ꓔꓲꓸꓸ ꓒ ꓒꓬꓱꓼ ꓠꓹ ꓟ ꓢꓳ ꓔꓬ ꓢꓴ ꓐꓴꓳ꓾ꓠꓴ ꓪ ꓟꓬꓽ ꓢꓶ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓡꓰꓽ ꓡꓳꓸ ꓔ꓾ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓢꓯꓼ ꓖꓶˍꓟ꓾ ꓕꓲ ꓠꓽ ꓡꓰ ꓕꓲ ꓠꓽ ꓠ ꓢ: ꓠꓬꓲꓽ ꓑ ꓫꓬ ꓐꓴ ꓐꓰ ꓜꓲꓼ ꓡꓯꓽ ꓘꓳꓹ ꓟ ꓗꓪ ꓔꓲꓸꓸ ꓒ ꓪ ꓔꓲ ꓡꓰꓳ (14 ) ꓡꓰ ꓲꓔꓮꓡꓬ ꓗꓴꓷꓼ ꓔꓣꓰ ꓐꓮꓣ ꓠꓰꓰ ꓔꓳ ꓢ-ꓢꓶ-ꓠ ꓗꓪ ꓔꓲꓸꓸ ꓒ ꓒꓬꓱꓼ ꓠꓹ ꓟ ꓢꓳ ꓔꓬ ꓢꓴ ꓐꓴ ꓔꓯ ꓠꓬꓲꓽ ꓧꓪꓹ ꓕꓲ ꓧꓪꓹ ꓜꓲꓼ ꓡꓯ ꓘꓳ ꓗꓷ ꓢꓲ꓾ ꓠꓴ ꓪ ꓟꓬꓽ ꓢꓶ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓡꓰꓽ ꓡꓳꓸ ꓔ ꓐꓰ ꓕꓵꓼ ꓪ ꓖꓶ ꓗꓷ ꓟ ꓥ ꓡꓳ= ꓕꓱ ꓜꓲꓽꓼꓡꓯ ꓘꓳꓹ ꓟ ꓗꓪ ꓔꓲꓸꓸ ꓒ ꓪ ꓔꓲ ꓡꓰꓳ (14) ꓡꓰ ꓢꓲ: ꓫꓬ ꓢꓴ ꓬꓳ-ꓦ ꓒꓳꓹ ꓡꓳ (1) ꓠꓬ ꓔꓲꓸꓸ ꓒ ꓤꓶꓸꓹ ꓐꓱ ꓶ ꓔꓯ ꓢꓳ ꓓꓴ ꓥ ꓡꓳ ꓐꓰ ꓐꓯ ꓔ ꓡꓳ=
ꓝꓸ ꓢꓲ ꓙꓲ ꓫꓬ ꓢꓴ ꓮꓴꓖꓴꓢꓔꓲꓠꓰ ꓥ ꓟꓲ ꓬꓲ ꓤꓶꓸꓹ ꓮ ꓙꓵꓽ ꓔꓯ ꓢꓲ ꓒ ꓔꓯ ꓖꓶ ꓠꓲꓹ ꓫꓵˍꓡꓳ= ꓖꓳ ꓡꓰ ꓐꓯ ꓥˍ ꓟꓲ ꓤꓹ ꓠꓬꓲ ꓫꓵ: ꓠꓬꓲ ꓓꓴ ꓬꓲ ꓠꓯ ꓸꓼ ꓗꓪ ꓔꓳꓹ ꓜꓳ: ꓔꓬ ꓟ ꓙꓲ ꓫꓬ ꓢꓴ ꓮꓴꓖꓴꓢꓔꓲꓠꓰ ꓡꓰ ꓐꓰ ꓠꓴ ꓪ ꓤꓶꓸꓹ ꓔꓯ ꓥˍ ꓟꓲ ꓪꓴ-ꓢ ꓔꓯ ꓖꓶ ꓠꓲꓹ ꓫꓵˍ ꓟ ꓔꓲꓸꓸ ꓒ ꓤꓶꓸꓹ ꓗꓪ ꓡꓰ ꓟꓽ ꓥ ꓥ꓾ ꓣꓳ ꓤꓶꓸꓹ ꓦꓬꓼ ꓠꓬꓲ ꓮ ꓙꓵꓽ ꓪꓴ-ꓢ ꓔꓯ ꓡꓯ ꓙꓱ ꓠꓹ ꓟ ꓣꓳꓸ ꓚꓵ.