ꓒꓴ ꓤ ꓫꓵ ꓤ ꓦ ꓡꓱ ꓟꓽ ꓓ ꓟ (Sunday reflection )
ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (18) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ,ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 12ꓽ13‐21 ꓗꓪ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓡ ꓞꓳ ꓕꓲ ꓣꓳ ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓟ. ꓒꓽ ꓥꓪ ꓔꓯ ꓡꓯꓼ ꓪ ꓐꓱꓻ ꓖꓶ ꓡ ꓠ, ꓟ ꓥꓪ ꓮ ꓬꓲꓼ ꓔꓯ ꓐꓯ ꓙ ꓐꓰ ꓐꓯ ꓖꓶ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓔꓯ ꓞꓳ ꓤꓽꓳ ꓮꓽ ꓟ ꓡꓰ ꓥꓪ ꓔꓯ ꓠꓴ ꓪ ꓐꓯ ꓟꓵ ꓞꓷ, ꓢꓴ ꓢꓲꓽ ꓒ ꓐꓰ ꓡꓯꓼ ꓪ ꓐꓱ ꓖꓶ ꓢꓴ ꓣꓱꓽ ꓝꓲ ꓡ? ꓠꓲ, ꓦꓰ.ˍ ꓟ ꓮ ꓙꓵꓽ ꓔꓯ ꓧꓪ. ꓛꓲ ꓐꓰ ꓤ ꓟꓳ꓿ ꓮ ꓡꓲꓳ ꓐꓯ ꓠꓬ ꓞꓳ ꓤ ꓠꓽ ꓬꓲ ꓖꓴꓽ ꓙꓴꓽ ꓮꓽ ꓟꓬ, ꓙꓳˍ ꓟ ꓗꓪ ꓐꓰ ꓢꓯ. ꓔꓬ ꓟꓶ ꓟ ꓟꓽ ꓥ ꓐꓰ ꓐꓯ ꓖꓶ ꓡꓳ꓿
ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓞꓳ ꓐꓳ ꓕꓲ ꓣꓳ ꓠꓬ ꓬꓲ ꓦ ꓟꓲꓽ ꓗꓪ ꓜ ꓪꓳꓽ ꓡꓳ ꓪꓳꓽ ꓮ ꓟꓬ, ꓫ ꓟꓶ ꓡꓳ꓿ ꓝꓮꓲ ꓬꓲ ꓠꓬ ꓜ ꓐꓳ ꓓꓳ ꓐꓳ ꓢꓲ ꓔꓬ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ‐ꓢ ꓠꓽ ꓬꓲ ꓔꓯ ꓞꓳꓽ ꓙꓲꓽꓳ ꓠꓬꓲ. ꓟꓶꓽ ꓘꓶꓼ ꓠꓴ ꓶ ꓟꓬ ꓔꓯ ꓥꓪ ꓧꓪ ꓡ ꓥꓳ꓿ ꓠꓴ ꓡꓰ ꓙꓽ ꓖꓶ ꓔ ꓟ ꓮꓽ ꓟ ꓔꓯ. ꓟ ꓗꓷ ꓡꓰ ꓥꓳ ꓪ? ꓚꓲ. ꓛꓬ ꓐꓱ ꓶ ꓡꓰꓽ ꓒꓵꓽ ꓶꓽ ꓫ ꓗꓶ ꓔ ꓢꓴ ꓪꓴ‐ꓢ ꓔꓯ ꓟꓳ. ꓟꓽ ꓐꓳ ꓟ ꓡ ꓞꓳ ꓠꓬ ꓬꓲ ꓕꓱ ꓡꓱ ꓗ, ꓡꓳ ꓐꓯ ꓖꓶ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓟ. ꓖꓶ ꓡ ꓟ ꓠꓬ ꓟꓲ ꓠꓯ ꓒꓴ ꓫꓵ ꓔꓯ ꓟꓽ ꓙꓲ ꓟ ꓚꓱ, ꓗꓪ ꓐꓰ ꓧꓪ ꓠꓬ ꓢꓲꓺ ꓒ ꓟꓽ ꓠꓲ, ꓒꓴ ꓟ ꓥ ꓡꓳ꓿ ꓢꓲꓺ ꓒ ꓠꓲ, ꓒꓴ ꓚꓱ, ꓗꓪ ꓐꓰ ꓧꓪ, ꓠ, ꓟ ꓣꓳꓺ ꓚꓵˍ ꓟ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿
ꓪꓴ‐ꓢ ꓔꓯ ꓟꓲ ꓠꓯ ꓗꓪ ꓙꓳ ꓟ ꓮ ꓙꓵꓽ ꓕꓯ ꓢꓲ ꓠꓲ, ꓠꓵ ꓠ, ꓟ ꓮ ꓘꓶ. ꓣꓳ ꓚꓵˍ ꓟ ꓚꓱ, ꓔꓯ ꓥ ꓟꓲ ꓟ. ꓖꓶ ꓡ ꓟ ꓥ ꓡꓳ꓿ ꓣꓳ ꓠꓲ, ꓟ ꓠꓬ ꓕꓲ ꓟ ꓡꓰ ꓙꓳ ꓟ ꓪꓴ. ꓠꓬꓲ ꓪꓴ‐ꓢ ꓔꓯ ꓮ ꓙꓵꓽ ꓠꓲ, ꓠꓵ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓞꓳ ꓡꓯ. ꓕꓲ ꓣꓳ ꓠꓬ ꓟꓲ ꓠꓯ ꓗꓪ ꓐꓬ ꓡꓰ ꓗꓴ. ꓟ ꓒꓴ ꓫꓵ ꓔꓯ ꓡꓰ ꓧꓪ ꓔꓬ ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓳ. ꓟꓳ ꓟ ꓪꓴ. ꓠꓬꓲ ꓣꓳ ꓫꓵꓻ ꓕꓯ ꓣꓴ ꓔꓯꓺ ꓙꓰ ꓟꓽ ꓐ ꓡ ꓟ ꓔꓯ ꓡꓰ ꓟꓽ ꓧꓪ ꓠ, ꓟ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ ꓝꓮꓲ ꓪꓴ‐ꓢ ꓔꓯ ꓙꓵꓻ ꓢꓲ ꓠꓬꓲ ꓙꓲ ꓟ ꓡ ꓞꓳ ꓕꓲ ꓣꓳ ꓙꓲ ꓟ ꓕꓲ ꓒꓳ, ꓗꓪ ꓐꓰ ꓞꓳ ꓙꓳ ꓢꓯ. ꓔꓬ ꓠ, ꓟ ꓣꓳꓺ ꓚꓵˍ ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓒꓴ ꓫꓵ ꓧꓪ ꓟ ꓙꓵ, ꓕꓯ ꓥ ꓟꓲ ꓙꓲ ꓟ ꓟꓬꓱꓽ ꓗꓪ ꓐꓰ ꓙꓲ ꓟ ꓕꓲ ꓒꓳ, ꓗꓪ ꓐꓰ ꓧꓪ, ꓠ, ꓟ ꓣꓳꓺ ꓚꓵˍ ꓟ ꓚꓱ, ꓗꓪ ꓠꓴ ꓥꓪ ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓠꓬ ꓒꓴ ꓫꓵ ꓧꓪ ꓟ ꓝꓮꓲ ꓟꓲ ꓠꓯ ꓖꓴ ꓙꓴꓽ ꓧꓪ ꓟ ꓙꓵ, ꓕꓯ ꓮ ꓡꓰ ꓕꓲ ꓒꓳ, ꓗꓪ ꓐꓰ ꓧꓪ ꓔꓬ ꓡ ꓓꓵ ꓙ ꓠꓬꓲ ꓡꓯ꓿
ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓢꓲꓺ ꓒ ꓠꓯ, ꓗꓪ ꓡ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
