ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓠꓬ ꓡꓯꓼ ꓐꓳ ꓔꓶ. ꓓꓴ ꓔꓯ ꓠꓲ, ꓙꓳꓺ ꓢꓴ꓾ ꓡꓯꓼ ꓐꓳ ꓔꓶ. ꓓꓴ ꓔꓯ ꓡꓳ. ꓠꓲ, ꓟꓽ ꓫꓵ ꓢꓴ꓾ ꓡꓯꓼ ꓐꓳ ꓔꓶ. ꓓꓴ ꓔꓯ ꓠꓲ, ꓐꓴ ꓢꓴ ꓮ ꓟꓬ, ꓙꓳˍ ꓡꓳ꓿ ꓟꓬꓽ ꓠꓬꓲ ꓐꓷ, ꓠꓬꓲ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓮ ꓫꓵꓽ ꓥˍ ꓟꓲ ꓢꓻ ꓢꓻ ꓡꓰꓽ ꓟꓶˍ ꓟ꓾ ꓮ ꓫꓵꓽ ꓥˍ ꓟꓲ ꓢꓻ ꓢꓻ ꓡꓰꓽ ꓬꓰ ꓐ ꓡˍ ꓟ ꓦꓬꓼ ꓠꓬꓲ ꓗꓪ ꓠꓲ, ꓟ ꓠꓯꓸꓼ ꓗꓪ ꓫ. ꓙꓵˍ ꓟ꓾ ꓣꓳ ꓧꓪꓽ ꓖꓳ ꓓꓱꓽ ꓗꓪ ꓫ. ꓙꓵˍ ꓟ ꓕꓲꓽ ꓫꓵꓽ ꓫꓵꓽ ꓮ ꓡꓲ ꓫꓵꓽ ꓔꓯ ꓥˍ ꓟꓲ ꓣꓳ ꓬꓰ ꓠꓲ, ꓟꓽ ꓫꓵ ꓗꓷ ꓡꓰˍ ꓡꓳ꓿ ꓕꓱ ꓟ ꓠꓬ ꓟꓽ ꓜꓳꓽ ꓐꓰ ꓐꓯˍ ꓟ꓾ ꓢ. ꓠꓯ (2) ꓠꓽ ꓕꓲ ꓠꓽ ꓟ ꓜꓻ ꓚꓲ. ꓧꓪꓽ ꓚꓲ. ꓠꓽ ꓦꓬꓼ ꓠꓬꓲ ꓗꓪ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓑ ꓙꓽ ꓪˍ ꓡꓳ꓿
ꓟ. ꓟꓲꓽ 2 ꓕꓱ ꓕꓲ ꓕꓱ ꓥ ꓟ (ꓒꓲ‐ꓡꓲ‐ꓒꓲ꓿3ꓽ17‐4ꓽ1) ꓗꓪ꓾ ꓙꓲꓻ ꓫꓬ ꓢꓴ ꓒꓳ‐ꓡꓳ ꓡꓰ ꓣꓳ ꓔꓯ ꓮ ꓡꓲ ꓐꓯ ꓔ ꓖꓶˍ ꓡ ꓐꓯ ꓠꓬ꓾ ꓙꓲꓻ ꓫꓬ ꓢꓴ ꓒꓳ‐ꓡꓳ ꓠꓬ ꓣꓳ ꓔꓯ “ꓡ ꓞꓳ ꓮ ꓟꓬ, ꓠꓬ ꓡꓯꓼ ꓐꓳ ꓔꓶ. ꓓꓴ ꓔꓯ ꓛꓴꓽ ꓙꓳ ꓢꓴ ꓬꓰˍ ꓥꓳ꓾” ꓐꓰ ꓐꓯˍ ꓟ ꓣꓳ ꓑ ꓙꓽ ꓪˍ ꓡꓳ꓿ ꓡꓯꓼ ꓐꓳ ꓔꓶ. ꓓꓴ ꓔꓯ ꓛꓴꓽ ꓙꓳˍ ꓐꓯ ꓟ ꓠꓬ ꓡꓯꓼ ꓐꓳ ꓔꓶ. ꓓꓴ ꓔꓯ ꓠꓲ, ꓙꓳꓺ ꓢꓴ꓾ ꓡꓯꓼ ꓐꓳ ꓔꓶ. ꓓꓴ ꓔꓯ ꓡꓳ. ꓠꓲ, ꓟꓽ ꓫꓵ ꓢꓴ꓾ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻˍ ꓟ ꓠꓬ ꓡꓯꓼ ꓐꓳ ꓔꓶ. ꓓꓴ ꓔꓯ ꓑꓱ. ꓠꓲ, ꓫꓵˍ ꓟ ꓑꓶ. ꓓꓴ ꓟꓽ ꓥ ꓥ ꓐꓰ꓾ ꓚꓲ. ꓛꓬ ꓗ, ꓛꓲꓽ ꓓꓴ꓾ ꓚꓲ. ꓛꓬ ꓧꓪꓽ ꓖꓳ ꓓꓱꓽ ꓗ, ꓛꓲꓽ ꓓꓴ ꓐꓱ ꓶˍ ꓡꓰꓽ ꓙꓵꓻ ꓢꓴ꓾ ꓕꓱ ꓡꓱ ꓫꓵꓽ ꓔꓯ ꓙꓲꓻ ꓫꓬ ꓢꓴ ꓒꓳ‐ꓡꓳ ꓡꓰ ꓟ. ꓖꓶ ꓔ ꓡꓳ꓿ ꓡꓯꓼ ꓐꓳ ꓔꓶ. ꓓꓴ ꓔꓯ ꓟꓽ ꓠꓲ, ꓠꓵ ꓢꓴ꓾ ꓡꓯꓼ ꓐꓳ ꓔꓶ. ꓓꓴ ꓔꓯ ꓚꓲ. ꓛꓬ ꓤꓶꓻ ꓗꓪ ꓒꓵꓽ ꓗ ꓟꓽ ꓚꓰ ꓢꓴ ꓬꓲ ꓪ ꓤꓶꓻ ꓠꓬ ꓡꓳ, ꓬꓰˍ ꓕꓯ ꓐꓬ ꓡꓰˍ ꓥꓳ꓾ ꓐꓰ ꓙꓲꓻ ꓫꓬ ꓢꓴ ꓒꓳ‐ꓡꓳ ꓐꓰ ꓣꓳ ꓔꓯ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓙꓳꓺ ꓗꓽ ꓖꓶ ꓔ ꓡꓳ꓿
ꓡꓯꓼ ꓐꓳ ꓔꓶ. ꓓꓴ ꓐꓯˍ ꓟ ꓠꓬ ꓮ ꓫꓵꓽ ꓥ ꓡ? ꓣꓳ ꓢꓲ ꓒ ꓬꓰ‐ꓢꓴ ꓗ ꓠꓯ. ꓛꓳˍ ꓟ ꓑꓶ. ꓓꓴ ꓣꓳ ꓔꓳ, ꓜꓳꓽ ꓠ ꓔˍ ꓟ꓾ ꓣꓳ ꓙꓵꓻ ꓠꓲ, ꓐꓱ ꓶ ꓣꓳ ꓔꓳ, ꓜꓳꓽ ꓠ ꓔˍ ꓟ ꓫ. ꓙꓵ ꓟꓷꓼ ꓙꓵ ꓓꓴ꓾ ꓕꓲ ꓠꓬꓲ ꓕꓲ ꓠꓬꓲ ꓣꓳ ꓔꓳ, ꓜꓳꓽ ꓪˍ ꓟ ꓘꓶꓻ ꓡꓶ ꓓꓴ ꓔꓯ ꓠꓲ, ꓟ ꓠꓯꓸꓼ ꓗꓪ ꓐꓰ꓾ ꓪꓴ‐ꓢ ꓔꓯ ꓙꓵˍ ꓟ ꓗꓪ ꓐꓰ ꓣꓳ ꓜꓲꓽ ꓐ ꓡˍ ꓟ ꓕꓱ ꓟ ꓠꓬ ꓡꓯꓼ ꓐꓳ ꓔꓶ. ꓓꓴ ꓔꓯ ꓑꓱ.ˍ ꓟ ꓥ ꓡꓳ꓿
ꓶꓼ ꓓꓳꓽ ꓫꓱ, ꓓꓳꓽ ꓗꓪ ꓥˍ ꓟꓲ꓾ ꓡꓴ‐ꓘ 9ꓽ28‐36 ꓗꓪ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓛꓳꓽ ꓒꓯ, ꓥ ꓟ ꓒꓲ‐ꓕꓱ꓾ ꓬꓳ‐ꓦ꓾ ꓬ‐ꓗꓴ ꓔꓯ ꓪ ꓚꓲ ꓕꓯꓽ ꓢꓲ ꓗꓪ ꓧꓳꓽ ꓔꓯ, ꓓꓯꓻ ꓙꓰ ꓢꓲ ꓠꓬꓲ꓾ ꓬꓲ ꓪ ꓟꓲꓽ ꓙꓬ ꓗꓪ ꓬꓲ ꓠꓬ ꓬꓲ ꓒꓬꓱꓽ ꓶꓻ ꓡꓰˍ ꓟ ꓔꓯ ꓢꓲꓽ ꓫꓬ ꓕꓳꓽ ꓶ ꓔꓯ ꓣꓳ ꓑ ꓙꓽˍ ꓡꓳ꓿ ꓟ. ꓟꓲꓽ ꓕꓱ ꓟ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓬꓲ ꓛꓳꓽ ꓒꓯ, ꓒꓲ‐ꓕꓱ ꓠꓬ ꓢꓲ ꓒ ꓬꓰ‐ꓢꓴ ꓡꓯꓼ ꓐꓳ ꓔꓶ. ꓓꓴ ꓑꓱ. ꓠ ꓗ, ꓡꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓟ. ꓒ ꓐꓴ꓾ ꓟ. ꓟꓲꓽ ꓢꓷ. ꓢꓴ ꓡꓯꓽ ꓒꓯ, ꓗꓪ ꓫꓵꓻ ꓢꓲ ꓠꓬꓲ ꓢꓽ ꓠꓬꓲ ꓗ ꓠꓯ. ꓢꓯ. ꓬꓲꓼ ꓡˍ ꓥꓳ ꓐꓰ꓾ ꓬꓲ ꓟꓷꓽ ꓠꓷ, ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓐꓯ ꓟꓳ. ꓖꓶ ꓔꓬ ꓕꓯ ꓒꓲ‐ꓕꓱ ꓠꓬ ꓬꓲ ꓔꓯ ꓕꓼˍ ꓡꓳ꓾ ꓬꓲ ꓔꓯ ꓗꓽˍ ꓡꓳ꓿ ꓠꓴ ꓠꓬ ꓡꓯꓼ ꓐꓳ ꓔꓶ. ꓓꓴ ꓑꓱ. ꓟꓽ ꓓꓻ ꓐꓰ ꓢꓲꓽ ꓒ ꓬꓰ‐ꓢꓴ ꓔꓯ ꓗꓽ ꓢꓴ ꓥ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓪꓽ ꓚꓲ ꓕꓯꓽ ꓢꓲ ꓗꓪ ꓶꓻ ꓒꓬꓱꓽ ꓑꓶ. ꓙꓰˍ ꓕꓯ꓾ ꓟꓴꓽ ꓗꓪ ꓗꓴꓷꓼ ꓐꓯˍ ꓟꓲ ꓮ ꓡꓲ ꓗ, ꓟ ꓔꓯ ꓬꓲ ꓟꓳ. ꓖꓶˍ ꓕꓯ ꓒꓲ‐ꓕꓱ ꓠꓬ ꓖꓳ ꓗꓪ ꓡꓰꓽ ꓔꓬ, ꓠꓲ, ꓫꓵ ꓡˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓐꓰ ꓕꓲ ꓪꓽ ꓓꓳ ꓡˍ ꓟ ꓟꓳ‐ꓫꓲ ꓐꓱ ꓶ ꓦꓲꓻ ꓕꓲꓽ ꓟ꓾ ꓬꓲ‐ꓡꓲ‐ꓬ ꓐꓱ ꓶ ꓦꓲꓻ ꓕꓲꓽ ꓟ ꓫꓬ, ꓢꓲ ꓠꓬꓲ ꓕꓱ ꓗꓪ ꓔꓬ ꓡꓯ ꓐꓯ ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓔꓯ ꓬꓲ ꓓꓰꓽˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓞꓳ ꓤ ꓐꓯˍ ꓟ ꓠꓬ ꓫ. ꓙꓵˍ ꓟ ꓔꓯ ꓮꓽ ꓟˍ ꓟꓲ ꓟꓽ ꓠꓲ, ꓫꓵ꓿ ꓚꓲ. ꓛꓬ ꓧꓪꓽ ꓖꓳ ꓓꓱꓽ ꓠꓻ ꓡꓰˍ ꓟ꓾ ꓚꓲ. ꓛꓬ ꓠꓻ ꓓꓴ ꓑ ꓓꓴ ꓡꓰˍ ꓟ꓾ ꓚꓲ. ꓛꓬ ꓫ. ꓙꓵ ꓡꓰˍ ꓟ ꓮꓽ ꓟˍ ꓟꓲ ꓟꓽ ꓠꓲ, ꓫꓵ꓿ ꓖꓳ ꓡꓱ ꓐꓯˍ ꓥ ꓟꓲ ꓗ, ꓛꓲꓽˍ ꓟ ꓑꓬꓮꓪˍ ꓟ꓾ ꓣꓳ ꓤꓶꓻ ꓔꓯ ꓗꓳ. ꓢꓻ ꓡꓰ ꓝꓲˍ ꓟ ꓠꓬ ꓮꓽ ꓟˍ ꓟꓲ ꓠꓲ, ꓫꓵˍ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓗ ꓠꓯ. ꓛꓳ ꓢꓴ ꓐꓴ ꓠꓬ ꓕꓱ ꓡꓱ ꓬꓰ ꓟꓽ ꓓꓻ ꓐꓯˍ ꓟ ꓣꓳ ꓔꓯ ꓟꓳ. ꓖꓶ ꓡˍ ꓡꓳ꓿
ꓥ ꓡꓳ꓿ ꓟꓲ ꓠꓯ ꓕꓱ ꓟ ꓗꓪ ꓠꓬ ꓫ. ꓙꓵ ꓟꓷꓼ ꓙꓵ ꓓꓴ ꓥˍ ꓟꓲ ꓣꓳ ꓔꓳ, ꓜꓳꓽˍ ꓥꓳ꓿ ꓗ, ꓛꓲꓽ ꓓꓴ ꓔꓯ ꓥˍ ꓟꓲ ꓣꓳ ꓔꓳ, ꓜꓳꓽˍ ꓥꓳ꓿ ꓡ ꓞꓳ ꓕꓲ ꓣꓳ ꓠꓬ ꓕꓲꓽ ꓞꓲꓼ ꓡꓱꓸꓼ ꓗ, ꓛꓲꓽ ꓟꓽ ꓘꓴ꓿ ꓕꓲꓽ ꓞꓲꓼ ꓡꓱꓸꓼ ꓫ. ꓙꓵ ꓟꓷꓼ ꓙꓵˍ ꓟ ꓬꓲ ꓟꓽ ꓔꓳ, ꓜꓳꓽ꓿ ꓖꓳ ꓡꓱ ꓠꓬꓲ ꓔꓳ, ꓜꓳꓽˍ ꓟ ꓠꓬ ꓗ, ꓛꓲꓽˍ ꓟ ꓕꓲꓽ ꓧꓪ, ꓟꓽ ꓗ, ꓛꓲꓽ ꓟ ꓕꓲꓽ ꓧꓪ,꓾ ꓕꓱ ꓡꓱ ꓔꓳ, ꓜꓳꓽˍ ꓟ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬꓲ. ꓠꓬꓲ ꓣꓳ ꓔꓯ ꓟꓳ. ꓖꓶ ꓡˍ ꓟ ꓠꓬ꓾ ꓣꓳ ꓟꓲ ꓠꓯ ꓕꓱ ꓟ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻˍ ꓟ ꓗꓪ ꓐꓰ ꓫ. ꓙꓵ ꓟꓶ ꓙꓵˍ ꓟ ꓠꓬ ꓬꓲ ꓖꓳꓽ ꓟꓽ ꓥ꓿ ꓣꓳ ꓚꓲ. ꓛꓬ ꓡꓯꓼ ꓐꓳ ꓔꓶ. ꓓꓴ ꓑꓱ.