ˍ ꓡꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰꓳ (14) ꓡꓰ ꓐꓯ ꓔ ꓡꓳ= ꓑ ꓫꓬ ꓐꓰ ꓟꓽ ꓙ ꓡꓯ ꓘꓳ ꓕꓲ ꓣꓳˍ ꓡꓰ: ꓔꓬ ꓟ ꓔꓯ ꓤ ꓟꓳ ꓢꓲ꓾ ꓮ ꓟꓬ ꓗꓪ ꓛꓲ ꓓꓻ ꓥˍ ꓟꓲ ꓜꓴ ꓐꓰ ꓙ ꓡꓯ ꓘꓳ ꓢꓲ ꓟꓬꓱꓽ ꓬꓰ ꓠꓹ ꓟ ꓐꓰ ꓣꓳ ꓐꓱ ꓶ ꓦ ꓢꓯꓼ ꓪ ꓖꓶ ꓡˍ ꓟ ꓢꓲ ꓫꓬ ꓕꓳꓽ ꓶ ꓔꓯ ꓟꓽ ꓠꓽ ꓠ: ꓵ ꓠꓹ ꓟ ꓐꓰ ꓣꓳ ꓔꓲꓸꓸ ꓒ ꓒꓬꓱꓼ ꓠꓹ ꓟ ꓢꓳ ꓔꓬ ꓕꓯ ꓟꓸ ꓖꓶ ꓡ ꓢꓴ ꓔꓲꓸꓸ ꓒ ꓓ ꓐꓴ ꓔꓯ ꓒꓵ: ꓢꓲ ꓔꓬ ꓠꓹ ꓟ ꓢꓯꓼ ꓔ ꓡꓳ=
ꓠꓴ ꓪ ꓠꓬ ꓢ-ꓢꓶ-ꓠ ꓗꓪ ꓐꓰ ꓬꓰ ꓙˍ ꓟ ꓑꓶꓸ ꓓꓴ ꓕꓱ ꓔꓲꓸꓸ ꓒ ꓤꓶꓸꓹ ꓗꓪ ꓫꓱ: ꓔꓬ ꓟ ꓔꓯ ꓓꓵ: ꓙ ꓔ꓾ ꓔꓲꓸꓸ ꓒ ꓒꓬꓱꓼ ꓠꓹ ꓟ ꓢꓳ ꓔꓬ ꓢꓴ ꓐꓴ ꓔꓯ ꓠꓴ ꓪ ꓠꓲꓹ ꓟ ꓮ ꓙꓵꓽ ꓔꓯ ꓙ ꓣꓳ: ꓢꓲ ꓔꓬ ꓠꓹ ꓟ ꓐꓰ ꓠꓴ ꓪ ꓟꓬꓽ ꓢꓶ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓡꓰꓽ ꓡꓳꓸ ꓔ ꓢꓲ꓾ꓬꓲˍꓐꓰ ꓛꓳ: ꓒꓯꓹ ꓬꓰ ꓢꓲ꓾ ꓮ ꓕꓯ ꓥˍ ꓟꓲ ꓙ ꓡꓯ ꓘꓳ ꓠꓹ ꓟ ꓬꓲ ꓚꓱꓹ ꓔꓯ ꓧꓪ꓾ ꓐꓰ ꓔꓲꓸꓸ ꓒ ꓪ ꓔꓲ ꓡꓰꓳ (14) ꓡꓰ ꓐꓯ ꓖꓶˍ ꓡꓳ= ꓢꓲ ꓒ ꓬꓰ-ꓢꓴ ꓐꓰ ꓜꓲ ꓡꓯ ꓘꓳꓹ ꓕꓯ ꓢꓲ꓾ ꓣꓳ ꓤꓶꓸꓹ ꓔꓯ ꓚꓬꓱ ꓟꓶ ꓠꓹ ꓟ ꓐꓰ ꓗꓹ ꓛꓲꓼˍ ꓟ ꓓꓳꓽ ꓔꓯ ꓐꓯ ꓟꓸ ꓖꓶ ꓐ ꓡ ꓢꓲ꓾ ꓢꓯꓼ ꓪ ꓪ ꓡ ꓥꓳ= ꓠꓴ ꓪ ꓤꓶꓸꓹ ꓔꓯ ꓟꓸ ꓟ ꓟ-ꓡꓲ-ꓬ ꓡꓰ ꓬꓰ ꓙ ꓝꓲ꓾ ꓦ ꓡꓱ ꓚꓱꓹ ꓗꓪ ꓥˍ ꓟꓲ ꓗꓹ ꓛꓲ ꓝꓲ꓾ ꓐꓰ ꓔꓲꓸꓸ ꓒ ꓪ ꓔꓲ ꓡꓰꓳ (14) ꓡꓰ ꓪꓽ ꓘꓴ ꓙ ꓢꓲ꓾ ꓬꓲ ꓟꓶꓽ ꓢꓰꓼ ꓗꓷˍ ꓡꓳ=
