ꓣꓳꓽ ꓠꓻ ꓖꓼ ꓗꓪ ꓗꓪꓺ ꓒꓴ ꓟꓰˍ ꓟ ꓗꓪ ꓐꓰ ꓜ ꓚꓲꓸ ꓧꓪꓽ ꓚꓲꓸ ꓦꓬꓼ ꓠꓬꓲ ꓗꓪ ꓣꓳꓽ ꓓꓵ ꓡꓺꓳ꓿ ꓣꓳ ꓟꓹ ꓟ ꓘꓴ ꓜꓲꓼ ꓞꓳ ꓠꓬ ꓣꓳꓽ ꓠꓲꓹ ꓟ ꓔꓯ ꓒꓴ ꓔ ꓠꓹ ꓟ ꓐꓱ ꓶ ꓘꓴꓻ ꓔꓬꓹ ꓡꓳ꓿ “ꓫꓵꓻˍ ꓟꓸꓸ ꓳ꓾ ꓠꓴ ꓧꓪꓸ ꓡꓰˍ ꓟ ꓮ ꓡꓲ ꓗꓪ ꓓꓹ ꓡ? ꓫꓵꓻˍ ꓟꓸꓸꓳ꓾ ꓠꓴ ꓫꓵꓻ ꓓꓳꓼ ꓮ ꓡꓲ ꓗꓪ ꓓꓹ ꓡ? (1 ꓘꓳ˗ꓡꓱ˗ꓕꓴ) ꓗꓪ ꓐꓳꓺ ꓔ ꓡꓳ꓿ ꓬꓰ˗ꓢꓴ ꓠꓬ ꓝꓴꓲꓸ ꓔꓯ ꓧꓪꓸ ꓡꓰ ꓢꓴ꓾ ꓫꓵꓻ ꓓꓴꓽ ꓔꓯ ꓧꓪꓸ ꓡꓰ ꓢꓴ ꓥ ꓡꓳ꓿

ꓕꓱ ꓜ ꓚꓲꓸ ꓦꓬꓼ ꓠꓬꓲ ꓟ ꓠꓬ ꓙꓴ˗ꓐꓲ˗ꓡꓲ ꓘꓳꓼ ꓗꓪˍ ꓟꓲ ꓬꓯꓼˍ ꓡꓳ꓿ ꓣꓳꓽ ꓕꓲꓽ ꓪ ꓙ ꓫꓱꓽ ꓙꓰ ꓡꓯ ꓐꓰ ꓣꓳꓽ ꓪꓴꓸ ꓔꓴ ꓔ ꓟ ꓡꓰ ꓣꓳꓽ ꓮ ꓙꓵꓽ ꓢꓴ ꓪꓴ˗ꓢ ꓟꓲꓽ ꓙꓬ ꓗꓪ ꓫꓱꓽ ꓗꓳꓸ ꓙꓰ ꓡꓯ꓿

