1998 ꓘꓳꓼ ꓕꓯ ꓮꓢꓲꓮ ꓗꓪ ꓟ ꓶꓻ ꓡꓯꓼ ꓟꓴ ꓚꓱꓹ ꓠꓬ ꓠꓻ ꓓꓴ ꓒꓬꓽ ꓓꓴ ꓔꓳꓹ ꓜꓳꓽ ꓔꓬ ꓡꓳ= ꓐꓯ ꓠꓲ, ꓫꓵˍ ꓟ ꓠꓬ ꓶꓻ ꓡꓯꓼ ꓟꓴ ꓚꓱꓹ ꓠꓯꓸꓼ ꓗꓪ ꓢꓯꓼ ꓟꓽ ꓙꓳ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓮ ꓡꓲꓳ ꓐꓯ ꓠꓬ ꓣ-ꓫ ꓗꓴꓷꓼ ꓒꓴ ꓣꓴꓐꓡꓰ ꓬꓲ ꓒꓵꓼ ꓞꓰꓻ ꓡꓰ ꓟ ꓑꓶꓸ ꓓꓴ ꓫꓸ ꓢꓴ ꓟꓶꓽ ꓢꓴ ꓗꓴꓷꓼ ꓗꓪ ꓬꓰ ꓙˍ ꓟ ꓒꓴ ꓮꓽ ꓟꓬꓹ ꓟꓽ ꓪ ꓟ ꓪꓴꓸ ꓠꓬꓲ ꓟꓬꓽ ꓠꓬꓲ ꓕꓱ ꓡꓰ ꓗꓷ ꓡꓰ ꓓꓴ ꓥ ꓪ ꓐꓰ ꓕꓱ ꓡꓰ ꓐꓯˍ ꓡꓳ= ꓟꓬꓽ ꓠꓬꓲ ꓐꓷꓹ ꓠꓬꓲ ꓢꓔꓳꓚꓗ ꓢꓧꓮꓣꓰ ꓐꓯˍ ꓟ ꓒꓴ ꓟꓬꓽ ꓡ ꓐꓷꓹ ꓡˍ ꓟ꓾ ꓥ ꓠꓬ꓾ ꓣꓳ ꓡꓰˍ ꓟ ꓚꓱꓹ ꓟꓸ ꓖꓶˍ ꓟ ꓶꓻ ꓡꓯꓼ ꓬꓰˍ ꓟ ꓚꓱꓹ꓾ ꓕꓱ ꓕꓲꓽ ꓘꓴ ꓗꓪ ꓮ ꓕꓯ ꓥˍ ꓟꓲ ꓓꓯ ꓡˍ ꓟ ꓟꓽ ꓙꓳ꓾ ꓞꓰꓻ ꓡꓰˍ ꓟ ꓪꓴꓸ ꓠꓬꓲ ꓥ ꓡꓳ= ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓶꓻ ꓡꓯꓼ ꓟꓴˍ ꓟ ꓞꓰꓻ ꓡꓰˍ ꓕꓯ ꓠꓬ ꓗꓴꓷꓼ ꓕꓲꓽ ꓗꓴꓷꓼ ꓡꓰ ꓕꓲꓽ ꓗꓴꓷꓼ ꓗꓪ ꓫꓸ ꓓꓴ ꓟꓶꓽ ꓓꓴ ꓕꓱ ꓡꓰ ꓮꓽ ꓟꓬ, ꓔꓳꓹ ꓜꓳꓽˍ ꓟ ꓥ ꓪ= ꓕꓱ ꓡꓰ ꓟꓲ ꓠꓯ ꓗꓪ ꓟ ꓶꓻ ꓡꓯꓼ ꓟꓴ ꓚꓱꓹ ꓟꓽ ꓙꓲꓻ ꓠꓬ ꓫꓸ ꓢꓴ ꓟꓶꓽ ꓢꓴ ꓗꓴꓷꓼ ꓠꓯꓸꓼ ꓗꓪ ꓙꓲꓻˍ ꓟ ꓶꓻ ꓡꓯꓼ ꓥˍ ꓟꓲ ꓟꓬꓽ ꓠꓬꓲ ꓐꓷꓹ ꓠꓬꓲ ꓟꓬꓽ ꓡˍ ꓟ ꓥ ꓪ=
ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓟꓽ ꓓ ꓫꓸ ꓔ ꓟ ꓗꓴꓷꓼ ꓐꓴ ꓠꓯꓸꓼ ꓗꓪ ꓠꓬ ꓟꓵꓽ ꓘꓳꓼ ꓥˍ ꓟꓲ ꓟꓬꓽ ꓠꓬꓲ ꓐꓬ ꓡꓰ ꓓꓴ ꓥ ꓪ= ꓖꓳ ꓟ ꓡꓰꓽ ꓟꓽ ꓞꓲ ꓞꓳ ꓤ ꓥˍ ꓟꓲ ꓟꓬꓽ ꓠꓬꓲ ꓫꓸ ꓡꓰ ꓓꓴ ꓟ ꓥ ꓪ= ꓮ ꓡꓲꓳ ꓐꓯˍ ꓠꓬ ꓬꓲ ꓪꓽ ꓠꓬ ꓶꓻ ꓡꓯꓼ ꓔꓯ ꓚꓱꓹ ꓠ, ꓟ ꓢꓯꓼ ꓕꓵꓼˍ ꓟ ꓪꓴꓸ ꓠꓬꓲ ꓞꓳ ꓫꓸ ꓗꓴꓷꓼ ꓐꓴ ꓠꓬ ꓑ ꓫꓬ ꓐꓴ ꓔꓯ ꓬꓰ ꓙ ꓔ ꓙˍ ꓟ ꓠꓯꓸꓼ ꓗꓪ ꓟꓬꓽ ꓠꓬꓲ ꓐꓷꓹ ꓠꓬꓲ ꓠꓯꓻ ꓞꓲꓼ ꓫꓬꓹ ꓖꓶˍ ꓟ ꓠꓯꓸꓼ ꓗꓪ ꓒꓴ ꓮꓽ ꓟꓬꓹ ꓣꓱꓽ ꓓꓴ ꓟꓽ ꓙꓳ ꓕꓱ ꓡꓰ ꓗꓷ ꓡꓰ ꓢꓲ ꓠꓬꓲ ꓑ ꓫꓬ ꓐꓴ ꓠꓬ ꓟꓬꓽ ꓠꓬꓲ ꓐꓷꓹ ꓠꓬꓲ ꓧꓪꓸ ꓧꓪꓸꓼ ꓔꓬ ꓟꓶ ꓠ, ꓟ ꓫꓸ ꓔ ꓟ ꓡꓰꓽ ꓟꓽ ꓞꓲ ꓜꓽ ꓪꓳꓽ ꓡꓳ ꓪꓳꓽ ꓥˍ ꓟꓲ ꓫꓸ ꓡꓰˍ ꓟ ꓥ ꓪ= ꓖꓳ ꓟ ꓡꓰꓽ ꓟꓽ ꓞꓲ ꓶꓻ ꓡꓯꓼ ꓚꓱꓹ ꓠ, ꓟ ꓐꓱ ꓶ ꓟꓵꓽ ꓘꓳꓼ ꓔꓯ ꓥˍ ꓟꓲ ꓐꓬ ꓡꓰ ꓝꓲˍ ꓟ ꓒꓴ ꓤꓼ ꓫꓵ ꓤꓼ ꓧꓪˍ ꓟ꓾ ꓢꓲ, ꓜꓲ ꓘꓶ, ꓔ ꓟ꓾ ꓫꓵ ꓚꓴꓸ ꓔ ꓟ꓾ ꓑꓳꓽ ꓫꓵꓽ ꓚꓴꓸ ꓔ ꓟ ꓕꓱ ꓡꓱ ꓫꓵꓽ ꓚꓴꓸ ꓔ ꓟ ꓪꓴꓸ ꓠꓬꓲ ꓥ ꓡꓳ= ꓗꓴꓷꓼ ꓗꓪ ꓟ ꓟꓵꓽ ꓘꓳꓼ ꓐꓬ ꓡꓰ ꓠ ꓬꓰˍ ꓟ ꓶꓻ ꓡꓯꓼ ꓟꓴˍ ꓟ ꓮꓽ ꓟꓬꓹ ꓕꓱ ꓡꓰ ꓬꓰ ꓢꓲ ꓶꓻ ꓡꓯꓼ ꓔꓯ ꓚꓱꓹ ꓠ, ꓟ ꓢꓯꓼ ꓕꓵꓼˍ ꓟ ꓪꓴꓸ ꓠꓬꓲ ꓥ ꓪ= 1980 ꓘꓳꓼ ꓔꓯ ꓛꓳꓽ ꓠꓬꓲ ꓕꓯ꓾ ꓞꓳ ꓫꓸ ꓗꓴꓷꓼ ꓐꓴ ꓶꓻ ꓡꓯꓼ ꓚꓱꓹ ꓠ, ꓔ ꓟ ꓠꓬ 600 ꓐꓲꓡꓡꓲꓳꓠ ꓙꓳˍ ꓡꓳ= 1 ꓐꓲꓡꓡꓲꓳꓠ ꓐꓯˍ ꓟ ꓠꓬ 10ꓹ000 ꓫꓬꓹ ꓔꓯ ꓐꓯˍ ꓟ ꓥ ꓪ= 1999 ꓘꓳꓼ ꓕꓯ ꓠꓬ 2 ꓕꓣꓲꓡꓡꓲꓳꓠ ꓗꓪ ꓛꓲ ꓟꓬꓽ ꓡˍ ꓟ ꓔꓯ ꓐꓯˍ ꓟ ꓥ ꓪ= 1 ꓔꓣꓲꓡꓡꓲꓳꓠ ꓐꓯˍ ꓟ ꓠꓬ 1ꓹ000 ꓫꓬˍ ꓟ 10ꓹ000 ꓧꓪꓹ ꓥ ꓢꓲ 1 ꓔꓣꓲꓡꓡꓲꓳꓠ ꓐꓯˍ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ 2 ꓕꓣꓲꓡꓡꓲꓳꓠ ꓐꓯˍ ꓕꓯ ꓠꓬ 10ꓹ000 ꓫꓬˍ ꓟ 2ꓹ000 ꓧꓪꓹ ꓗꓷ ꓡꓰ ꓕꓯ ꓢꓲ ꓠꓬꓲ 2 ꓔꓣꓲꓡꓡꓲꓳꓠ ꓐꓯˍ ꓟ ꓥ ꓪ=
