ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓮꓽ ꓐꓽ ꓮ ꓟ ꓣꓱꓽ ꓢꓴ ꓠꓬ ꓚꓲ. ꓛꓬ ꓤ ꓠꓱ ꓗ, ꓘꓶꓽ ꓓꓳ ꓙꓰˍ ꓕꓯ ꓮ ꓫꓵꓽ ꓬꓰ ꓖꓶ ꓩꓴˍ ꓡ꓿ ꓮ ꓫꓵꓽ ꓡꓯꓼ ꓘꓪ ꓩꓴˍ ꓡ꓿ ꓚꓲ. ꓛꓬ ꓤ ꓠꓱ ꓗ ꓘꓶꓽ ꓓꓳ ꓙꓰˍ ꓕꓯ꓾ ꓕꓲꓽ ꓗꓴꓷꓼ ꓗꓴꓷꓼ ꓗꓪ ꓙꓰˍ ꓕꓯ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓠꓬ ꓒꓴ ꓫꓵ ꓖꓶ ꓩꓴˍ ꓡꓳ꓿ ꓬꓲ ꓪ ꓙꓻ ꓖꓴ ꓗꓪ ꓟꓽ ꓦꓰꓼ ꓟꓷꓼ ꓠ, ꓟ ꓐꓱ ꓶ ꓜꓻ ꓙꓴꓽ ꓕꓱ, ꓖꓶˍ ꓡꓳ꓿ ꓬꓲ ꓪ ꓙꓻ ꓖꓴ ꓗꓪ ꓗ, ꓛꓲꓽ ꓛꓲꓽ ꓡꓰꓽ ꓙꓰ ꓐ ꓡ ꓠ, ꓟ ꓐꓱ ꓶ ꓬꓲ ꓪ ꓪꓽ ꓘꓴ ꓙ ꓖꓶˍ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲ ꓬꓲ ꓪ ꓣꓱꓽ ꓓꓴ ꓒꓴ ꓫꓵ ꓤ ꓖꓶˍ ꓟ ꓡꓰꓽ ꓟꓽ ꓞꓲ꓾ ꓙ ꓖꓴ ꓙ ꓐꓽ ꓗꓪ ꓬꓲ ꓪ ꓔꓯ ꓢꓴ ꓡꓰ ꓕꓲꓺ ꓡ ꓓꓶꓽ ꓡˍ ꓕꓯ ꓗꓽ ꓕ ꓓꓴ ꓐꓱ ꓶ ꓕꓲ ꓖ ꓕꓲ ꓧꓪ, ꓮꓽ ꓐꓽ ꓮ ꓟ ꓣꓱꓽ ꓢꓴ ꓐꓴ ꓫꓬ, ꓖꓶˍ ꓡꓳ꓿ ꓕꓱ ꓟ ꓠꓬ ꓞꓳ ꓤ ꓕꓲꓽ ꓣꓳ ꓚꓲ. ꓛꓬ ꓤ ꓫꓵ. ꓤ ꓠꓱ꓾ ꓚꓲ. ꓛꓬ ꓦꓲ ꓗꓪ ꓚꓳ. ꓗ ꓘꓶꓽ ꓓꓳ ꓙꓰ ꓢꓴ ꓔꓯ ꓬꓰ ꓖꓶˍ ꓟ ꓬꓰ ꓫꓵꓽ ꓕꓲ ꓫꓵꓽ ꓥ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓢ. ꓠꓯ ꓢꓲ ꓒ ꓦꓬꓼ ꓠꓬꓲ ꓗꓪ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ 10ꓽ1‐12, 17‐20 ꓗꓪ ꓮ ꓡꓲ ꓐꓳ ꓔ ꓡ ꓐꓯ ꓠꓬ꓾ ꓢꓲ ꓒ ꓬꓰ‐ꓢꓴ ꓠꓬ ꓝꓲ ꓓꓴ 72 ꓣꓳ ꓔꓯ ꓘꓴ ꓢꓲ ꓠꓬꓲ ꓬꓲ ꓪ ꓙꓰ ꓠ ꓔ ꓟ ꓞꓳ ꓘ, ꓗꓪ ꓙꓰ ꓝꓲˍ ꓡꓳ꓿ ꓖꓳ ꓗꓪ ꓙꓰ ꓝꓲˍ ꓕꓯ ꓬꓲ ꓠꓬ ꓬꓲ ꓪ ꓔꓯ꓾ ꓕꓱ ꓦꓲ ꓗꓪ ꓢꓲ ꓡꓲ ꓟ ꓟꓶ ꓝꓲ ꓐꓯ ꓢꓲ ꓠꓬꓲ ꓬꓲ ꓪ ꓔꓯ ꓧꓪ. ꓧꓪꓸꓼ ꓐꓯ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓕꓵꓼ ꓪ ꓖꓶˍ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲ ꓬꓲ ꓪ ꓙ ꓖꓴ ꓗꓪ ꓣꓱꓽ ꓓꓴ ꓒꓴ ꓤ ꓫꓵ ꓤ ꓕꓽ ꓔꓯ,꓾ ꓒꓴ ꓗꓶ ꓓꓴ ꓕꓽ ꓔꓯ,꓾ ꓛꓲ ꓠꓲ ꓥˍ ꓟꓲ ꓕꓽ ꓔꓯ꓿ ꓙ ꓖꓴ ꓙ ꓐꓽ ꓗꓪ ꓣꓱꓽ ꓓꓴ ꓮ ꓫꓵꓽˍ ꓟꓲ ꓕꓽ ꓔꓯ, ꓐꓯ ꓢꓲ ꓠꓬꓲ ꓝꓲ ꓩꓴ ꓗꓷˍ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓮ ꓫꓵꓽ ꓪꓴ. ꓠꓬꓲ ꓬꓲ ꓪ ꓔꓯ ꓙ ꓖꓴ ꓗꓪ ꓮ ꓫꓵꓽˍ ꓟꓲ ꓟꓽ ꓔꓯ, ꓝꓲ ꓡ꓿ ꓥ ꓡꓳ꓾ ꓣꓳ ꓡꓳ. ꓠꓬꓲˍ ꓕꓯ ꓬꓲ. ꓪꓴ. ꓕꓲꓽ ꓟ ꓠꓬ ꓒꓴ ꓫꓵ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓗ ꓠꓯ. ꓖꓼ ꓢꓴ ꓪꓴ‐ꓢ ꓟꓬꓱꓽ ꓬꓰ ꓢꓴ ꓠꓬ ꓒꓴ ꓫꓵ ꓔꓯ ꓟꓬ ꓠꓯ ꓡˍ ꓕꓯ꓾ ꓒꓴ ꓫꓵ ꓔꓯ ꓠꓲ, ꓠꓵ ꓡˍ ꓕꓯ꓾ ꓒꓴ ꓫꓵ ꓔꓯ ꓠꓲ, ꓦꓯ. ꓡˍ ꓕꓯ ꓬꓲ ꓠꓬ ꓬꓲ ꓬꓰ ꓠ ꓔ ꓟ ꓪꓴ‐ꓢ ꓟꓬꓱꓽ ꓔꓯ ꓟꓲ ꓡꓰ, ꓗꓷ ꓗꓴ.ˍ ꓡꓳ꓿
ꓝꓮꓲ ꓬꓲ ꓠꓲ, ꓟ ꓘꓴꓽ ꓠꓯꓸꓼ ꓗꓪ ꓒꓴ ꓤ ꓫꓵ ꓤ ꓡꓰꓽ ꓓ, ꓕꓯ ꓪꓴ‐ꓢ ꓔꓯ ꓦ ꓡꓱ ꓠ, ꓟ ꓐꓱ ꓶ ꓬꓲ ꓢꓯꓼ ꓐꓽ ꓡꓰˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓥꓪ ꓠꓬ ꓪꓴ‐ꓢ ꓔꓯ ꓟꓽ ꓦ ꓡꓱ꓾ ꓥꓪ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓮ ꓘꓶ. ꓟꓽ ꓢꓯꓼ ꓕꓵꓼ ꓥˍ ꓟꓲ ꓥꓪ ꓠꓬ ꓪ ꓜꓽ ꓪ ꓓꓳꓻˍ ꓡꓳ꓾ ꓥꓪ ꓠꓬ ꓪ ꓖꓪꓽˍ ꓡꓳ ꓐꓯ ꓢꓲ ꓠꓬꓲ ꓓꓵꓽ ꓙꓽ ꓔꓬ ꓗꓴ.ˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓬꓲ ꓦ ꓡꓱ ꓖꓴ ꓮ ꓙꓵꓽ ꓬꓲ ꓙꓳˍ ꓟ ꓮ ꓙꓵꓽ ꓠꓬ ꓢꓲ ꓒ ꓬꓰ‐ꓢꓴ ꓥ ꓕꓯ ꓠꓬ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓡꓰꓽ ꓦ ꓡꓱˍ ꓥꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓬꓲ ꓜꓽ ꓓꓴ ꓓꓳꓻ ꓓꓴ ꓖꓪꓽ ꓓꓴ ꓮ ꓙꓵꓽ ꓠꓬ ꓢꓲ ꓒ ꓬꓰ‐ꓢꓴ ꓡꓰꓽ ꓥ ꓡꓳ꓿ ꓖꓳ ꓡꓱ ꓠꓬꓲ ꓒꓴ ꓫꓵ ꓕꓽ ꓔꓯ, ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯˍ ꓟ ꓥ ꓡꓳ꓿
ꓝꓮꓲ ꓛꓲ ꓠꓲ ꓥˍ ꓟꓲ ꓬꓲ ꓐꓷ, ꓕꓽ ꓔꓯ, ꓐꓰ ꓐꓯ ꓔ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓛꓲ ꓠꓲ ꓐꓯˍ ꓟ ꓠꓬ ꓣꓳ ꓔꓯ ꓛꓴꓽ ꓟꓽ ꓗ. ꓡ ꓠ, ꓟ ꓐꓱ ꓶ꓾ ꓣꓳ ꓔꓯ ꓡꓳ ꓓꓰ ꓟꓽ ꓧꓶ. ꓡ ꓠ, ꓟ ꓐꓱ ꓶ꓾ ꓛꓲ ꓒꓯ, ꓛꓲ ꓗꓪꓺ ꓗꓪ ꓛꓴꓽ ꓟꓽ ꓗ. ꓡ ꓠ, ꓟ ꓐꓱ ꓶ ꓛꓲ ꓠꓲ ꓔꓯ ꓠꓲˍ ꓟ ꓥ ꓡꓳ꓾ ꓛꓲ ꓠꓲ ꓓꓱꓼˍ ꓟ ꓥ ꓡꓳ꓿ ꓕꓱ ꓟˍ ꓡꓰ ꓐꓰ ꓣꓳ ꓠꓬ ꓪꓴ‐ꓢ ꓟꓬꓱꓽ ꓬꓰ ꓙꓰˍ ꓕꓯ꓾ ꓪꓴ‐ꓢ ꓙꓵꓻ ꓠꓲ, ꓠꓯꓸꓼ ꓗꓪ ꓛꓳ ꓫꓱꓽ ꓔꓬ ꓕꓯ꓾ ꓢꓴ ꓡꓰ ꓣꓳ ꓔꓯ ꓛꓴꓽ ꓔꓯ ꓫꓱ.ˍ ꓟ ꓢꓴ ꓡꓰ ꓛꓴꓽ ꓙꓳ ꓡˍ ꓟ꓾ ꓢꓴ ꓡꓰ ꓓꓶꓽ ꓡˍ ꓟ꓾ ꓢꓴ ꓡꓰ ꓔꓲ. ꓡˍ ꓟ ꓕꓱ ꓟ ꓔꓯ ꓙꓳꓺ ꓟꓽ ꓛꓵ ꓛꓵ ꓚꓲ. ꓛꓬ ꓢꓷ.ˍ ꓟ ꓡꓰ ꓐꓰ ꓗꓽ ꓕ. ꓟ ꓟꓽ ꓥ ꓥ ꓐꓰ꓾ ꓢꓲ ꓒ ꓬꓰ‐ꓢꓴ ꓔꓯ ꓖꓪꓽ ꓠ, ꓟ ꓐꓱ ꓶ ꓢꓲ ꓒ ꓬꓰ‐ꓢꓴ ꓔꓯ ꓓꓱꓼ ꓠ, ꓟ ꓐꓱ ꓶ꓾ ꓢꓲ ꓒ ꓬꓰ‐ꓢꓴ ꓔꓯ ꓠꓬꓲ ꓠ, ꓟ ꓐꓱ ꓶ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓕꓱ ꓡꓱ ꓕꓵꓼ ꓪ ꓖꓶ ꓡˍ ꓟ ꓥ ꓡꓳ꓿
ꓠꓴ ꓪ ꓠꓬ ꓠꓴ ꓪ ꓚꓲ. ꓛꓬ ꓢꓯꓼ ꓪ ꓗꓪ ꓐꓰ ꓮ ꓫꓵꓽ ꓔꓯˍ ꓟꓲ ꓕꓽ ꓢꓯꓼ ꓕꓵꓼ꓿ ꓠꓴ ꓪ ꓠꓬ ꓠꓴ ꓪ ꓢꓷ. ꓠꓲ,꓾ ꓠꓴ ꓪ ꓢꓯꓼ ꓪ꓾ ꓠꓴ ꓪ ꓔꓯ ꓙꓳˍ ꓟ ꓮ ꓫꓵꓽ ꓗꓪ ꓐꓰˍ ꓟꓲ ꓕꓽ ꓢꓯꓼ ꓕꓵꓼ꓿ ꓮ ꓙꓵꓽ ꓠꓬ ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓡꓰꓽ ꓞꓳ ꓙꓳ ꓐꓰ ꓬꓰ‐ꓢꓴ ꓡꓰ ꓐꓯˍ ꓟ ꓥ ꓡꓳ꓿ ꓣꓳ ꓦꓲꓻ ꓗꓪ ꓮꓽ ꓐꓽ ꓮ ꓟ ꓠꓬ ꓣꓳ ꓔꓯ ꓕꓲꓽ ꓫꓵꓽ ꓤ꓾ ꓒꓴ ꓤ ꓫꓵ ꓤ ꓖꓶ ꓩꓴˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳꓽ ꓔꓯ ꓮ ꓫꓵꓽˍ ꓟꓲ ꓟꓽ ꓖꓶ ꓩꓴ꓿ ꓖꓳ ꓡꓱ ꓐꓯˍ ꓥ ꓟꓲ ꓬꓲ ꓠꓬ ꓬꓲ ꓐꓯ ꓘꓶꓽ ꓣꓳ ꓔꓯ ꓖꓶ ꓩꓴˍ ꓡꓳ꓿ ꓬꓲ ꓚꓲ. ꓛꓬ ꓡꓰ ꓣꓳ ꓐꓰ ꓕꓲꓽ ꓡꓰ, ꓔꓬ ꓡꓳ ꓐꓯˍ ꓟ ꓣꓳ ꓢꓯꓼ ꓪ ꓟꓶ ꓓꓴ ꓥ ꓡꓳ꓿ ꓣꓳ ꓮ ꓙꓵꓽ ꓦ ꓡꓱ ꓖꓴ ꓬꓲ ꓕꓲꓽ ꓣꓳˍ ꓡꓰꓽ ꓥ ꓡꓳ꓿
