ꓫꓵꓻ_ ꓟ ꓚꓱꓹ ꓔꓯ ꓠꓬ ꓔꓳꓹ ꓟꓽ ꓐ ꓡ꓾ ꓢꓯꓸ ꓔꓬ ꓕꓯ ꓣꓱꓽ ꓙ ꓟ ꓗꓪ ꓐꓰ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓾
ꓕꓲ ꓠꓽ ꓡꓲ ꓕꓲ ꓠ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓜꓲ ꓡꓯ ꓘꓳ_ ꓟ ꓮꓠꓖꓰꓡꓴꓢ ꓪꓽ ꓘꓴ ꓙꓵꓹ ꓕꓯ ꓕꓱ ꓕꓲ ꓫꓵꓽ ꓠꓽ ꓠꓬ ꓮ ꓟꓶ ꓔꓲꓺ ꓒ ꓪ ꓔꓲ ꓠꓽ ꓔꓬ ꓟ Castel Gandalfo ꓗꓪ ꓬꓰ ꓖꓶ ꓗꓷ ꓟ ꓥꓳ=
ꓜꓲꓼ ꓡ ꓢꓴ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓔꓯ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓲ ꓫꓬ ꓕꓳ ꓶ ꓪꓴ-ꓢ ꓶꓼ ꓓꓳ ꓫꓱꓹ ꓓꓳ “ꓟꓸ ꓒꓽꓳ꓾ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ ꓥꓪ ꓮ ꓡꓲ ꓬꓰ ꓠꓯꓹ ꓡ? ꓐꓯ_ ꓟ ꓢꓲ ꓫꓬ ꓕꓳ ꓶ ꓝꓲꓸ ꓗꓪ ꓐꓰ ꓢꓯꓼ ꓖꓶ ꓗꓷ ꓟ ꓥꓳ=
ꓔꓲꓺ ꓒ ꓪ ꓔꓲ ꓡꓰ ꓕꓱ ꓠ ꓠꓬꓲ ꓘꓶꓽ ꓗꓪ ꓖꓳ ꓕꓲ ꓣꓳ ꓠꓬ ꓬꓲ ꓠꓲꓹ ꓟ ꓘꓴꓽ ꓗꓪ ꓫꓵꓻ ꓟ꓾ ꓟꓽ ꓙꓲ_ ꓟ ꓐꓰ ꓞꓳꓸ ꓡꓰ ꓟ ꓗꓪ ꓐꓰ ꓡꓲꓹ ꓙꓰ ꓢꓲ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓟ ꓔꓯ ꓪ ꓟꓶ ꓠꓲꓹ ꓫꓵ ꓟ ꓥ ꓡꓳ=
ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓔꓯ ꓠꓬ ꓜꓲ ꓜꓲ ꓟꓴ ꓟꓴ ꓬꓰ ꓟ꓾ ꓖꓪ ꓙꓱ ꓡꓯ ꓘꓳ ꓟ ꓚꓱꓹ ꓗꓪ ꓐꓰ ꓮ ꓕꓯ ꓟꓲ ꓟꓽ ꓪ꓾ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓐꓯ_ ꓟ ꓠꓬ ꓐꓹ ꓐ ꓟꓹ ꓟ ꓡꓰ ꓤ ꓠꓱ ꓤ ꓔꓯ ꓡꓯꓼ ꓪ ꓐꓱ ꓖꓶ_ ꓟ ꓡꓰ ꓐꓰ ꓪꓴ-ꓢ ꓕꓲ ꓪ ꓡꓰ ꓖꓶ ꓐ ꓡ ꓟ꓾ ꓪꓴ-ꓢ ꓡꓰ ꓣꓳ ꓔꓯ ꓖꓶ ꓔ ꓟ ꓡꓯꓼ ꓪ ꓥ ꓡꓳ=
ꓬꓲ ꓡꓰ ꓖꓶ_ ꓟ ꓡꓯꓼ ꓪ ꓕꓱ ꓟ ꓔꓯ ꓪ ꓟꓶ ꓠꓹ ꓟ ꓬꓲ ꓠꓲꓹ ꓡꓶꓽ ꓔꓯ ꓛꓳ ꓫꓱ ꓠꓹ ꓟ ꓥ ꓡꓳ꓾ ꓬꓲ ꓠꓲꓹ ꓡꓶꓽ ꓠꓬ ꓠꓲꓹ ꓟ ꓡꓱꓼ ꓪꓴ-ꓢ ꓔꓯ ꓠꓲꓹ ꓠꓵꓻ ꓠꓹ ꓟ꓾ ꓚꓲ ꓛꓬ ꓠꓲꓹ ꓠꓵꓻ ꓟ ꓡꓰ ꓐꓰ ꓣꓳ ꓠꓶꓽ ꓛꓳ ꓕꓲ ꓛꓳ ꓔꓯ ꓥ ꓟꓲ ꓠꓲꓹ ꓠꓵꓻ ꓠꓹ ꓟ ꓥ ꓡꓳ= ꓕꓱ ꓟ ꓔꓯ ꓬꓰ ꓟ ꓗꓪ ꓐꓰ ꓪꓴ-ꓢ ꓡꓰ ꓣꓳ ꓔꓯ ꓠꓲꓹ ꓠꓵꓻ ꓟ ꓔꓯ ꓣꓳ ꓝꓮꓲ ꓖꓶ ꓡ_ ꓟ ꓥ ꓡꓳ=
ꓪꓴ-ꓢ ꓠꓬ ꓕꓲ ꓞꓲꓼ ꓕꓲ ꓑ ꓟ ꓪꓴ-ꓢ ꓥ ꓟ ꓡꓰ ꓐꓰ ꓬꓲ ꓠꓲꓹ ꓡꓶꓽ ꓥ ꓟꓲ ꓢꓯꓸ ꓔꓬ ꓝꓲ_ ꓟ ꓠꓲꓹ ꓡꓶꓽ ꓥ ꓡꓳ꓾ ꓣꓳ ꓟꓲ ꓠꓯ ꓡ ꓞꓳ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓟꓶ ꓠꓹ ꓟ ꓬꓲ ꓤ ꓔꓲ ꓔꓯ ꓝꓲ ꓩꓴ ꓡ ꓢꓲ ꓠꓬꓲ ꓚꓬꓴ ꓙ ꓡ ꓟ ꓗꓪ ꓐꓰ ꓬꓲ ꓕꓲ ꓞꓲꓼ ꓕꓲ ꓑ ꓠꓵꓻ ꓠꓲꓹ ꓔꓯ ꓟꓸ ꓖꓶ_ ꓟ ꓥ ꓡꓳ=
ꓙꓲ ꓢꓴ ꓬꓲ ꓤꓶꓻ ꓠꓬ ꓠꓵꓻ ꓠꓲꓹ ꓬꓲ ꓠꓯꓹ ꓟ ꓔꓯ ꓟꓸ ꓖꓶ_ ꓟ ꓥ ꓡꓳ= ꓠꓵꓻ ꓠꓲꓹ ꓠꓬ ꓠꓲꓹ ꓡꓱ ꓡꓱ ꓐꓰ ꓖꓶ_ ꓡꓳ꓾ ꓮ ꓕꓯ ꓟꓲ ꓖꓽ ꓖꓶ_ ꓡꓳ꓾ ꓬꓲ ꓒꓵꓽ ꓥ ꓟꓲ ꓪꓴꓽ ꓓꓰ ꓡꓰ_ ꓟ ꓡꓰ ꓐꓰ ꓣꓳ ꓗꓪ ꓐꓰ ꓥ ꓟꓲ ꓮ ꓕꓯ ꓟꓲ ꓟꓽ ꓧꓹ ꓙꓰ ꓟ ꓥ ꓡꓳ=
ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓟꓲ ꓠꓯ ꓡ ꓞꓳ ꓐꓴ ꓪꓴ-ꓢ ꓐꓰ ꓠꓶꓽ ꓞꓹ ꓠꓹ ꓟ ꓧꓳꓽ ꓪꓴꓸ ꓟ ꓡꓰ ꓐꓰ ꓣꓳ ꓮ ꓙꓵ ꓠꓬ ꓣꓳ ꓒ ꓕꓲ ꓗꓪ ꓔꓬ ꓟ ꓠꓶꓽ ꓛꓳ ꓕꓲ ꓛꓳ ꓐꓴ ꓔꓯ ꓠꓲꓹ ꓡꓱ ꓡꓱ ꓐꓰ ꓠꓵꓻ ꓠꓲꓹ ꓖꓶ ꓠ ꓔ ꓡꓳ= ꓕꓲ ꓟꓲ ꓠꓯ ꓡꓱꓼ ꓐꓱ ꓶ ꓚꓬꓴ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓡꓰ ꓐꓰ ꓠꓲꓹ ꓟ ꓐꓬ ꓡꓰ ꓢꓴ꓾ ꓠꓲꓹ ꓟ ꓙ ꓣꓳ ꓢꓴ ꓐꓴ ꓬꓲ ꓪ ꓔꓯ ꓠꓲꓹ ꓟ ꓗꓳꓸ ꓖꓶ ꓢꓲ ꓠꓬꓲ ꓥꓳ ꓡꓳꓸ ꓓꓴ ꓔꓯ ꓖꓶ ꓠꓹ ꓟ ꓐꓱ ꓶ ꓣꓳ ꓮ ꓙꓵ ꓠꓬ ꓘꓴ ꓟꓶ ꓢꓴ ꓡꓰ ꓥ ꓡꓳ=
“ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ ꓫꓵꓻ ꓟ ꓚꓱꓹ ꓔꓯ ꓕꓽ ꓔꓳꓹ ꓟꓽ ꓐ ꓡ꓾ ꓠꓱꓸ ꓐꓯꓼ ꓢꓴ ꓔꓯ ꓠꓵꓻ ꓠꓲꓹ꓾ ꓒꓵꓽ ꓛꓳ_ ꓟ ꓝꓲ ꓓꓴ ꓟꓬꓱꓽ ꓣꓱꓽ ꓙ_ꓟ ꓗꓪ ꓐꓰ ꓡꓰ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓔꓯ ꓪ ꓟꓶ ꓡ ꓥꓳ꓾ ꓐꓰ ꓢꓯꓼ ꓖꓶ ꓗꓷ ꓟ ꓥꓳ=
