ꓣꓳ ꓤꓶꓻ ꓠꓯꓼ ꓗꓪ ꓓꓵꓽ ꓡ ꓠꓹ ꓟ ꓗꓹ ꓘꓶꓽ ꓲꓼ ꓢꓲ ꓡꓳꓸ ꓔꓬ ꓟ ꓢꓲ ꓒꓽ ꓔꓯ ꓘꓳꓹ ꓣꓴ ꓓꓴ ꓬꓰ ꓡꓯ꓾
ꓕꓲ ꓠꓽ ꓡꓲ ꓕꓲ ꓠꓽ ꓠꓽ ꓦꓬꓼ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵꓹ ꓕꓯ ꓜꓲꓼ ꓡ ꓢꓴ ꓙꓲ ꓢꓴ ꓢꓲ ꓤ ꓐꓴ ꓔꓯ ꓔꓲꓺ ꓒ ꓪ ꓔꓲ ꓡꓰ ꓠ ꓠꓹ ꓗꓴꓸ ꓟ ꓐꓰ ꓠꓲꓹ ꓡꓱ ꓡꓱ ꓐꓰ ꓘꓳꓹ ꓣꓴ ꓗꓴꓸ_ ꓟ ꓣꓳꓸ ꓚꓵ_ ꓟ ꓚꓱꓹ ꓗꓪ ꓐꓰ ꓢꓯꓼ ꓖꓶ ꓗꓷ ꓟ ꓥꓳ=
ꓔꓲꓺ ꓒ ꓪ ꓔꓲ ꓡꓰ ꓖꓳ ꓕꓲ ꓠꓬꓲ ꓢꓲ ꓫꓬ ꓕꓳ ꓶ ꓘꓶꓼ ꓫꓵꓼ ꓡꓵ ꓗꓪ ꓮ-ꓐ-ꓡ-ꓦ ꓐꓰ ꓬꓲ ꓦꓲ ꓢꓲ ꓟ ꓢ-ꓣ ꓚꓱꓹ ꓐꓰ ꓘꓶꓽ ꓫꓵꓼ ꓫꓵꓼ ꓗꓪ ꓢꓲ ꓒ ꓬꓰ-ꓢꓴ ꓬꓲ ꓠꓶꓽ ꓛꓳ ꓕꓲ ꓛꓳ ꓥ ꓟ ꓟ-ꓕ ꓐꓰ ꓟ-ꓡꓲ ꓬꓲ ꓪ ꓡꓰ ꓠꓲꓹ ꓡꓱ ꓘꓳꓹ ꓣꓴ ꓟ ꓚꓱꓹ ꓔꓯ ꓟꓳꓸ ꓐꓯ ꓖꓶ ꓗꓷ ꓟ ꓥꓳ=
ꓫꓱꓸ ꓤ ꓟ ꓠꓬꓲ ꓙ ꓡꓳꓸ ꓙ ꓟ꓾ ꓠꓬ ꓠꓲꓹ ꓡꓱ ꓘꓳꓹ ꓣꓴ ꓟ ꓬꓲ ꓚꓱꓹ ꓥ ꓥ ꓟꓲ ꓙꓽ ꓣꓳ_ ꓟ ꓠꓬ ꓮ ꓘꓶꓸ ꓣꓳꓸ ꓚꓵ_ ꓟ ꓥ ꓟ ꓡꓰ ꓐꓰ ꓠꓲꓹ ꓟ ꓙꓲ ꓢꓲ ꓠꓲꓹ ꓡꓱ ꓢꓴ ꓟ-ꓕ ꓠꓬ ꓟꓬꓱꓽ ꓬꓰ ꓙ ꓟ ꓗꓪ ꓡꓰ ꓔꓬ ꓡꓰ ꓢꓲ ꓠꓬꓲ ꓮ ꓘꓶꓸ ꓒꓵꓽ ꓓꓰ ꓡꓰ_ ꓟ ꓪꓴ-ꓢ ꓐꓰ ꓫꓱꓹ ꓡꓯ ꓘꓳ ꓟ꓾ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠꓹ ꓠꓹ ꓟ ꓚꓱꓹ ꓔꓯ ꓬꓲ ꓟꓽ ꓪ꓾ꓞꓳꓸ ꓡꓰ ꓟ ꓥꓳ=
ꓚꓲ ꓛꓬ ꓓꓰ ꓢ ꓟꓬ ꓠꓬꓲ ꓣꓳꓸ ꓚꓵ_ ꓟ ꓔꓯ ꓚꓲ ꓛꓬ ꓤꓶꓻ ꓗꓪ ꓓꓵ ꓡ ꓠꓹ ꓟ ꓐꓱ ꓶ ꓠꓲꓹ ꓟ ꓗ ꓘꓶꓽ ꓒꓴ ꓢꓲ ꓠꓬꓲ ꓘꓳꓹ ꓣꓴ ꓠ ꓔ ꓡꓳ꓾ ꓚꓲ ꓛꓬ ꓓꓰ ꓢ ꓪꓴꓽ ꓓꓰ ꓡꓰ_ ꓟ ꓔꓯ ꓘꓳꓹ ꓣꓴ ꓠꓹ ꓟ ꓙ ꓜꓲꓼ ꓕꓯ ꓢꓲ ꓣꓳ ꓤꓶꓻ ꓠꓬ ꓐꓲ ꓜꓲꓼ ꓡꓰ ꓟ ꓥꓳ= ꓕꓱ ꓟ ꓗꓪ ꓐꓰ ꓡꓰ ꓗꓹ ꓛꓲ_ ꓟ ꓐꓰ ꓐꓲ ꓜꓲꓼ ꓟ ꓔꓯ ꓧꓳꓽ ꓣꓱ ꓡ ꓟ ꓥ ꓡꓳ= ꓟ-ꓕ ꓬꓲ ꓠꓬꓲ ꓟ ꓟ-ꓡꓲ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓘꓳꓹ ꓣꓴ ꓟ ꓡꓰ ꓟꓽ ꓞꓲ ꓬꓲ ꓐꓯ ꓘꓶꓽ ꓔꓯ ꓠ ꓠꓹ ꓟ ꓥ ꓟꓲ ꓮ ꓘꓶꓸ ꓣꓳꓸ ꓚꓵ_ ꓟ ꓔꓯ ꓬꓲ ꓢꓷꓸ ꓔ ꓟ ꓑꓶ ꓓꓴ ꓥ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓖꓶ ꓔ ꓡꓳ=
ꓙꓲ_ ꓟ ꓔꓯ ꓛꓳ ꓫꓱ ꓣꓴ ꓗꓴꓸ ꓠꓹ ꓟ ꓐꓱ ꓶ ꓟꓽ ꓥꓳꓽ ꓡꓰ ꓠꓹ ꓟ ꓣꓳ ꓤꓶꓻ ꓗꓪ ꓠ ꓠꓹ ꓗꓴꓸ ꓠꓹ ꓟ ꓐꓰ ꓢꓲ ꓡꓲꓹ ꓟ ꓔꓯ ꓟꓹ ꓟ ꓟ-ꓡꓲ ꓠꓯꓼ ꓗꓪ ꓐꓰ ꓢꓳꓺ ꓣꓴ ꓓꓴ ꓬꓰ ꓡꓯ= ꓠꓲꓹ ꓡꓱ ꓡꓱ ꓘꓳꓹ ꓣꓴ ꓗꓴꓸ ꓠꓹ ꓟ ꓮ ꓕꓯ ꓟꓲ ꓙ ꓜꓲꓼ ꓓꓴ ꓬꓰ ꓡꓯ= ꓠꓱꓸ ꓐꓯꓼ ꓢꓴ ꓔꓯ ꓘꓳꓹ ꓣꓴ ꓟ ꓠꓬ ꓚꓲ ꓛꓬ ꓔꓯ ꓥ ꓟꓲ ꓘꓳꓹ ꓣꓴ ꓖꓶ ꓠꓹ ꓟ ꓠꓲꓹ ꓡꓱ ꓗꓷ ꓟ ꓥꓳ= ꓪꓴ-ꓢ ꓐꓰ ꓜꓲ ꓡꓯ ꓘꓳ ꓥ ꓟꓲ ꓣꓳ ꓠꓶꓽ ꓛꓳ ꓕꓲ ꓛꓳ ꓐꓰ ꓜꓲ ꓡꓯ ꓘꓳ ꓥ ꓟꓲ ꓕꓱ ꓜꓲ ꓡꓯ ꓘꓳ ꓟ ꓠꓬ ꓪꓴ-ꓢ ꓡꓰ ꓖꓶ ꓔ ꓟ ꓪꓴꓽ ꓓꓰ ꓡꓰ_ ꓟ ꓣꓱ ꓛꓰ ꓥ ꓟ ꓔꓯ ꓢꓷꓸ ꓠ ꓔ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓗꓷ ꓟ ꓥꓳ=