ꓝꓮꓲ ꓕꓲꓽ ꓫꓵꓽ ꓠꓬ ꓢꓲ ꓒ ꓬꓰ‐ꓢꓴ ꓠꓬ꓾ ꓠꓴ ꓪ ꓦꓲꓻ ꓗꓪ ꓛꓲ ꓬꓰˍ ꓕ ꓑꓳꓸꓼ ꓕꓱ ꓕꓲ ꓦꓲ ꓗꓪ ꓢꓲ ꓡꓲ ꓟ ꓙꓳ ꓝꓲ ꓐꓰ ꓐꓯ꓿ ꓖꓳ ꓕꓲꓽ ꓦꓲ ꓗꓪ ꓢꓲ ꓡꓲ ꓟ ꓔꓯ ꓘꓳ ꓣꓴ ꓒꓵꓽ ꓢꓴ ꓙꓳˍ ꓠꓬ ꓠꓴ ꓪ ꓖꓶˍ ꓟ ꓢꓲ ꓡꓲ ꓟ ꓬꓲ ꓪ ꓟꓶˍ ꓥꓳ꓿ ꓖꓳ ꓕꓲ ꓦꓲ ꓗꓪ ꓢꓲ ꓡꓲ ꓟ ꓔꓯ ꓟꓽ ꓠꓲ, ꓠꓵ ꓢꓴ ꓔꓬ ꓠꓬ ꓠꓴ ꓪ ꓖꓶˍ ꓟ ꓢꓲ ꓡꓲ ꓟ ꓠꓬ ꓠꓴ ꓪ ꓔꓯ ꓚꓱ, ꓬꓲꓼ ꓡˍ ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓐꓯ ꓖꓶˍ ꓡꓳ꓿ ꓕꓱ ꓟ ꓠꓬ ꓮ ꓫꓵꓽ ꓬꓲ. ꓬꓲ ꓢꓲ ꓥ ꓡ꓿
ꓥ ꓡꓳ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓿ ꓬꓲ. ꓬꓲ ꓢꓲ ꓮ ꓘꓶ. ꓙꓳˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓐꓯˍ ꓟ ꓠꓬ꓾ ꓢꓲ ꓒ ꓬꓰ‐ꓢꓴ ꓬꓲ ꓢꓲ ꓡꓲ ꓟ ꓖꓶ ꓠ, ꓟ ꓐꓰ ꓠꓵꓻ ꓠꓲ, ꓖꓶ ꓠ, ꓟ ꓥ ꓡꓳ꓿ ꓕꓲ ꓖ ꓕꓲ ꓦꓲ ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓘꓳ ꓣꓴ ꓫꓵꓽ꓾ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓠꓲ, ꓠꓵ ꓫꓵꓽ꓾ ꓢꓲ ꓒ ꓬꓰ‐ꓢꓴ ꓢꓲ ꓡꓲ ꓟ ꓔꓯ ꓟꓽ ꓘꓳ ꓣꓴ ꓫꓵꓽ ꓙꓳˍ ꓡꓳ꓿ ꓕꓱ ꓕꓲꓽ ꓦꓲ ꓗꓪ ꓢꓲ ꓡꓲ ꓟ ꓙꓳ ꓡ ꓝꓲ꓾ ꓐꓯ ꓥ ꓟꓲ ꓟꓽ ꓘꓳ ꓣꓴ ꓢꓲ ꓠꓬꓲ ꓓꓶꓽ ꓠꓲ, ꓫꓵˍ ꓫꓵꓽ ꓔꓲ. ꓠꓲ, ꓫꓵˍ ꓫꓵꓽ ꓟꓲ ꓙꓳˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓖꓳ ꓟ ꓔꓯ ꓠꓲ, ꓟ ꓠꓯꓸꓼ ꓗꓪ ꓕꓽ ꓗꓶ꓿ ꓠꓴ ꓝꓮꓲ ꓕꓲ ꓖ ꓗꓪ ꓙꓰ꓿ ꓮ ꓡꓲꓳ ꓐꓯ ꓠꓬ ꓠꓴ ꓢꓲ ꓡꓲ ꓟ꓾ ꓠꓴ ꓠꓵꓻ ꓠꓲ, ꓬꓲ ꓪ ꓟꓽ ꓘꓳ ꓣꓴ ꓟ ꓑꓶ. ꓓꓴ ꓖꓳ ꓟ ꓬꓲ ꓖꓳꓽ ꓟꓽ ꓗꓷ ꓡꓰ꓿ ꓮ ꓡꓲ ꓗꓪ ꓛꓲ ꓬꓰˍ ꓡ ꓐꓯ ꓠꓬ꓾ ꓚꓲ. ꓛꓬ ꓔꓬ ꓗꓪ ꓚꓱ, ꓬꓲꓼ ꓡˍ ꓡꓳ꓾ ꓐꓰ ꓢꓷ. ꓠ ꓗ, ꓡꓳ꓿
