ꓟꓶ ꓞ ꓮ ꓘꓶ. ꓞˍ ꓟ ꓗꓪ ꓟꓶ ꓤ ꓔꓬ ꓗꓷˍ ꓕ ꓑꓳꓸꓼ ꓪꓴ. ꓓꓵ ꓠꓻ ꓡˍ ꓟ ꓠꓬ ꓮ ꓫꓵꓽ ꓑꓶ. ꓓꓴ ꓥ ꓡ꓾
ꓮ ꓟꓶ ꓕꓯ ꓟꓶ ꓞ ꓥˍ ꓟꓲ ꓮ ꓘꓶ. ꓞꓺ ꓡꓺꓳ꓿ ꓟꓳꓼ ꓡꓳ ꓙꓵ, ꓛꓲ ꓡ ꓕꓯ ꓟꓶ ꓞꓺ ꓢꓯꓼ ꓥˍ ꓟꓲ ꓔꓶ. ꓞꓺˍ ꓟ ꓥꓳ꓿ ꓖꓳ ꓡꓱ ꓞꓺˍ ꓟ ꓠꓯꓸꓼ ꓗꓪ ꓕꓲ ꓖ ꓖ ꓗꓪ ꓙꓰ ꓓꓴ ꓓꓳ ꓡˍ ꓕꓯ꓾ ꓞꓳ ꓤ ꓟꓬꓽ ꓠꓬꓲ ꓠꓬ ꓮ ꓘꓶ. ꓙꓰ ꓛꓲ.ˍ ꓟ ꓥ ꓡꓳ꓿
ꓕꓱ ꓡꓱ ꓮ ꓘꓶ. ꓞˍ ꓟ ꓗꓪ ꓙꓰˍ ꓕꓯˍ ꓟꓲ ꓪꓴ. ꓓꓵ ꓠꓻˍ ꓟ ꓔꓯ ꓟꓽ ꓠꓽ ꓠꓽ ꓔꓳ, ꓜꓳꓽ ꓔꓬ ꓪˍ ꓡꓳ꓿ ꓧꓶ. ꓕꓯ ꓙꓳˍ ꓟ ꓠꓻ ꓔꓯ ꓛꓳ ꓢꓲ ꓖꓼ ꓢꓲ ꓠꓬꓲ꓾ ꓪꓴ. ꓓꓵ ꓠꓻˍ ꓟ꓾ ꓪꓴ. ꓓꓵ ꓕꓲꓽ ꓐꓶꓽ ꓠꓻˍ ꓟ ꓒꓬꓱꓼ ꓡ ꓗꓴ.ˍ ꓟ ꓥ ꓡꓳ꓿
ꓪꓴ. ꓓꓵ ꓠꓻˍ ꓐꓯ ꓟ ꓠꓬ ꓐꓯˍ ꓕꓯ ꓡꓰꓽ ꓢꓻˍ ꓡꓳ꓾ ꓚꓵ ꓚꓵ ꓒꓬꓱꓼ ꓡˍ ꓕꓯ ꓠꓬ ꓮ ꓘꓶ. ꓫꓬ, ꓫ.ˍ ꓟ ꓕꓲ ꓙꓰꓽ ꓥ ꓡꓳ꓿ ꓪꓴ. ꓓꓵ ꓠꓻ ꓡˍ ꓟ ꓚꓱ, ꓠꓬ ꓪꓴ. ꓠꓶ. ꓘꓴꓽ ꓗꓪ ꓟ ꓠꓰꓣꓦꓰ ꓬꓲ ꓙꓴꓽ ꓐꓴ ꓠꓬ ꓟꓬꓱꓽ ꓔꓯ ꓜꓳꓽ ꓜꓳꓽ ꓬꓰ ꓟꓽ ꓐ ꓡ ꓕꓯ ꓪꓴ. ꓓꓵ ꓠꓻ ꓡˍ ꓟ ꓥ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓖꓳ ꓡꓱ ꓠꓬꓲ ꓞꓺ ꓢꓯꓼ ꓪꓴ. ꓠꓬꓲ ꓪꓴ. ꓓꓵ ꓠꓻˍ ꓟ ꓥ ꓟꓲ ꓞꓳ ꓤ ꓐꓴ ꓐꓱ ꓶ ꓟꓽ ꓙꓲꓻ ꓟ ꓥ ꓡꓳ꓿ ꓞꓺ ꓢꓯꓼ ꓗꓪ ꓐꓰ ꓥˍ ꓟꓲ꓾ ꓠꓱ. ꓐꓯ ꓟꓵꓽ ꓗꓳꓼ ꓪꓴ. ꓠꓬꓲ ꓥˍ ꓟꓲ꓾ ꓮ ꓡꓲ ꓫꓵꓽ ꓑꓶ. ꓓꓴ ꓥˍ ꓟꓲ ꓪꓴ. ꓓꓵ ꓠꓻˍ ꓟ ꓠꓬ ꓡ ꓞꓳ ꓔꓯ ꓐꓬ ꓡꓰ ꓝꓲ ꓐ ꓡˍ ꓟ ꓫꓵꓽ ꓪꓴ ꓕꓲ ꓟꓽ ꓥ ꓡꓳ꓿