ˍ ꓟ ꓠꓬ꓾ ꓕꓲꓽ ꓠꓬꓲ ꓙꓳˍ ꓠꓬ ꓖꓴ ꓡꓰ ꓟꓽ ꓓꓻ ꓟ ꓐꓬ ꓡꓰ ꓟꓽ ꓓꓻ ꓟ ꓡꓯꓼ ꓪ ꓟꓶ ꓠ, ꓟ ꓥ ꓡꓳ꓿ ꓚꓵ ꓚꓵ꓾ ꓟꓴ ꓗꓪ ꓗꓴꓷꓼ ꓠꓬ ꓚꓵ ꓚꓵ ꓙꓳˍ ꓡꓳ ꓐꓯˍ ꓟ ꓔꓯ ꓢꓲ ꓒ ꓬꓰ‐ꓢꓴ ꓠꓬ ꓒꓲ‐ꓕꓱ ꓬꓳ‐ꓦ ꓬ‐ꓗꓴ ꓔꓯ ꓟꓳ. ꓖꓶˍ ꓟ ꓡꓰ ꓐꓰ꓾ ꓠꓬꓲ. ꓠꓬꓲ ꓠꓴ ꓐꓰ ꓥꓪ ꓔꓯ ꓟꓳ. ꓖꓶ ꓔꓬ ꓟ ꓥ ꓡꓳ꓿
ꓜꓻ ꓚꓲ. ꓧꓪꓽ ꓚꓲ.ˍ ꓟ ꓦꓬꓼ ꓠꓬꓲ ꓗꓪ ꓣꓳ ꓧꓪꓽ ꓖꓳ ꓓꓱꓽ ꓫꓵꓽ ꓧꓪꓽ ꓠꓯꓼ ꓠꓲ, ꓡꓶꓽ ꓟꓽ ꓛꓳ ꓛꓳ ꓐꓰ ꓢꓲ ꓒ ꓬꓰ‐ꓢꓴ ꓠꓲ, ꓡꓶꓽ ꓛꓳˍ ꓟ꓾ ꓜꓻ ꓚꓲ.ˍ ꓟ ꓧꓪꓽ ꓚꓲ.ˍ ꓟ ꓝꓴꓲ. ꓔꓯ ꓚꓲ.ˍ ꓟ꓾ ꓕꓱ ꓡꓱ ꓫꓵꓽ ꓚꓲ.ˍ ꓟ ꓮ ꓙꓵꓽ ꓔꓯ ꓠꓲ, ꓒꓴ ꓒꓴ ꓡꓰꓽ ꓣꓳ ꓬꓰ ꓡꓯ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓰ ꓐꓯˍ ꓠꓬ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓟꓴ ꓗꓪ ꓗꓴꓷꓼ ꓠꓬ ꓚꓵ ꓚꓵ ꓙꓳˍ ꓡꓳ꓿ ꓠꓴ ꓬꓰˍ ꓟ ꓠꓬ ꓬꓲ ꓖꓳꓽ ꓟꓽ ꓥ꓿ ꓠꓴ ꓫ. ꓙꓵ ꓔꓬ ꓟ ꓠꓬ ꓬꓲ ꓖꓳꓽ ꓟꓽ ꓗꓷ ꓡꓰ꓿ ꓢꓲ ꓒ ꓬꓰ‐ꓢꓴ ꓐꓱ ꓶ ꓙꓵꓻ ꓠꓲ, ꓐꓱ ꓶ ꓠꓴ ꓫ. ꓙꓵ ꓟꓶ ꓙꓵˍ ꓟ ꓠꓬ ꓬꓲ. ꓖꓳꓽ ꓟꓽ ꓗꓷ ꓡꓰ ꓐꓰ ꓐꓯ ꓟ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓟꓳ. ꓖꓶ ꓡ ꓔꓬ ꓡꓳ꓾ ꓢꓯꓼ ꓖꓶ ꓡ ꓔꓬ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓟ ꓦꓬꓼ ꓠꓬꓲ ꓗꓪ꓾ ꓠꓴꓻ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻˍ ꓟ ꓠꓬ ꓗꓳ. ꓢꓻ ꓠ, ꓟ ꓐꓱ ꓶ꓾ ꓡꓯꓼ ꓐꓳ ꓔꓶ. ꓓꓴ ꓟꓽ ꓑꓱ. ꓪ ꓠ, ꓟ ꓐꓱ ꓶ꓾ ꓕꓲ ꓚꓱ, ꓐꓯˍ ꓠꓬ ꓠꓴ ꓟꓽ ꓫ. ꓙꓵ ꓠ, ꓟ ꓐꓱ ꓶ꓾ ꓠꓴ ꓟꓬ ꓐꓲ ꓟꓽ ꓓꓳ ꓠ, ꓟ ꓐꓱ ꓶ ꓬꓲ ꓗ ꓠꓯ. ꓛꓳ ꓔꓬ ꓥꓳ ꓐꓯ ꓠꓬ꓾ ꓠꓴ ꓖꓼ ꓛꓳ ꓔꓬ ꓟ ꓢꓲ ꓒ ꓬꓰ‐ꓢꓴ ꓠꓬ ꓟꓽ ꓜꓳꓽ꓿ ꓔꓱ, ꓟ ꓢꓲ ꓒ ꓬꓰ‐ꓢꓴ ꓟꓽ ꓥꓺꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓣꓳ ꓙꓵꓻˍ ꓟ ꓢꓲ ꓒ ꓬꓰ‐ꓢꓴ ꓠꓬ ꓚꓲ. ꓛꓬ ꓡꓯꓼ ꓐꓳ ꓔꓶ. ꓓꓴ ꓔꓯ ꓑꓱ. ꓢꓲ ꓠꓬꓲ ꓚꓮꓡꓦꓮꓣꓬ ꓪꓽ ꓚꓲ ꓕꓯꓽ ꓢꓲ ꓗꓪ ꓓꓯꓻ ꓢꓴ ꓥ ꓡꓳ꓿ ꓢꓴ ꓡꓰ ꓤꓲˍ ꓟ꓾ ꓢꓴ ꓡꓰ ꓓꓶꓽ ꓔꓲ.ˍ ꓟ ꓔꓯ ꓘꓽ ꓗꓳ. ꓙꓰ ꓢꓲ ꓠꓬꓲ ꓡꓯꓼ ꓐꓳ ꓔꓶ. ꓓꓴ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓫꓵꓻ ꓗꓷ ꓢꓴ ꓥ ꓡꓳ꓿
ꓕꓱ ꓡꓱ ꓫꓵꓽ ꓪꓴ‐ꓢ ꓔꓯ ꓣꓳ ꓦ ꓡꓱ ꓔꓬ ꓟ ꓦꓬꓼ ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓮ ꓫꓵꓽ ꓥˍ ꓟꓲ ꓐ ꓡˍ ꓡꓳ꓾ ꓮ ꓫꓵꓽ ꓥˍ ꓟꓲ ꓬꓰ ꓗꓴ.ˍ ꓡꓳ꓾ ꓐꓰ ꓐꓯˍ ꓥ ꓟꓲ ꓬꓲ ꓗ ꓠꓯ. ꓛꓳ ꓢꓴ ꓠꓬ ꓕꓱ ꓟ ꓔꓯ ꓥꓳ ꓡꓳ. ꓢꓲ ꓡꓰꓽ꓾ ꓬꓲ ꓡꓰ ꓖꓶ ꓡˍ ꓟ ꓡꓯꓼ ꓫꓴ ꓔꓯˍ ꓡꓰꓽ ꓥꓳ ꓡꓳ. ꓢꓲ ꓡꓰꓽ ꓞꓳ ꓙꓳ ꓟꓽ ꓓꓻ꓿ ꓮ ꓫꓵꓽ ꓔꓯ ꓥꓳ ꓡꓳ. ꓢꓲ ꓞꓳ ꓙꓳ ꓠ ꓔ ꓡ ꓐꓯ ꓠꓬ꓾ ꓠꓬꓲ. ꓠꓬꓲ ꓙꓲꓻ ꓫꓬ ꓢꓴ ꓐꓴ ꓬꓲ ꓪ ꓙꓻ ꓫꓱꓽ ꓗꓳ. ꓙꓰ ꓟ꓾ ꓢꓲ ꓒ ꓬꓰ‐ꓢꓴ ꓗ ꓠꓯ. ꓛꓳˍ ꓟ꓾ ꓚꓲ. ꓛꓬ ꓡꓯꓼ ꓐꓳ ꓔꓶ. ꓓꓴ ꓑꓱ. ꓢꓲ ꓠꓬꓲ ꓬꓲ ꓗ ꓠꓯ. ꓖꓼ ꓠ ꓗ, ꓡꓳ꓾ ꓐꓯˍ ꓟ ꓔꓯ ꓠꓬꓲ. ꓠꓬꓲ ꓗꓪ ꓢꓯꓼ ꓖꓶ ꓡ ꓔꓬ ꓡꓳ꓿
ꓙꓲꓻ ꓫꓬ ꓢꓴ ꓒꓳ‐ꓡꓳ ꓐꓯˍ ꓟ ꓡꓰ ꓐꓰ “Enemies of the Cross ‐ ꓡꓯꓼ ꓐꓳ ꓔꓶ. ꓓꓴ ꓔꓯ ꓛꓴꓽ ꓙꓳ ꓢꓴ” ꓟꓽ ꓒꓬꓱꓼ ꓡ ꓠ, ꓟ ꓣꓳ ꓢꓯꓼ ꓕꓵꓼ ꓡꓯ꓿ ꓡꓯꓼ ꓐꓳ ꓔꓶ. ꓓꓴ ꓔꓯ ꓠꓲ, ꓥꓳꓺ ꓢꓴ꓾ ꓡꓯꓼ ꓐꓳ ꓔꓶ. ꓓꓴ ꓔꓯ ꓚꓲ. ꓛꓬ ꓠꓲ, ꓟ ꓠꓯꓸꓼ ꓗꓪ ꓗꓶ ꓔ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓗ ꓠꓯ. ꓖꓼ ꓢꓴ ꓣꓳꓽ ꓢꓯꓼ ꓕꓵꓼ ꓡꓯ꓿ ꓟꓲ ꓠꓯ ꓕꓱ ꓟ ꓗꓪ ꓡꓯꓼ ꓐꓳ ꓔꓶ. ꓓꓴ ꓔꓯ ꓟꓽ ꓑꓱ. ꓠꓬ ꓮ ꓡꓲ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓒꓬꓱꓼ ꓡ ꓟꓽ ꓓꓻ꓿ ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓟꓬꓽ ꓠꓬꓲ ꓮ ꓟꓶ ꓜꓻ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓗꓪ ꓚꓲ. ꓛꓬ ꓠꓲ, ꓫꓵˍ ꓟ ꓔꓯ ꓚꓲ. ꓐ ꓡ ꓢꓲ ꓠꓬꓲ꓾ ꓚꓵ ꓚꓵ ꓪꓴ‐ꓢ ꓗꓪ ꓚꓳ. ꓗꓳ. ꓙꓰ ꓠꓬ ꓥꓪ ꓤꓶꓻ ꓗꓪ ꓥꓪ ꓠꓲ, ꓫꓵˍ ꓟ ꓟꓽ ꓙꓳ ꓐꓯ ꓟ ꓔꓯ ꓟ. ꓖꓶ ꓠ, ꓟ ꓮ ꓘꓶ. ꓙꓲꓻˍ ꓟ ꓦꓬꓼ ꓠꓬꓲ ꓥ ꓡꓳ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓣꓳꓽ ꓢꓯꓼ ꓕꓵꓼ ꓙꓰ ꓡꓯ꓿ ꓫ. ꓟꓳ꓿
