ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓠꓬ ꓮ ꓘꓶꓸ ꓛꓲ ꓪꓴ ꓓꓰ ꓡꓰ ꓟ ꓠꓵꓻ ꓠꓲꓹ ꓐꓰ ꓖꓶ ꓔ ꓟ ꓥ ꓡꓳ꓾
ꓡꓳꓹ ꓬꓰ ꓟ ꓠꓽ ꓦꓬꓼ ꓠꓬꓲ ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓑꓮꓲ ꓦꓬꓼ ꓠꓬꓲ ꓗꓪ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓮꓠꓖꓰꓡꓴꓢ ꓪꓽ ꓘꓴ ꓙꓵꓹ ꓕꓯ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ ꓢꓲ ꓫꓬ ꓖꓳ ꓓꓱ ꓑ ꓑ ꓠꓯꓼ ꓗꓪ ꓔꓬ ꓟ ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓠꓬ ꓟꓲ ꓠꓯ ꓡ ꓞꓳ ꓮ ꓙꓵ ꓚꓬꓴ ꓙ ꓟꓶ ꓠꓹ ꓟ ꓐꓱ ꓶ ꓠꓲꓹ ꓠꓵꓻ ꓢꓲ ꓖꓶ ꓔ ꓟ ꓥ ꓡꓳ꓾ ꓐꓰ ꓐꓯ ꓖꓶ ꓔ ꓟ ꓥꓳ=
ꓣꓳ ꓤꓶꓻ ꓐꓰ ꓕꓲ ꓪ ꓚꓴ ꓔꓲ ꓗꓷ ꓟ ꓑ ꓑ ꓐꓰ ꓛꓱꓼ ꓡꓱꓼ ꓙꓵ ꓔꓯ ꓪꓴ-ꓢ ꓡꓰ ꓘꓳꓹ ꓣꓴ ꓢꓲ ꓶ ꓥꓳꓽ ꓙꓱ ꓗꓷ ꓗꓸ ꓠꓯꓸ ꓢꓲ ꓫꓬ ꓡꓰ ꓝꓲ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓐꓰ ꓒꓬꓱꓼ ꓡꓰ ꓝꓲ ꓟ ꓥꓳ= ꓕꓱ ꓟ ꓠꓬ ꓟꓲ ꓠꓯ ꓡ ꓞꓳ ꓐꓴ ꓚꓬꓴ ꓙ ꓟꓶ ꓠꓹ ꓟ ꓐꓱ ꓶ ꓠꓲꓹ ꓠꓵꓻ ꓢꓲ ꓖꓶ ꓔ ꓟ ꓪꓴ ꓓꓰ ꓡꓰ ꓟ ꓥ ꓡꓳ=
ꓠꓬꓲꓸ ꓠꓬꓲ ꓟꓵ ꓗꓳ ꓓꓵ ꓓꓵ ꓗꓪ ꓔꓬ ꓟ ꓗ-ꓔꓳ-ꓡꓲꓗ ꓘꓴ ꓜꓲꓼ ꓞꓳ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓾ ꓢꓲ ꓫꓬ ꓖꓳ ꓓꓱ ꓑ ꓑ ꓑꓮꓲ ꓔꓯ ꓬꓰ ꓔꓬ ꓟ ꓥ ꓡꓳ= ꓕꓱ ꓑꓮꓲ ꓦꓬꓼ ꓠꓬꓲ ꓠꓯꓼ ꓗꓪ ꓵ ꓠꓹ ꓟ ꓪꓴ-ꓢ ꓶ ꓓꓳ ꓫꓱꓸ ꓓꓳ ꓢꓲ ꓫꓬ ꓕꓳ ꓶ ꓝꓲꓸ ꓗꓪ ꓑ ꓑ ꓥꓪꓽ ꓒꓬꓹ ꓐꓰ ꓥꓪ ꓠꓬꓲꓽ ꓟ ꓔꓯ ꓟꓬ ꓡ ꓝꓲ_ ꓟ ꓚꓱꓹ ꓔꓯ ꓡꓳꓸ ꓟꓳ ꓪ ꓟ ꓥꓳ=
ꓡꓴ-ꓘ ꓕꓳ ꓶ ꓗꓪ ꓬꓲ ꓔꓶꓸ ꓮ ꓟꓬꓹ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓠꓯꓼ ꓗꓪ ꓡ ꓢꓲ ꓠꓹ ꓠ ꓢꓴ ꓐꓴ ꓛꓳ ꓫꓱꓽ ꓡ ꓢꓴ ꓐꓴ ꓠꓻ ꓫꓬꓹ ꓪ ꓟꓶ ꓠꓹ ꓟ ꓢꓯꓼ ꓕꓵꓼ ꓔꓬ ꓢꓴ ꓐꓴ ꓡ ꓞꓳ ꓮ ꓟꓬꓹ ꓔꓯ ꓬꓲ ꓪ ꓠꓯꓼ ꓗꓪ ꓙꓳ_ ꓟ ꓜ ꓓꓴ ꓮ ꓠꓶꓸ ꓞ ꓐꓰ ꓖꓶ ꓜ ꓠꓹ ꓟ ꓛꓳ ꓒꓯꓹ ꓐꓴ ꓔꓯ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓥꓳ=
ꓕꓱ ꓮꓸ ꓠꓶꓸ ꓡꓰ ꓙꓳ ꓟ ꓜ ꓓꓴ ꓠꓬ ꓕꓱ ꓡ ꓞꓳ ꓮ ꓟꓬꓹ ꓔꓯ ꓐꓳ ꓞꓹ ꓡꓰ ꓠ ꓗꓪ ꓛꓲ ꓖꓶ ꓜ ꓐ ꓡ ꓢꓲ ꓠꓬꓲ ꓬꓲ ꓦꓶ ꓬꓲ ꓒꓯ ꓥ ꓟꓲ ꓖꓳ ꓫ ꓟꓶ ꓠ ꓗꓪ ꓛꓲ ꓓꓵꓽ ꓙ ꓟꓶ ꓓꓴ ꓒꓬꓱꓼ ꓡ ꓟ ꓥꓳ=
ꓮ ꓠꓶꓸ ꓞ ꓗꓪ ꓐꓰ ꓖꓶ ꓜ ꓟ ꓠꓬ ꓡ ꓞꓳ ꓮ ꓟꓬꓹ ꓐꓱ ꓶ ꓙꓲ ꓖꓴ ꓙꓳ ꓡꓰ_ ꓟ ꓥꓳ= ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓑꓮꓲ ꓗꓪ ꓕꓱ ꓢꓲ ꓫꓬ ꓕꓳ ꓶ ꓝꓲꓸ ꓠꓬ ꓙꓲ ꓢꓴ ꓢꓲ ꓤ ꓐꓴ ꓔꓯ ꓢꓷꓸ ꓡꓰ ꓝꓲ ꓟ ꓠꓬ ꓠꓴ ꓪ ꓡꓰ ꓬꓰ ꓙ_ ꓟ ꓖꓶ ꓜ ꓟ ꓠꓲꓹ ꓡꓱ ꓡꓱ ꓐꓰ ꓬꓰ_ ꓟ ꓙꓵꓹ ꓗꓪ ꓪꓴ-ꓢ ꓐꓰ ꓕꓲ ꓠꓲꓹ ꓕꓲ ꓪ ꓗꓷ ꓡꓰ ꓟ ꓑꓶ ꓓꓴ ꓪꓴ ꓓꓰ ꓡꓰ ꓟ ꓙꓲ ꓖꓴ ꓙꓳ ꓡ ꓟ ꓥꓳ= ꓕꓱ ꓟ ꓔꓯ ꓠꓲꓹ ꓟ ꓘꓴꓽ ꓗꓪ ꓓꓵꓽ ꓙ ꓔ ꓓꓴ ꓬꓰ ꓡꓯ=
ꓐꓹ ꓐ ꓪꓴ-ꓢ ꓠꓬ ꓣꓳ ꓟꓲ ꓠꓯ ꓞꓳ ꓤ ꓔꓯ ꓚꓬꓴ ꓙ ꓠꓹ ꓟ ꓬꓲ ꓢꓯꓼ ꓟꓬ ꓔꓯ ꓖꓶ ꓗꓷ ꓟ ꓥꓳ= ꓢꓲ ꓫꓬ ꓟ ꓤ ꓶ ꓡꓯꓸ ꓚꓵ ꓬꓲ ꓟꓹ ꓟ ꓒꓬꓱꓼ ꓡꓰ ꓝꓲ ꓟ ꓥꓳ꓾ ꓣꓳ ꓟꓲ ꓠꓯ ꓡ ꓞꓳ ꓡꓰ ꓐꓰ ꓫꓵꓻ ꓗꓴꓸ ꓟ꓾ ꓕꓱ ꓧꓪ ꓖꓳ ꓓꓱꓽ ꓐꓰ ꓮ ꓐꓲ ꓕꓲ ꓣꓳ ꓐꓰ ꓬꓲ ꓟꓹ ꓟ ꓔꓯ ꓖꓶ ꓗꓷ ꓟ ꓥꓳ= ꓪꓴ-ꓢ ꓗꓪ ꓐꓰ ꓫꓸ ꓫꓸ ꓟꓷ ꓟꓷ ꓐꓰ ꓟꓲ ꓠꓯ ꓗꓪ ꓬꓯꓼ ꓡ ꓢꓲ ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓚꓬꓴ ꓙ ꓟꓶ ꓠꓹ ꓟ ꓐꓱ ꓶ ꓢꓲꓺ ꓗꓷ ꓟ ꓥꓳ=ꓟꓲ ꓠꓯ ꓡ ꓞꓳ ꓕꓲ ꓣꓳ ꓡꓰ ꓐꓰ ꓚꓲ ꓛꓬ ꓤꓶꓻ ꓔꓯ ꓪꓴ-ꓢ ꓠꓯꓼ ꓗꓪ ꓡꓯꓼ ꓙꓱ ꓔ ꓡꓳ=
ꓮ ꓟꓬ ꓛꓲ ꓣꓳꓺ ꓓꓰ ꓡꓰ ꓟ ꓥ ꓥ ꓟꓲ ꓠꓱꓸ ꓐꓯꓼ ꓢꓴ ꓔꓯ ꓠꓲꓹ ꓡꓱ ꓡꓱ ꓐꓰ ꓖꓶ_ ꓕꓯ ꓘꓳꓹ ꓣꓴ ꓢꓴ ꓐꓴ ꓣꓳ ꓔꓯ ꓢꓷꓸ ꓔ ꓕꓯ ꓮ ꓘꓶꓸ ꓛꓲ ꓡꓳꓸ ꓐꓲ_ ꓟ ꓔꓯ ꓣꓳ ꓘꓳꓹ ꓣꓴ ꓟꓶ_ ꓡꓳ= ꓣꓳ ꓔꓱꓹ ꓟ ꓠꓲꓹ ꓟ ꓐꓰ ꓖꓶ_ ꓟ ꓡꓯ ꓫꓴ ꓕꓲ ꓟ ꓗꓪ ꓐꓰ ꓖꓶ ꓢꓴ ꓘꓳꓹ ꓣꓴ ꓢꓴ ꓠꓬꓲ ꓣꓳ ꓡꓱꓼ ꓮ ꓘꓶꓸ ꓛꓲ ꓠꓲꓹ ꓡꓱ ꓢꓲ ꓠꓶꓽ ꓞꓹ ꓟ ꓔꓯ ꓓꓵꓽ ꓙ ꓟꓶ_ ꓡꓳ꓾ ꓕꓱ ꓟ ꓠꓬ ꓮ ꓘꓶꓸ ꓡꓳꓸ ꓐꓲ ꓓꓴ ꓙꓳ_ ꓡꓳ=
ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓥ ꓟ ꓢꓲ ꓫꓬ ꓖꓳ ꓓꓱ ꓑ ꓑ ꓑꓶ ꓓꓴ ꓖꓶ ꓢꓴ ꓐꓰ ꓘꓳꓹ ꓣꓴ ꓢꓴ ꓠꓬꓲꓽ ꓗꓳꓸ ꓚ ꓗꓪ ꓠꓲꓹ ꓡꓱ ꓟ ꓔꓯ ꓪ ꓟ ꓡꓰ ꓐꓰ ꓣꓳ ꓤꓶꓻ ꓐꓰ ꓕꓲ ꓪ ꓢꓲ ꓫꓬ ꓟ ꓑ ꓑ ꓐꓰ ꓛꓱꓼ ꓡꓱꓼ ꓙꓵ ꓔꓯ ꓶ ꓥꓳꓽ ꓙꓱ ꓚꓴ ꓔꓲ_ ꓟ ꓑꓶ ꓓꓴ ꓣꓳ ꓠꓯꓼ ꓗꓪ ꓚꓬꓴ ꓙ ꓟꓶ ꓠꓹ ꓟ꓾ ꓟꓲ ꓠꓯ ꓡ ꓞꓳ ꓮ ꓙꓵ ꓚꓬꓴ ꓙ ꓟꓶ ꓠꓹ ꓟ ꓐꓱ ꓶ ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓐꓰ ꓒꓳꓹ ꓡꓰ ꓟ ꓥꓳ= ꓣꓳ ꓚꓴ ꓔꓲ ꓟ ꓔꓯ ꓪꓴ-ꓢ ꓠꓬ ꓗꓹ ꓗꓹ ꓛꓲ ꓛꓲ ꓐꓰ ꓘꓳꓹ ꓣꓴ ꓟ ꓠꓬ ꓪꓴ-ꓢ ꓐꓰ ꓟꓲ ꓠꓯ ꓡ ꓞꓳ ꓐꓰ ꓕꓲ ꓠꓲꓹ ꓕꓲ ꓪ ꓥ ꓟ ꓔꓯ ꓟꓸ ꓖꓶ ꓔ ꓟ ꓥꓳ= ꓣꓳ ꓔꓯ ꓥ ꓟꓲ ꓬꓲ ꓐꓰ ꓕꓲ ꓪ ꓗꓷ ꓠꓹ ꓟ ꓘꓴ ꓔ ꓡꓳ= ꓚꓴ ꓔꓲ ꓟ ꓐꓰ ꓘꓳ ꓣꓴ ꓟ ꓠꓬ ꓠꓵꓻ ꓠꓲꓹ ꓡꓯꓼ ꓫꓴ ꓔꓯ ꓟꓸ ꓖꓶ ꓔ ꓡꓳ꓾ ꓕꓱ ꓡꓯꓼ ꓫꓴ ꓠꓬ ꓣꓳ ꓔꓯ ꓪꓴ-ꓢ ꓐꓰ ꓕꓲ ꓠꓲꓹ ꓕꓲ ꓪ ꓗꓷ ꓡꓰ ꓝꓲ_ ꓡꓳ=
ꓫꓪ ꓫꓵꓸ ꓮ ꓟꓬꓹ ꓗꓪ ꓐꓰ ꓑ ꓑ ꓒꓬꓱꓼ ꓡ ꓟ ꓡꓰ ꓐꓰ ꓣꓳ ꓮ ꓙꓵ ꓕꓲ ꓠꓲꓹ ꓕꓲ ꓪ ꓡꓯ ꓙꓱ ꓟ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓐꓯ_ ꓟ ꓠꓵꓻ ꓠꓲꓹ꓾ ꓫꓱꓸ ꓤ ꓠꓲꓹ ꓑ ꓑ ꓒꓬꓱꓼ ꓡ ꓟ ꓥꓳ= ꓢꓲ ꓒ ꓬꓰ-ꓢꓴ ꓬꓲ ꓚꓴ ꓔꓲ ꓟ ꓡꓯ ꓙꓱ ꓟ ꓐꓰ ꓕꓲ ꓪ ꓣꓳ ꓠꓲꓹ ꓡꓱ ꓡꓱ ꓐꓰ ꓚꓴ ꓔꓲ ꓟ ꓔꓯ ꓕꓲ ꓠꓲꓹ ꓕꓲ ꓪ ꓗꓷ ꓠꓹ ꓟ ꓐꓱ ꓶ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ=
