ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓗꓪ ꓐꓰ ꓟꓵꓽ ꓙꓴꓽ ꓚꓵˍ ꓟ ꓮ ꓡꓰ ꓗꓪ ꓐꓰ ꓒꓬꓱꓼ ꓡ ꓡꓽ ? (Climate Change)
ꓣꓳ ꓔꓬ ꓟ ꓟꓬ‐ꓟ ꓗꓴꓷꓼ ꓐꓰ ꓠꓱ. ꓐꓯꓼ ꓗꓴꓷꓼ ꓮ ꓟꓬ, ꓗꓪ ꓥ ꓟꓲ ꓟꓵꓽ ꓙꓴꓽ ꓚꓵˍ ꓟ ꓟꓵꓽ ꓓꓵ ꓟ ꓔꓯ ꓣꓳ ꓡꓳ. ꓟꓳ ꓟ ꓥ ꓡꓳ꓿ ꓕꓱ ꓟ ꓠꓬ ꓮ ꓡꓰ ꓐꓰ ꓒꓬꓱꓼ ꓡ ꓡ ꓐꓰ ꓐꓯ ꓟ ꓔꓯ ꓣꓳ ꓡꓳ ꓠꓬꓲˍ ꓓꓴ ꓬꓰ ꓡꓯ꓿ ꓓꓽ ꓪꓴ. ꓗꓪ ꓟꓲ ꓠꓯ ꓡꓴ. ꓠꓬ ꓮ ꓫꓵꓽ ꓗꓪ ꓐꓰ ꓫꓬ, ꓔ ꓡ ꓐꓰ ꓐꓯ ꓟ ꓔꓯ ꓣꓳ ꓡꓳ ꓠꓬꓲ ꓓꓴ ꓬꓰ ꓡꓯ꓿
ꓣꓳ ꓟꓲ ꓠꓯ ꓕꓱ ꓟ ꓠꓬ ꓮ‐ꓭ ꓩꓴ ꓕꓲ ꓢꓶꓽ ꓡꓰ ꓐꓰ ꓫꓱ, ꓡꓯꓽ ꓘꓳ ꓟ ꓥ ꓡꓳ꓿ ꓮ‐ꓭ ꓩꓴ ꓗꓪ ꓙꓳˍ ꓟ ꓡꓰ ꓐꓰ ꓟꓲ ꓠꓯ ꓘꓴꓽ ꓗꓪ ꓥ ꓟꓲ ꓙꓳˍ ꓟ ꓔꓯ ꓟꓲ ꓠꓯ ꓢꓷ. ꓠꓲ, ꓙꓳ ꓢꓴ ꓐꓴ ꓡꓰ ꓚꓲ. ꓚꓺ ꓔ ꓟ ꓥ ꓡꓳ꓿
ꓟꓲ ꓠꓯ ꓘꓴꓽ ꓗꓪ ꓥ ꓟꓲ ꓬꓲ ꓔꓱ ꓔꓱ ꓮ ꓟꓬ, ꓙꓳ ꓟ ꓥ ꓢꓲ ꓠꓬꓲ ꓐꓵ ꓞꓲ ꓥꓪ ꓘꓳ ꓖꓪꓽ ꓔ ꓟ ꓡꓰ ꓐꓰ ꓪ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓟꓲ ꓠꓯ ꓔꓯ ꓬꓲ ꓔꓱ ꓮ ꓟꓬ, ꓟ ꓗꓪ ꓐꓰ ꓑꓲ. ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓠꓬꓲ ꓟꓵꓽ ꓓꓵ ꓟ ꓟꓵꓽ ꓙꓴꓽ ꓚꓵˍ ꓟ ꓠꓬ ꓮ ꓡꓰ ꓗꓪ ꓐꓰ ꓒꓬꓱꓼ ꓥ ꓐꓯ ꓠꓬ ꓟꓲ ꓠꓯ ꓗꓪ ꓬꓲ ꓪꓴ. ꓕꓲ ꓔꓱ ꓟ ꓠꓬ ꓮ ꓤ ꓤ ꓐꓰ ꓓꓵ ꓔꓬ ꓡꓴ ꓔꓬ ꓟ ꓥ ꓡꓳ꓿
ꓕꓱ ꓡꓱ ꓐꓰ ꓟꓶ ꓫꓵˍ ꓫꓵˍ ꓗꓷ ꓡꓰ ꓟ ꓙꓵ, ꓕꓯ ꓬꓲ ꓪꓴ. ꓟꓲ ꓠꓯ ꓕꓲ ꓔꓱ ꓟ ꓠꓬ ꓓꓵ ꓔꓬ ꓟ ꓟꓶ ꓫꓵˍ ꓡꓰ ꓟ ꓪꓴ. ꓠꓬꓲ ꓬꓲ ꓘꓴꓽ ꓗꓪ ꓙꓳ ꓟ ꓟꓲ ꓠꓯ ꓔꓱ ꓗꓪ ꓥ ꓟꓲ ꓟꓵꓽ ꓓꓵ ꓟ ꓡꓴ ꓟ ꓒꓬꓱꓼ ꓡ ꓢꓲ ꓠꓬꓲ ꓬꓲ ꓪ ꓛꓳꓽ ꓟ ꓡꓴ ꓟ ꓟꓽ ꓪ ꓗꓷ ꓡꓰ ꓕꓯ ꓟꓵꓽ ꓙꓴꓽ ꓚꓵˍ ꓟ ꓟꓵꓽ ꓡꓴ ꓟ ꓒꓬꓱꓼ ꓡ ꓟ ꓥ ꓡꓳ꓿
ꓕꓱ ꓡꓰ ꓐꓰ ꓬꓲ ꓙꓰ ꓟ ꓬꓲ ꓚꓱ, ꓟꓽ ꓪꓽ ꓗꓷ ꓡꓰ ꓟ ꓙꓵ, ꓕꓯ ꓟꓲ ꓠꓯ ꓘꓴꓽ ꓗꓪ ꓟꓵꓽ ꓙꓴꓽ ꓓꓽ ꓟ ꓚꓵˍ ꓟ ꓒꓬꓱꓼ ꓡ ꓢꓲ ꓠꓬꓲ ꓣꓳ ꓟꓲ ꓠꓯ ꓔꓯ ꓮ ꓘꓶ. ꓛꓲ ꓫ. ꓓꓴ ꓒꓬꓱꓼ ꓡ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓟꓲ ꓠꓯ ꓗꓪ ꓕꓲ ꓑ ꓑ ꓟꓵꓽ ꓙꓴꓽ ꓚꓵˍ ꓟ ꓔꓶ. ꓠꓬ ꓙ‐ꓑꓮꓠ ꓗꓴꓷꓼ ꓲꓠ‐ꓓꓳ‐ꓠꓲ‐ꓫ. ꓗꓴꓷꓼ ꓗꓪ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓪꓴ‐ꓢ ꓡꓰ ꓚꓰ ꓔ ꓟ ꓡꓯꓼ ꓓꓴ ꓠꓬ ꓮ ꓘꓶ. ꓛꓲ ꓓꓵ ꓙ ꓟꓶ ꓓꓴ ꓙꓳˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓠꓬꓲ. ꓠꓬꓲ ꓗꓪ ꓟꓵꓽ ꓓꓵ ꓟ ꓟꓵꓽ ꓙꓴꓽ ꓮ ꓡꓰ ꓗꓪ ꓐꓰ ꓚꓵˍ ꓡ ꓐꓰ ꓐꓯ ꓟ ꓔꓯ ꓢꓷ. ꓡꓰꓳ ꓐꓰ ꓓꓴ ꓙ ꓡꓳ ꓫ. ꓟꓳ ꓪ꓿
