ꓮ ꓟꓶ ꓕꓱ ꓗꓪ ꓟꓳꓻ ꓪˍ ꓟ ꓬꓲ ꓜꓲ ꓔꓯ ꓠꓬ ꓡꓳꓽ ꓟꓲꓽ ꓥꓳꓽ ꓗꓪ ꓐꓰ ꓗꓬꓮꓴꓔ‐ꓔꓲꓠ‐ꓑꓳꓠꓰ ꓜꓲ ꓐꓰ ꓘꓴˍ ꓟ ꓥ ꓢꓲ ꓠꓬꓲ꓾ ꓧꓪꓽ ꓒꓴ ꓥꓳꓽ ꓗꓪ ꓐꓰ Peperomia Pellucida ꓐꓰ ꓘꓴˍ ꓟ ꓥ ꓡꓳ꓿
ꓠ ꓠ, ꓔꓬ ꓢꓴ ꓠꓯꓸꓼ ꓗꓪ ꓟꓬꓽ ꓠꓬꓲ ꓠꓬ ꓞꓲꓼ ꓣꓳˍ ꓕꓯ ꓗꓬꓮꓴꓔ‐ꓔꓲꓠ‐ꓑꓳꓠꓰ ꓔꓯ ꓣꓱꓽ ꓠꓬꓲˍ ꓥꓳ꓿ ꓖꓳ ꓟ ꓕꓯꓽ ꓢꓲ ꓗꓪ ꓕꓳꓽ ꓶ ꓐꓳ ꓗꓷ ꓠꓬ ꓝꓮꓲ ꓬꓲ ꓫꓵꓼ ꓐꓳ ꓠ, ꓟ ꓐꓱ ꓶ ꓐꓳ ꓓꓳ ꓡꓰ ꓟ ꓕꓳꓽ ꓶ ꓔꓯ ꓒꓬ ꓦˍ ꓟ ꓣꓱꓽˍ ꓡꓳ꓾ ꓐꓰ ꓢꓷ. ꓪˍ ꓡꓳ꓿ ꓬꓲ ꓜꓲ ꓕꓱ ꓟ ꓠꓬ ꓚꓮꓠꓚꓰꓣ ꓠꓻ ꓐꓱ ꓶ ꓮ ꓘꓶ. ꓙꓲꓻˍ ꓟ ꓠꓯ ꓞꓲꓼ ꓥ ꓡꓳ ꓐꓰ ꓐꓯ ꓔꓬ ꓢꓴ ꓮ ꓟꓬ, ꓙꓳˍ ꓡꓳ꓿
ꓬꓲ ꓜꓲ ꓕꓱ ꓟ ꓠꓬ ꓬꓲ ꓓꓻ ꓬꓲ ꓣꓱꓻ ꓔꓬ ꓟ ꓬꓲ ꓜꓲ ꓥ ꓢꓲ ꓠꓬꓲ ꓕꓲ ꓐꓱ ꓟ ꓠꓽ ꓜꓽ ꓓˍ ꓟ ꓔꓯ ꓟꓽ ꓢꓷ. ꓠꓬꓲ ꓮꓽ ꓔꓳ ꓔꓳ ꓚꓵ, ꓦ ꓗꓷˍ ꓟ ꓙꓳˍ ꓡꓳ꓿ ꓜꓽ ꓓꓻˍ ꓟ ꓔꓯ ꓢꓷ. ꓢꓴ ꓕꓲ ꓐꓱ ꓠꓽ ꓬꓲ ꓒꓬꓽ ꓬꓲ ꓜꓲ ꓔꓯ ꓚꓬ. ꓜꓽ꓾ ꓬꓲꓻ ꓞꓻ ꓗꓪ ꓕ. ꓗꓷ ꓢꓲ ꓑꓯ. ꓜꓽ꓾ ꓧꓪꓽ ꓘꓮꓪꓔ‐ꓢꓪꓰ ꓗꓪ ꓧꓳꓽ ꓜꓽ ꓬꓰˍ ꓡꓳ꓿ ꓬꓲ ꓪꓴ. ꓜꓽ ꓢꓴ ꓐꓱ ꓶ ꓜꓽ ꓟꓽ ꓬꓽ ꓓ, ꓟ ꓑꓶ. ꓓꓴ ꓮ ꓔꓲ. ꓤ ꓜꓽ ꓫ. ꓓꓴ ꓙꓳˍ ꓥꓳ꓿ ꓖꓳ ꓡꓱ ꓥˍ ꓟꓲ 3 ꓜꓽ ꓛꓲ ꓜꓽ ꓗꓷ ꓕꓯ ꓠꓽ ꓜꓽ ꓢꓻ ꓡˍ ꓡꓳ꓿
ꓙꓲꓻ ꓖꓴ ꓙꓳˍ ꓟ ꓚꓱ, ꓐꓴ ꓠꓬ
ꓚꓮꓠꓚꓰꓣ ꓖꓼ ꓓꓳ ꓖꓶ ꓐ ꓡˍ ꓡꓳ꓾