ꓬꓲꓸ ꓕꓲꓽ ꓟꓳ ꓬꓲꓸ ꓪꓴꓸ ꓕꓲꓽ ꓟ ꓟ ꓠꓬ꓾ “ꓥꓳ ꓡꓳꓸ ꓓꓴ ꓠꓯꓸꓼ ꓗꓪ ꓪꓰ ꓤ” (ꓑꓲꓡꓖꓣꓲꓟꓢ ꓳꓝ ꓧꓳꓑꓰ) ꓐꓯˍ ꓟ ꓔꓯ ꓣꓳꓽ ꓓꓵꓽ ꓙ ꓠꓬꓲ ꓓꓴ ꓬꓰ ꓡꓯ꓿ ꓬꓲ˗ꓢꓷ˗ꓡꓰ ꓡ ꓞꓳ ꓐꓴ ꓠꓬ ꓬꓲ ꓙꓲꓽ ꓟꓵꓽ ꓗꓪ ꓐꓰ ꓓꓳꓺ ꓙꓰˍ ꓕꓯ ꓡꓲ ꓛꓲ ꓟꓵꓽ ꓛꓱ ꓗꓪ ꓬꓲꓸ ꓙꓵ, (ꓬꓲ ꓦꓬꓼ ꓠꓬꓲ) ꓟꓶ ꓤ ꓣꓴ ꓢꓲ ꓙ ꓫꓱꓽ ꓠ ꓗꓷ ꓡꓰꓳ꓿ ꓕꓱ ꓟ ꓠꓬ ꓪꓴ˗ꓢ ꓬꓲꓸ ꓚꓲꓸ ꓛꓬˍ ꓟꓲ ꓠꓲꓹ ꓡꓶꓽ ꓙꓳˍ ꓟ ꓥꓳ꓿ ꓕꓱ ꓟ ꓗꓪ ꓐꓰ ꓣꓳꓽ ꓔꓯ ꓢꓷꓸ ꓡꓰ ꓝꓲˍ ꓟ ꓠꓬ ꓣꓳꓽ ꓠꓬ ꓟꓲ ꓠꓯꓺ ꓪꓰ ꓤ ꓡꓰꓽ ꓥꓳ ꓐꓯ ꓟ ꓥꓳ꓿ ꓪꓰ ꓤ ꓠꓬ ꓬꓲꓸ ꓙꓵ, ꓛꓲ ꓡ ꓠꓬ ꓬꓲꓼ ꓙꓰ ꓪꓸ ꓥꓳ꓿ ꓖꓳ ꓡꓱ ꓠꓬꓲ ꓣꓳꓽ ꓠꓬ ꓮ ꓕꓯ ꓥˍ ꓟꓲ ꓠꓲꓹ ꓟ ꓒꓳ, ꓡꓶꓸ ꓢꓲ ꓔꓬꓹ ꓡꓯ꓿ ꓪꓴ˗ꓢ ꓔꓯ ꓠꓲꓹ ꓟ ꓛꓱ ꓔꓴ ꓙꓰ ꓡꓯ꓿

ꓠꓬꓲꓽ ꓫꓵꓽ ꓟ ꓠꓬ꓾ “ꓕꓲꓽ ꓪ ꓙ ꓫꓱꓽ ꓡꓯ” ꓐꓯ ꓟ ꓥꓳ꓿ ꓙꓲ˗ꓢꓴ ꓢꓲꓺ ꓤ ꓐꓴ ꓠꓬ ꓕꓲꓽ ꓪ ꓡꓰ ꓮ ꓕꓯˍ ꓟꓲ ꓙ ꓫꓱꓽ ꓠ ꓗ, ꓡꓳ꓾ ꓐꓰ ꓐꓳ ꓔ ꓡꓳ꓿ ꓣꓳꓽ ꓠꓬ ꓕꓲꓽ ꓪ ꓫꓱꓽ ꓢꓲ ꓙꓰ ꓠ ꓗˍ ꓡꓳ꓿ ꓢꓲ˗ꓫꓬ˗ꓟ˗ꓦ ꓪꓴ˗ꓢ ꓠꓬ ꓮ ꓕꓯˍ ꓟꓲ ꓗ ꓘꓶꓽ ꓚꓵꓸ ꓔ ꓢꓲ ꓟꓽ ꓔꓬ꓿ ꓖꓳ ꓡꓱ ꓠꓬꓲ ꓣꓳꓽ ꓥˍ ꓟꓲ ꓕꓲꓽ ꓛꓳˍ ꓐꓰ ꓙꓰ ꓠ ꓗˍ ꓡꓳ꓿ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓗꓶꓸˍ ꓟ ꓟꓽ ꓙꓳ ꓙꓳ꓾ ꓟꓬꓺ ꓔꓳˍ ꓟ ꓟꓽ ꓙꓳꓺ ꓙꓳꓺ꓾ ꓮ ꓡꓰ ꓟ ꓔꓯꓸ ꓡꓰ ꓟꓽ ꓡꓳ ꓒꓰ ꓒꓰ ꓐꓰ ꓙꓰ ꓠ ꓗˍ ꓡꓳ꓿

ꓢ ꓫꓵꓽ ꓟ ꓠꓬ꓾ ꓣꓳ ꓐꓴ ꓠꓬ ꓕꓲꓽ ꓪ ꓥꓳꓺ ꓡꓳꓸ ꓢꓲ ꓕꓲꓽ ꓪ ꓙ ꓫꓱꓽ ꓓꓴ ꓥꓳ꓿ ꓣꓳꓽ ꓥꓳ ꓡꓳꓸˍ ꓓꓴ ꓠꓬ ꓣꓳꓽ ꓔꓯ ꓠꓲꓹ ꓟ ꓟꓽ ꓫꓸ ꓡꓰ ꓝꓲ (ꓣꓳ˗ꓟ 5ꓽ5)꓿ ꓜ ꓚꓲꓸ ꓧꓪꓽ ꓚꓲꓸˍ ꓟ ꓗꓪ ꓣꓳ ꓠꓲꓹ ꓟ ꓚꓵ ꓠ ꓔ ꓟ ꓕꓲꓽ ꓟ ꓠꓬ ꓢꓲ ꓒ ꓬꓰ˗ꓢꓴ ꓢꓯꓸ ꓬꓲꓼ ꓡ ꓟ ꓔꓯ ꓥꓳ꓿ ꓫꓵꓻ ꓓꓴꓽ ꓥˍ ꓟꓲ꓾ ꓠꓲꓹ ꓫ ꓟ ꓥˍ ꓟꓲ꓾ ꓣꓳ ꓔꓯ ꓪꓴ˗ꓢ ꓐꓰ ꓗꓷꓹ ꓟꓽ ꓐ ꓡ꓿

ꓢ ꓫꓵꓽ ꓕꓱ ꓟ ꓘꓴ ꓠꓯꓸꓼ ꓗꓪ ꓣꓳꓽ ꓔꓯ ꓠꓲꓹ ꓟ ꓡꓶꓸ ꓠꓹ ꓟ ꓐꓱ ꓶ ꓘꓴꓻ ꓔꓬꓹ ꓡꓳ꓿ ꓣꓳꓽ ꓝꓴꓲꓸ ꓗꓪ ꓐꓰ ꓪꓴ˗ꓢ ꓔꓯ ꓓꓵꓽ ꓙ ꓒꓳ ꓙꓰ ꓡꓯ꓿

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳꓽ ꓐꓴ ꓔꓯ ꓠꓲꓹ ꓟ ꓟꓽ ꓙꓬ ꓡꓰ ꓝꓲ ꓟ ꓥꓳ ꓡꓳꓸ ꓓꓴ ꓠꓯꓸꓼ ꓗꓪ ꓦꓰꓼ ꓞ, ꓔꓬꓹ ꓡꓯ (ꓣꓳ˗ꓟ 5ꓽ5) ꓿ ꓖꓳ ꓟ ꓠꓬ ꓮ ꓙꓵꓽ ꓢꓴ ꓔꓯ ꓚꓬꓴ. ꓟꓶ ꓠꓹ ꓟ ꓘꓴ ꓜꓲꓼ ꓞꓳ ꓔꓯ ꓬꓲꓼ ꓠꓬꓲꓸ ꓖꓶꓽˍ ꓡꓳ ( 1 ꓕꓲ˗ꓟꓳ˗ꓕꓲ 2ꓽ4)꓿

ꓢꓲ ꓫꓬꓹ ꓟ ꓟꓹ ꓟ ꓟ˗ꓣꓲ˗ꓬ꓾ ꓥꓳ ꓡꓳꓸ ꓓꓴ ꓟꓹ ꓟ ꓠꓬ꓾ ꓕꓱ ꓜ ꓚꓲꓸ ꓦꓬꓼ ꓠꓬꓲ ꓗꓪ ꓣꓳꓽ ꓐꓱ ꓶ ꓪꓽ ꓘꓴ ꓙ ꓖꓶꓽ ꓝꓲ꓿