ꓝꓮꓲ ꓕꓲ ꓒꓳ, ꓗꓪ ꓐꓰ ꓓꓵꓽ ꓙꓽ ꓠꓬꓲˍ ꓕꓯ ꓣꓳ ꓕꓲꓽ ꓠꓬꓲ ꓕꓲ ꓠꓬꓲ ꓞꓳ ꓙꓳˍ ꓟ ꓣꓳ ꓠꓵꓻ ꓠꓲ,꓾ ꓪꓴ‐ꓢ ꓢꓲ ꓡꓲ ꓟ ꓔꓯ ꓣꓱꓽ ꓢꓲ ꓠꓬꓲ ꓢꓴ ꓔꓯ ꓶꓼ ꓥꓳꓽ ꓙꓱꓽ ꓖꓶ ꓠ, ꓟ ꓬꓳ. ꓚꓰꓽˍ ꓡꓳ꓿ ꓢꓴ ꓡꓰ ꓣꓳ ꓔꓯ ꓓꓶꓽ ꓡˍ ꓕꓯ ꓥ ꓟꓲ꓾ ꓢꓴ ꓡꓰ ꓣꓳ ꓔꓯ ꓟꓽ ꓔꓱ, ꓟ ꓟꓽ ꓙꓲꓻ ꓟ ꓐꓯ ꓡˍ ꓕꓯ ꓥ ꓟꓲ ꓣꓳ ꓠꓬ ꓠꓵꓻ ꓠꓲ, ꓡꓰꓽ ꓟꓳ. ꓖꓶ ꓠ ꓗ, ꓡꓳ꓿ ꓕꓱ ꓡꓱ ꓬꓰˍ ꓟ ꓗꓪ ꓐꓰ ꓮ ꓫꓵꓽ ꓟꓶˍ ꓡ ꓐꓰ ꓐꓯˍ ꓠꓬ꓾ ꓣꓳ ꓖꓶˍ ꓟ ꓠꓵꓻ ꓠꓲ, ꓠꓬ ꓖꓳ ꓕꓲ ꓣꓳ ꓠ ꓬꓲ ꓘꓳ ꓣꓴ ꓒꓵꓽˍ ꓠꓬ ꓬꓲ ꓟꓶˍ ꓥꓳ꓿ ꓬꓲ ꓘꓳ ꓣꓴ ꓟꓽ ꓒꓵꓽ ꓠꓬ ꓣꓳ ꓚꓲ. ꓛꓬ ꓔꓬ ꓗꓪ ꓚꓱ, ꓬꓲꓼ ꓡˍ ꓥꓳ ꓐꓯ ꓟ ꓣꓳ ꓙꓵꓻ ꓡꓯ꓿ ꓖꓳ ꓡꓱ ꓟꓽ ꓥ ꓥ ꓐꓰ ꓣꓳ ꓠꓬ ꓣꓳ ꓔꓯ ꓑꓱ, ꓡ ꓢꓴ꓾ ꓣꓳ ꓔꓯ ꓟꓽ ꓘꓳ ꓣꓴ ꓢꓴ ꓔꓯ ꓣꓳ ꓙꓱꓽˍ ꓠꓬ ꓣꓳ ꓙꓱꓽˍ ꓟ ꓬꓲꓼ ꓪ ꓟꓽ ꓘꓳ ꓣꓴ ꓕꓯ ꓣꓳ ꓙꓱꓽˍ ꓟ ꓬꓲ ꓪ ꓐꓰ ꓟꓽ ꓒꓵꓽ ꓕꓯ ꓣꓳ ꓙꓱꓽ ꓘꓶꓽ ꓠꓬ ꓣꓳ ꓔꓯ ꓚꓱ, ꓬꓲꓼ ꓡˍ ꓡꓳ꓾ ꓐꓯ ꓟ ꓣꓳ ꓢꓷ. ꓡꓰ ꓓꓴ ꓬꓰ ꓡꓯ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓔꓯ ꓙꓳˍ ꓟ ꓮ ꓙꓵꓽ ꓠꓬ ꓢꓲ ꓒ ꓬꓰ‐ꓢꓴ ꓡꓰꓽ ꓥ ꓝꓲ꓿ ꓣꓳ ꓔꓯ ꓙꓳˍ ꓟ ꓐꓳ ꓶ ꓮ ꓙꓵꓽ ꓠꓬ ꓢꓲ ꓒ ꓡꓰꓽ ꓥ ꓝꓲ꓾ ꓐꓰ ꓐꓯ ꓢꓲ ꓠꓬꓲ ꓕꓱ ꓕꓲꓽ ꓠꓽ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓢꓯꓼ ꓪ ꓖꓶ ꓡˍ ꓟ ꓥ ꓡꓳ꓿