ꓣꓳꓽ ꓠꓬ ꓖꓳ ꓡꓱ ꓔꓬ ꓖꓳ ꓡꓱ ꓪꓴ. ꓓꓵ ꓠꓻ ꓛꓵˍ ꓢꓴ꓾ ꓪꓴ. ꓓꓵ ꓠꓻ ꓗꓴ. ꓢꓴ ꓕꓲ ꓣꓳ ꓥ ꓕꓯ ꓠꓽ꓾ ꓟꓶ ꓞꓺ ꓮ ꓘꓶ. ꓞꓺˍ ꓟ ꓙꓵ, ꓗꓪ ꓠꓱ. ꓫꓳ. ꓟ. ꓗꓪ ꓟꓽ ꓙꓰ ꓧꓶ. ꓕꓯ꓾ ꓬꓲ ꓐꓽ ꓗꓪ ꓟꓽ ꓙꓰ ꓧꓶ. ꓕꓯ ꓕꓱ ꓡꓱ ꓫꓵꓽ ꓣꓳ ꓔꓯ ꓙꓳˍ ꓡ꓾ ꓐꓯ ꓟ ꓔꓯ ꓚꓬ, ꓠꓬꓲ ꓠ ꓗ, ꓡꓳ꓿ ꓕꓱ ꓟ ꓠꓬ꓾
* ꓠꓲ, ꓟ ꓢꓴꓼ ꓢꓼ ꓔꓬ ꓟ
* ꓠꓲ, ꓟ ꓙꓬˍ ꓟ
* ꓬꓲꓼ ꓔ ꓬꓲꓼ ꓟꓶ ꓟꓽ ꓐꓳ ꓟ
* ꓕꓲ ꓑ, ꓕꓲ ꓑ, ꓘꓶꓽ ꓩꓴˍ ꓟ
* ꓠꓲ, ꓟ ꓮ ꓘꓶ. ꓔꓷ, ꓟ
ꓕꓱ ꓡꓱ ꓫꓵꓽ ꓣꓳ ꓖꓳ ꓓꓱꓽ ꓗꓪ ꓒꓬꓱꓼ ꓔꓬ ꓠꓬ ꓟꓶ ꓞꓺ ꓞꓺˍ ꓟ ꓗꓪ ꓓꓳ ꓙꓰ ꓟꓽ ꓓꓻ꓿ ꓟꓽ ꓥ ꓕꓯ ꓠꓬ ꓮ ꓘꓶ. ꓞꓺˍ ꓟ ꓗꓪ ꓓꓳ ꓙꓰ ꓪ ꓡꓰˍ ꓕꓯ ꓠꓬ ꓪꓴ. ꓓꓵ ꓠꓻ ꓡˍ ꓥꓳ꓿
ꓮ ꓘꓶ. ꓞꓺˍ ꓟ ꓑꓶ. ꓓꓴ ꓪꓴ. ꓓꓵ ꓠꓻ ꓡˍ ꓕꓯ ꓠꓽ ꓤ ꓟꓳ ꓔ ꓠꓯ, ꓡꓳ꓿ ꓮ ꓫꓵꓽ ꓪꓴ. ꓠꓬꓲ ꓥ ꓡ ꓐꓯ ꓠꓬ ꓣꓳ ꓟꓽ ꓤ ꓟꓳ ꓕꓯ ꓠꓱ. ꓐꓯ ꓫꓵꓽ ꓪꓴ ꓙꓳ ꓡˍ ꓡꓳ꓿ ꓒꓰꓼ ꓡˍ ꓟ꓾ ꓬꓲ ꓐꓵꓽ ꓛꓱꓽ ꓠꓱˍ ꓟ ꓔꓯ ꓟꓶ ꓡˍ ꓕꓯ ꓟꓬ ꓢꓶꓽ ꓞꓼ ꓐꓰ ꓶꓻ ꓡꓰˍ ꓟ ꓒꓬꓱꓼ ꓡ ꓗꓴ.ˍ ꓡꓳ꓿ ꓗ ꓠꓯ. ꓕꓯ ꓢꓺ ꓡꓰˍ ꓕꓯ ꓠꓬ ꓪꓴ. ꓠꓶ. ꓫꓵꓽ ꓙꓴꓽ ꓞꓷ, ꓗꓷˍ ꓗꓪ ꓛꓲ ꓒꓬꓱꓼ ꓡ ꓐ ꓡˍ ꓟ ꓪꓴ. ꓠꓬꓲ ꓥ ꓡꓳ꓿
ꓖꓳ ꓡꓱ ꓥ ꓕꓯ ꓠꓽ ꓪꓴ. ꓓꓵ ꓠꓻˍ ꓟ ꓔꓯ ꓓꓻ ꓡꓰ ꓠ ꓮ ꓡꓲ ꓬꓰ ꓠꓯ, ꓡ
ꓪꓴ. ꓓꓵ ꓠꓻ ꓡ ꓠꓬ ꓮ ꓫꓵꓽ ꓑꓶ. ꓓꓴ ꓠꓻˍ ꓠꓻ ꓞꓼ ꓞꓼ ꓓꓻ ꓡꓰ ꓠ ꓫꓬ,ˍ ꓟ ꓠꓬ ꓪ ꓜꓲ ꓙꓲˍ ꓡꓳ꓿ ꓔꓯ ꓥꓳꓽ ꓮ ꓘꓶ. ꓞꓺˍ ꓟ ꓗꓪ ꓙꓰ ꓔꓬ ꓕꓯ ꓪꓴ. ꓓꓵ ꓠꓻ ꓡˍ ꓕꓯ ꓬꓲꓻ ꓙꓬ ꓮ ꓟꓬ, ꓓꓳꓻ ꓖꓶˍ ꓟ ꓠꓬ ꓙꓲˍ ꓟ ꓚꓱ, ꓕꓲ ꓟ ꓥ ꓡꓳ꓿ ꓟꓬꓽ ꓠꓬꓲ ꓠꓬ ꓞꓺ ꓢꓯꓼ ꓮ ꓘꓶ. ꓟꓬꓽˍ ꓟ ꓑꓶ. ꓓꓴ ꓬꓲꓻ ꓙꓬ ꓢꓯꓼ ꓠꓲ. ꓡꓰ ꓢꓲ ꓪꓴ. ꓓꓵ ꓪ ꓜꓲ ꓠꓻ ꓡˍ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓠꓻ ꓕꓱ ꓟ ꓔꓯ ꓢꓻ ꓡꓰ ꓓꓻ ꓡꓰ ꓝꓲ ꓠ, ꓟ ꓠꓬ
- ꓬꓲꓻ ꓙꓬ ꓮ ꓟꓬ, ꓓꓳꓻ ꓠꓯ, ꓡꓳ
- ꓟꓮꓖꓠꓰꓢꓲꓴꓟ ꓢꓯꓼ ꓮ ꓟꓬ, ꓓꓵˍ ꓟ ꓜꓽ ꓓꓴ ꓟꓬꓽ ꓟꓬꓽ ꓜꓽ꓿ (ꓠꓲ, ꓛꓵꓼˍ ꓟ ꓜꓽ ꓪꓳꓽ ꓡꓳ ꓪꓳꓽ꓾ ꓕꓳ. ꓑ ꓢꓶꓽ꓾ ꓮ. ꓠꓳ꓾ ꓬꓲ ꓫꓵ. ꓬꓲ ꓠꓲ, ꓟ꓾ ꓥ ꓟ ꓢꓶꓽ) ꓐꓴ ꓔꓯ ꓜꓽ ꓖꓶ꓿
- ꓙꓲꓻ ꓒꓶꓽ ꓐꓰ ꓬꓲꓼ ꓫꓵꓽ ꓬꓲꓼ ꓙꓰꓽ ꓓꓳꓻˍ ꓟ ꓠꓽ ꓗꓷ꓿
- ꓬꓲꓼ ꓔ ꓬꓲꓼ ꓟꓶ ꓐꓳ ꓡꓰ ꓝꓲ꓿
- ꓦꓲꓔꓮꓟꓲꓠ ꓐ ꓢꓯꓼ ꓓꓯ,ˍ ꓟ ꓜꓽ ꓓꓴ ꓜꓽ ꓖꓶ꓿
- ꓖꓳ ꓓꓱꓽ ꓗꓪ ꓚꓵ, ꓬꓲ ꓓꓳ ꓠ ꓛꓲ ꓡꓵ ꓡꓯꓼ ꓡꓵ ꓖꓶ꓿
- ꓬꓲ ꓐꓵꓽ ꓮ ꓘꓶ. ꓫꓬꓻˍ ꓟ ꓮ ꓘꓶ. ꓛꓱꓽ ꓠꓱˍ ꓟ ꓔꓯ ꓠꓱꓽˍ ꓟ ꓔꓯ ꓤ ꓟꓳ꓿
ꓝꓮꓲ ꓪꓴ. ꓓꓵ ꓠꓻˍ ꓟ ꓠꓬ ꓞꓺ ꓟˍ ꓑꓶ. ꓓꓴˍ ꓡꓰꓽ ꓪꓴ. ꓓꓵ ꓠꓻ ꓡˍ ꓟ ꓟꓽ ꓥ ꓥ꓾ ꓟꓵꓽ ꓘꓳꓼ ꓒꓳ, ꓡꓶ. ꓙꓰˍ ꓟ ꓗꓪˍ ꓟꓲ ꓪꓴ. ꓓꓵ ꓠꓻ ꓡ ꓗꓴ.ˍ ꓡꓳ꓾ ꓐꓰ ꓢꓷ. ꓪ ꓡꓳ꓿
