ꓠꓬꓲ. ꓠꓬꓲ ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓝꓲ ꓓꓴ ꓕꓳ‐ꓟ ꓔꓯ꓾ “ꓠꓴ ꓠꓬ ꓥꓪ ꓔꓯ ꓟꓳꓻˍ ꓠꓬꓲ ꓙꓵꓻˍ ꓟ ꓥ ꓡ? ꓟꓽ ꓟꓳꓻ ꓠꓬꓲˍ ꓟꓲ ꓙꓵꓻ ꓢꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ”꓾ ꓐꓰ ꓐꓯˍ ꓟ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓗꓪ ꓐꓰ ꓣꓳ ꓦꓻ ꓢꓯꓼ ꓪ ꓣꓴ ꓓꓴ ꓥꓳ꓿
ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ ꓬꓳ‐ꓦ 20ꓽ24‐29 ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓬꓲ ꓕꓲꓽ ꓟꓴꓽ ꓠꓬ꓾ ꓢꓲ ꓒ ꓬꓰ‐ꓢꓴ ꓫꓵˍ ꓗꓪ ꓐꓰ ꓢꓯ. ꓬꓲꓼ ꓡˍ ꓟ ꓦꓬꓼ ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓬꓲ. ꓝꓲ ꓓꓴ ꓐꓴ ꓠꓬ ꓙꓳꓺ ꓠꓬꓲ ꓐꓰ ꓔꓬ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓴ ꓔꓯ ꓟꓳ. ꓖꓶˍ ꓕꓯ ꓝꓲ ꓓꓴ ꓕꓳ‐ꓟ ꓠꓬ ꓖꓳ ꓗꓪ ꓟꓽ ꓔꓬ꓿ ꓖꓳ ꓟ ꓑꓶ. ꓝꓲ ꓓꓴ ꓐꓴ ꓠꓬ ꓝꓲ ꓓꓴ ꓕꓳ‐ꓟ ꓔꓯ꓾ ꓥꓪ ꓠꓴꓽ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓟꓳꓻ ꓗꓷꓳ꓾ ꓐꓰ ꓐꓯ ꓖꓶˍ ꓕꓯ ꓝꓲ ꓓꓴ ꓕꓳ‐ꓟ ꓠꓬ꓾ ꓬꓲ ꓡꓯꓽ ꓒꓯ, ꓗꓪ ꓔꓰ‐ꓝꓲꓼ ꓑ ꓔꓯ ꓥꓪ ꓟꓽ ꓕꓲꓺ ꓠꓬꓲ ꓠꓬ꓾ ꓬꓲ ꓙꓳꓽ ꓐꓬ ꓗꓪ ꓡ. ꓒꓬ. ꓗ. ꓙ ꓙꓰ ꓟ ꓔꓯ ꓥꓪ ꓟꓽ ꓢꓳ ꓠꓬꓲ ꓠꓬ ꓥꓪ ꓟꓽ ꓙꓵꓻ꓾ ꓐꓰ ꓐꓯ ꓖꓶˍ ꓡꓳ꓿
ꓖꓳ ꓗ ꓠꓯ. ꓠꓬ ꓦꓰꓼ ꓠꓬꓲ ꓕꓲꓽ ꓠꓬꓲ ꓗꓪ ꓝꓲ ꓓꓴ ꓐꓴ ꓐꓰ ꓝꓲ ꓓꓴ ꓕꓳ‐ꓟ ꓔꓬ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓝꓮꓲ ꓕꓲꓽ ꓧꓪ, ꓶꓻ ꓒꓬꓱꓽ ꓟꓳ. ꓖꓶ ꓡ ꓢꓲ ꓠꓬꓲ “ꓠꓴ ꓪ ꓢꓲ ꓡꓲ ꓟ ꓙꓳ ꓝꓲ” ꓐꓰ ꓐꓯˍ ꓡꓳ꓿ ꓖꓳ ꓗ ꓠꓯ. ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓝꓲ ꓓꓴ ꓕꓳ‐ꓟ ꓔꓯ꓾ ꓕꓳ‐ꓟꓺꓳ꓾ ꓠꓴ ꓡꓯ ꓒꓯ, ꓕꓱ ꓗꓪ ꓢꓲ ꓠꓬꓲ ꓡꓯ꓿ ꓥꓪ ꓙꓳꓽ ꓐꓬ ꓗꓪ ꓫꓳ ꓠꓬꓲ ꓡꓯ꓾ ꓐꓯ ꓖꓶˍ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓝꓲ ꓓꓴ ꓕꓳ‐ꓟ ꓔꓯ ꓣꓳ ꓡꓳ. ꓠꓬꓲˍ ꓥꓳ ꓐꓯ ꓠꓬ꓾ ꓬꓲ ꓠꓬ ꓙꓵꓻ ꓠꓲ, ꓐꓽ ꓢꓴ꓾ ꓬꓲ ꓠꓬ ꓙꓵꓻ ꓠꓲ, ꓟꓽ ꓙꓳ ꓢꓴ ꓥ ꓡꓳ ꓐꓰ꓾ ꓣꓳ ꓕꓱ ꓡꓱ ꓡꓳ. ꓟꓳꓻˍ ꓥꓳ꓿ ꓮꓽ ꓟ ꓥˍ ꓟꓲ ꓕꓱ ꓡꓱ ꓐꓯ ꓔꓬ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓝꓲ ꓓꓴ ꓕꓳ‐ꓟ ꓔꓯ ꓠꓬꓲ. ꓠꓬꓲ ꓣꓳ ꓔꓯꓺ ꓢꓳ ꓓꓴ ꓓꓽ ꓟ ꓕꓲꓽ ꓟ ꓙꓳˍ ꓡꓳ꓿ ꓕꓱ ꓟ ꓠꓬ ꓮ ꓫꓵꓽ ꓥ ꓡ ꓐꓯ ꓠꓬ꓾ ꓝꓲ ꓓꓴ ꓕꓳ‐ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓱ. ꓐꓯ ꓡ ꓞꓳ ꓐꓱ ꓶ ꓮ ꓡꓲ ꓘꓶ ꓛꓲ ꓪꓽ ꓠꓬꓲˍ ꓟ ꓬꓲ ꓬꓰ ꓔꓬ ꓟ ꓔꓯ ꓥ ꓟꓲ ꓝꓲ ꓓꓴ ꓕꓳ‐ꓟ ꓬꓲ ꓠꓲ, ꓟ ꓗꓪ ꓟꓽ ꓓꓵꓽ꓿
ꓢꓲ ꓒ ꓬꓰ‐ꓢꓴ ꓠꓬ ꓡ ꓞꓳ ꓥꓪꓽ ꓔꓴ ꓣꓳ ꓔꓯ ꓖꓶ ꓜꓽ ꓖꓶ ꓓꓳꓻˍ ꓡꓳ꓿ ꓠꓲꓽ ꓮ ꓟꓬ, ꓔꓯ ꓥ ꓟꓲ ꓬꓲ ꓖꓼ ꓓꓳ ꓖꓶˍ ꓡꓳ꓿ ꓠꓻ ꓢꓴ ꓒꓬꓽ ꓢꓴ ꓮ ꓟꓬ, ꓔꓯ ꓥ ꓟꓲ ꓬꓲ ꓫꓬ, ꓖꓶˍ ꓡꓳ꓿ ꓪꓽ ꓠꓬꓲˍ ꓟ ꓟꓬꓱꓽ ꓮ ꓟꓬ, ꓬꓰ ꓖꓶˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓝꓲ ꓓꓴ ꓕꓳ‐ꓟ ꓠꓬ ꓖꓳ ꓟ ꓔꓯ ꓠꓲ, ꓟ ꓗꓪ ꓟꓽ ꓓꓵꓽ꓿ ꓬꓲ ꓠꓲ, ꓟ ꓟꓽ ꓙꓳ꓿ ꓖꓳ ꓡꓱ ꓐꓯ ꓥ ꓟꓲ ꓝꓲ ꓓꓴ ꓕꓳ‐ꓟ ꓬꓲ ꓠꓲ, ꓟ ꓙꓳ ꓓꓰ ꓡꓰˍ ꓟ ꓕꓲꓽ ꓟ ꓠꓬ ꓮ ꓫꓵꓽ ꓥ ꓡ ꓐꓯ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓐꓱ ꓶ ꓮ ꓫꓵꓽ ꓬꓰ ꓖꓶ ꓗꓷ ꓡ ꓐꓯ ꓟ ꓔꓯ ꓬꓲ ꓢꓷ. ꓠꓲ, ꓫꓵˍ ꓟ ꓡꓰꓽ ꓥ ꓡꓳ꓿
ꓕꓱ ꓟ ꓑꓶ. ꓓꓴ ꓬꓲ ꓠꓬ ꓬꓲ ꓔꓯ ꓚꓬꓴ. ꓙ ꓖꓶ ꓡˍ ꓟ ꓢꓲ ꓒ ꓬꓰ‐ꓢꓴ ꓠꓬ ꓔꓱ, ꓚꓵˍ ꓟ ꓪꓴ‐ꓢ ꓥ ꓡ꓿ ꓬꓲ ꓐꓱ ꓶ ꓢꓲ ꓒ ꓬꓰ‐ꓢꓴ ꓠꓬ ꓚꓵ ꓚꓵ ꓠꓵꓻ ꓠꓲ, ꓢꓲ ꓒ ꓥ ꓡ ꓐꓯˍ ꓟ ꓬꓲ ꓢꓷ. ꓠꓲ, ꓫꓵˍ ꓟ ꓑꓶ. ꓓꓴ ꓔꓲꓺ ꓢꓲꓽ ꓢꓲꓽ ꓡꓰꓽ ꓬꓲ ꓢꓷ. ꓠꓲ, ꓫꓵˍ ꓟ ꓑꓶ. ꓓꓴ ꓬꓲ ꓠꓬ ꓬꓲ ꓡꓯ ꓒꓯ, ꓡꓰ ꓢꓲꓺ ꓠꓲ, ꓫꓵˍ ꓟ ꓥ ꓡꓳ꓿ ꓬꓲ ꓙꓳꓽ ꓐꓬ ꓗꓪ ꓫꓳꓽ ꓠꓲ, ꓫꓵˍ ꓡꓳ꓾ ꓐꓯˍ ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓔꓱ, ꓔꓱ, ꓐꓯ ꓪˍ ꓠꓬ ꓝꓲ ꓓꓴ ꓕꓳ‐ꓟ ꓠꓬ ꓙꓵꓻ ꓠꓲ, ꓐꓽ ꓢꓴ ꓟꓽ ꓥ꓿ ꓬꓲ ꓠꓬ ꓬꓲ ꓐꓱ ꓶ ꓢꓲ ꓒ ꓬꓰ‐ꓢꓴ ꓠꓬ ꓮ ꓡꓲ ꓘꓶ ꓛꓲ ꓔꓱ, ꓚꓵˍ ꓟ ꓥ ꓡ ꓐꓯ ꓟ ꓬꓲ ꓢꓷ. ꓠꓲ, ꓫꓵˍ ꓟ ꓑꓶ. ꓓꓴ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓥ ꓟꓲ ꓕꓱ ꓡꓱ ꓥꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓘꓴ ꓜꓲꓼ ꓞꓳ ꓐꓱ ꓶ꓾ ꓣꓳ ꓦꓲꓻ ꓢꓴ ꓐꓱ ꓶ꓾ ꓥ ꓠꓬ ꓠꓱ. ꓐꓯ ꓢꓴ ꓐꓱ ꓶ ꓪꓽ ꓠꓬꓲˍ ꓟ ꓕꓱ ꓡꓱ ꓬꓰ ꓖꓶ ꓗꓷꓳ꓿ ꓘꓴ ꓜꓲꓼ ꓞꓳ ꓗꓪ ꓕꓱ ꓡꓱ ꓬꓰ ꓖꓶ ꓗꓷꓳ꓾ ꓐꓰ ꓣꓳ ꓐꓯ ꓔꓬ ꓥ ꓟꓲ ꓖꓳ ꓟ ꓔꓯ ꓣꓳ ꓠꓲ, ꓟ ꓗꓪ ꓗꓶ ꓔ ꓟꓽ ꓛꓵ꓿ ꓣꓳ ꓠꓬ ꓠꓬꓲ. ꓠꓬꓲ ꓣꓳ ꓢꓲ ꓒ ꓬꓰ‐ꓢꓴ ꓠꓬ ꓥꓪ ꓐꓱ ꓶ ꓠꓴ ꓪ ꓐꓱ ꓶ ꓮ ꓡꓲ ꓫꓵꓽ ꓢꓲ ꓒ ꓥ ꓡ ꓐꓯˍ ꓟ ꓝꓲ ꓓꓴ ꓕꓳ‐ꓟˍ ꓡꓰ ꓐꓰ ꓣꓳꓽ ꓢꓳꓽ ꓠꓬꓲ ꓓꓴ꓾ ꓣꓳ ꓢꓷ. ꓠꓬꓲ ꓓꓴ꓾ ꓛꓽ ꓠꓬꓲ ꓓꓴ ꓥꓳ꓿
ꓢꓲ ꓒ ꓬꓰ‐ꓢꓴ ꓥˍ ꓟꓲ ꓠꓬ. ꓠꓬꓲ ꓠꓴ ꓪ ꓐꓰ ꓬꓲ. ꓐꓰ ꓮ ꓡꓲ ꓘꓶ ꓛꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓠꓲ, ꓠꓵ ꓔꓬ ꓡ ꓐꓯ ꓟ ꓬꓲ ꓟ. ꓖꓶ ꓠꓲ, ꓫꓵˍ ꓟ ꓑꓶ. ꓓꓴ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓝꓲ ꓓꓴ ꓕꓳ‐ꓟ ꓠꓬ ꓡꓳ, ꓬꓰˍ ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓟꓴꓽ ꓗꓪ ꓗꓪ ꓓꓯꓻ ꓙꓰ꓾ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓟꓳꓻ ꓗꓷ ꓡꓰˍ ꓥ ꓟꓲ ꓝꓲ ꓓꓴ ꓕꓳ‐ꓟ ꓶꓼ ꓓꓳꓽ ꓫꓱ, ꓓꓳꓽ ꓚ ꓟ. ꓖꓶˍ ꓟ ꓠꓬ ꓲ‐ꓓꓲ‐ꓬ ꓟꓵꓽ ꓗꓪ ꓛꓲ ꓡ ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓟꓳꓻ ꓐꓯ ꓥ ꓟꓲ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓢꓯꓼ ꓟꓬ ꓖꓶ ꓗꓷ ꓟ ꓥ ꓡꓳ꓿ ꓕꓱ ꓟ ꓠꓬ ꓝꓲ ꓓꓴ ꓕꓳ‐ꓟ ꓔꓯ ꓣꓳ ꓔꓯꓺ ꓢꓳ ꓓꓴ ꓓꓽ ꓟ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓴ ꓪ ꓐꓱ ꓶ ꓮ ꓡꓲ ꓫꓵꓽ ꓪꓴ‐ꓢ ꓥ ꓡ꓾ ꓮ ꓡꓲ ꓫꓵꓽ ꓢꓲ ꓒ ꓥ ꓡ ꓐꓯˍ ꓟ ꓝꓲ ꓓꓴ ꓕꓳ‐ꓟˍ ꓡꓰ ꓐꓰ ꓠꓴ ꓪ ꓔꓱ, ꓔꓱ, ꓚꓵ ꓚꓵ ꓡꓰꓽ ꓛꓽ ꓟꓶ ꓡꓰ ꓝꓲ꓿
