ꓢꓲ ꓒ ꓬꓰ‐ꓢꓴ ꓠꓬ ꓢꓺ ꓧꓪ, ꓠꓲꓽ ꓢ‐ꓓꓯ ꓤ, ꓠꓬꓲ ꓫꓵꓽ ꓠꓬꓲˍ ꓟ ꓔꓯ ꓬꓲ. ꓟꓶˍ ꓡꓳ꓿ ꓢꓺ ꓧꓪ, ꓡꓱꓸꓼ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓧꓪꓽ ꓖꓳ ꓓꓱꓽ ꓔꓯ ꓟꓳ. ꓤ, ꓠꓬꓲ ꓫꓵꓽ ꓠꓬꓲˍ ꓟ꓾ ꓝꓮꓲ ꓙꓵꓽ ꓪ ꓔꓯ ꓟꓳ. ꓤ, ꓠꓬꓲ ꓫꓵꓽ ꓠꓬꓲˍ ꓟ ꓐꓰ꓾ ꓪꓴ‐ꓢ ꓔꓯ ꓟꓳ. ꓤ, ꓠꓬꓲ ꓫꓵꓽ ꓠꓬꓲˍ ꓟ꓾ ꓕꓱ ꓡꓱ ꓢꓺ ꓫꓵꓽ ꓔꓯ ꓢꓲ ꓒ ꓬꓰ‐ꓢꓴ ꓡꓰ ꓔꓳ, ꓜꓳꓽˍ ꓟ ꓥ ꓡꓳ꓿
ꓢ. ꓠꓯ ꓠꓬ꓾ ꓜ ꓚꓲ. ꓧꓪꓽ ꓚꓲ.ˍ ꓟ ꓬꓲ ꓪꓴ. ꓕꓲ ꓠꓽ ꓠꓽ ꓦꓬꓼ ꓠꓬꓲ ꓥ ꓡꓳ꓿ ꓬꓲ ꓪꓴ. ꓕꓲ ꓠꓽ ꓗꓪ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓠꓬ꓾ ꓢꓲ ꓒ ꓬꓰ‐ꓢꓴ ꓠꓬ ꓡꓲ ꓛꓲ ꓟꓵꓽ ꓗꓪ ꓙꓰ ꓢꓲ ꓠꓬꓲ ꓠꓲꓽ ꓪ ꓔꓲ. ꓠꓲꓽ ꓢ‐ꓓꓯ ꓤ, ꓠꓬꓲ ꓫꓵꓽ ꓠꓬꓲˍ ꓟ ꓔꓯ ꓬꓲ ꓘꓳ ꓗꓳ. ꓙꓰˍ ꓡꓳ꓾ ꓐꓯ ꓟ ꓔꓯ ꓣꓳ ꓑ ꓙꓽ ꓪˍ ꓡꓳ꓿
ꓡꓲ ꓛꓲ ꓟꓲ ꓐꓯˍ ꓟ ꓠꓬ ꓮ ꓫꓵꓽˍ ꓟꓲ ꓟꓽ ꓙꓳ ꓟ꓾ ꓮ ꓫꓵꓽ ꓜꓽ ꓓꓴ ꓓꓳꓻ ꓓꓴ ꓟꓽ ꓙꓳ ꓟ꓾ ꓮ ꓫꓵꓽ ꓢꓯꓼˍ ꓟꓲ ꓟꓽ ꓑ ꓙꓽ ꓟ꓾ ꓢꓲ ꓡꓲ ꓡꓲˍ ꓐꓰ ꓗ, ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓡꓲ ꓛꓲ ꓟꓲ ꓐꓯˍ ꓟ ꓔꓯ ꓝꓮꓲ ꓕꓲ ꓚꓱ, ꓐꓯ ꓪˍ ꓠꓬ꓾ ꓙꓳꓺ ꓓꓴ ꓛꓱꓽ ꓓꓴ꓾ ꓠꓲ, ꓟ ꓫ. ꓓꓴ ꓡꓲ ꓛꓲ ꓥ ꓡꓳ꓿ ꓜꓽ ꓓꓴ ꓓꓳꓻ ꓓꓴ ꓮ ꓫꓵꓽ ꓟꓽ ꓙꓳ꓾ ꓠꓱ. ꓐꓯ ꓙꓳꓺ ꓓꓴ ꓮ ꓫꓵꓽ ꓔꓯ ꓥˍ ꓟꓲ ꓔꓳ, ꓜꓳꓽ ꓗꓴ. ꓖꓴ ꓥ ꓡꓳ꓿
