ꓪ ꓔꓲ Constantine ꓚꓱ,
ꓪ ꓔꓲ Constantine ꓠꓬ ꓮꓓ (277 ꓗꓪ ꓐꓰ 337 )ꓘꓳꓼ ꓗꓪ ꓛꓲ ꓢꓯ. ꓔꓬ ꓗꓷ ꓢꓴ ꓪ ꓔꓲ ꓥ ꓡꓳ꓿ ꓬꓲ ꓠꓬ ꓣꓳ‐ꓟ ꓪ ꓔꓲ ꓐꓴ ꓡꓯꓽ ꓒꓯ, ꓗꓪ ꓐꓰ ꓣꓳ‐ꓟ ꓗꓴꓷꓼ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓔꓯ ꓠꓲ ꓪꓴꓽ ꓪꓴꓽ ꓦꓻ ꓡꓱ ꓪꓽ ꓘꓴ ꓟꓶ ꓠ, ꓟ ꓬꓰ ꓙ ꓢꓴ ꓪ ꓔꓲ ꓕꓲ ꓣꓳ ꓥ ꓡꓳ꓿
ꓪ ꓔꓲ ꓠꓬ ꓲꓔꓮꓡꓬ ꓗꓴꓷꓼ ꓟꓲ‐ꓡ ꓡꓳ ꓒꓱ ꓗꓪ ꓔꓬ ꓢꓲ ꓠꓬꓲ ꓑ ꓫꓬ ꓐꓴ ꓮ ꓡꓰ ꓐꓰ ꓞꓳ ꓫꓱ, ꓠ, ꓟ ꓙꓵꓽ ꓗ ꓔꓯ ꓐꓯ ꓑꓶ ꓗꓷꓳ꓿ ꓣꓳ‐ꓟ ꓖꓴ ꓪꓴ. ꓕꓲ ꓒꓳ, ꓗꓪ ꓙꓵꓽ ꓢꓴ ꓪ ꓔꓲ ꓫꓵꓻ ꓡꓰ ꓗ. ꓠꓯ ꓬꓲ ꓤ ꓥ ꓟ ꓟꓲ‐ꓢꓲ‐ꓟꓲ ꓠꓬ ꓝꓮꓲ ꓙꓵꓽ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓬ ꓠꓱ. ꓐꓯꓼ ꓪ ꓔꓲ ꓐꓰ ꓢꓰꓼ ꓡꓯꓽ ꓘꓳ, ꓟ ꓙꓵ, ꓔꓯ ꓞꓳꓺ ꓡꓰ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓪ ꓔꓲ Constantine ꓠꓬ ꓟꓲ‐ꓡ ꓡꓳ ꓒꓱ ꓗꓪ ꓛꓲ ꓡꓰ ꓟ ꓙꓵ, ꓕꓯ ꓠꓱ. ꓐꓯꓼ ꓪ ꓔꓲ ꓐꓴ ꓐꓰ ꓜꓲꓼ ꓗꓷꓳ꓿ ꓖꓳ ꓗ. ꓠꓯ ꓪ ꓔꓲ ꓐꓴ ꓠꓬꓲꓽ ꓣꓳ ꓠꓬ ꓪꓴ‐ꓢ ꓟꓽ ꓦ ꓡꓱ ꓢꓴ ꓐꓴ ꓐꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓡꓰ ꓐꓰ ꓗꓴꓷꓼ ꓙꓵꓽ ꓚꓱ, ꓗꓪ ꓐ ꓠ, ꓟ ꓐꓯ ꓑꓶ ꓗꓷꓳ꓿
ꓪ ꓔꓲ ꓟꓬꓱꓽ ꓟꓯ ꓔꓬ ꓟ ꓔꓲꓺ ꓒ ꓐꓴ ꓗꓴꓷꓼ ꓙꓵꓽ ꓢꓴ ꓪ ꓔꓲ ꓐꓴ ꓔꓯ ꓒꓴ ꓖꓶ ꓝꓲ ꓟ ꓐꓰ ꓟꓯꓼ ꓬꓰ ꓝꓲ ꓟ ꓔꓯ ꓪ ꓔꓲ Constantine ꓡꓰ ꓠꓽ ꓗꓷ ꓝꓲ ꓟ ꓥ ꓡꓳ꓿ ꓝꓮꓲ ꓘꓴ ꓜꓲꓼ ꓞꓳ ꓠꓯ, ꓗꓪ ꓥ ꓟꓲ ꓮ ꓡꓴ ꓒꓴ ꓖꓶ ꓟ ꓐꓰ ꓖꓳꓺ ꓟ ꓔꓯ ꓥ ꓟꓲ ꓙꓵꓽ ꓪ ꓖꓶ ꓗꓷ ꓟ ꓥ ꓡꓳ꓿
ꓝꓮꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓟꓬꓱꓽ ꓬꓰ ꓝꓲ ꓟ ꓮ ꓙꓵꓽ ꓔꓯ ꓠꓽ ꓝꓲ ꓟ ꓟꓲ ꓥ ꓡꓳ꓿ ꓝꓮꓲ ꓪ ꓔꓲ Constantine ꓠꓬ ꓑ ꓫꓬ ꓐꓴ ꓔꓯ ꓮ ꓘꓶ. ꓛꓲ ꓟꓬꓱꓽ ꓬꓰ ꓝꓲ ꓟ ꓗꓪ ꓐꓰ ꓠꓽ ꓡꓰ ꓝꓲ ꓟ ꓥ ꓡꓳ꓿ ꓬꓲ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓗ, ꓛꓲ ꓞꓳ ꓙꓳ ꓢꓯ. ꓔꓬ ꓠ, ꓟ ꓝꓮꓲ ꓪꓽ ꓘꓴ ꓦꓲꓻ ꓫꓬ, ꓢꓲ ꓠꓬꓲ ꓪꓽ ꓘꓴ ꓠ, ꓟ ꓙꓵꓽ ꓪ ꓖꓶ ꓗꓷ ꓢꓴ ꓪ ꓔꓲ ꓥ ꓡꓳ꓿
ꓬꓲ ꓠꓬ ꓣꓳ‐ꓟ ꓪ ꓔꓲ ꓐꓴ ꓗꓳ ꓡꓳ ꓗꓪ ꓐꓰ ꓙꓲ‐ꓢꓴ ꓢꓲꓺ ꓤ ꓒꓬꓱꓼ ꓡ ꓢꓴ ꓥ ꓢꓲ ꓠꓬꓲ ꓣꓳ‐ꓟ ꓗꓴꓷꓼ ꓮ ꓙꓵꓽ ꓡꓱ ꓔꓯ ꓪꓴ‐ꓢ ꓦꓻ ꓡꓱ ꓢꓴ ꓐꓴ ꓗꓴꓷꓼ ꓐꓰ ꓐꓯ ꓑꓶ ꓗꓷ ꓢꓴ ꓪ ꓔꓲ ꓟꓲ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓣꓳ‐ꓟ ꓗꓴꓷꓼ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓟꓬ, ꓟꓬꓽ ꓡ ꓟ ꓥ ꓡꓳ꓿ ꓫ. ꓟꓳ ꓪ꓿