ꓬꓲ ꓒꓬꓽ ꓗꓪ ꓠꓬ ꓚꓮꓠꓚꓰꓣ ꓔꓯ ꓖꓼ ꓓꓳ ꓖꓶ ꓐ ꓡˍ ꓟ ꓮꓠꓔꓲꓳꓫꓲꓓꓮꓠꓔ ꓐꓰ ꓐꓰꓔꓮ‐ꓚꓮꓣꓳꓔꓰꓠꓰ ꓬꓲ ꓢꓯꓼ ꓓꓯ,ˍ ꓟ ꓥ ꓢꓲ꓾ ꓬꓲ ꓢꓯꓼ ꓕꓱ ꓟ ꓠꓬ ꓚꓮꓠꓚꓰꓣ ꓚꓰꓡꓡ ꓪꓴꓽ ꓡ ꓟꓬꓽ ꓡˍ ꓟ ꓔꓯ ꓗꓽ ꓕ. ꓙ ꓖꓶ ꓐ ꓡˍ ꓟ ꓬꓲ ꓢꓯꓼ ꓙꓳˍ ꓡꓳ꓾ ꓐꓰ ꓢꓷ. ꓪˍ ꓡꓳ꓿
ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓐꓴ ꓔꓯ ꓥˍ ꓟꓲ ꓖꓼ ꓓꓳ ꓖꓶˍ ꓡꓳ꓾
ꓬꓲ ꓒꓬꓽ ꓗꓪ ꓙꓳˍ ꓟ patuloside A ꓐꓰ ꓘꓴˍ ꓟ ꓬꓲ ꓢꓯꓼ ꓠꓬ ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓐꓴ ꓔꓯ ꓖꓼ ꓓꓳ ꓖꓶ ꓢꓲ ꓠꓻ ꓐꓶꓽ ꓓꓲꓻ ꓗꓪ ꓐꓰ ꓗꓽ ꓕ. ꓙ ꓖꓶˍ ꓡꓳ꓿
ꓬꓲ ꓝꓲ. ꓬꓲ ꓟꓲ ꓳʼ ꓠꓻˍ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓡꓳ꓾
ꓬꓲ ꓝꓲ. ꓬꓲ ꓟꓲ ꓳʼ ꓠꓻ ꓢꓴ ꓐꓴ ꓠꓬ ꓕꓱ ꓠꓯ ꓞꓲꓼ ꓜꓲ ꓔꓯ ꓚꓬ. ꓓꓳꓻˍ ꓕꓯ ꓳʼˍ ꓟ ꓓꓻ ꓡꓰ ꓝꓲ ꓓꓴ ꓠꓯ ꓞꓲꓼ꓾ ꓘꓳꓼ ꓠꓻˍ ꓟ ꓓꓻ ꓡꓰ ꓝꓲ ꓓꓴ ꓠꓯꓼ ꓞꓲꓼ ꓟꓬ ꓛꓲ ꓬꓲ ꓢꓯꓼ ꓪꓽ ꓠꓬꓲˍ ꓡꓳ꓿ ꓛꓲ ꓝꓲ. ꓠ ꓗ ꓠꓻ ꓢꓴ ꓐꓴ ꓐꓱ ꓶ ꓥˍ ꓟꓲ ꓙꓲꓻˍ ꓡꓳ꓾ ꓐꓰ ꓢꓷ. ꓪˍ ꓡꓳ꓿
ꓫꓵꓽ ꓘꓴꓽ ꓗꓪ ꓟ ꓴꓣꓲꓚ ꓮꓚꓲꓓ ꓔꓯ ꓠꓲ. ꓡꓰ ꓝꓲˍ ꓡꓳ꓾
ꓫꓵꓽ ꓘꓴꓽ ꓠꓯꓸꓼ ꓗꓪ ꓴꓣꓲꓚ ꓮꓚꓲꓓ ꓟꓬꓽ ꓡꓰˍ ꓕꓯ ꓬꓲ ꓝꓲ. ꓬꓲ ꓟꓲ ꓳʼˍ ꓟ ꓖꓳꓴꓔ ꓠꓻ꓾ ꓪꓳꓽ ꓓꓲꓻ ꓗꓪ ꓡꓳ ꓓꓰ ꓒꓬꓱꓼ ꓡꓰˍ ꓟ꓾ ꓪꓳꓽ ꓓꓲꓻ ꓐꓬ ꓡꓰˍ ꓟ꓾ ꓠꓲ, ꓟ ꓫꓵꓽ ꓙꓴꓽ ꓐꓰ ꓗꓴ. ꓙꓲꓽ ꓙꓳˍ ꓟ ꓠꓻ ꓒꓬꓱꓼ ꓡ ꓝꓲ ꓗꓴ.ˍ ꓡꓳ꓿
ꓬꓲ ꓒꓬꓽ ꓠꓬ ꓫꓵꓽ ꓘꓴꓽ ꓗꓪ ꓟ ꓴꓣꓲꓚ ꓮꓚꓲꓓ ꓞꓰꓻ ꓡꓰ ꓬꓯꓼ ꓡꓰ ꓠꓲ, ꓫꓵ ꓢꓴ ꓜꓻ ꓠ ꓔˍ ꓟ ꓠꓯ ꓞꓲꓼ ꓕꓲ ꓙꓰꓽ ꓥ ꓡꓳ꓿ ꓬꓲ ꓒꓬꓽ ꓗꓪ ꓐˍ ꓟ allopurinol ꓬꓲ ꓢꓯꓼ ꓠꓬ ꓫꓵꓽ ꓘꓴꓽ ꓗꓪ ꓟ ꓴꓣꓲꓚ ꓮꓚꓲꓓ ꓔꓯ ꓔꓲꓺ ꓟꓴ. ꓗꓷ ꓡꓰ ꓝꓲ ꓠ ꓬꓰ ꓙ ꓖꓶ ꓐ ꓡˍ ꓡꓳ꓿
ꓠꓲ, ꓟ ꓙꓬˍ ꓟ ꓔꓯ ꓥˍ ꓟꓲ ꓓꓻ ꓡꓰ ꓝꓲ ꓐ ꓡˍ ꓡꓳ꓾
ꓬꓲ ꓒꓬꓽ ꓠꓬ ꓠꓲ, ꓟ ꓙꓬ ꓠꓻ ꓙꓳ ꓔꓬ ꓢꓴ ꓐꓴ ꓐꓱ ꓶ ꓙꓲꓻˍ ꓡꓳ꓿ ꓠꓲ, ꓟ ꓔꓬ, ꓢꓻ ꓓꓴ ꓐꓱ ꓶ ꓙꓲꓻ ꓓꓰ ꓡꓰˍ ꓟ ꓠꓯ ꓞꓲꓼ ꓕꓲ ꓙꓰꓽ ꓥ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓔꓶ ꓟꓽ ꓛꓵ ꓗꓪꓼ ꓫꓵꓼ ꓟꓽ ꓛꓵ ꓛꓵ ꓬꓲ ꓓꓻ ꓬꓲ ꓣꓱꓻ ꓔꓬ ꓟ ꓬꓲ ꓜꓲ ꓕꓱ ꓟ ꓠꓬ ꓙꓲꓻ ꓖꓴ ꓮ ꓟꓬ, ꓙꓳˍ ꓐꓯˍ ꓥ ꓟꓲ ꓤ ꓠꓱ ꓶꓻ ꓔꓬ ꓟ ꓟ, ꓟ ꓐꓴ꓾ ꓮ ꓚꓵ, ꓛꓵꓼ ꓤ ꓙꓳˍ ꓟ ꓤ ꓠꓱ ꓟ ꓐꓴ ꓐꓰ ꓕꓱ ꓬꓲ ꓜꓲ ꓐꓰ ꓟꓽ ꓕꓽ ꓢꓴ ꓐꓴ꓾ ꓠꓻ ꓓꓽ ꓟ ꓙꓳ ꓢꓴ ꓐꓴ ꓟꓽ ꓜꓽ ꓠꓬ ꓪ ꓜꓲ ꓙꓲˍ ꓡꓳ꓾ ꓐꓰ ꓐꓯ ꓔ ꓟ ꓙꓳˍ ꓡꓳ꓿ ꓝꓮꓲ ꓬꓲ ꓜꓲ ꓕꓱ ꓟ ꓠꓬ ꓠꓯ ꓞꓲꓼ ꓥ ꓟ ꓑꓶ. ꓓꓴ ꓬꓲ ꓟꓶ ꓬꓲ ꓜꓲꓽ ꓟꓽ ꓜꓻ ꓪ ꓡꓰ ꓠ, ꓟ ꓔꓯ ꓥˍ ꓟꓲ ꓤ ꓟꓳ ꓠ ꓔˍ ꓡꓳ꓿
