ꓬꓳ‐ꓦ ꓿ 3ꓽ7‐15
ꓬꓰ‐ꓢꓴ ꓡꓰ ꓠꓲ‐ꓘꓳ‐ꓓꓲ‐ꓟꓴ ꓔꓯ ꓕꓱ ꓡꓱ ꓐꓯˍ ꓡꓳ꓿ ꓥꓪ ꓡꓰ ꓠꓴ ꓔꓯ꓾ ꓠꓴ ꓠꓽ ꓫꓬ, ꓦꓵꓻ ꓠ ꓗ, ꓢꓰꓽ ꓡꓳ꓾ ꓐꓰ ꓐꓯ ꓖꓶˍ ꓟ ꓔꓯ ꓕꓽ ꓓꓵꓽ ꓙ ꓟꓶꓻ꓿ ꓟꓲꓽ ꓦꓲ ꓠꓬ ꓮ ꓡꓲ ꓗꓪ ꓙꓱꓼ ꓠꓲ, ꓫꓵˍ ꓠꓬ ꓙꓱꓼˍ ꓡꓳ꓿ ꓬꓲ ꓢꓯꓼ ꓠꓴ ꓑ ꓙꓽˍ ꓟꓲ꓾ ꓮ ꓡꓲ ꓗꓪ ꓐꓰ ꓡˍ ꓟ ꓐꓰ ꓮ ꓡꓲ ꓗꓪ ꓙꓰˍ ꓟ ꓠꓴ ꓟꓽ ꓢꓷ.꓿ ꓦ ꓡꓰ ꓦꓵꓻ ꓔ ꓢꓴ ꓥ ꓕ ꓑꓳ. ꓠꓬ ꓖꓳ ꓡꓱ ꓗ, ꓡꓳ꓾ ꓐꓰ ꓐꓯ ꓖꓶˍ ꓡꓳ꓿
ꓠꓲ‐ꓘꓳ‐ꓓꓲ‐ꓟꓴ ꓡꓰ ꓬꓰ‐ꓢꓴ ꓔꓯ꓾ ꓕꓱ ꓟꓬ ꓙꓰꓽ ꓠꓬ ꓮ ꓡꓲ ꓒꓬꓱꓼ ꓡ ꓓ ꓡ? ꓐꓰ ꓠ ꓠꓬꓲˍ ꓕꓯ꓾ ꓬꓰ‐ꓢꓴ ꓡꓰ꓾ ꓠꓴ ꓠꓬ ꓬꓲ‐ꓢꓷ‐ꓡꓰ ꓡ ꓞꓳ ꓟ. ꓒ ꓥ ꓢꓲ ꓕꓱ ꓟꓬ ꓙꓰꓽ ꓟ ꓟꓽ ꓙꓽ ꓜꓲꓼ ꓢꓰꓽ ꓡ? ꓥꓪ ꓔꓱ, ꓔꓱˍ ꓠꓴ ꓔꓯ ꓐꓯ ꓖꓶˍ ꓠꓬꓲ꓾ ꓥꓪ ꓠꓴꓽ ꓢꓷ.ˍ ꓟ ꓥꓪ ꓠꓴꓽ ꓫ. ꓕꓱ ꓢꓲ꓾ ꓥꓪ ꓠꓴꓽ ꓟꓳ ꓠꓬꓲˍ ꓟ ꓔꓯ ꓥꓪ ꓠꓴꓽ ꓢꓷ. ꓙ ꓟꓳ ꓙˍ ꓟꓲ꓾ ꓥꓪ ꓠꓴꓽ ꓢꓷ. ꓙ ꓟꓳ ꓙˍ ꓟ ꓔꓯ ꓠꓴ ꓪ ꓟꓽ ꓘꓳ ꓣꓴ꓿
ꓥꓪ ꓡꓰ ꓠꓴ ꓪ ꓔꓯ ꓟꓲ ꓠꓯ ꓗꓪ ꓟ ꓫꓵꓽ ꓪꓴ ꓐꓯ ꓖꓶˍ ꓕꓯ ꓠꓴ ꓪ ꓟꓽ ꓙꓵꓻ ꓠꓬ꓾ ꓟꓴ ꓗꓪ ꓗꓪ ꓟ ꓫꓵꓽ ꓪꓴ ꓐꓯ ꓖꓶ ꓐꓭˍ ꓟꓲ ꓠꓴ ꓪ ꓙꓵꓻ ꓡ ꓓꓴ ꓟꓽ ꓥ꓿ ꓟꓴ ꓗꓪ ꓗꓪ ꓔꓬ ꓢꓲ ꓟꓴ ꓗꓪ ꓗꓪ ꓐꓰ ꓬꓯꓼ ꓡ ꓢꓴ ꓡ‐ꓞꓳ‐ꓮ‐ꓐꓲ ꓟꓽ ꓥ ꓠꓬ꓾ ꓟꓴ ꓗꓪ ꓕꓯ ꓢꓲ ꓗꓪ ꓮ ꓟˍ ꓟꓲ ꓟꓽ ꓓꓯ ꓙꓰ ꓠꓬꓲ꓿
