ꓠꓴ ꓥꓪ ꓠꓶꓽ ꓛꓳꓽ ꓕꓲ ꓛꓳꓽ ꓠꓬ ꓮ ꓟ ꓥ ꓡ?
ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓠꓶꓽ ꓛꓳꓽ ꓕꓲ ꓛꓳꓽ ꓐꓯ ꓟ ꓔꓯ ꓟꓲ ꓠꓯ ꓢꓷ. ꓠꓲ, ꓙꓳ ꓢꓴ ꓐꓴ ꓡꓰ ꓐꓯ ꓟ. ꓖꓶ ꓡ ꓟ ꓠꓬ ꓙꓱ‐ꓣꓴ‐ꓢ‐ꓡꓱ ꓗꓪ ꓐꓰ ꓡ ꓢꓴ ꓠꓬ ꓮ‐ꓓꓯ ꓗꓪ ꓐꓰ ꓡ ꓟ ꓞꓳ ꓫꓵꓽ ꓔꓯ ꓐꓯ ꓟ ꓥ ꓡꓳ꓿ ꓝꓮꓲ ꓒꓬ, ꓜꓽ ꓢꓴ ꓟꓽ ꓙꓲ ꓢꓴ ꓐꓯ ꓟ ꓠꓬ ꓠꓲ ꓢ‐ꓓꓯ ꓟꓶ ꓡꓰ ꓝꓲ ꓢꓴ ꓐꓴ ꓔꓯ ꓐꓯ ꓟ. ꓥ ꓡꓳ꓿
ꓝꓮꓲ ꓙꓲˍ ꓟ ꓢ‐ꓟ‐ꓡꓲ ꓡ ꓞꓳ ꓠꓬ ꓢꓲꓺ ꓒ ꓬꓰ‐ꓢꓴ (ꓣꓳ ꓝꓴꓲ ꓙꓳ ꓢꓴ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓙ ꓢꓴ ꓔꓯ ꓐꓯ ꓟ. ꓥ ꓡꓳ꓿ ꓝꓮꓲ ꓪꓰ ꓤ ꓦꓲꓻ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓔꓶ ꓔ ꓟ ꓘꓴ ꓜꓲꓼ ꓞꓳ ꓔꓯ ꓐꓯ ꓔ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ ꓐꓴ ꓬꓲ ꓗ. ꓠꓯ ꓛꓳꓽ ꓢꓴ ꓐꓴ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓙꓲˍ ꓟ ꓢ‐ꓟ‐ꓡꓲ ꓡ ꓞꓳ ꓕꓲ ꓣꓳ ꓡꓰ ꓐꓰ ꓠꓱ. ꓐꓯꓼ ꓢꓴ ꓣꓳ ꓒꓽ ꓕꓲ ꓗꓪ ꓔꓬ ꓢꓴ ꓐꓴ ꓔꓯ ꓬꓰ ꓙ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓘꓴˍ ꓔꓬ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓬ ꓠꓶꓽ ꓛꓳꓽ ꓕꓲ ꓛꓳꓽ ꓔꓯ ꓬꓰ ꓙ ꓟ ꓗꓪ ꓘꓴ ꓜꓲꓼ ꓞꓳ꓾ ꓙꓵꓻ ꓠꓲ, ꓚꓱ, ꓟꓽ ꓪ ꓞꓳ ꓫꓵꓽ ꓟꓽ ꓪ ꓕꓱ ꓟ ꓠꓬ ꓟꓽ ꓣꓳꓺ ꓚꓵˍ ꓟ ꓥ ꓡꓳ꓿ ꓢꓲꓺ ꓒ ꓡꓰ ꓐꓯ ꓔ ꓟ ꓮ ꓫꓵˍ ꓣꓳꓺ ꓚꓵˍ ꓥ ꓐꓯ ꓠꓬ ꓠꓵꓻ ꓠꓲ, ꓡꓰ ꓣꓳꓺ ꓚꓵˍ ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓔꓬ ꓟ ꓟꓲ ꓠꓯ ꓗꓪ ꓠꓵꓻ ꓠꓲ, ꓟꓽ ꓙꓳ ꓟ ꓪꓴ. ꓠꓬꓲ ꓮ ꓘꓶ. ꓛꓲ ꓫꓵꓽ ꓪꓴꓽ ꓒꓬꓱꓼ ꓔꓬ ꓟ ꓔꓯ ꓣꓳ ꓡꓳ. ꓟꓳ ꓪ ꓡꓳ꓿ ꓗꓴꓷꓼ ꓕꓲ ꓗꓴꓷꓼ ꓡꓰ ꓕꓲ ꓗꓴꓷꓼ ꓢꓰꓼ ꓡꓯꓽ ꓘꓳ, ꓔꓬ ꓟ ꓪꓴ. ꓠꓬꓲ ꓟꓵꓽ ꓗꓳ ꓓꓵ ꓓꓵ ꓗꓪ ꓑ ꓫꓬ ꓐꓴ ꓮ ꓟꓬ, ꓫ. ꓓꓴ ꓟꓷ ꓓꓴ ꓠꓲ, ꓫ. ꓟꓬ ꓫ. ꓓꓴ ꓮ ꓟꓬ, ꓔꓳ, ꓜꓳꓻ ꓟ ꓥ ꓡꓳ꓿ ꓑ ꓫꓬ ꓐꓴ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓬꓽ ꓠꓬꓲ ꓫ. ꓡ ꓟ꓿
ꓣꓳ ꓠꓬꓲ. ꓠꓬꓲ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓬꓰ ꓝꓲ ꓠꓲ, ꓫꓵˍ ꓟ ꓠꓬ ꓘꓴ ꓜꓲꓼ ꓞꓳ ꓟꓽ ꓪ ꓙꓵꓻ ꓠꓲ, ꓟꓽ ꓪ ꓥ ꓟꓲ ꓕꓲ ꓠꓲ, ꓕꓲ ꓪ ꓠꓵꓻ ꓠꓲ, ꓟꓬꓱꓽ ꓔꓯ ꓬꓰ ꓠ, ꓟ ꓘꓴˍ ꓔꓬ ꓟ ꓥ ꓡꓳ꓿ ꓘꓴ ꓜꓲꓼ ꓞꓳ ꓟꓽ ꓟ ꓞꓳ ꓫꓵꓽ ꓟꓽ ꓪ ꓟ ꓫꓵꓽ ꓘꓶꓽ ꓟ ꓚꓱ, ꓔꓯ ꓡꓳ. ꓗꓷ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓣꓳ ꓚꓲ. ꓛꓬ ꓔꓯ ꓠꓲ, ꓠꓵ ꓟ ꓡꓰ ꓐꓰ ꓠꓶꓽ ꓛꓳꓽ ꓕꓲ ꓛꓳꓽ ꓔꓯ ꓠꓲ, ꓠꓵ ꓠ, ꓟ ꓘꓴ ꓔꓬ ꓟ ꓥ ꓡꓳ꓿
ꓣꓳ ꓒꓽ ꓕꓲ ꓗꓪ ꓔꓬ ꓢꓴ ꓫ. ꓓꓴ ꓟꓷꓽ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓓꓴ ꓬꓰ ꓡꓯ꓿ ꓣꓳ ꓠꓬ ꓙꓲ‐ꓢꓴ ꓢꓲꓺ ꓤ ꓥ ꓟꓲ ꓫ. ꓓꓴ ꓟꓷ ꓢꓴ ꓠꓲ, ꓫ. ꓟꓬ ꓫ. ꓢꓴ ꓐꓴ ꓔꓯ ꓐ ꓡ ꓟꓬꓽ ꓛꓲ ꓟꓽ ꓬꓰ ꓙ ꓟꓽ ꓔꓳ, ꓠꓬ ꓢꓲꓽ ꓫꓬ ꓕꓳ ꓶ ꓗꓪ ꓐ ꓢꓴ ꓙꓵꓽ ꓗ ꓟ. ꓒ ꓐꓰ ꓡꓱ‐ꓬꓲ ꓡ ꓞꓳ ꓡꓰ ꓐꓰ ꓫꓱ, ꓡꓰ ꓟ ꓥ ꓡꓳ꓿
ꓣꓳ ꓒ ꓕꓲ ꓗꓪ ꓔꓬ ꓢꓴ ꓔꓯ ꓠꓵꓻ ꓠꓲ, ꓟꓳ. ꓖꓶ ꓓꓴ ꓬꓰ ꓡꓯ꓿ ꓬꓰ ꓙ ꓔꓳ, ꓙ ꓓꓴ ꓬꓰ ꓡꓯ꓿ ꓢꓲꓺ ꓒ ꓠꓵꓻ ꓠꓲ, ꓟꓳ. ꓖꓶ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ, ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
