ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓔꓯ ꓧꓪ. ꓧꓪ.꓿
ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓐꓯˍ ꓟ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ ꓮ ꓙꓵꓽ ꓠꓬ ꓑ ꓙꓽ ꓠꓬꓲˍ ꓡꓳ꓿ ꓕ‐ꓣꓲ‐ꓠ‐ꓔꓲ ꓐꓯˍ ꓟ ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓪꓴ‐ꓢ ꓐ, ꓐ꓾ ꓤ ꓔꓲ.꓾ ꓢꓲꓽ‐ꓫꓬ‐ꓟ‐ꓦ ꓢ ꓣꓳ ꓠꓬ ꓕꓲ ꓖꓳ ꓓꓱꓽˍ ꓡꓰ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ ꓮ ꓙꓵꓽ ꓕꓱ ꓟ ꓔꓯ ꓘꓳ ꓣꓴˍ ꓡꓳ꓿ ꓢ. ꓠꓯ ꓠꓬ ꓕ‐ꓣꓲ‐ꓠ‐ꓔꓲ ꓑꓮꓲꓽ ꓥ ꓡꓳ꓾ ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓪꓴ‐ꓢ ꓑꓮꓲꓽ ꓥ ꓡꓳ꓿ ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓪꓴ‐ꓢ ꓑꓮꓲꓽ ꓗꓪ ꓐꓰ ꓐ, ꓐ ꓥ ꓟꓲ꓾ ꓤ ꓔꓲ. ꓥˍ ꓟꓲ꓾ ꓢꓲꓽ‐ꓫꓬ‐ꓟ‐ꓦ ꓪꓴ‐ꓢ ꓥˍ ꓟꓲ ꓬꓲ ꓪ ꓠꓬ ꓕꓲ ꓖꓳ ꓓꓱꓽ꓾ ꓮ ꓡꓲ ꓕꓲ ꓣꓳˍ ꓟꓲ ꓟꓽ ꓪꓴꓽ꓾ ꓮ ꓡꓲ ꓕꓲ ꓣꓳˍ ꓟꓲ ꓟꓽ ꓣꓳꓺ ꓠꓵꓻ ꓠꓲ, ꓐꓰ ꓕꓱ ꓡꓱ ꓠꓶꓼ ꓞ, ꓡꓳ ꓐꓯ ꓟ ꓔꓯ ꓣꓳ ꓢꓷ. ꓠ, ꓟ ꓐꓱ ꓶ꓾ ꓪꓴ‐ꓢ ꓔꓯ ꓫꓱ. ꓖꓶ ꓐ ꓡ ꓠ, ꓟ ꓐꓱ ꓶ ꓑꓮꓲꓽ ꓕꓱ ꓟ ꓔꓯ ꓣꓳ ꓬꓰˍ ꓟ ꓥ ꓡꓳ꓿
ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓪꓴ‐ꓢ ꓐꓯ ꓟ ꓠꓬ ꓚꓵ ꓘꓶꓽ ꓕꓲ ꓟ ꓥ ꓡꓳ꓿ ꓞꓳ ꓤ ꓪꓴ. ꓠꓶ. ꓗꓪ ꓐꓰ ꓓꓵꓽ ꓙꓽ ꓛꓲ ꓟꓽ ꓐ ꓡ꓿ ꓞꓳ ꓤ ꓫꓪ. ꓚꓱ, ꓗꓪ ꓐꓰ ꓫꓪ. ꓟꓽ ꓐ ꓡ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓾ ꓢ ꓣꓳ ꓐꓯˍ ꓥ ꓟꓲ ꓕꓲ ꓖꓳ ꓓꓱꓽ꓾ ꓕꓱ ꓡꓱ ꓥ ꓟ ꓑꓶ. ꓓꓴ ꓣꓳ ꓪꓴ. ꓠꓶ. ꓗꓪ ꓐꓰ ꓓꓵꓽ ꓙꓽ ꓟꓽ ꓐ ꓡ ꓫꓵꓽ ꓙꓳˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓚꓵ ꓚꓵ ꓢꓲꓽ ꓫꓬ ꓕꓳꓽ ꓶ ꓗꓪ ꓡꓳ. ꓠꓬꓲˍ ꓥ ꓟꓲ ꓣꓳ ꓐꓱ ꓶ ꓢꓯꓼ ꓪ ꓙꓲꓻ ꓓꓴ ꓓꓽ ꓟ ꓥ ꓡꓳ꓿ Trinitarian Spirituality ꓐꓯ ꓟ ꓚꓱ, ꓗꓪ ꓐꓰ ꓮ ꓔꓲ. ꓤ ꓐꓯ ꓟꓳ. ꓖꓶ ꓠꓲ, ꓫꓵˍ ꓡꓳ꓿ ꓐ, ꓐ ꓤ ꓔꓲ. ꓢꓲꓽ‐ꓫꓬ‐ꓟ‐ꓦ ꓠꓬ ꓕꓲꓽ ꓖꓳ ꓓꓱꓽ ꓕꓲꓽ ꓫꓵꓽˍ ꓐꓰ ꓕꓱ ꓡꓱ ꓠꓶꓼ ꓡꓯ ꓘꓳ ꓓ, ꓡꓳ꓿ ꓮꓽ ꓐ ꓥˍ ꓟꓲ ꓤ ꓔꓲ. ꓠꓯꓸꓼ ꓗꓪ ꓕꓱ ꓡꓱ ꓐꓰ ꓠꓶꓼ ꓓ, ꓡꓳ꓿ ꓤ ꓔꓲ. ꓥˍ ꓟꓲ ꓮꓽ ꓐ ꓠꓯꓸꓼ ꓗꓪ ꓕꓱ ꓡꓱ ꓗꓴ. ꓙꓲꓽ ꓙꓳˍ ꓡꓳ꓿ ꓬꓲ ꓪ ꓠꓬꓲꓽ ꓗꓴ. ꓚꓸꓼ ꓗꓪ ꓢꓲꓽ‐ꓫꓬ‐ꓟ‐ꓦ ꓪꓴ‐ꓢ ꓠꓵꓻ ꓠꓲ, ꓪꓴ‐ꓢ ꓥˍ ꓟꓲ ꓕꓱ ꓡꓱ ꓠꓶꓼ ꓞ, ꓓ, ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓕꓲꓽ ꓣꓳ ꓛꓳꓽ ꓕꓲ ꓣꓳ꓾ ꓕꓲ ꓟ ꓛꓳꓽ ꓕꓲ ꓟ ꓒ ꓕꓲꓺ ꓠꓶꓼ ꓓ, ꓟ ꓡꓰꓽ ꓟꓽ ꓞꓲ꓾ ꓑꓯ, ꓡꓯ ꓘꓳ ꓓ, ꓟ ꓥ ꓡꓳ꓿ ꓕꓱ ꓟ ꓗꓪ ꓐꓰ ꓣꓳ ꓔꓯ ꓟꓳ. ꓖꓶ ꓡ ꓔꓬ ꓟ ꓬꓲ ꓪꓴ. ꓕꓲꓽ ꓫꓵꓽ ꓟ ꓠꓬ꓾ ꓣꓳ ꓮ ꓙꓵꓽ ꓠꓬ ꓢꓲ ꓒ ꓬꓰ‐ꓢꓴ ꓗꓪ ꓐꓰ ꓐ, ꓐ ꓪꓴ‐ꓢ ꓤ ꓫꓵ. ꓤ ꓠꓱ ꓒꓬꓱꓼ ꓡ ꓢꓲ ꓠꓬꓲ꓾ ꓐ, ꓐ ꓪꓴ‐ꓢ ꓐꓰ ꓣꓳ ꓙꓻ ꓡꓯ ꓘꓳ ꓟꓶˍ ꓟ ꓐꓰ ꓾ ꓠꓱ. ꓐꓯ ꓢꓴ ꓐꓰ ꓙꓻ ꓡꓯ ꓘꓳ ꓠ, ꓟ꓾ ꓫꓱ. ꓤ ꓟꓬꓱꓽ ꓬꓰ ꓠ, ꓟ ꓣꓳ ꓔꓯ ꓟꓳ. ꓖꓶ ꓡˍ ꓟ ꓥ ꓡꓳ꓿ ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓪꓴ‐ꓢ ꓠꓬ ꓕꓲ ꓠꓲ, ꓔꓲ ꓪ ꓙꓳˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓧꓳ, ꓫꓵꓽ ꓧꓳ, ꓡꓯ ꓘꓳ ꓢꓲ ꓠꓬꓲ ꓪꓴ‐ꓢ ꓠꓯꓸꓼ ꓗꓪ ꓞꓳ ꓙꓳ ꓠ, ꓟ ꓐꓱ ꓶ ꓬꓲ ꓪꓴ. ꓕꓲ ꓫꓵꓽ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿
ꓝꓮꓲ ꓕꓲꓽ ꓫꓵꓽ ꓟ ꓠꓬ Christ Center ꓐꓰ ꓐꓯˍ ꓟ ꓢꓲ ꓒ ꓬꓰ‐ꓢꓴ ꓔꓯ ꓬꓳ. ꓚꓰꓽˍ ꓟ ꓗꓪ ꓗꓶ ꓔ ꓠ, ꓟ ꓣꓳ ꓔꓯ Trinitarian Spirituality ꓐꓯ ꓟ ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓦ ꓚꓱ, ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓢꓲ ꓒ ꓬꓰ‐ꓢꓴ ꓟꓲ ꓠꓯ ꓕꓱ ꓟ ꓗꓪ ꓬꓯꓼ ꓡˍ ꓟ ꓗꓪ ꓐꓰ ꓞꓳ ꓤ ꓠꓬ ꓐ, ꓐ ꓪꓴ‐ꓢ ꓙꓳˍ ꓟ ꓢꓷ. ꓡꓰꓳ꓿ ꓢꓲꓽ‐ꓫꓬ‐ꓟ‐ꓦ ꓪꓴ‐ꓢ ꓙꓳˍ ꓟ ꓥˍ ꓟꓲ ꓢꓷ. ꓡꓰꓳ꓿ ꓮꓽ ꓐ ꓠꓬ ꓤ ꓔꓲ. ꓠꓯꓸꓼ ꓗꓪ ꓬꓲ ꓟꓬꓱ ꓓꓳꓽ ꓓꓳ ꓡˍ ꓡꓳ꓿ ꓢꓲꓽ‐ꓫꓬ‐ꓟ‐ꓦ ꓥˍ ꓟꓲ ꓤ ꓔꓲ. ꓬꓰ‐ꓢꓴ ꓠꓯꓸꓼ ꓗꓪ ꓬꓲ ꓟꓬꓱ ꓓꓳꓽ ꓓꓳ ꓡˍ ꓡꓳ꓿ ꓖꓳ ꓡꓱ ꓠꓬꓲ ꓐ, ꓐ ꓐꓰ ꓢꓲꓽ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓤ ꓔꓲ. ꓠꓯꓸꓼ ꓗꓪ ꓔꓱ, ꓫꓵ ꓗꓷ ꓔ ꓢꓲ ꓠꓬꓲ ꓕꓱ ꓡꓱ ꓙꓳ ꓔꓬ ꓟ ꓥ ꓡꓳ꓿ ꓣꓳ ꓤꓶꓻ ꓗꓪ ꓣꓳ ꓔꓯ ꓟꓳ. ꓖꓶ ꓡ ꓔꓬ ꓟ ꓠꓬ ꓣꓳ ꓥ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓔꓱ, ꓫꓵ ꓠꓯꓸꓼ ꓗꓪ ꓮ ꓘꓶ. ꓬꓳ. ꓚꓰꓽˍ ꓟ ꓔꓲ ꓔꓶ. ꓗꓪ ꓕꓱ ꓡꓱ ꓢꓯꓼ ꓕꓵꓼ ꓠ, ꓟ ꓐꓱ ꓶ ꓣꓳ ꓮ ꓫꓵꓽ ꓬꓰˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓬꓳ. ꓚꓰꓽˍ ꓟ ꓬꓲ ꓔꓶ. ꓗꓪ ꓗꓶ ꓔ ꓠ, ꓟ ꓐꓱ ꓶ ꓣꓳ ꓔꓯ ꓟꓳ. ꓖꓶ ꓡˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓾ ꓢꓲ ꓒ ꓬꓰ‐ꓢꓴ ꓗꓪ ꓐꓰ ꓐ, ꓐ ꓟꓬꓱ ꓓꓳꓽ ꓓꓳˍ ꓟ ꓡꓰ ꓐꓰ꓾ ꓣꓳ ꓢꓲ ꓒ ꓬꓰ‐ꓢꓴ ꓠꓲ, ꓡꓶꓽ ꓛꓳˍ ꓟ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓞꓳ ꓙꓳˍ ꓟ ꓗꓪ ꓐꓰ ꓐ, ꓐ ꓠꓲ, ꓡꓶˍ ꓟꓲ ꓓꓳ ꓡˍ ꓟ ꓥ ꓡꓳ꓿
ꓝꓮꓲ ꓢ ꓫꓵꓽ ꓕꓲ ꓫꓵꓽ ꓟ ꓠꓬ ꓢꓲꓽ‐ꓫꓬ‐ꓟ‐ꓦ ꓚꓱ, ꓥ ꓡꓳ꓿ ꓢꓲꓽ‐ꓫꓬ‐ꓟ‐ꓦ ꓠꓬ ꓐ, ꓐ ꓐꓰ ꓤ ꓔꓲ. ꓔꓯ ꓠꓶꓼ ꓡꓯ ꓘꓳ ꓝꓲˍ ꓟ ꓑꓯ, ꓡꓯ ꓘꓳ ꓝꓲˍ ꓟ ꓠꓵꓻ ꓠꓲ, ꓥ ꓡꓳ꓿ ꓕꓱ ꓟ ꓠꓬ ꓣꓳ ꓔꓯ ꓟꓳ. ꓖꓶ ꓡˍ ꓟ ꓠꓬ Pentecost ꓐꓯˍ ꓟ ꓢꓲꓽ‐ꓫꓬ‐ꓟ‐ꓦ ꓪꓴ‐ꓢ ꓬꓯꓼ ꓡˍ ꓟ ꓗꓪ ꓐꓰ ꓣꓳ ꓮ ꓙꓵꓼ ꓠꓬ ꓢꓲꓽ‐ꓫꓬ‐ꓟ‐ꓦ ꓗꓪ ꓐꓰ ꓐ, ꓐ ꓪꓴ‐ꓢ ꓐꓰ ꓠꓶꓼ ꓡꓯ ꓘꓳ ꓡꓰꓳ꓿ ꓐ, ꓐ ꓪꓴ‐ꓢ ꓠꓯꓸꓼ ꓗꓪ ꓣꓳ ꓕꓲ ꓠꓲ, ꓕꓲ ꓪ ꓗꓷ ꓡꓰꓳ꓿ ꓕꓱ ꓟˍ ꓡꓰ ꓐꓰ ꓣꓳ ꓠꓶꓽ ꓛꓳꓽ ꓕꓲ ꓛꓳꓽ ꓢꓴ ꓔꓯ ꓥˍ ꓟꓲ ꓣꓳ ꓠꓲ, ꓠꓵ ꓠ, ꓟ꓾ ꓟꓬꓽ ꓠꓬꓲ ꓐꓶ ꓠꓬꓲ ꓣꓳ ꓠꓬ ꓢꓲꓽ‐ꓫꓬ‐ꓟ‐ꓦ ꓪꓴ‐ꓢ ꓗꓪ ꓐꓰ ꓐ, ꓐ ꓔꓯ ꓮꓽ ꓐ ꓐꓰ ꓘꓴꓻ ꓐ ꓡˍ ꓟ ꓤ ꓫꓵ. ꓤ ꓠꓱ ꓐꓴ ꓒꓬꓱꓼ ꓡꓺꓳ꓿ ꓖꓳ ꓡꓱ ꓠꓬꓲ ꓢꓲꓽ‐ꓫꓬ‐ꓟ‐ꓦ ꓠꓯꓸꓼ ꓗꓪ ꓞꓳ ꓙꓳ ꓠ, ꓟ ꓐꓱ ꓶ ꓣꓳ ꓔꓯ ꓟꓳ. ꓖꓶ ꓡ ꓔꓬ ꓟ ꓥ ꓡꓳ꓿
ꓝꓮꓲ ꓡꓲꓺ ꓫꓵꓽ ꓕꓲ ꓫꓵꓽ ꓟ ꓠꓬ Mission Oriented ꓐꓰ ꓐꓯˍ ꓟ ꓪꓴ‐ꓢ ꓡꓰ ꓝꓲ ꓩꓴ ꓗꓷˍ ꓟ ꓚꓱ, ꓔꓯ ꓣꓳ ꓔꓯ ꓢꓷ. ꓡꓰ ꓝꓲˍ ꓡꓳ꓿ ꓮꓽ ꓐ ꓠꓬ ꓞꓳ ꓤ ꓔꓯ ꓚꓬꓴ. ꓠ, ꓟ ꓐꓱ ꓶ ꓤ ꓔꓲ. ꓔꓯ ꓝꓲ ꓩꓴ ꓗꓷˍ ꓡꓳ꓿ ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓟꓬꓱꓽ ꓬꓰˍ ꓟ ꓗꓪ ꓝꓲ ꓩꓴˍ ꓟˍ ꓟꓲ ꓕꓲꓽ ꓟ ꓥ ꓡꓳ꓾ ꓐꓯ ꓟ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓟ ꓠꓬ ꓪꓴ‐ꓢ ꓟꓬꓱ ꓓꓳꓽ ꓓꓳ ꓠ, ꓟ ꓐꓰ꓾ ꓣꓳ ꓚꓬꓴ. ꓟꓶ ꓠ, ꓟ ꓐꓱ ꓶ ꓥ ꓡꓳ꓿ ꓖꓳ ꓡꓱ ꓠꓬꓲ ꓪꓴ‐ꓢ ꓟꓬꓱ ꓓꓳꓽ ꓓꓳ ꓠ, ꓟ ꓠꓬ Mission ꓐꓰ ꓐꓯˍ ꓟ ꓪꓴ‐ꓢ ꓟꓬꓱꓽ ꓣꓱꓽˍ ꓟ ꓢꓯꓼ ꓕꓵꓼ ꓠ ꓔ ꓡꓳ꓿ ꓪꓴ‐ꓢ ꓟꓬꓱꓽ ꓣꓱꓽˍ ꓐꓯ ꓟ ꓠꓬ ꓟ. ꓒ ꓟ. ꓟ ꓔꓯ ꓡꓰꓽ ꓐꓯˍ ꓟ ꓟꓽ ꓥ꓿ ꓕꓲ ꓠꓬꓲ ꓕꓲ ꓠꓬꓲ ꓣꓳ ꓞꓳ ꓙꓳ ꓔꓬ ꓟ ꓗꓪ ꓪꓴ‐ꓢ ꓠꓲ, ꓡꓶꓽ ꓗꓪ ꓐꓰ ꓛꓳ ꓫꓱꓽˍ ꓠꓬ ꓣꓱꓽ ꓬꓰˍ ꓟ ꓗꓪ ꓐꓰ ꓟ. ꓟꓲꓽ ꓚ ꓔꓬ ꓟ ꓥ ꓡꓳ꓿ ꓣꓳ ꓫ. ꓕꓱˍ ꓟ ꓣꓳ ꓞꓳ ꓙꓳˍ ꓟ ꓗꓪ ꓐꓰ ꓟ. ꓟꓲꓽ ꓚ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ Trinitarian Spirituality ꓐꓰ ꓐꓯ ꓟ ꓚꓱ, ꓕꓱ ꓟ ꓠꓬ ꓕꓱ ꓡꓲꓺ ꓫꓵꓽ ꓗꓪ ꓐꓰ ꓣꓳ ꓔꓯ ꓢꓯꓼ ꓖꓶ ꓔꓬ ꓟ ꓪ ꓖꓶ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ‐ꓣꓳ‐ꓕꓲ‐ꓖꓳ‐ꓓꓱꓽ ꓪꓴ‐ꓢ ꓠꓯꓸꓼ ꓗꓪ ꓣꓳ ꓥ ꓟꓲ ꓕꓲꓽ ꓠꓲ, ꓕꓲꓽ ꓪ ꓡꓰꓽ ꓪꓴ‐ꓢ ꓠꓯꓸꓼ ꓗꓪ ꓞꓳ ꓙꓳ ꓙꓰ ꓡꓯ ꓐꓰ ꓮ ꓙꓵꓽ ꓢꓴ ꓔꓯ ꓢꓯꓼ ꓖꓶ ꓠꓲ, ꓫꓵˍ ꓡꓳ꓿