ꓬꓲ ꓔꓯ ꓙꓵꓻ ꓢꓴ ꓮꓽ ꓟ ꓥˍ ꓟꓲ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠ, ꓟ꓾ ꓡꓲ ꓛꓲ ꓟꓵꓽ ꓛꓱ, ꓗꓪ ꓟꓳ‐ꓫꓲ ꓡꓰ ꓩꓴ ꓔꓯ ꓔꓳ, ꓔꓴ ꓗꓷ ꓟˍ ꓡꓰ ꓐꓰ꓾ ꓡ‐ꓞꓳ‐ꓮ‐ꓐꓲ ꓔꓯˍ ꓟꓲ ꓔꓳ, ꓔꓴ ꓗꓷ ꓠ ꓗ, ꓥꓳ꓾ ꓐꓯˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓗꓪ ꓙꓳˍ ꓟ ꓒꓬꓱꓼ ꓔꓬ ꓟ ꓔꓯ ꓢꓷ.ˍ ꓟ ꓞꓳ ꓤ ꓢꓷ. ꓠꓲ, ꓠꓬ ꓮ ꓟꓬ, ꓟꓽ ꓙꓳ꓿ ꓞꓳ ꓤ ꓕꓲ ꓣꓳ ꓠꓬ ꓮ ꓙꓵꓽ ꓡꓱꓸꓼ ꓔꓯ ꓢꓷ. ꓟꓽ ꓐ ꓡ꓿ ꓬꓲ ꓢꓷ.ˍ ꓟ ꓕꓲ ꓛꓱꓽ ꓗꓪ ꓡꓰꓽ ꓢꓷ.ˍ ꓡꓳ꓿ ꓟꓬ ꓢꓶꓽ ꓡꓰ ꓟꓳꓻ ꓓ, ꓟ꓾ ꓑ ꓙꓽ ꓓ, ꓟ꓾ ꓫꓱ, ꓪ ꓕꓲꓺ ꓪ ꓓ, ꓟ꓾ ꓬꓲ ꓐꓵꓽ ꓟꓶˍ ꓟ ꓕꓱ ꓟꓬ ꓫꓵꓽ ꓗꓪ ꓐꓰ ꓢꓷ. ꓪˍ ꓟ ꓔꓯ ꓡꓰꓽ ꓘꓳ ꓣꓴ ꓠꓲ, ꓫꓵˍ ꓟ ꓞꓳ ꓤ ꓥˍ ꓟꓲ ꓮ ꓟꓬ, ꓙꓳˍ ꓡꓳ꓿ ꓟꓲ ꓠꓯ ꓗꓪ ꓙꓳˍ ꓟ ꓒꓬꓱꓼ ꓔꓬ ꓟ ꓕꓲ ꓐꓱ ꓔꓯ ꓠꓬ ꓞꓳ ꓤ ꓟꓬ ꓢꓶꓽ ꓡꓰ ꓟꓳꓻ ꓟꓽ ꓓꓻ꓾ ꓑ ꓙꓽ ꓟꓽ ꓓ꓾ ꓕꓲꓺ ꓪ ꓟꓽ ꓓꓻ ꓟˍ ꓟꓲ ꓙꓳˍ sꓰꓽ ꓡꓳ꓿ ꓮ ꓙꓵꓽ ꓔꓯ ꓟꓳꓻ ꓕꓯˍ ꓢꓲ. ꓡꓰꓽ꓾ ꓑ ꓙꓽˍ ꓕꓯ ꓢꓲ. ꓡꓰꓽ꓾ ꓕꓲꓺ ꓪˍ ꓕꓯ ꓢꓲ.ˍ ꓡꓰꓽ ꓙꓵꓻˍ ꓥꓳ꓾ ꓘꓳ ꓣꓴˍ ꓥꓳ ꓐꓯ ꓕꓯ ꓠꓽ꓾ ꓣꓳ ꓢꓷ. ꓠꓲ, ꓣꓳ ꓪꓴ. ꓠꓷ. ꓥˍ ꓟꓲ ꓟꓳꓻ ꓓ, ꓑ ꓙꓽ ꓓ, ꓕꓲ ꓒꓳ, ꓗꓪ ꓛꓲˍ ꓡꓰꓽ ꓢꓷ.ˍ ꓥꓳ꓿
ꓙꓵꓻ ꓠꓲ, ꓐꓰ ꓗꓴ. ꓙꓲꓽ ꓙꓳˍ ꓟ꓾ ꓪꓴ‐ꓢ ꓐꓰ ꓗꓴ. ꓙꓲꓽ ꓙꓳˍ ꓟ ꓮ ꓙꓵꓽ ꓠꓬ ꓣꓳ ꓟꓳꓻ ꓐ ꓡˍ ꓟ꓾ ꓑ ꓙꓽ ꓐ ꓡˍ ꓟ꓾ ꓕꓲꓺ ꓐ ꓡˍ ꓟ ꓕꓯꓽ ꓢꓲ ꓮ ꓟꓬ, ꓪꓴꓽˍ ꓟ ꓪꓽ ꓠꓬꓲˍ ꓟ ꓥ ꓡꓳ꓿ ꓟꓲ ꓠꓯ ꓗꓪ ꓙꓳˍ ꓟ ꓔꓯ ꓠꓬ ꓬꓲ ꓑꓰ, ꓟꓳ. ꓖꓶ ꓐ ꓡˍ ꓥ ꓟꓲ꓾ ꓚꓵꓻ ꓘꓶꓽ ꓠꓯ.ˍ ꓟ ꓔꓯ ꓠꓬ ꓙꓵꓻ ꓠꓲ, ꓗꓪ ꓐꓰ ꓡꓰꓽ ꓟꓳ. ꓖꓶ ꓐ ꓡˍ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓞꓳ ꓤ ꓐꓴ ꓔꓯ ꓟ. ꓖꓶˍ ꓕꓯ ꓟꓲ ꓠꓯ ꓗꓪ ꓙꓳˍ ꓟ ꓬꓲ. ꓑꓰ, ꓟꓳ. ꓖꓶ ꓐ ꓡˍ ꓟ ꓔꓯ ꓣꓱꓽ ꓢꓲ꓾ ꓟꓲ ꓠꓯ ꓗꓪ ꓚꓵ ꓚꓵ ꓒꓬꓱꓼ ꓔꓬ ꓟ ꓔꓯ ꓖꓴ ꓔꓯ ꓟ. ꓖꓶ ꓔꓬ ꓥ ꓟꓲ꓾ ꓞꓳ ꓤ ꓐꓴ ꓠꓬ ꓕꓱ ꓟ ꓔꓯ ꓟꓽ ꓙꓵꓻ꓾ ꓘꓳ ꓣꓴ ꓟꓽ ꓐ ꓡ꓿ ꓖꓳ ꓡꓱ ꓥ ꓕꓯ ꓠꓽ ꓟꓲ ꓠꓯ ꓗꓪ ꓙꓳˍ ꓟ ꓕꓯꓽ ꓢꓲ ꓬꓲ ꓚꓵꓻ ꓘꓶꓽ ꓠꓯ.ˍ ꓟ꓾ ꓬꓲ ꓟ. ꓟꓲꓽ ꓠꓯˍ ꓟ ꓟꓴꓽ ꓗꓪ ꓗꓴꓷꓼ ꓚꓱ, ꓔꓯ ꓘꓳ ꓣꓴ ꓐ ꓡ ꓠ, ꓟ ꓠꓬ ꓮ ꓘꓶ. ꓶꓽ ꓞ, ꓓ, ꓢꓰꓽ ꓡꓳ꓿ ꓮ ꓶ. ꓶꓻ ꓗꓪ ꓡꓰꓽ ꓓ, ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓣꓳꓽ ꓠꓬ ꓪꓴ‐ꓢ ꓡꓰ ꓟ. ꓖꓶ ꓡˍ ꓟ ꓔꓯ ꓘꓳ ꓣꓴ ꓐ ꓡ ꓠ, ꓟ꓾ ꓙꓽ ꓜꓲꓼ ꓐ ꓡ ꓠ, ꓟ ꓐꓱ ꓶ ꓙꓵꓻ ꓠꓲ, ꓣꓱꓽ ꓛꓰꓽ ꓔꓯ ꓓꓰꓽ ꓓꓴ ꓬꓰ ꓡꓯ꓿
