑꓳ‐ꓔꓴ‐ꓗꓰ ꓶꓻ ꓡꓯꓼ ꓬꓰ ꓜꓴꓻ ꓠꓬ ꓧꓶꓽ ꓗꓴꓷꓼ ꓙꓰ ꓠ ,ꓟ ꓙꓵꓽ ꓪ ꓡꓰꓳ꓿ ꓖꓳ ꓕꓯ ꓔꓲꓺ ꓒ ꓣꓲꓚꓧꓮꓣꓓ ꓥ ꓟꓲ ꓑꓳ‐ꓔꓴ‐ꓗꓰ ꓶꓻ ꓡꓯꓼ ꓬꓰ ꓜꓴꓻ ꓐꓰ ꓕꓲ ꓪ ꓙꓰ ꓗꓷ ꓟ ꓥ ꓡꓳ꓿ ꓧꓶꓽ ꓞꓳ ꓫꓵꓽ ꓐꓴ ꓐꓱ ꓶ ꓮ ꓘꓶ. ꓛꓲ ꓙꓲ ꓟ ꓪꓴ‐ꓢ ꓟꓬꓱꓽ ꓟꓯ ꓠ, ꓟ ꓠꓬ ꓬꓲ ꓪ ꓡꓲꓽ ꓒꓰꓼ ꓘꓴꓽ ꓗꓪ ꓓꓵ ꓡꓰ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓟꓯ ꓠ, ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓔꓲꓺ ꓒ ꓣꓲꓚꓧꓮꓣꓓ ꓧꓶꓽ ꓥꓳꓽ ꓔꓯ ꓓꓽ ꓪꓴ. ꓢꓳꓻ ꓣꓴ ꓗꓷꓳ꓿
ꓔꓲꓺ ꓒ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓧꓶꓽ ꓥꓳꓽ ꓗꓪ ꓐꓰ ꓐꓳ ꓗꓷꓳ꓿ ꓧꓶꓽ ꓞꓳ ꓫꓵꓽ ꓐꓴ ꓮ ꓘꓶ. ꓛꓲ ꓞꓳ ꓒꓴ ꓔꓬ ꓢꓴ ꓠꓬ ꓚꓳꓠꓝꓴꓚꓲꓴꓢ ꓥ ꓡꓳ꓿ ꓔꓲꓺ ꓒ ꓡꓰ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓚꓱ, ꓥ ꓟꓲ ꓚꓳꓠꓝꓴꓚꓲꓴꓢ ꓡꓰ ꓐꓰ ꓕꓲ ꓡꓰ ꓥ ꓡꓳ ꓐꓰ ꓐꓯ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓔꓯ ꓟ. ꓖꓶ ꓗꓷꓳ꓿
ꓕꓱ ꓡꓱ ꓐꓰ ꓧꓶꓽ ꓗꓴꓷꓼ ꓗꓪ ꓙꓰꓢꓴꓲꓔ ꓔꓲꓺ ꓒ ꓐꓴ ꓠꓬ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓬꓰ ꓗꓷ ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓮ ꓟꓬ, ꓟꓬꓽ ꓡ ꓟ ꓥ ꓡꓳ꓿ ꓫ. ꓟꓳ ꓪ꓿
