ꓔꓲꓺ ꓒ ꓪ ꓔꓲ ꓡꓰꓳ (14) ꓐꓰ ꓴꓗꓣꓮꓲꓠꓲꓮꓠ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓜꓲꓼ ꓡꓯꓽ ꓘꓳ ꓟ
ꓔꓲꓺ ꓒ ꓪ ꓔꓲ ꓡꓰꓳ (14 ) ꓐꓰ ꓴꓗꓣꓮꓲꓠꓲꓮꓠ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓦꓳ‐ꓡꓴ‐ꓓꓲ‐ꓟ ꓢ‐ꓘꓰ ꓐꓴ ꓦꓮꓔꓲꓚꓮꓠ ꓡꓳ ꓒꓱ ꓗꓪ 7 ꓦ ꓟ 9 ꓠꓬꓲ 2025 ꓘꓳꓼ ꓠꓽ ꓢꓽ ꓠꓬꓲ ꓕꓯ ꓜꓲꓼ ꓡꓯꓽ ꓘꓳ ꓗꓷꓳ ꓐꓰ ꓐꓯ ꓔ ꓡꓳ꓿
ꓕꓱ ꓜꓲꓼ ꓡꓯꓽ ꓘꓳ ꓗꓷ ꓟ ꓗꓪ ꓣ‐ꓫ ꓗꓴꓷꓼ ꓐꓰ ꓴꓗꓣꓮꓲꓠꓰ ꓗꓪ ꓟꓯꓼ ꓢꓰꓼ ꓡꓯꓽ ꓘꓳ ꓗꓷ ꓟ ꓪꓴ. ꓠꓬꓲ ꓣ‐ꓫ ꓗꓴꓷꓼ ꓗꓪ ꓧꓳꓽ ꓙꓰ ꓟ ꓴꓗꓣꓮꓲꓠꓰ ꓤ ꓠꓱ ꓤ ꓐꓴ ꓔꓯ ꓬꓲ ꓪ ꓗꓴꓷꓼ ꓗꓪ ꓡ ꓡ ꓠ, ꓟ ꓐꓰ ꓢꓲ ꓡꓲ ꓟꓶ ꓠ, ꓟ ꓐꓱ ꓶ ꓮ ꓟꓬ, ꓫꓵꓽ ꓔꓯ ꓖꓪ ꓙꓱꓽ ꓗꓷꓳ ꓐꓰ ꓐꓯ ꓔ ꓡꓳ꓿
ꓦꓮꓔꓲꓚꓮꓠ ꓓꓳꓽ ꓫꓵꓽ ꓗꓪ ꓐꓰ ꓐꓯ ꓔ ꓟ ꓗꓪ ꓐꓰ ꓣ‐ꓫ ꓐꓰ ꓴꓗꓣꓮꓲꓠꓰ ꓢꓰꓼ ꓡꓯꓽ ꓘꓳ ꓟ ꓪꓴ. ꓠꓬꓲ ꓫꓵꓻ ꓡꓰ ꓢꓴ ꓐꓴ ꓔꓯ ꓔꓲꓺ ꓒ ꓪ ꓔꓲ ꓠꓬ ꓠꓲ, ꓫ. ꓟꓬ ꓫ. ꓢꓲ ꓠꓬꓲ ꓪꓽ ꓘꓴ ꓙ ꓖꓶ ꓗꓷ ꓟ ꓚꓱ, ꓐꓰ ꓴꓗꓣꓲꓠꓰ ꓑ ꓫꓬ ꓐꓴ ꓐꓱ ꓶ ꓥ ꓟꓲ ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴ ꓙ ꓖꓶ ꓗꓷꓳ꓿
ꓝꓮꓲ ꓗꓴꓷꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓪꓴ. ꓠꓬꓲ ꓐꓱ ꓓꓵ ꓕꓳ ꓦꓲꓻ ꓗꓪ ꓔꓬ ꓢꓴ ꓐꓴ ꓔꓯ ꓡꓲ. ꓖꓶ ꓠ, ꓟ ꓐꓰ ꓣ‐ꓫ ꓗꓴꓷꓼ ꓗꓪ ꓧꓳꓽ ꓙꓰ ꓟ ꓤ ꓠꓱ ꓤ ꓐꓴ ꓔꓯ ꓕꓲ ꓦꓲꓻ ꓢꓴ ꓐꓰ ꓜꓲꓼ ꓠ, ꓟ ꓐꓰ ꓡ ꓡ ꓠ, ꓟ ꓟꓬꓱꓽ ꓬꓰ ꓠ, ꓟ ꓫ. ꓕꓱ ꓗꓷꓳ꓿
ꓴꓗꓣꓮꓲꓣꓲꓠꓰ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓠꓬ ꓔꓲꓺ ꓒ ꓪ ꓔꓲ ꓐꓰ ꓜꓲꓼ ꓪ ꓟ ꓑꓶ. ꓓꓴ ꓮ ꓘꓶ. ꓛꓲ ꓫ. ꓟꓳ ꓒꓵꓽ ꓗ ꓘꓶꓽ ꓔꓯ ꓫ. ꓕꓱ ꓗꓷꓳ꓿
ꓝꓮꓲ ꓔꓲꓺ ꓒ ꓪ ꓔꓲ ꓡꓰ ꓣ‐ꓫ ꓴꓗꓣꓮꓲꓠꓰ ꓗꓴꓷꓼ ꓐꓰ ꓢꓲ ꓡꓲ ꓟꓶ ꓠ, ꓟ ꓖꓪ ꓙꓱ ꓜꓲꓼ ꓓꓴ ꓔꓯ ꓬꓰ ꓠ, ꓟ ꓐꓱ ꓶ ꓙꓽ ꓖꓶ ꓓꓳ ꓡꓰ ꓐꓰ ꓫ. ꓕꓱ ꓔ ꓟ ꓥ ꓡꓳ ꓐꓰ Vatican news ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿
