ꓫꓵꓻꓳ꓾ ꓐꓯ_ ꓟ ꓚꓱꓹ ꓗꓪ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓗꓪ ꓐꓰ ꓮ ꓡꓰ ꓟꓳ_ ꓡ꓾ ꓫꓵꓻ ꓐꓯ_ ꓟ ꓠꓬ ꓧꓪ ꓖꓳ ꓓꓱ ꓗꓪ ꓐꓰ ꓦ ꓓꓳ ꓙꓰ ꓟ ꓔꓯ ꓐꓯ_ ꓡꓳ= ꓡ ꓞꓳ ꓐꓯ_ ꓟ ꓠꓬ ꓦ ꓐꓰ ꓧꓪ ꓖꓳ ꓓꓱ ꓕꓱ ꓡꓱ ꓠꓬꓲꓽ ꓟ ꓔꓬ ꓟ ꓑꓶ ꓓꓴ ꓦ ꓓꓳ ꓙꓰ ꓠꓬ ꓞꓳ ꓤ ꓫꓵꓻ_ ꓟ ꓥ ꓡꓳ= ꓫꓵꓻ ꓐꓰ ꓐꓯ_ ꓟ ꓠꓬ ꓟꓲ ꓠꓯ ꓕꓱ ꓕꓲ ꓒꓳꓹ ꓗꓪ ꓧꓪ ꓖꓳ ꓓꓱ ꓡꓳꓹ ꓬꓰ ꓟ ꓔꓯ ꓐꓯ_ ꓟ ꓥ ꓡꓳ= ꓣꓳ ꓟꓲ ꓠꓯ ꓕꓱ ꓟ ꓗꓪ ꓠꓬ ꓮ ꓫꓵ ꓥ ꓟꓲ ꓬꓲ ꓙꓵꓹ ꓐꓰ ꓬꓲ ꓔꓶꓸ ꓐꓯ_ ꓟ ꓠꓯꓼ ꓘꓴꓽ ꓗꓪ ꓔꓬ ꓡꓳ=ꓬꓲ ꓙꓵꓹ ꓠꓯꓼ ꓘꓴ ꓗꓪ ꓔꓬ ꓟ ꓑꓶ ꓓꓴ ꓞꓳ ꓤ ꓥ ꓟꓲ ꓕꓲ ꓠꓬꓲ ꓑꓶꓸ ꓕꓲ ꓠꓬꓲ ꓟꓳ ꓡ ꓔꓬ ꓡꓳ= ꓞꓳ ꓤ ꓡꓰ ꓟꓽ ꓞꓲ ꓠꓱꓸ ꓐꓯꓼ ꓙꓱ ꓤ ꓙꓱ ꓟꓲ ꓢꓲꓹ ꓜꓲ ꓢꓲꓹ ꓟꓲ ꓮ ꓙꓵ ꓥ ꓟꓲ ꓬꓲ ꓙꓵꓹ ꓠꓯꓼ ꓘꓴ ꓗꓪ ꓮ ꓜ ꓮ ꓜ ꓪꓴꓽ ꓡ ꓢꓲ ꓠꓬꓲ ꓮ ꓜ ꓮ ꓜ ꓐꓰ ꓫꓵꓻ ꓡꓰ ꓔꓬ ꓡꓳ=ꓕꓱ ꓟ ꓠꓬ ꓪꓴ-ꓢ ꓡꓰ ꓫꓬꓹ ꓔꓶ ꓔ ꓟ ꓬꓲ ꓚꓱꓹ ꓕꓲ ꓚꓱꓹ ꓥ ꓡꓳ= ꓖꓳ ꓡꓱ ꓠꓬꓲ ꓬꓲ ꓙꓵꓹ ꓗꓪ ꓐꓰ ꓞꓳ ꓤ ꓮ ꓙꓵ ꓠꓬ ꓫꓵꓻ ꓪ ꓟ ꓥ ꓡꓳ= ꓝꓮꓲ ꓫꓵꓻ ꓓꓵ ꓐꓯ_ ꓟ ꓠꓬ ꓝꓴꓲ ꓠꓯꓼ ꓘꓴ ꓗꓪ ꓐꓰ ꓓꓳ ꓡ ꓡꓳ= ꓖꓳ ꓡꓱ ꓠꓬꓲ ꓣꓳ ꓘꓴ ꓜꓲꓼ ꓞꓳ ꓡꓰ ꓫꓵꓻ ꓐꓯ ꓟ ꓠꓬ ꓮꓽ ꓠꓱ ꓕꓯ ꓟꓽ ꓙꓳ꓾ ꓮ-ꓓꓯ ꓐꓰ ꓰ-ꓪ ꓔꓯ ꓚꓰꓼ ꓕꓯ ꓪꓴ-ꓢ ꓠꓬ ꓕꓲ ꓞꓲꓼ ꓕꓲ ꓑ ꓬꓲ ꓐꓰ ꓔꓬ ꓠꓹ ꓟ ꓚꓰꓼ ꓔ ꓟ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓝꓴꓲ ꓬꓰ ꓗꓷ ꓗ ꓠꓯ ꓝꓴꓲ ꓪꓽ ꓒꓵ ꓠꓬ ꓫꓵꓻ_ ꓟ ꓟꓶ ꓡꓰꓳ=
ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓫꓵꓻ ꓐꓯ ꓟ ꓬꓲ ꓬꓲ ꓢꓷ ꓔꓯ ꓫꓬꓹ ꓡꓶꓸ ꓗꓷꓳ=ꓮ ꓫꓵ ꓑꓶ ꓓꓴ ꓥ ꓡ꓾ ꓮꓽ ꓠꓶ ꓕꓯ ꓠꓬ ꓫꓵꓻ_ ꓐꓯ ꓟ ꓮ ꓘꓶꓸ ꓙꓳ ꓓꓴ ꓕꓲ ꓟ ꓥ ꓡꓳ꓾ ꓫꓵꓻ ꓗ ꓠꓯꓸ ꓮ ꓫꓵ ꓗꓷ ꓡꓶ_ ꓡ꓾ ꓮ ꓡꓰ ꓐꓰ ꓗꓷ ꓡꓰ_ ꓟ ꓣꓳ ꓟꓽ ꓢꓷꓸ ꓟ ꓑꓶ ꓓꓴ ꓫꓵꓻ ꓓꓵ ꓔꓯ ꓮ ꓘꓶꓸ ꓙꓳ_ ꓡꓳ= ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓚꓲ ꓛꓬ ꓐꓰ ꓫꓵꓻ ꓓꓵ ꓕꓱ ꓟ ꓔꓯ ꓘꓳꓹ ꓣꓴ ꓢꓲ ꓠꓬꓲ ꓫꓵꓻ ꓗꓷ ꓢꓲ ꓟꓲ ꓠꓯ ꓗꓪ ꓢꓽ ꓠꓬꓲ ꓔꓵꓸ ꓗꓷ ꓢꓲ ꓠꓬꓲ ꓠꓬꓲ ꓠꓬꓲ ꓝꓮꓲ ꓢꓯꓸ ꓬꓲꓼ ꓡꓻꓳ꓾ ꓖꓳ ꓡꓱ ꓠꓬꓲ ꓞꓳ ꓤ ꓮ ꓙꓵ ꓔꓯ ꓥ ꓟꓲ ꓬꓲ ꓔꓯ ꓙꓵꓻ ꓢꓴ ꓠꓬ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓥꓳ ꓐꓰ ꓬꓲ ꓐꓯ ꓘꓶꓽ ꓐꓯ ꓔ ꓡꓳ= ꓕꓱ ꓟ ꓠꓬ ꓣꓳ ꓙꓵꓻ ꓠꓲꓹ ꓐꓱ ꓶ ꓢꓯꓼ ꓪ ꓙꓳ ꓓꓴ ꓥ ꓡꓳ= ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓠꓬ ꓖꓳ ꓓꓱ ꓔꓲꓹ ꓕꓯ ꓡꓰ ꓢꓲ ꓒ ꓬꓰ-ꓢꓴ ꓐꓰ ꓕꓲ ꓪ ꓫꓵꓻꓳ꓾ ꓖꓳ ꓷꓱ ꓔꓲꓹ ꓟꓶ ꓗ ꓟ ꓑꓶ ꓓꓴ ꓣꓳ ꓠꓬ ꓝꓴꓲ ꓠꓯꓼ ꓘꓴ ꓗꓪ ꓫꓵꓻꓳ꓾ ꓖꓳ ꓡꓱ ꓠꓬꓲ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓞꓳ ꓙꓳ ꓟ ꓗꓪ ꓣꓳ ꓠꓬ ꓫꓵꓻ ꓢꓴ ꓥ ꓡꓳ= ꓕꓲ ꓚꓱꓹ ꓐꓯ ꓠꓬ ꓝꓴꓲ ꓠꓯꓼ ꓘꓴ ꓗꓪ ꓫꓵꓻ ꓢꓴ ꓥ ꓡꓳ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓢꓲ ꓠꓬꓲ ꓮ ꓕꓯ ꓟꓲ ꓫꓵꓻ ꓓꓵ ꓐꓯ_ ꓟ ꓠꓬ ꓣꓳ ꓠꓬ ꓕꓲ ꓠꓬꓲ ꓙꓳ ꓠꓬ ꓫꓵꓻ ꓪ ꓥꓳ= ꓖꓳ ꓡꓱ ꓥ ꓟꓲ ꓫꓵꓻꓳ꓾ ꓐꓯ ꓟ ꓠꓬꓧꓪ ꓖꓳ ꓓꓱ ꓡꓳꓹ ꓬꓰ ꓕꓲ ꓒꓳꓹ ꓡꓰ ꓥ ꓡꓳ꓾ ꓕꓲ ꓠꓬꓲ ꓙꓳ ꓠꓬ ꓝꓮꓲ ꓢꓯꓸ ꓬꓲꓼ ꓡ ꓥꓳ= ꓢꓲ ꓒ ꓬꓰ-ꓢꓴ ꓔꓬ ꓢꓰ ꓡꓳ ꓐꓯ_ ꓟ ꓔꓯ ꓙꓵꓻ ꓢꓲ ꓠꓬꓲ ꓢꓲ ꓒꓽ ꓠꓯꓼ ꓗꓪ ꓞꓳ ꓙꓳ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ=
