ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪ. ꓐꓰ ꓐꓯ ꓩꓴ ꓡˍ ꓥꓳ꓿ ꓢ. ꓠꓯ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪꓽ ꓑꓮꓲꓽ ꓥ ꓡꓳ꓿ ꓚꓳꓣꓑUS ꓚꓧꓣꓲꓢꓔꓲ ꓐꓯˍ ꓟ ꓢꓲ ꓒ ꓬꓰ‐ꓢꓴ ꓬꓲ ꓖꓳ ꓓꓱꓽ ꓐꓰ ꓫꓵꓽ ꓔꓯ ꓫꓱ. ꓖꓶˍ ꓟ ꓑꓮꓲꓽ ꓓꓽ ꓟ ꓕꓲꓽ ꓟ ꓥ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓠꓬ (ꓡꓴ‐ꓘ꓿9ꓽ11‐17) ꓥ ꓡꓳ꓿ ꓪꓴ‐ꓢ ꓐꓯ ꓘꓶꓽ ꓔꓯ ꓥꓪ ꓐꓰ ꓕꓲꓽ ꓛꓳˍ ꓠ ꓠ, ꓓꓴ ꓬꓰ ꓡꓯ꓿
“ꓞꓳ ꓜꓴ ꓐꓴ ꓬꓲ ꓪ ꓔꓯ ꓡꓳ. ꓢꓷ. ꓡꓰ ꓠꓬ ꓬꓲ ꓪ ꓔꓯ ꓛꓳ ꓙꓰˍ ꓡꓳ꓿ ꓬꓰ‐ꓢꓴ ꓠꓬ ꓬꓲ ꓪ ꓔꓯ ꓘꓳ ꓣꓴ ꓢꓲ ꓪꓴ‐ꓢ ꓗꓴꓷꓼ ꓟ. ꓟꓲꓽ ꓚ ꓟ. ꓖꓶˍ ꓡꓳ꓿ ꓠꓻ ꓫꓬ, ꓖꓶ ꓠꓯ, ꓟ ꓔꓯˍ ꓟꓲ ꓫꓬ, ꓖꓶˍ ꓡꓳ꓿ ꓟꓲꓽ ꓟꓲ ꓓꓵꓽ ꓡꓰˍ ꓐꓰ ꓗ, ꓕꓯ ꓞꓲ ꓠꓬꓲꓽ ꓣꓳ ꓟ ꓬꓲ ꓔꓯ ꓡ ꓢꓲ꓾ ꓕꓱ ꓗꓪ ꓠꓬ ꓡꓲ ꓛꓲ ꓥ ꓠꓬꓲ ꓞꓳ ꓜꓴ ꓔꓯ ꓠꓬ ꓚꓳ ꓡꓳ ꓟ ꓡꓳ ꓒꓱ ꓘ, ꓒꓱ ꓗꓪ ꓬꓲꓼ ꓔ ꓖꓴˍ ꓐꓰ ꓜꓽ ꓓꓴ ꓧꓪ ꓙꓰ ꓝꓲ꓾ ꓐꓯˍ ꓡꓳ꓿ ꓬꓰ‐ꓢꓴ ꓡꓰ ꓬꓲ ꓛꓳꓽ ꓒꓯ, ꓐꓴ ꓔꓯ꓾ ꓬꓲ ꓪ ꓔꓯ ꓠꓴ ꓪ ꓖꓶ ꓜꓽ꓾ ꓐꓯ ꓖꓶˍ ꓡꓳ꓿
ꓬꓲ ꓪ ꓡꓰ꓾ ꓥꓪ ꓠꓴꓽ ꓠꓬ ꓡ ꓞꓳ ꓕꓱ ꓟꓬ ꓟ ꓐꓱ ꓶ ꓜꓽ ꓓꓴ ꓟꓽ ꓪꓴꓻ ꓙꓰ ꓠꓬ꓾ ꓕꓱ ꓗꓪ ꓠꓽ ꓑ ꓑ ꓥꓪꓽ ꓑꓬˍ ꓐꓰ ꓥꓪ. ꓠꓬꓲꓽ ꓟˍ ꓡꓰꓽ ꓙꓳˍ ꓡꓳ꓾ ꓐꓯˍ ꓡꓳ꓿ (ꓮ ꓡꓲꓳ ꓐꓯˍ ꓠꓬ ꓖꓳ ꓗꓪ ꓞꓳ ꓑ. ꓤˍ ꓡꓰꓽ ꓥꓪꓽ ꓔꓴ ꓣꓳ ꓛꓲ ꓙꓳˍ ꓡꓳ꓿)
ꓬꓰ‐ꓢꓴ ꓡꓰ ꓬꓲ ꓛꓳꓽ ꓒꓯ, ꓐꓴ ꓔꓯ꓾ ꓬꓲ ꓪ ꓔꓯ ꓕꓲ ꓜꓴ ꓟ ꓥꓪꓽ ꓞꓲ ꓣꓳ ꓛꓲ꓾ ꓕꓲ ꓜꓴ ꓕꓲ ꓜꓴ ꓐꓰ ꓠꓬꓲ ꓠ. ꓝꓲ꓾ ꓐꓯˍ ꓠꓬꓲ꓾ ꓝꓲ ꓓꓴ ꓐꓴ ꓡꓰ ꓞꓳ ꓜꓴ ꓔꓯ ꓬꓲ ꓖꓳ ꓡꓱ ꓠꓬꓲ. ꓠ. ꓝꓲˍ ꓡꓳ꓿ ꓬꓲ ꓠꓬ ꓑ ꓑ ꓖꓳ ꓥꓪꓽ ꓑꓬˍ ꓐꓰ ꓥꓪ. ꓠꓬꓲꓽ ꓟ ꓟ ꓣꓴ ꓔ ꓢꓲ꓾ ꓟꓴ ꓗꓪ ꓗꓪ ꓡꓳ. ꓢꓲ ꓠꓬꓲ꓾ ꓶꓼ ꓥꓳꓽ ꓙꓱꓽ ꓖꓶ ꓗꓷ ꓠꓬ ꓦꓶ, ꓗꓷ ꓢꓲ꓾ ꓞꓳ ꓜꓴ ꓔꓯ ꓑꓶ ꓖꓶ ꓠ, ꓟ ꓛꓳꓽ ꓒꓯ, ꓐꓴ ꓔꓯ ꓖꓶˍ ꓡꓳ꓿
ꓖꓳ ꓡꓱ ꓠꓬ ꓬꓲ ꓪ ꓮ ꓙꓵꓽ ꓢꓴ ꓜꓽ ꓐꓳ ꓡꓰˍ ꓡꓳ꓿ ꓜꓰꓻ ꓡꓰˍ ꓟ ꓬꓲ ꓧꓶꓽ ꓬꓲ ꓟꓲ ꓠꓬ ꓛꓳꓽ ꓒꓯ, ꓐꓴ ꓡꓰ ꓞꓲ ꓠꓬꓲꓽ ꓠꓳ. ꓘꓴꓽ ꓖꓳ ꓫ ꓟꓶˍ ꓡꓳ꓿”
ꓕꓱ ꓟ ꓠꓬ ꓪꓴ‐ꓢ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓫꓵꓽ ꓬꓲ ꓧꓪꓽ ꓟꓽ ꓚꓰꓼ ꓧꓶ. ꓕꓯ ꓡ ꓞꓳ ꓥꓪꓽ ꓔꓴ ꓔꓯ ꓒ ꓐꓳ ꓖꓶ ꓜꓽˍ ꓡꓳ꓿ ꓬꓲ ꓢꓯꓼ ꓪ ꓗꓪ ꓐꓰ ꓓꓵꓽ ꓙꓽ ꓟꓶ ꓓꓴ ꓬꓰ ꓟ. ꓖꓶˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓕꓱ ꓟ ꓠꓬ ꓬꓲ ꓫꓵꓽ ꓬꓲ ꓧꓪꓽ ꓖꓶ ꓜꓽ ꓠ, ꓟ ꓐꓱ ꓶ ꓟꓽ ꓛꓲ ꓟꓽ ꓡꓯꓼ ꓕꓯ ꓡꓰ ꓬꓲ ꓶꓻ ꓒꓬꓱꓽ ꓟꓳ. ꓖꓶˍ ꓟ ꓕꓲ ꓚꓱ, ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓟꓶ ꓘꓶ ꓜꓻ ꓜꓽˍ ꓟ ꓕꓲꓽ ꓦꓬꓽ ꓗꓪ ꓑ ꓑ ꓔꓯ ꓣꓴ ꓢꓲ ꓦꓶ, ꓗꓷ ꓢꓲ ꓠꓬꓲ ꓬꓲ ꓝꓲ ꓓꓴ ꓐꓴ ꓔꓯ ꓖꓶ ꓢꓲ꓾ ꓕꓱ ꓟ ꓠꓬ ꓥꓪ ꓧꓪꓽ ꓥ ꓡꓳ꓾ ꓕꓱ ꓟ ꓠꓬ ꓥꓪ ꓫꓵꓽ ꓥ ꓡꓳ꓾ ꓐꓰ ꓔꓶ ꓔꓲ. ꓖꓶˍ ꓟ ꓥ ꓡꓳ꓿ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓕꓱ ꓟ ꓔꓯ ꓮ ꓟꓶ ꓗꓪ ꓛꓲ ꓖꓼ ꓛꓳ ꓔꓬ ꓢꓰꓽ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓫꓵꓽ ꓐꓰ ꓬꓲ ꓧꓪꓽ ꓑ ꓑ ꓐꓰ ꓛꓱꓼ ꓡꓱꓼ ꓙꓵ ꓕꓱ ꓟ ꓠꓬ ꓟꓲ‐ꓢ ꓔꓲ ꓖꓶˍ ꓟ ꓗꓪ ꓢꓲ ꓒ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪꓽ ꓚꓵ ꓒꓬꓱꓼ ꓡˍ ꓟ ꓔꓯ ꓥꓪ ꓠꓴꓽ ꓮ ꓙꓵꓽ ꓙꓵꓻ ꓔꓬ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓗ‐ꓡ‐ꓪ‐ꓣꓲ ꓪ ꓚꓲ ꓗꓪ ꓣꓳ ꓐꓱ ꓶ ꓢꓯꓼ ꓟꓬ ꓖꓶ ꓗꓷꓳ꓿ ꓫꓵꓽ ꓧꓳ. ꓖꓶ ꓗꓷꓳ꓿ ꓬꓲ ꓔꓯ ꓙꓵꓻ ꓢꓴ ꓠꓬ ꓚꓬꓴ. ꓟꓶˍ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓬꓲ ꓔꓯ ꓙꓵꓻ ꓢꓲ ꓬꓲ ꓧꓪꓽ ꓜꓽ ꓢꓴˍ ꓡꓰꓽ ꓚꓬꓴ. ꓟꓶˍ ꓥꓳ ꓐꓰ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓙꓵꓻˍ ꓟ ꓥ ꓡꓳ꓿
ꓞꓳ ꓤ ꓕꓲꓽ ꓣꓳ ꓘꓴꓽ ꓗꓪ ꓫꓵꓽ ꓐꓯˍ ꓟ ꓠꓬ ꓮ ꓘꓶ. ꓬꓳ. ꓚꓰꓽˍ ꓡꓳ꓿ ꓧꓪꓽ ꓖꓳ ꓓꓱꓽ ꓕꓲ ꓟ ꓡꓱꓸꓼ ꓫꓵꓽ ꓗꓪ ꓐꓰ ꓡꓰꓽ ꓞꓳ ꓙꓳ ꓔꓬ ꓟ ꓥ ꓡꓳ꓿ ꓢꓯ. ꓔꓬ ꓟ ꓥ ꓡꓳ꓿ ꓣꓳ ꓦꓰꓼ ꓟ ꓘꓴꓽ ꓠꓯꓸꓼ ꓗꓪ ꓜꓻ ꓙꓲˍ ꓟ꓾ ꓝꓮꓲ ꓧꓪꓽ ꓖꓳ ꓓꓱꓽ ꓗꓪ ꓓꓳ ꓡˍ ꓟ ꓣꓳ ꓔꓯ ꓢꓯ. ꓝꓲˍ ꓟ꓾ ꓕꓲ ꓖꓳ ꓓꓱꓽ ꓡꓱꓸꓼ ꓗꓪ ꓟꓬꓱꓽ ꓬꓰ ꓔꓬ ꓟ ꓠꓬ ꓫꓵꓽ ꓥ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓫꓵꓽ ꓕꓱ ꓟ ꓠꓬ ꓣꓳ ꓐꓱ ꓶ ꓬꓲ ꓝꓳ, ꓟꓶ ꓕꓲ ꓟ ꓥ ꓡꓳ꓿ ꓧꓪꓽ ꓕꓲ ꓘꓴ. ꓑꓳ, ꓬꓰ ꓠꓬ ꓣꓳ ꓢꓯ. ꓔꓬ ꓐ ꓡˍ ꓢꓰꓽ ꓡꓳ꓿ ꓛꓲ ꓒꓯ, ꓕꓲ ꓐꓽ ꓘꓳ, ꓡꓰ ꓠꓬ ꓣꓳ ꓢꓯ. ꓓ, ꓐ ꓡˍ ꓢꓰꓽ ꓡꓳ꓿ ꓖꓳ ꓡꓱ ꓥ ꓟꓲ ꓫꓵꓽ ꓮ ꓙꓵꓽ ꓖꓴ ꓡꓰ ꓠꓬ ꓣꓳ ꓠꓬ ꓟꓽ ꓢꓯ. ꓓꓻꓳ꓿ ꓖꓳ ꓡꓱ ꓠꓬꓲ ꓫꓵꓽ ꓐꓯˍ ꓟ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓮ ꓘꓶ. ꓬꓳ. ꓚꓰꓽˍ ꓡꓳ꓿
ꓕꓱ ꓟˍ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓠꓬ ꓗ‐ꓣ‐ꓪ‐ꓣꓲ ꓪ ꓚꓲ ꓗꓪ ꓫꓵꓻ ꓢꓲ ꓠꓬꓲ ꓬꓲ ꓫꓵꓽ ꓧꓳ. ꓗꓷꓳ꓿ ꓬꓲ ꓔꓯ ꓣꓳ‐ꓟ ꓡ ꓞꓳ ꓡꓰ ꓬꓲ ꓠꓲ, ꓟ ꓗꓪ ꓡ. ꓒꓬ. ꓐ‐ꓥꓷ ꓐꓰ ꓗ. ꓕꓯ꓾ ꓬꓲ ꓠꓲ, ꓟ ꓘꓴꓽ ꓠꓯꓸꓼ ꓗꓪ ꓐꓰ ꓫꓵꓽ ꓐꓰ ꓬꓲꓻ ꓙꓬ ꓓꓳ ꓡˍ ꓡꓳ꓾ ꓐꓰ ꓣꓳ ꓵꓻ ꓟꓶˍ ꓡꓳ꓿ ꓕꓱ ꓟ ꓠꓬ ꓮ ꓫꓵꓽ ꓬꓲ ꓬꓲ ꓢꓲ ꓥ ꓡ꓿ ꓢꓲ ꓒ ꓬꓰ‐ꓢꓴ ꓬꓲ ꓫꓵꓽ ꓠꓬ ꓬꓲꓻ ꓙꓬ ꓐꓰ ꓕꓲ ꓛꓳˍ ꓓꓳ ꓡˍ ꓡꓳ ꓐꓯˍ ꓟ ꓠꓬ ꓬꓲ ꓬꓲ ꓢꓲ ꓙꓳˍ ꓡꓳ꓿ ꓣꓳ ꓮ ꓙꓵꓽ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓫꓵꓽ ꓗꓪ ꓐꓰ ꓞꓲꓽ ꓫꓬ, ꓟ ꓟꓶˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓣꓳ ꓜꓽ ꓓꓳꓻ ꓠ, ꓗ, ꓡꓳ ꓐꓯ ꓟ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿
ꓟꓲ‐ꓢ ꓬꓰˍ ꓟ ꓙꓵ, ꓗꓪ ꓢꓲ ꓒ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪꓽ ꓒꓬꓱꓼ ꓡˍ ꓟ ꓑ ꓑ ꓐꓰ ꓛꓱꓼ ꓡꓱꓼ ꓙꓵꓻ ꓔꓯ ꓠꓬ ꓔꓲ ꓒ ꓣꓱꓽ ꓢꓴ ꓠꓬ ꓬꓲꓻ ꓙꓬ ꓮ ꓔꓲ. ꓗꓶˍ ꓡꓳ꓿ ꓕꓱ ꓟ ꓠꓬ ꓣꓳꓽ ꓧꓪꓽ ꓖꓳ ꓓꓱꓽ ꓘꓴꓽ ꓠꓯꓸꓼ ꓗꓪ ꓫꓵꓽ ꓑꓰ, ꓒꓬꓱꓼ ꓠ, ꓟ ꓐꓱ ꓶ ꓬꓰ ꓔꓬ ꓥ ꓟꓲ ꓐ ꓠ ꓔ ꓡꓳ ꓐꓯ ꓟ ꓣꓳ ꓔꓯ ꓢꓷ. ꓡꓰ ꓝꓲˍ ꓟ ꓥ ꓡꓳ꓿
ꓕꓱ ꓡꓱ ꓢꓲ ꓒ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓣꓳ ꓘꓳ ꓣꓴˍ ꓡꓳ꓿ ꓕꓱ ꓟ ꓠꓬ ꓣꓳ ꓦꓻ ꓐꓱ ꓶ ꓢꓯꓼ ꓪ ꓥ ꓡꓳ꓿ ꓧꓪꓽ ꓖꓳ ꓓꓱꓽ ꓕꓲ ꓟ ꓘꓴꓽ ꓠꓯꓸꓼ ꓗꓪ ꓫꓵꓽ ꓠꓬ ꓬꓳ. ꓚꓰꓽ ꓓꓰ ꓡꓰ ꓟ ꓐꓰ ꓕꓲꓽ ꓡꓰ, ꓣꓳ ꓦ ꓔꓯ ꓟꓳ. ꓥˍ ꓟꓲ ꓢꓲ ꓒ ꓬꓰ‐ꓢꓴ ꓬꓲ ꓫꓵꓽ ꓕꓱ ꓟ ꓠꓬ ꓟꓽ ꓙꓳ ꓟꓽ ꓓꓻ ꓟ ꓟꓽ ꓓꓳꓻ ꓟꓽ ꓓꓻ ꓟ ꓥ ꓡꓳ꓿ ꓣꓳꓽ ꓧꓪꓽ ꓖꓳ ꓓꓱꓽ ꓗꓪ ꓟꓽ ꓜꓽ ꓔꓬ ꓟꓽ ꓓꓳꓻ ꓔꓬ ꓕꓯ ꓫꓵꓻˍ ꓟ ꓡꓰ ꓐꓰ꓾ ꓦꓻ ꓕꓲꓽ ꓒꓳ, ꓗꓪ ꓥˍ ꓟꓲ ꓪꓴ‐ꓢ ꓬꓲ. ꓫꓵꓽ ꓬꓲ. ꓧꓪꓽ ꓟꓽ ꓜꓽ ꓠꓬ ꓫꓵˍ ꓥꓳ꓿ ꓢꓲ ꓒ ꓬꓰ‐ꓢꓴ ꓬꓲ. ꓫꓵꓽ ꓬꓲ. ꓧꓪꓽ ꓦꓬꓼ ꓠꓬꓲ ꓗꓪ ꓣꓳꓽ ꓪ ꓜꓲ ꓢꓲ ꓒ ꓠꓯꓸꓼ ꓗꓪ ꓣꓳ ꓞꓳ ꓙꓳ ꓡꓯ꓿
ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓑ ꓙꓽˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓡ ꓞꓳ ꓥꓪꓽ ꓔꓴ ꓣꓳ ꓔꓯ ꓜꓻ ꓖꓶꓽ ꓜꓽˍ ꓟ ꓟ. ꓟꓲꓽ ꓥ ꓡꓳ꓿ ꓧꓪꓽ ꓖꓳ ꓓꓱꓽ ꓕꓲꓽ ꓒꓳ, ꓔꓯ ꓐꓳ ꓡꓰ ꓝꓲˍ ꓟ ꓡꓰ ꓐꓰ ꓦ ꓕꓲꓽ ꓒꓳ, ꓔꓯ ꓥ ꓟꓲ ꓐꓳ ꓡꓰ ꓝꓲˍ ꓡꓳ ꓐꓯ ꓟ ꓬꓲ ꓠꓬ ꓣꓳ ꓔꓯ ꓢꓷ. ꓡꓰ ꓝꓲˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓲ, ꓟ ꓘꓴꓽ ꓠꓯꓸꓼ ꓗꓪ ꓟꓲ ꓠꓯ ꓕꓱ ꓟ ꓗꓪ ꓡꓰꓽ ꓗ, ꓛꓲꓽ ꓓꓴ ꓧꓪ ꓔꓬ ꓡ꓿ ꓟꓲ ꓠꓯ ꓕꓱ ꓟ ꓘꓴꓽ ꓠꓯꓸꓼ ꓗꓪ ꓜꓽ ꓓꓴ ꓓꓳꓻ ꓓꓴ ꓖꓪꓽ ꓓꓴˍ ꓡꓰꓽ ꓠꓴ ꓙꓽ ꓖꓶ ꓔꓬ ꓡ꓿ ꓖꓳ ꓡꓱ ꓬꓰˍ ꓥꓳ ꓐꓯ ꓠꓬ ꓮ ꓕꓯ ꓥ ꓟꓲ ꓐꓳ ꓡ ꓟꓽ ꓓꓻ꓿ ꓣꓳ ꓒꓴ ꓫꓵ ꓙꓳˍ ꓥ ꓟꓲ ꓣꓳ ꓠꓲ, ꓟ ꓘꓴꓽ ꓠꓯꓸꓼ ꓗꓪ ꓕꓲꓽ ꓫꓵꓽ ꓫꓵꓽ ꓞ, ꓟ ꓡꓰ ꓐꓰ ꓗ, ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓪꓴ‐ꓢ ꓚꓱ, ꓥ ꓟ ꓦꓻ ꓥ ꓟ ꓢꓲ ꓒ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓣꓳ ꓘꓳ ꓣꓴ ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓬꓲ ꓚꓱ, ꓔꓯ ꓣꓳ ꓞꓳ ꓙꓳˍ ꓥꓳ ꓐꓯˍ ꓠꓬ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓐꓲ ꓜꓲꓼˍ ꓟ꓾ ꓗ, ꓛꓲꓽˍ ꓟ꓾ ꓢꓲ ꓡꓲ ꓟ ꓟꓶˍ ꓥꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓲꓽ ꓠꓬꓲ ꓕꓲꓽ ꓠꓬꓲ ꓬꓰ ꓔꓬ ꓟ ꓟꓲ‐ꓢ ꓘꓴꓽ ꓠꓯꓸꓼ ꓗꓪ ꓢꓲ ꓒ ꓬꓰ‐ꓢꓴ ꓬꓲ. ꓫꓵꓽ ꓬꓲ. ꓧꓪꓽ ꓔꓯ ꓜꓳꓽ ꓜꓳꓽˍ ꓐꓰ ꓘꓳ ꓣꓴ ꓐ ꓡ ꓠ, ꓟ ꓐꓱ ꓶ꓾ ꓒꓵꓽ ꓒꓵꓽˍ ꓐꓰ ꓘꓳ ꓣꓴ ꓐ ꓡ ꓠ, ꓟ ꓐꓱ ꓶ ꓣꓳꓽ ꓢꓯꓼ ꓕꓵꓼ ꓡꓯ꓿
