
ꓪꓴ‐ꓢ ꓠꓬ ꓮ ꓫꓵꓽ ꓑꓶ. ꓓꓴ ꓑꓶꓽ ꓓꓲ ꓡꓯ ꓓꓲ ꓔꓯ ꓡ ꓞꓳ ꓐꓱ ꓶ ꓚꓰꓼ ꓔ ꓟ ꓚꓱ, (Environment program)
ꓪꓴ‐ꓢ ꓠꓬ ꓮ ꓫꓵꓽ ꓑꓶ. ꓓꓴ ꓑꓶꓽ ꓓꓲ ꓡꓯ ꓓꓲ ꓔꓯ ꓡ ꓞꓳ ꓐꓱ ꓶ ꓚꓰꓼ ꓔ ꓟ ꓔꓯ ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓗꓪ ꓐꓰ ꓣꓳ ꓠ, ꓡꓳ ꓓꓴ ꓬꓰ ꓡꓯ꓿ ꓣꓳ ꓢꓲ, ꓠꓯ ꓢꓲ, ꓜꓲ ꓗꓪ ꓙꓰ ꓟ ꓙꓵ, ꓕꓯ ꓐꓶꓽ ꓓꓲ ꓡꓯ ꓓꓲ ꓡꓳ. ꓟꓳ ꓟ ꓙꓵ, ꓔꓯ ꓣꓳ ꓠ ꓠꓬꓲˍ ꓟ ꓗꓴ ꓟ ꓠꓬ ꓮ ꓫꓵꓽ ꓑꓶ. ꓓꓴ ꓡ ꓞꓳ ꓐꓱ ꓶ ꓙꓲ ꓖꓴ ꓟꓽ ꓙꓳ ꓟ ꓐꓶꓽ ꓓꓲ ꓔꓯ ꓪꓴ‐ꓢ ꓡꓰ ꓚꓰꓼ ꓔ ꓡ ꓐꓰ ꓣꓳ ꓠ ꓠꓬꓲˍ ꓗꓴ ꓟ ꓙꓳˍ ꓟ ꓥ ꓡꓳ꓿
ꓢꓲ, ꓜꓲ ꓗꓪ ꓔꓬ ꓟ ꓐꓶ ꓓꓲ ꓝꓮꓲ ꓡ ꓞꓳ ꓔꓯ ꓫꓵꓽ ꓪꓴꓽ ꓖꓶ ꓗꓴ ꓟ ꓐꓶꓽ ꓓꓲ ꓡꓯ ꓓꓲ ꓔꓯ ꓣꓳ ꓮ ꓟꓬ, ꓡꓳ. ꓟꓳ ꓪ ꓟ ꓥ ꓡꓳ꓿ ꓧꓪꓽ ꓒꓴ ꓥꓳꓽ ꓗꓪ ꓐꓰ Entomology ꓐꓯ ꓟ ꓢꓷ. ꓠꓲ, ꓚꓱ, ꓔꓯ ꓣꓳ ꓡꓳ. ꓠꓬꓲ ꓕꓯ ꓮ ꓫꓵꓽ ꓥ ꓟꓲ ꓟꓵꓽ ꓘꓳꓼ ꓔꓯ ꓬꓰ ꓙ ꓙꓲˍ ꓟ ꓟꓵꓽ ꓘꓳꓼ ꓒꓬꓱꓼ ꓡ ꓝꓲ ꓟ ꓐꓶꓽ ꓓꓲ ꓡꓯ ꓓꓲ ꓥ ꓟꓲ ꓚꓱ,ꓔꓯ ꓡꓳ. ꓟꓳ ꓓꓽ ꓟ ꓥ ꓡꓳ꓿
ꓟꓲ ꓠꓯ ꓗꓪ ꓬꓲ ꓚꓲ. ꓛꓬ ꓪꓴꓽ ꓡ ꓟꓴ ꓡ ꓠ, ꓟ ꓬꓲ ꓚꓲ. ꓛꓬ ꓟꓬ, ꓡ ꓠ, ꓟ ꓐꓱ ꓶ ꓟꓲ ꓠꓯ ꓗꓪ ꓕꓱ ꓡꓱ ꓫꓵꓽ ꓐꓶꓽ ꓓꓲ ꓡꓯ ꓓꓲ ꓔꓯ ꓣꓱ ꓔꓬ ꓡꓳ ꓐꓰ ꓐꓯ ꓟ ꓚꓱ, ꓔꓯ ꓢꓷ. ꓓꓽ ꓟ ꓥ ꓡꓳ꓿ ꓐꓶꓽ ꓓꓲ ꓡꓯ ꓓꓲ ꓐꓴ ꓠꓬ ꓣꓳ ꓟꓲ ꓠꓯ ꓡ ꓞꓳ ꓟꓽ ꓢꓷ. ꓟ ꓚꓱ, ꓗꓪ ꓐꓰ ꓟꓲ ꓠꓯ ꓔꓯ ꓮ ꓟꓬ, ꓫꓵꓽ ꓗꓪ ꓐꓰ ꓬꓰ ꓙ ꓔꓳ, ꓙ ꓔꓬ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓪꓴ‐ꓢ ꓠꓬ ꓮ ꓫꓵꓽ ꓔꓯ ꓥ ꓟꓲ ꓮꓽ ꓔꓳꓽ ꓟꓽ ꓚꓰꓼ ꓔ ꓐꓰ ꓣꓳ ꓢꓷ. ꓪ ꓟ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓣꓳ ꓢꓲ, ꓜꓲ ꓢꓲ, ꓟꓲ ꓔꓯ ꓮꓽ ꓔꓳꓽ ꓔꓳꓽ ꓣꓱ ꓟꓽ ꓬꓯꓼ ꓬꓯꓼ ꓟꓽ ꓘꓶꓽ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿ ꓬꓲ ꓪ ꓠꓬ ꓞꓳ ꓤ ꓢꓯꓼ ꓟꓬ ꓐꓱ ꓶ ꓬꓲ ꓒꓳ, ꓒꓳ, ꓗꓪ ꓐꓰ ꓬꓰ ꓙ ꓔꓳ, ꓙ ꓔꓬ ꓡꓳ ꓐꓯ ꓟ ꓔꓯ ꓣꓳ ꓢꓷ. ꓪ ꓟ ꓥ ꓡꓳ꓿ ꓢꓲ, ꓜꓲ ꓢꓲ, ꓟꓲ ꓔꓯ ꓠꓲ, ꓠꓵ ꓡꓯ꓾ ꓐꓶꓽ ꓓꓲ ꓡꓯ ꓓꓲ ꓔꓯ ꓒꓵꓽ ꓓꓴ ꓬꓰ ꓡꓯ꓿ ꓟꓵꓽ ꓘꓳꓼ ꓟꓽ ꓒꓳ, ꓡ ꓠ, ꓟ ꓢꓯꓼ ꓕꓵꓼ ꓡꓯ ꓫ. ꓟꓳ ꓪ꓿