ꓖꓳ ꓡꓱ ꓠꓬꓲ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳˍ ꓕꓯ ꓧꓪꓽ ꓒꓴ ꓫꓵꓽ ꓥꓳꓽ ꓗꓪ ꓐꓰ “Desert experience” ꓐꓯˍ ꓟꓲ꓾ ꓡꓲ ꓛꓲ ꓟꓵꓽ ꓛꓱ ꓗꓪ ꓔꓳ, ꓜꓳꓽˍ ꓟ ꓞꓳ ꓤ ꓕꓲ ꓣꓳˍ ꓡꓰ ꓐꓰ ꓤ, ꓠꓬꓲ ꓫꓵꓽ ꓠꓬꓲ ꓓꓴ꓾ ꓕꓱ ꓡꓱ ꓫꓵꓽ ꓔꓳ, ꓜꓳꓽˍ ꓟ ꓦꓬꓼ ꓠꓬꓲ ꓥˍ ꓟꓲ ꓙꓳ ꓗꓴ.ˍ ꓡꓳ꓿ ꓟꓲ ꓠꓯ ꓕꓱ ꓟ ꓗꓪ ꓣꓳꓽ ꓔꓬ ꓟ ꓠꓬ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓐꓯˍ ꓟ ꓠꓬ ꓮ ꓕꓯ ꓥ ꓟꓲ ꓣꓳꓽ ꓔꓳ, ꓜꓳꓽˍ ꓡꓳ꓿ ꓘꓳ ꓗꓳ. ꓙꓰˍ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓬꓲ ꓔꓳ, ꓜꓳꓽˍ ꓟ ꓠꓬ ꓮ ꓡꓲ ꓫꓵꓽ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓥ ꓡ ꓐꓯˍ ꓠꓬ꓾ ꓬꓲ ꓪꓴ. ꓕꓲꓽ ꓟ ꓬꓲ ꓔꓳ, ꓜꓳꓽˍ ꓟ ꓠꓬ꓾ ꓠꓲꓽ ꓢ‐ꓓꓯ ꓡꓰ ꓢꓲ ꓒ ꓬꓰ‐ꓢꓴ ꓜꓻ ꓦꓰꓼ ꓟꓷꓼ ꓔꓬ ꓕꓯ꓾ ꓜꓽ ꓓꓴ ꓚꓲ.ˍ ꓟ ꓑꓶ. ꓓꓴ ꓦꓰꓼ ꓟꓷꓼ ꓔꓬ ꓕꓯ ꓬꓲ ꓡꓰ ꓬꓲ ꓔꓯ ꓐꓯ ꓖꓶ ꓡˍ ꓟ ꓐꓯ ꓧꓪ. ꓘꓶꓽ ꓥ ꓡꓳ꓿ “ꓡꓳ ꓓꓰ ꓕꓱ ꓟ ꓗꓪ ꓑ ꓑ ꓒꓬꓱꓼ ꓡꓰ ꓠ, ꓟ ꓠꓴ ꓬꓰ” ꓐꓰ ꓐꓯ ꓖꓶˍ ꓡꓳ꓿ ꓜ ꓦꓰꓼ ꓟꓷꓼ ꓔꓬ ꓕꓯ ꓮ ꓡꓲ ꓫꓵꓽ ꓔꓯ ꓥˍ ꓟꓲ ꓣꓳ ꓓꓵꓽ ꓙꓽ ꓗꓴ.ˍ ꓡꓳ꓿
