ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓧꓪꓽ ꓒꓴ ꓫꓵꓽ ꓥꓳꓽ ꓗꓪ ꓐꓰ “Don’t look at his lips. Just look at his feet” ꓐꓰ ꓐꓯ ꓟ ꓐꓯ ꓧꓪ. ꓘꓶꓽ ꓙꓳˍ ꓡꓳ꓿ ꓬꓲ. ꓬꓲ ꓢꓲ ꓠꓬ “ꓬꓲ ꓟꓷꓼ ꓠꓷ, ꓔꓯ ꓕꓽ ꓡꓳ. ꓠꓬꓲ꓾ ꓬꓲ ꓛꓲ ꓒꓯ, ꓔꓯ ꓡꓳ. ꓠꓬꓲ” ꓐꓯˍ ꓟ ꓥ ꓡꓳ꓿ ꓕꓱ ꓟ ꓬꓲ. ꓬꓲ ꓢꓲ ꓠꓬ꓾ ꓡ ꓞꓳ ꓕꓲ ꓣꓳ ꓔꓯ ꓡꓳ. ꓠ ꓠꓬꓲˍ ꓕꓯ ꓬꓲ ꓔꓯ ꓙꓽ ꓘꓶꓽ ꓠꓲ, ꓫꓵˍ ꓕꓯ ꓬꓲ ꓟꓷꓽ ꓠꓷ, ꓔꓯ ꓕꓽ ꓡꓳ. ꓠꓬꓲ꓾ ꓬꓲ ꓫ. ꓕꓱˍ ꓟ ꓔꓯ ꓕꓽ ꓡꓳ. ꓠꓬꓲ꓿ ꓖꓳ ꓡꓱ ꓐꓯ ꓥ ꓟꓲ ꓬꓲ ꓬꓰˍ ꓟ ꓔꓯ ꓡꓳ. ꓠꓬꓲ꓾ ꓮ ꓡꓲ ꓐꓰ ꓬꓰˍ ꓡ꓾ ꓮ ꓡꓲ ꓐꓰ ꓞꓳ ꓙꓳˍ ꓡ꓾ ꓐꓯˍ ꓟ ꓔꓯ ꓡꓳ. ꓠꓬꓲ꓿ ꓖꓳ ꓡꓱ ꓬꓰˍ ꓠꓬ ꓡ ꓞꓳ ꓖꓳ ꓕꓲ ꓣꓳ ꓟ ꓮ ꓡꓲ ꓫꓵꓽ ꓥ ꓡ ꓐꓯ ꓟ ꓣꓳ ꓟꓳˍ ꓥꓳ ꓐꓰ ꓐꓯ ꓔ ꓡꓳ꓾ ꓐꓯ ꓟ ꓬꓲ. ꓬꓲ ꓢꓲ ꓥ ꓡꓳ꓿
ꓢ. ꓠꓯ ꓢꓲ ꓒ ꓦꓬꓼ ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓗ ꓠꓯ. ꓖꓼ ꓢꓴ ꓐꓴ ꓔꓯ ꓙꓳꓺ ꓗꓽ ꓖꓶˍ ꓡꓳ꓿ ꓡ ꓞꓳ ꓕꓲ ꓐꓱ ꓙꓳˍ ꓟ ꓠꓬ ꓚꓲ. ꓛꓬ ꓔꓯ ꓚꓲ. ꓛꓬ ꓝꓴꓲ. ꓟꓽ ꓟꓳꓻ꓿ ꓚꓲ. ꓛꓬ ꓙꓲꓻˍ ꓡꓳ꓾ ꓚꓲ. ꓛꓬ ꓠꓬ ꓔꓱ, ꓜꓳꓽˍ ꓡꓳ ꓐꓰ ꓐꓯ ꓢꓲ ꓠꓬꓲ ꓚꓲ. ꓛꓬ ꓟꓬ ꓢꓶꓽ ꓗꓪ ꓕꓳꓽ ꓓ, ꓟ ꓢꓲ, ꓓꓱꓽ ꓔꓯ ꓟꓽ ꓟꓳꓻ꓿ ꓠꓱ. ꓐꓯ ꓢꓴ ꓟꓬ ꓢꓶꓽ ꓗꓪ ꓓ, ꓟ ꓑꓱ. ꓛꓵꓽ ꓔꓯ ꓡꓰꓽ ꓟꓳꓻ ꓢꓲ ꓠꓬꓲ ꓢꓴ ꓔꓯ ꓟꓽ ꓔꓱ, ꓟꓽ ꓜꓳꓽ ꓟ ꓐꓯˍ ꓟ꓾ ꓢꓴ ꓔꓯ ꓐꓯ ꓗ. ꓟ ꓞꓳ ꓤ ꓙꓳˍ ꓡꓳ꓿
ꓕꓲ ꓐꓱ ꓟ ꓪꓴ‐ꓢ ꓟꓬꓱꓽ ꓬꓰ ꓔꓬ ꓢꓴ꓾ ꓪꓴ‐ꓢ ꓟ. ꓟꓲꓽ ꓚ ꓢꓴ ꓐꓴ ꓥˍ ꓟꓲ ꓕꓱ ꓡꓱ ꓫꓵꓽ ꓙꓳ ꓗꓴ.ˍ ꓡꓳ꓿ ꓟꓷꓽ ꓠꓷ, ꓗꓪ ꓐꓰ ꓐꓯ ꓔꓬ ꓟ ꓕꓲ ꓚꓱ,꓾ ꓚꓵ ꓚꓵ ꓣꓱꓽ ꓬꓰ ꓔꓬ ꓟ ꓕꓲ ꓚꓱ,꓾ ꓕꓱ ꓡꓱ ꓫꓵꓽ ꓞꓳ ꓤ ꓙꓳˍ ꓡꓳ꓾ ꓐꓰ ꓪꓴ‐ꓢ ꓠꓬ ꓬꓲ ꓗ ꓠꓯ. ꓖꓼ ꓢꓴ ꓔꓯ ꓙꓳꓺ ꓗꓽ ꓖꓶ ꓔ ꓡꓳ꓿ ꓙꓲꓻˍ ꓟ ꓢꓲ, ꓜꓲ ꓠꓬ ꓙꓲꓻˍ ꓟ ꓬꓲ ꓢꓶꓽ ꓓꓱꓼ ꓡˍ ꓥꓳ꓾ ꓟꓽ ꓙꓲꓻ ꓟ ꓢꓲ, ꓜꓲ ꓠꓬ ꓟꓽ ꓙꓲꓻ ꓟ ꓬꓲ ꓢꓶꓽ ꓓꓱꓼ ꓡˍ ꓥꓳ꓿ ꓛꓴꓽ ꓜꓲ ꓗꓪ ꓐꓰ ꓮ ꓘꓶꓽ ꓢꓶꓽ ꓔꓯ ꓮ ꓡꓲ ꓥˍꓟꓲ ꓓꓱꓼ ꓟꓽ ꓐ ꓡ꓿
ꓕꓱ ꓟˍ ꓡꓰ ꓐꓰ ꓞꓳ ꓤ ꓕꓲ ꓣꓳ ꓠꓬ ꓬꓲ ꓟꓷꓽ ꓠꓷ, ꓘꓶꓽ ꓗꓪ ꓐꓰ ꓬꓲ ꓫꓵꓽ ꓬꓲ ꓙꓰꓽ ꓐꓯ ꓔꓬ ꓥ ꓟꓲ ꓬꓲ ꓠꓲ, ꓟ ꓠꓯꓸꓼ ꓗꓪ ꓙꓲꓻˍ ꓟ ꓟꓽ ꓙꓳ ꓕꓯ꓾ ꓬꓲ ꓠꓲ, ꓟ ꓠꓯꓸꓼ ꓗꓪ ꓚꓵ ꓚꓵ ꓙꓲꓻˍ ꓟ ꓗꓪ ꓐꓰ ꓓꓳ ꓡˍ ꓟ ꓟꓽ ꓥ ꓕꓯ ꓬꓲ ꓣꓱꓽ ꓬꓰˍ ꓟ ꓗꓪ ꓐꓰ ꓣꓳ ꓡꓳ. ꓟꓳꓻ ꓓˍ ꓡꓳ꓿ (ꓡꓴ‐ꓘ 6ꓽ39‐45) ꓗꓪ ꓢꓲ ꓒ ꓬꓰ‐ꓢꓴ ꓡꓰ꓾ ꓟꓬ ꓔꓶ ꓠꓬ ꓟꓬ ꓔꓶ ꓢꓴ ꓔꓯ ꓙ ꓖꓴ ꓧꓳꓽ ꓟꓽ ꓐ ꓡ꓾ ꓐꓰ ꓐꓯ ꓔ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓮ ꓙꓵꓽ ꓡꓱꓸꓼ ꓞꓰꓻ ꓓꓵꓽ ꓙꓰˍ ꓥꓳ꓾ ꓡꓱ. ꓙꓰˍ ꓥꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓠꓬꓲꓽ ꓫꓵꓽ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿ ꓢꓲ ꓒ ꓬꓰ‐ꓢꓴ ꓗ ꓠꓯ. ꓖꓼ ꓢꓴ ꓣꓳ ꓠꓬ ꓣꓳ ꓖꓼ ꓛꓳ ꓔꓬ ꓟ ꓦꓬꓼ ꓠꓬꓲ ꓗꓪ ꓪꓴ‐ꓢ ꓟ. ꓟꓲꓽ ꓚ ꓢꓴ꓾ ꓪꓴ‐ꓢ ꓟꓬꓱꓽ ꓬꓰ ꓢꓴ ꓬꓲ ꓪ ꓬꓰˍ ꓟ ꓬꓲ ꓪ ꓫ. ꓕꓱˍ ꓟ ꓔꓯ ꓟꓽ ꓡꓳ. ꓠꓬꓲ ꓠꓬꓲ꓾ ꓬꓲ ꓪ ꓣꓱꓽ ꓬꓰˍ ꓟ ꓔꓯ ꓡꓳ. ꓠꓬꓲ ꓢꓲ ꓠꓬꓲ ꓙꓲꓻˍ ꓟ ꓔꓯ ꓔꓯꓺ ꓢꓳ ꓠ, ꓟ꓾ ꓟꓽ ꓙꓲꓻ ꓟ ꓔꓯ ꓡꓳ ꓗꓷ ꓢꓲ ꓠꓬꓲ ꓚꓵ ꓚꓵ ꓪꓴ‐ꓢ ꓔꓬ ꓗꓪ ꓙꓰ ꓠ, ꓟ ꓐꓱ ꓶ ꓣꓳ ꓔꓯ ꓢꓯꓼ ꓪ ꓖꓶ ꓔꓬ ꓡꓳ꓿
ꓮ ꓡꓲꓳ ꓐꓯ ꓠꓬ ꓕꓲ ꓖ ꓕꓲ ꓧꓪ, ꓠꓬ꓾ ꓣꓳ ꓟ. ꓒ ꓟ. ꓟ ꓐꓴ꓾ ꓔꓲ ꓒ ꓔꓲ ꓟ ꓐꓴ ꓬꓲ ꓪ ꓟꓬ ꓔꓶˍ ꓟ ꓗꓪ ꓐꓰ ꓬꓰ ꓛꓬ ꓗꓷ ꓬꓰ ꓥꓳꓽ ꓗꓷ ꓗ ꓠꓯ.꓾ ꓣꓳ ꓠꓬ ꓪꓴ‐ꓢ ꓐꓰ ꓶꓽ ꓤ ꓗꓪ ꓡꓰˍ ꓟ꓾ ꓪꓴ‐ꓢ ꓔꓯ ꓟꓽ ꓙꓵꓻ ꓟ ꓦꓬꓼ ꓠꓬꓲˍ ꓟꓲ ꓙꓳ ꓡ ꓗꓴ.ˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓙꓳꓺ ꓗꓽ ꓖꓶ ꓔ ꓡꓳ꓿ ꓬꓲ ꓪ ꓬꓰˍ ꓟ ꓡꓰ ꓕꓽ ꓬꓰ꓿ ꓚꓵ ꓚꓵ ꓪꓴ‐ꓢ ꓐꓯ ꓘꓶꓽ ꓗꓪ ꓐꓰ ꓞꓳ ꓙꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓔ ꓡꓳ꓿
ꓝꓮꓲ ꓠꓬꓲꓽ ꓫꓵꓽ ꓕꓲ ꓫꓵꓽ ꓟ ꓠꓬ ꓟ. ꓟꓲꓽ ꓗꓪ ꓐꓰ ꓣꓳ ꓔꓯ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓟꓬ ꓢꓶꓽ ꓔꓯ ꓥˍ ꓟꓲ ꓒꓴ ꓗꓴ. ꓠ, ꓟ꓾ ꓣꓳ ꓟꓬ ