ꓣꓳ ꓟꓲ ꓠꓯ ꓞꓳ ꓤ ꓐꓴ ꓠꓬ ꓚꓲ. ꓛꓬ ꓠꓲ, ꓠꓵ ꓢꓴ꓾ ꓚꓲ. ꓛꓬ ꓫꓴ, ꓢꓴ꓾ ꓢꓷ. ꓢꓴ ꓐꓴ ꓐꓰ ꓫ. ꓕꓱ ꓡꓯ ꓘꓳˍ ꓕꓯ ꓐꓯ ꓖꓴ ꓟꓽ ꓓꓻ ꓗꓪ ꓛꓲ ꓫ. ꓕꓱ ꓡꓯ ꓘꓳ ꓓꓴ ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓟꓽ ꓠꓲ, ꓠꓵ ꓢꓴ꓾ ꓟꓽ ꓕꓽ ꓢꓴ ꓐꓴ꓾ ꓣꓳ ꓔꓯ ꓟꓽ ꓙꓲꓻ ꓟ ꓚꓬꓽ ꓚ ꓢꓴ ꓐꓴ꓾ ꓣꓳ ꓔꓯ ꓫ. ꓔꓳ ꓡꓰ ꓠ ꓐꓯ ꓢꓴ ꓐꓴ꓾ ꓣꓳ ꓔꓯ ꓐꓯ ꓡꓯꓼ ꓧ, ꓢꓴ꓾ ꓐꓯ ꓗ. ꓢꓴ ꓐꓴ ꓔꓯ ꓠꓽ ꓶꓽ ꓤ ꓗꓪ ꓚꓳ. ꓤ. ꓙꓰˍ ꓡꓳ꓿ ꓬꓲ ꓪ ꓐꓰ ꓶꓽ ꓤ ꓗꓪ ꓡꓰꓽ ꓔꓬ, ꓠꓲ, ꓫꓵˍ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓟ. ꓖꓶˍ ꓟ ꓠꓬ꓾ “ꓠꓴ ꓔꓯ ꓠꓲ, ꓠꓵ ꓢꓴ ꓔꓯ ꓡꓰꓽ ꓠꓲ, ꓠꓵˍ ꓕꓯ ꓠꓽ ꓮ ꓫꓵꓽ ꓡꓯꓼ ꓫꓴ ꓟꓽ ꓙꓳ꓿ ꓠꓴ ꓪ ꓠꓬ ꓠꓴ ꓪ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓡꓰꓽ ꓒꓵꓽ ꓗ ꓬꓰˍ ꓠꓬ꓾ ꓠꓱ. ꓐꓯ ꓢꓴ ꓐꓰ ꓟꓽ ꓫꓱ. ꓡꓯ ꓘꓳ ꓓꓴ ꓮ ꓫꓵꓽ ꓙꓳˍ ꓡ” ꓐꓰ ꓐꓯ ꓖꓶˍ ꓡꓳ꓿ ꓛꓴꓽ ꓙꓳ ꓢꓴ ꓔꓯ ꓠꓲ, ꓠꓵ ꓠ, ꓟ ꓙꓵꓽ ꓗ ꓬꓲ ꓫꓵꓼ ꓕꓲ ꓟ ꓬꓲ ꓪ ꓔꓯ ꓖꓶˍ ꓡꓳ꓿ ꓙꓵꓽ ꓗ ꓕꓱ ꓟ ꓔꓯ ꓛꓳ ꓫꓱꓽ ꓠ, ꓟ ꓬꓲ ꓝꓲ ꓓꓴ ꓐꓴ ꓔꓯ ꓓꓰꓽˍ ꓡꓳ꓿ ꓙꓵꓽ ꓗ ꓕꓱ ꓟ ꓠꓬ ꓠꓶꓽ ꓛꓳꓽ ꓕꓲ ꓛꓳꓽ ꓐꓴ ꓔꓯ ꓚꓲ. ꓛꓬ ꓖꓳ ꓓꓱꓽ ꓔꓯ ꓚꓲ. ꓛꓬ ꓠꓲ, ꓠꓵˍ ꓟˍ ꓡꓰ ꓐꓰ ꓬꓲ ꓪ ꓔꓯ ꓥ ꓟꓲ ꓠꓲ, ꓠꓵ ꓠ, ꓟ ꓥ ꓡꓳ꓿
ꓙꓵꓽ ꓗ ꓕꓱ ꓟ ꓠꓽ ꓐꓯ ꓢꓻˍ ꓟ ꓡꓰ ꓐꓰ ꓡꓯꓼ ꓕꓲꓺ ꓣꓱꓽ ꓬꓰ ꓠ, ꓟ ꓠꓽ ꓣꓳ ꓟꓲ ꓠꓯ ꓞꓳ ꓤ ꓐꓱ ꓶ ꓮ ꓘꓶ. ꓫ.ˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓙꓵꓽ ꓗ ꓫꓵꓼ ꓕꓱ ꓟ ꓔꓯ ꓚ ꓟ. ꓖꓶ ꓢꓲ꓾ ꓚꓲ. ꓛꓬ ꓖꓳ ꓓꓱꓽ ꓥˍ ꓟꓲ ꓛꓳ ꓫꓱꓽ ꓗꓷ ꓟ ꓢꓲ ꓒ ꓬꓰ‐ꓢꓴ ꓠꓬ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓐꓰ ꓬꓲ ꓔꓯ ꓘꓶꓻ ꓙꓵ ꓢꓴ ꓬꓲ ꓔꓯ ꓢꓰꓼ ꓢꓴ ꓐꓴ ꓐꓱ ꓶ ꓐ, ꓐ ꓪꓴ‐ꓢ ꓔꓬ ꓗꓪ “ꓐ, ꓐꓽꓳ꓾ ꓬꓲ ꓪ ꓮ ꓫꓵꓽ ꓬꓰ ꓔꓬ ꓟ ꓬꓲ ꓪ ꓟꓽ ꓢꓷ.꓿ ꓬꓲ ꓪ ꓝꓴꓲ. ꓔꓯ ꓖꓽ ꓖꓶ” ꓐꓰ ꓓꓰꓽ ꓙ ꓗꓷꓳ꓿ ꓣꓳ ꓐꓴ ꓥ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓔꓯꓺ ꓢꓳ ꓢꓲ ꓚꓲ. ꓛꓬ ꓔꓯ ꓛꓬ ꓗꓷ ꓢꓴ ꓐꓴ ꓔꓯ ꓬꓰ‐ꓢꓴ ꓙꓲ‐ꓢꓴˍ ꓡꓰ ꓐꓰ ꓖꓽ ꓖꓶ ꓠꓲ, ꓟ ꓡꓰ ꓒꓳ, ꓖꓶ ꓢꓲ ꓠꓬꓲ꓾ ꓢꓲ ꓒ ꓡꓰ ꓣꓳꓽ ꓔꓯ ꓖꓶ ꓔ ꓟ ꓣꓱꓽ ꓛꓰꓽ ꓡꓰ ꓟꓲ ꓠꓯ ꓕꓱ ꓟ ꓔꓯ ꓡꓳ. ꓐꓲꓻ ꓠ, ꓟ ꓐꓲꓻ ꓫꓴꓽ ꓙꓰ ꓓꓴ ꓬꓰ ꓡꓯ꓿