ꓖꓳ ꓡꓱ ꓠꓬꓲ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓬꓲ ꓪꓴ. ꓕꓲ ꓟ ꓠꓬ꓾ ꓢꓲ ꓒ ꓬꓰ‐ꓢꓴ ꓔꓯ ꓫꓵꓽ ꓧꓪꓽ ꓗꓪ ꓚꓳ. ꓠꓬꓲ ꓬꓲ ꓔꓯ ꓤ, ꓠꓬꓲ ꓫꓵꓽ ꓠꓬꓲˍ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ “ꓞꓳ ꓤ ꓠꓬ ꓪꓴ‐ꓢ ꓐꓯ ꓘꓶꓽ ꓗꓪ ꓐꓰ ꓡꓰꓽ ꓢꓯ. ꓔꓬ ꓠ ꓗ, ꓡꓳ” ꓐꓰ ꓬꓲ ꓔꓯ ꓒꓳ, ꓖꓶˍ ꓡꓳ꓿ ꓖꓳ ꓟ ꓔꓯ ꓣꓳ ꓡꓳ. ꓠꓬꓲ ꓢꓲ ꓠꓬꓲ ꓣꓳ ꓔꓯ ꓟ. ꓖꓶ ꓡˍ ꓟ ꓠꓬ꓾ ꓟꓲ ꓠꓯ ꓕꓱ ꓟ ꓗꓪ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓬꓲ ꓪꓴ. ꓕꓲꓽ ꓟ ꓠꓬ꓾ ꓧꓪꓽ ꓖꓳ ꓓꓱꓽ ꓫꓵꓽ ꓧꓪꓽ ꓗꓪ ꓐꓰ ꓥ ꓡꓳ꓾ ꓐꓯ ꓟ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿
ꓣꓳ ꓟꓲ ꓠꓯ ꓕꓱ ꓟ ꓗꓪ ꓒꓴ ꓧꓪ ꓔꓬ ꓟ ꓬꓲ ꓟꓶꓽ ꓬꓲ ꓔꓶ ꓙꓱꓼ ꓠꓬ ꓮ ꓫꓵꓽ ꓥ ꓡ꓿ ꓣꓳ ꓖꓳ ꓓꓱꓽ ꓗ, ꓛꓲꓽ ꓠ, ꓟ꓾ ꓣꓳ ꓖꓳ ꓓꓱꓽ ꓑꓬꓮꓪ ꓠ, ꓟ ꓡꓰꓽ ꓥ ꓡꓳ꓿ ꓟꓳ‐ꓓꓳ ꓕꓲ ꓒꓽ ꓪꓴˍ ꓡꓳ꓾ ꓟꓳ‐ꓓꓳ ꓖꓳ ꓟ ꓢꓶ. ꓟꓽ ꓞꓲ ꓙꓲꓻˍ ꓟ ꓣꓳ ꓧꓪꓽ ꓖꓳ ꓓꓱꓽ ꓔꓯ ꓗ, ꓛꓲꓽ ꓡꓰ ꓝꓲˍ ꓟ ꓟꓳ‐ꓓꓳ꓾ ꓥ ꓠꓬ꓾ ꓐꓵ ꓞꓶꓽ ꓟꓶ ꓛꓲ꓿ ꓐꓵ ꓞꓶꓽ ꓟꓶ ꓛꓲˍ ꓡꓰꓽ ꓟꓽ ꓛꓲ ꓐꓲꓻˍ ꓟ ꓙꓲꓻˍ ꓟ ꓔꓯ ꓣꓳ ꓟꓶ ꓠꓲ, ꓫꓵˍ ꓡꓳ꓿ ꓕꓱ ꓟ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓣꓳ ꓬꓰˍ ꓟ ꓮ ꓙꓵꓽ ꓬꓲ ꓟꓶꓽ ꓔꓶ ꓙꓱꓼ ꓠꓬ ꓮ ꓫꓵꓽ ꓥ ꓡ ꓐꓯ ꓟ꓾ ꓣꓳꓽ ꓧꓪꓽ ꓖꓳ ꓓꓱꓽ ꓗ, ꓛꓲꓽ ꓓꓴ ꓐꓱ ꓶ ꓥ ꓡꓳ ꓐꓯ ꓟ ꓣꓳ ꓡꓳ. ꓟꓳꓻˍ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓢꓯ. ꓔꓬ ꓠ, ꓟ ꓐꓱ ꓶ ꓕꓱ ꓟ ꓠꓬ ꓣꓱꓽ ꓞ, ꓟ ꓥ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓣꓳ ꓠꓲ, ꓟ ꓮ ꓙꓵꓽ ꓕꓱ ꓟ ꓔꓯ ꓥꓳꓺ ꓢꓲ ꓞꓳ ꓙꓳˍ ꓕꓯ ꓠꓽ ꓣꓳ ꓠꓬ ꓠꓬꓲ. ꓠꓬꓲ ꓠꓲꓽ ꓢ‐ꓓꓯ ꓡꓰ ꓢꓲ ꓒ ꓬꓰ‐ꓢꓴ ꓔꓯ ꓤ, ꓠꓬꓲˍ ꓟ ꓠꓯꓸꓼ ꓗꓪ ꓓꓵꓽ ꓙꓰꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓟ ꓥ ꓡꓳ꓿ ꓣꓳ ꓫꓵꓽ ꓧꓪꓽ ꓔꓯ ꓟꓳ. ꓮ ꓫꓵꓽ ꓬꓰˍ ꓥ ꓟꓲ ꓕꓱ ꓟ ꓔꓯ ꓡꓰꓽ ꓣꓳ ꓓꓵꓽ ꓙꓽˍ ꓕꓯ꓾ ꓮ ꓫꓵꓽ ꓬꓰˍ ꓟꓲ ꓣꓳ ꓠꓲ, ꓟ ꓗ, ꓛꓲꓽ ꓓꓴˍ ꓡꓰꓽ ꓣꓱꓽ ꓬꓰˍ ꓕꓯ ꓣꓳ ꓔꓯ ꓙꓳˍ ꓟ ꓙꓵꓽ ꓪ꓾ ꓣꓳ ꓚꓲ. ꓛꓬ ꓣꓳ ꓢꓷ.ˍ ꓟ ꓢꓷ. ꓠꓲ, ꓣꓳ ꓐꓱ ꓶˍ ꓡꓰꓽ ꓣꓱꓽˍ ꓕꓯ꓾ ꓕꓱ ꓟ ꓠꓬ ꓟꓽ ꓜꓳꓽ ꓐꓯ ꓟ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓟ ꓥ ꓡꓳ꓿
ꓠꓬꓲꓽ ꓙꓰꓽ ꓕꓲ ꓙꓰꓽ ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓠꓲꓽ ꓢ‐ꓓꓯ ꓡꓰ꓾ ꓬꓲ ꓔꓯ ꓪꓴ. ꓓꓵ ꓕꓱꓼ ꓠ, ꓟ ꓐꓱ ꓶ ꓬꓲ ꓠꓬ ꓤꓲˍ ꓡꓳ꓾ ꓫꓵꓽ ꓠꓬꓲˍ ꓡꓳ꓿ ꓕꓱ ꓟ ꓠꓬ ꓣꓳ ꓔꓯ ꓮ ꓫꓵꓽ ꓐꓯ ꓖꓶ ꓡ ꓔꓬ ꓡ ꓐꓯ ꓠꓬ꓾ ꓙꓵꓽ ꓪ ꓥ ꓡꓳ꓿ ꓣꓳ ꓧꓪꓽ ꓖꓳ ꓓꓱꓽ ꓑꓬꓮꓪ ꓠ, ꓟ ꓡꓰꓽ ꓟꓽ ꓛꓲ꓾ ꓣꓳ ꓠꓲ, ꓟ ꓠꓯꓸꓼ ꓗꓪ ꓠꓲ, ꓫꓵ ꓓꓰ ꓡꓰˍ ꓟ ꓕꓲ ꓫꓵꓽ ꓙꓳˍ ꓢꓰꓽ ꓡꓳ꓿ ꓕꓱ ꓟ ꓠꓬ ꓙꓵꓽ ꓪ ꓥ ꓡꓳ꓿ ꓡ ꓞꓳ ꓕꓲ ꓣꓳ ꓬꓲ ꓠꓲ, ꓟ ꓔꓯ ꓢꓷ. ꓠꓲ, ꓫꓵˍ ꓠꓬ ꓬꓲ ꓔꓯ ꓙꓵꓽ ꓪ ꓖꓶ꓾ ꓐꓰ ꓐꓯˍ ꓟ ꓐꓯ ꓘꓶꓽ ꓙꓳˍ ꓡꓳ꓿ ꓙꓵꓽ ꓪ ꓠꓬ ꓡ ꓞꓳ ꓕꓲ ꓣꓳ ꓔꓯ ꓪꓴ. ꓡꓰ ꓝꓲ ꓐ ꓡˍ ꓡꓳ꓿ ꓙꓵꓽ ꓪ ꓠꓬ ꓡ ꓞꓳ ꓕꓲ ꓣꓳ ꓔꓯ ꓒꓬꓱꓽ ꓑꓶ. ꓡꓰ ꓝꓲ ꓐ ꓡˍ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙꓵꓽ ꓪ ꓔꓯ ꓬꓲ ꓜꓲ ꓣꓱꓽˍ ꓠꓬ ꓙꓲꓻ ꓖꓴ ꓙꓳˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓙꓵꓽ ꓪ ꓕꓱ ꓟ ꓣꓳ ꓔꓯ ꓮ ꓡꓲ ꓐꓰ ꓗꓷ ꓡꓰ ꓝꓲˍ ꓡ ꓐꓯ ꓠꓬ ꓣꓳ ꓗꓴ.꓾ ꓣꓳ ꓬꓰ ꓗꓴ.꓾ ꓣꓳꓽ ꓡꓰꓽ ꓢꓷ.꓾ ꓣꓳ ꓠꓲ, ꓫꓵˍ ꓟ ꓡꓰ ꓙꓵꓽ ꓠꓲ, ꓫꓵ ꓡˍ ꓟ ꓕꓱ ꓡꓱ ꓫꓵꓽ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓔꓳ, ꓜꓳꓽ ꓡ ꓗꓴ.ˍ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓟ ꓠꓬ ꓣꓳ ꓔꓯ ꓙꓳˍ ꓟ ꓙꓵꓽ ꓪ ꓠꓬ ꓙꓲꓻˍ ꓗꓪ ꓣꓱꓽ꓾ ꓣꓳ ꓢꓷ.ˍ ꓟ ꓢꓷ. ꓠꓲ, ꓠꓬ ꓙꓲꓻˍ ꓟ ꓗꓪ ꓣꓱꓽ꓿ ꓕꓱ ꓟ ꓡꓰꓽ ꓟꓽ ꓞꓲ ꓣꓳ ꓙꓵꓽ ꓪ ꓠꓬ ꓪꓴ‐ꓢ ꓗꓪ ꓐꓰ ꓡˍ ꓡꓳ ꓐꓯ ꓟ ꓔꓯ ꓣꓳ ꓢꓷ. ꓠ ꓗ, ꓡꓳ꓿
ꓢꓲꓽ ꓫꓬ ꓕꓳꓽ ꓶ ꓗꓪ ꓢ‐ꓓꓯ ꓠꓬ ꓬꓲ ꓔꓯˍ ꓟ ꓟꓽ ꓥ ꓟ ꓙꓵꓽ ꓪ꓾ ꓢꓲ ꓒ ꓬꓰ‐ꓢꓴ ꓠꓬ ꓮ ꓙꓵꓽ ꓔꓯ ꓙꓵꓽ ꓢꓴ ꓙꓵꓽ ꓪ ꓐꓯ ꓥ ꓟꓲ꓾ ꓗꓶ. ꓥꓳꓽ ꓗꓪ ꓐꓰ ꓠꓲꓽ ꓢ‐ꓓꓯ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓗꓶ. ꓡˍ ꓡꓳ꓿ ꓖꓳ ꓡꓱ ꓠꓬꓲ ꓙꓵꓽ ꓪ ꓠꓯꓸꓼ ꓘꓴꓽ ꓗꓪ ꓢꓲ ꓡꓲ ꓟ ꓙꓳˍ ꓐꓰ ꓐꓯ ꓟ ꓟꓽ ꓥ꓿ ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓢꓲ ꓡꓲ ꓟ ꓙꓳ ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓡꓰꓽ ꓣꓳ ꓙꓵꓽ ꓪ ꓠꓬ ꓐꓲ ꓜꓲꓼˍ ꓡꓳ ꓐꓯ ꓟ ꓥ ꓡꓳ꓿
ꓢ ꓙꓰꓽ ꓕꓲ ꓙꓰꓽ ꓠꓬ꓾ ꓠꓲꓽ ꓢ‐ꓓꓯ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓪꓴ‐ꓢ ꓔꓯ ꓤ, ꓠꓬꓲ ꓫꓵꓽ ꓠꓬꓲ ꓠ, ꓟ ꓐꓱ ꓶ ꓬꓲ ꓠꓬ ꓪꓴ. ꓙꓰˍ ꓟ꓾ ꓪꓴ‐ꓢ ꓔꓯ ꓤ, ꓠꓬꓲ ꓫꓵꓽ ꓠꓬꓲ ꓠ, ꓟ ꓐꓱ ꓶ ꓬꓲ ꓠꓬ ꓘꓶ.ˍ ꓟ ꓣꓳ ꓑ ꓙꓽˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ “ꓪꓴ‐ꓢ ꓔꓯ ꓕꓽ ꓤ, ꓠꓬꓲ” ꓐꓰ ꓐꓯ ꓢꓲ ꓠꓬꓲ ꓠꓲꓽ ꓢ‐ꓓꓯ ꓔꓯ ꓬꓲ ꓡꓰ ꓧꓪ. ꓡꓰˍ ꓡꓳ꓿
ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓕꓲ ꓖ ꓕꓲ ꓧꓪ, ꓠꓬ ꓣꓳ ꓫꓪ. ꓔ ꓟ ꓡꓰ ꓐꓰ꓾ ꓣꓳ ꓓꓵꓽ ꓙ ꓔ ꓟ ꓡꓰ ꓟꓽ ꓒꓬꓱꓼ ꓡ ꓕꓯ ꓪꓴ‐ꓢ ꓔꓯ ꓤ, ꓠꓬꓲ ꓠꓲ, ꓫꓵˍ ꓡꓳ꓿ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓓꓵꓽ ꓙꓽ ꓔ ꓟ꓾ ꓣꓳ ꓠꓲ, ꓟ ꓠꓯꓸꓼ ꓗꓪ ꓥꓳ ꓡꓳ. ꓔ ꓟ ꓟꓽ ꓒꓬꓱꓼ ꓡ ꓕꓯ ꓣꓳ ꓠꓬ ꓪꓴ‐ꓢ ꓔꓯ ꓠ ꓠꓬꓲ ꓘꓶꓽ ꓠ ꓠꓬꓲ ꓠꓲ, ꓫꓵˍ ꓡꓳ꓿ ꓕꓱ ꓟ ꓟꓽ ꓜꓳꓽ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓪꓴ‐ꓢ ꓔꓯ ꓕꓽ ꓤ, ꓠꓬꓲ ꓐꓰ꓾ ꓐꓯ ꓔ ꓡꓳ꓿ ꓣꓳ ꓬꓰ ꓠ ꓔˍ ꓟ ꓠꓬ ꓣꓳ ꓠꓲ, ꓟ ꓠꓯꓸꓼ ꓗꓪ ꓠꓲ, ꓟꓽ ꓙꓬ ꓙꓬ ꓐꓰ ꓪꓴ‐ꓢ ꓔꓯ ꓡꓰꓽ ꓪꓳ ꓔ ꓢꓲ ꓠꓬꓲ꓾ ꓣꓳ ꓪꓽ ꓘꓴˍ ꓟ ꓬꓲ ꓖꓶ ꓡ ꓥ ꓟꓲ ꓟꓽ ꓖꓶ ꓡ ꓥ ꓟꓲ ꓪꓴ‐ꓢ ꓔꓯ ꓡꓰꓽ ꓣꓳ ꓠꓲ, ꓟ ꓓꓵꓽ ꓠ, ꓟ ꓬꓳ. ꓚꓰꓽˍ ꓡꓳ꓿ ꓪꓴ‐ꓢ ꓖꓶ ꓡˍ ꓟ ꓡꓯꓼ ꓫꓴ ꓔꓯ ꓟꓽ ꓥ ꓥ꓾ ꓬꓲ ꓔꓯ ꓡꓰꓽ ꓠꓲ, ꓠꓵ ꓢꓲ ꓠꓬꓲ ꓬꓲ ꓔꓯ ꓡꓯꓼ ꓙꓱ ꓠ, ꓟ ꓬꓳ. ꓚꓰꓽˍ ꓡꓳ꓿ ꓜ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓗꓪ ꓕꓱ ꓢ ꓫꓵꓽ ꓔꓯ ꓓꓵꓽ ꓙꓽ ꓠꓬꓲ ꓡꓯ꓿ ꓜ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓗꓪ ꓧꓪꓽ ꓖꓳ ꓓꓱꓽ ꓠꓲ, ꓫꓵˍ ꓟ ꓔꓯ ꓡꓰꓽ ꓟꓽ ꓥ ꓥ꓾ ꓦ ꓕꓲ ꓒꓳ, ꓗꓪ ꓢꓯꓼ ꓕꓵꓼ ꓠ, ꓟ ꓐꓰ꓾ ꓣꓳ ꓔꓯ ꓙꓳˍ ꓟ ꓢꓷ. ꓠꓲ, ꓣꓳ ꓔꓯ ꓙꓳˍ ꓟ ꓙꓵꓽ ꓪ ꓔꓯ ꓔꓱ, ꓔꓱ, ꓚꓵ ꓚꓵ ꓡꓰꓽ ꓣꓱꓽ ꓗꓴ. ꓠ, ꓟ꓾ ꓠꓲꓽ ꓢ‐ꓓꓯ ꓤ, ꓠꓬꓲ ꓫꓵꓽ ꓠꓬꓲ ꓘꓶ. ꓡˍ ꓟ ꓔꓯ ꓠ ꓠ, ꓢꓲ ꓠꓬꓲ ꓣꓳ ꓐꓱ ꓶˍ ꓡꓰꓽ ꓟꓽ ꓣꓱꓽ ꓣꓱꓽ ꓐꓰ ꓠꓱ. ꓐꓯ ꓢꓴ ꓐꓱ ꓶ ꓣꓱꓽ ꓐ ꓡ ꓠ, ꓟ꓾ ꓪꓴ‐ꓢ ꓔꓯ ꓤ, ꓠꓬꓲ ꓫꓵꓽ ꓠꓬꓲˍ ꓟ ꓟꓽ ꓬꓰ ꓠ, ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳꓽ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿
