ꓑꓮꓔꓧꓰꓲꓠ ꓢ-ꓢꓲ-ꓠ ꓗꓪ ꓐꓰ ꓞꓲꓼ ꓪꓴ ꓡꓰ ꓟ ꓔꓲꓺ ꓒ꓾ ꓐꓣꓳꓔꓧꓰꓣ ꓐꓴ ꓐꓰ ꓔꓲꓺ ꓟ ꓐꓴ ꓔꓯ ꓟꓬꓱꓺ ꓓꓳꓽ ꓖꓶ ꓙꓴ-ꓐꓲ-ꓡꓲ ꓑꓮꓲ ꓬꓰ_ ꓟ꓾
ꓫꓵꓽ ꓦ ꓟ 6 ꓠꓬꓲ 2025 ꓘꓳꓼ ꓠꓯꓼ 6ꓽ00 ꓙꓵꓹ ꓕꓯ ꓬꓲ ꓞꓲꓼ ꓪꓴ ꓡꓰ ꓢꓴ ꓔꓲꓺ ꓒ ꓐꓴ꓾ ꓐꓣꓳꓔꓧꓰꓣ ꓐꓴ ꓐꓰ ꓔꓲꓺ ꓟ ꓐꓴ ꓔꓯ ꓟꓬ-ꓟ ꓗꓴꓷꓼ꓾ ꓑꓮꓔꓧꓰꓲꓠ ꓡꓳ ꓒꓱ ꓢꓔꓸ ꓝꓣꓮꓠꓚꓲꓢ ꓫꓮꓦꓲꓰꓣ ꓔꓲꓺ ꓟ ꓜꓴ ꓔꓬ ꓔꓶꓸ ꓗꓪ ꓟꓬꓱꓺ ꓓꓳꓽ ꓖꓶ ꓙꓴ-ꓐꓲ-ꓡꓲ ꓑꓮꓲ ꓔꓯ ꓬꓰ ꓖꓶ ꓓꓳ ꓡꓰ ꓟ ꓥꓳ=
ꓑꓮꓔꓧꓰꓲꓠ ꓢ-ꓢꓲ-ꓠ ꓔꓲꓺ ꓒ ꓓꓽ Henry Eikhlein ꓡꓰ ꓙꓴ-ꓐꓲ-ꓡꓲ ꓟꓲ-ꓢ ꓪꓽ ꓘꓴ ꓙꓵꓹ ꓔꓯ ꓧꓳꓽ ꓪꓴꓸ ꓟꓴ ꓢꓲ ꓠꓬꓲ ꓪꓴ-ꓢ ꓐꓱ ꓶ ꓘꓴ ꓜꓲꓼ ꓞꓳ ꓐꓱ ꓶ ꓟꓬꓱꓽ ꓬꓰ ꓢꓯꓼ ꓕꓵꓼ ꓔꓬ ꓢꓴ ꓔꓯ ꓟꓬꓱꓺ ꓓꓳꓽ ꓖꓶ ꓒꓵꓽ ꓗꓹ ꓬꓰ_ ꓟ ꓐꓰ ꓫ ꓟꓳ ꓔꓬ ꓟ ꓥꓳ꓾
ꓟꓲ-ꓢ ꓪꓽ ꓘꓴ ꓙꓵꓹ ꓘꓴꓽ ꓗꓪ ꓔꓲꓺ ꓒ ꓓꓽ ꓡꓰ 2025 ꓘꓳꓼ ꓙꓴ-ꓐꓲ-ꓡꓲ ꓘꓳꓼ ꓠꓬ ꓮ ꓘꓶꓸ ꓣꓳꓸ ꓚꓵ_ ꓟ ꓔꓯ ꓐꓯ ꓡꓳꓹ ꓬꓰ ꓟ ꓥꓳ꓾ ꓖꓳ ꓟ ꓡꓰ ꓐꓰ ꓪꓴ-ꓢ ꓟꓬꓱꓽ ꓟꓯ ꓔꓬ ꓟ꓾ ꓙꓵꓻ ꓠꓲꓹ ꓚꓱꓹ꓾ ꓞꓳ ꓡꓱ ꓐꓴ ꓐꓰ ꓕꓲ ꓦꓲꓻ ꓢꓴ ꓐꓴ ꓐꓱ ꓶ ꓐꓰ ꓕꓱ ꓡꓱ ꓬꓲ ꓕꓲ ꓟꓴ ꓮ ꓟꓬꓹ ꓐꓰ ꓟꓵꓽ ꓗꓳꓸ ꓓꓵ ꓓꓵ ꓗꓪ ꓬꓰ ꓔꓬ ꓟ ꓥ ꓡꓳ=
“ꓠꓬꓲꓸ ꓠꓬꓲ ꓪꓴ-ꓢ ꓐꓱ ꓶ ꓘꓴ ꓜꓲꓼ ꓞꓳ ꓐꓱ ꓶ ꓮ ꓟꓬꓹ ꓘꓳꓼ ꓢꓯꓼ ꓕꓵꓼ ꓗꓷ ꓟ ꓞꓲꓼ ꓪꓴ ꓡꓰ ꓢꓴ ꓔꓲꓺ ꓒ ꓐꓴ ꓐꓣꓳꓔꓧꓰꓣ ꓐꓴ ꓔꓲꓺ ꓟ ꓐꓴ ꓔꓯ ꓟꓬꓱꓺ ꓓꓳꓽ ꓖꓶ ꓒꓵꓽ ꓗꓹ ꓖꓶ_ ꓡꓳ꓾ ꓐꓰ ꓐꓯ ꓔ ꓡꓳ= ꓬꓲ ꓪ ꓢꓯꓼ ꓕꓵꓼ ꓗꓷ ꓟ ꓠꓬ ꓘꓴ ꓜꓲꓼ ꓞꓳ ꓟꓬꓱꓽ ꓗꓪ ꓢꓯꓼ ꓕꓵꓼ ꓠꓹ ꓟ ꓣꓳ ꓔꓯ ꓢꓯꓼ ꓖꓶ ꓔ ꓡꓳ=
ꓡꓴ-ꓘ ꓕꓳ ꓶ 10ꓽ1-12/17-20 ꓗꓪ ꓜꓽ ꓪꓳꓽ ꓡꓳ ꓪꓳꓽ ꓫ ꓠꓹ ꓟ ꓙꓵꓹ ꓗꓪ ꓟꓬꓱꓽ ꓬꓰ ꓢꓴ ꓣꓱ ꓬꓯꓼ ꓟ ꓚꓱꓹ ꓥ ꓡꓳ= ꓢ-ꓢꓲ-ꓠ ꓟꓬꓱꓽ ꓗꓪ ꓢꓯꓼ ꓕꓵꓼ ꓗꓷ ꓟ ꓡꓰ ꓐꓰ ꓞꓳ ꓡꓱ ꓐꓴ ꓔꓯ ꓥ ꓟꓲ ꓢ-ꓢꓲ-ꓠ ꓟꓬꓱꓽ ꓘꓴ ꓜꓲꓼ ꓞꓳ ꓟꓬꓱꓽ ꓗꓪ ꓢꓯꓼ ꓕꓵꓼ ꓠꓹ ꓟ ꓢꓯꓼ ꓖꓶ_ ꓡꓳ=
ꓟꓲꓢꓢꓲꓳꓠ ꓐꓯ_ ꓟ ꓠꓬ ꓕꓲ ꓞꓲꓼ ꓕꓲ ꓑ ꓥ ꓡꓳ꓾ ꓬꓲ ꓙꓵꓹ ꓖꓴ ꓡꓰ ꓫꓵ ꓟꓽ ꓙꓳ꓾ ꓐꓰ ꓐꓯ ꓔ ꓡꓳ= ꓣꓳ ꓧꓪ ꓖꓳ ꓓꓱ ꓕꓲ ꓒꓳꓹ ꓢꓯꓼ ꓐ ꓡꓰ ꓟ ꓙꓵꓹ ꓗꓪ ꓥ ꓟꓲ ꓪꓽ ꓘꓴ ꓟ ꓗꓪ ꓐꓰ ꓘꓴ ꓜꓲꓼ ꓞꓳ ꓟꓬꓱꓽ ꓕꓲ ꓒꓳꓹ ꓗꓪ ꓢꓯꓼ ꓕꓵꓼ ꓠꓹ ꓟ ꓥꓳ=
ꓔꓲꓺ ꓟ ꓟꓳꓔꓧꓰꓣ ꓮꓠꓠ ꓔꓧꓰꓣꓰꓢꓮ ꓡꓰ ꓔꓲꓺ ꓒ ꓓꓽ꓾ ꓔꓲꓺ ꓒ ꓐꓴ ꓐꓰ ꓜꓲꓼ ꓡ ꓢꓴ ꓮ ꓙꓵ ꓔꓯ ꓫ ꓟꓳ ꓐꓰ ꓐꓯ ꓖꓶ ꓔ ꓡꓳ꓾ ꓬꓲ ꓞꓲꓼ 90 ꓘꓳꓼ ꓐꓰ 93 ꓘꓳꓼ ꓡꓳꓼ ꓡꓰ ꓟ ꓗꓪ ꓛꓲ ꓪꓴ-ꓢ ꓟꓬꓱꓽ ꓠꓯꓼ ꓗꓪ ꓢꓯꓼ ꓕꓵꓼ ꓡꓰ ꓟ ꓔꓲꓺ ꓟ ꓐꓴ ꓔꓯ ꓠꓲꓹ ꓡꓱ ꓡꓱ ꓐꓰ ꓟꓬꓱꓺ ꓓꓳꓽ ꓖꓶ ꓒꓵꓽ ꓗꓹ ꓬꓰ ꓡꓳ ꓐꓰ ꓐꓯ ꓔ ꓡꓳ=
ꓮ ꓟꓶ ꓟ ꓤꓶꓻ ꓫ ꓓꓴ ꓟꓷꓼ ꓓꓴ ꓐꓰ ꓮ ꓟꓬꓹ ꓔꓬ ꓟ ꓙꓵꓹ ꓗꓪ ꓙꓵꓻ ꓠꓲꓹ ꓗꓪ ꓕꓷ ꓕꓷ ꓡꓰ ꓛꓳ ꓫꓱꓽ ꓠꓹ ꓟ ꓞꓳ ꓡꓱ ꓤ ꓐꓴ ꓔꓯ ꓢꓯꓼ ꓖꓶ ꓔ ꓡꓳ= “ꓙ ꓜꓲꓼ ꓠꓲꓹ ꓟꓬꓹ ꓟ ꓓꓰ ꓢ꓾ ꓫꓱꓸ ꓤ ꓠꓲꓹ ꓐꓰ ꓙꓲ_ ꓟ ꓔꓯ ꓬꓰ ꓢꓲ ꓠꓬꓲ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓘꓳꓹ ꓣꓴ ꓪ ꓟꓶ ꓡꓰ ꓟ ꓪꓴ-ꓢ ꓣꓱ ꓛꓰ ꓔꓯ ꓮ ꓕꓯ ꓟꓲ ꓵ ꓓꓴ ꓬꓰ ꓡꓯ=”
ꓕꓲ ꓠꓲꓹ ꓕꓲ ꓪ ꓐꓰ ꓫ ꓟꓳ ꓟ ꓔꓯ ꓟꓳꓸ ꓠꓯꓼ ꓜ ꓓꓴ ꓜ ꓢꓲ ꓠꓬꓲ ꓑꓮꓲ ꓙꓵꓹ ꓔꓯ ꓬꓰ ꓓꓳ ꓡꓰ ꓟ ꓥꓳ= ꓕꓱ ꓟ ꓠꓬ ꓟꓬꓱꓽ ꓬꓰ ꓡꓳꓹ ꓬꓰ ꓢꓴ ꓐꓴ ꓔꓯ ꓒꓵꓽ ꓗꓹ ꓬꓰ_ ꓟ ꓡꓰ ꓐꓰ ꓡ ꓠꓹ ꓟ ꓤꓶꓻ ꓟꓬꓱꓽ ꓬꓰ ꓠꓹ ꓟ ꓔꓯ ꓥ ꓟꓲ ꓢꓯꓼ ꓕꓵꓼ ꓠꓲꓹ ꓕꓲ ꓟ ꓗꓷ ꓡꓰ ꓝꓲ_ ꓟ ꓡꓰ ꓐꓰ ꓘꓴ ꓜꓲꓼ ꓞꓳ ꓔꓯ ꓥ ꓟꓲ ꓕꓷ ꓞꓹ ꓠꓹ ꓟ ꓐꓱ ꓶ ꓢꓯꓼ ꓖꓶ ꓔ ꓟ ꓥꓳ=
