ꓟꓵꓽ ꓘꓳꓼ ꓐꓰ ꓫ. ꓕꓱ ꓟ (Environment program)
ꓠꓬꓲ. ꓠꓬꓲ ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓚꓱ, ꓗꓪ ꓐꓰ ꓬꓲ ꓒꓵꓽ ꓮ ꓟꓬ, ꓟꓽ ꓐꓯˍ ꓟ ꓐꓴ ꓞꓲꓽ ꓮ ꓟꓬ, ꓫꓬ, ꓔ ꓟ ꓪꓴ. ꓠꓬꓲ ꓒꓬꓱꓼ ꓡ ꓟ ꓟꓵꓽ ꓘꓳꓼ ꓒꓳ, ꓚꓱ, ꓥ ꓡꓳ꓿ ꓮ ꓟꓶ ꓟ ꓙꓵ, ꓗꓪ ꓚꓳꓟꓑꓮꓠꓬ ꓕꓲ ꓕꓱ ꓠꓬ ꓐꓴ ꓞꓲꓽ ꓟꓶ ꓞꓲꓽ ꓮ ꓟꓬ, ꓠꓬ ꓬꓲ ꓒꓵꓽ ꓮ ꓟꓬ, ꓟꓽ ꓐꓯ ꓟ ꓮ ꓟꓬ, ꓫꓬ, ꓓꓳ ꓡ ꓟ ꓥ ꓡꓳ꓿
ꓕꓱ ꓡꓰ ꓐꓰ ꓬꓲ ꓒꓵꓽ ꓮ ꓟꓬ, ꓟꓽ ꓐꓯ ꓟ ꓐꓴ ꓞꓲꓽ ꓪꓴꓽ ꓟ ꓪꓴ. ꓠꓬꓲ ꓙꓼ ꓡꓰ ꓫꓬ, ꓟ ꓗꓪ ꓣꓱ ꓟ ꓬꓲꓻ ꓙꓬ ꓝꓮꓲ ꓐꓴ ꓞꓲ ꓕꓱ ꓟ ꓔꓯ ꓮ ꓔꓳ ꓔꓳ ꓡꓳ ꓗꓷ ꓟ ꓪꓴ. ꓠꓬꓲ ꓟꓽ ꓛꓵꓽ ꓡꓰ ꓟꓽ ꓐꓬ ꓡꓰ ꓮ ꓟꓬ, ꓘꓳꓼ ꓙꓳ ꓟ ꓪꓴ. ꓠꓬꓲ ꓟꓵꓽ ꓘꓳꓼ ꓒꓳ, ꓡꓰ ꓝꓲ ꓟ ꓥ ꓡꓳ꓿
ꓚꓳꓟꓑꓮꓠꓬ ꓕꓲ ꓐꓱ ꓠꓬ ꓐꓴ ꓞꓲꓽ ꓐꓲ ꓐꓲ ꓡꓰ ꓔꓯ ꓬꓲ ꓒꓵꓽ ꓮ ꓟꓬ, ꓟꓽ ꓐꓯ ꓟ ꓐꓴ ꓞꓲꓽ ꓮ ꓟꓬ, ꓫꓬ, ꓓꓳ ꓡ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓙꓼ ꓣꓱ ꓢꓲ ꓠꓬꓲ ꓫꓬ, ꓔꓬ ꓟ ꓪꓴ. ꓠꓬꓲ ꓟꓶ ꓞꓽ ꓠꓬ ꓮ ꓟꓬ, ꓣꓱ ꓠ, ꓗꓷ ꓡꓰ ꓟ ꓪꓴ. ꓠꓬꓲ ꓮ ꓘꓶ. ꓗꓴ ꓡꓰ ꓟ ꓥ ꓡꓳ꓿
ꓕꓱ ꓡꓰ ꓐꓰ ꓞꓳ ꓤ ꓠꓬ ꓒꓴ ꓫꓵˍ ꓮ ꓟꓬ, ꓪ ꓠ, ꓟ ꓐꓱ ꓶ ꓕꓱ ꓡꓱ ꓫꓵꓽ ꓟꓬꓱꓺ ꓥ ꓟ ꓚꓳꓟꓑꓮꓠꓬ ꓮ ꓟꓬ, ꓫꓬ, ꓢꓲ ꓠꓬꓲ ꓒꓴ ꓧꓪ ꓟ ꓮ ꓟꓬ, ꓙꓳ ꓟ ꓥ ꓡꓳ꓿ ꓝꓮꓲ ꓣꓳ ꓐꓴ ꓞꓲꓽ ꓗꓪ ꓣꓱ ꓟ ꓠꓯꓻ ꓞꓲꓼ ꓑꓶ. ꓓꓴ ꓟꓲ ꓠꓯ ꓔꓯ ꓮ ꓘꓶ. ꓛꓲ ꓠꓻ ꓡꓰ ꓝꓲ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓐꓴ ꓞꓲ ꓗꓪ ꓣꓱ ꓟ ꓠꓯꓻ ꓞꓲ ꓠꓬ ꓢꓽ ꓢꓽ ꓡꓰ ꓐꓬ ꓡꓰ ꓟꓽ ꓓꓽ ꓧꓳꓽ ꓡꓰ ꓟꓽ ꓓꓽ ꓟ ꓪꓴ. ꓠꓬꓲ ꓥ ꓡꓳ꓿
ꓣꓳ ꓖꓪꓽ ꓟ ꓐꓴ ꓞꓲꓽ ꓔꓯ ꓡꓳ ꓗꓷ ꓕꓯ ꓟꓶ ꓦ ꓦ ꓢꓲ ꓠꓬꓲ ꓬꓲꓻ ꓙꓬ ꓙꓵꓽ ꓡ ꓕꓯ ꓐꓴ ꓞꓲ ꓗꓪ ꓙꓳ ꓟ ꓠꓯꓻ ꓞꓲꓼ ꓠꓬ ꓟꓲ ꓠꓯ ꓔꓯ ꓠꓻ ꓡꓰ ꓝꓲ ꓟ ꓥ ꓡꓳ꓿
ꓝꓮꓲ ꓐꓴ ꓞꓲ ꓮ ꓟꓬ ꓠꓬ ꓠꓰꓲꓡꓳꓠ ꓗꓪ ꓐꓰ ꓫꓬ, ꓔ ꓟ ꓥ ꓟ ꓪꓴ. ꓠꓬꓲ ꓕꓱ ꓟ ꓟꓬ Plastics ꓐꓰ ꓫꓱ, ꓡꓯꓽ ꓘꓳ ꓟ ꓥ ꓡꓳ꓿ ꓬꓲ ꓪ ꓠꓬ ꓬꓲ ꓞꓲ ꓘꓳꓼ ꓟꓽ ꓐꓬ ꓡꓰ ꓟ ꓪꓴ. ꓠꓬꓲ ꓟꓵꓽ ꓘꓳꓼ ꓒꓳ, ꓡꓰ ꓝꓲ ꓟ ꓔꓯ ꓒꓬꓱꓼ ꓡ ꓝꓲ ꓐ ꓡ ꓟ ꓥ ꓡꓳ꓿
ꓣꓳ ꓡꓰ ꓡꓳ ꓗꓷ ꓟ ꓐꓴ ꓞꓲ ꓟꓶ ꓞꓲ ꓠꓬ (200) ꓘꓳꓼ ꓗꓪ ꓢꓲ ꓠꓬꓲ ꓛꓵꓽ ꓡꓰ ꓟ ꓐꓴ ꓞꓲ ꓟꓶ ꓞꓲ ꓮ ꓟꓬ, ꓙꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓤ ꓟꓳ ꓢꓲ ꓠꓬꓲ ꓣꓳ ꓖꓪꓽ ꓫꓵꓽ ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓟꓵꓽ ꓘꓳꓼ ꓒꓳ, ꓡ ꓓꓲ ꓟ ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
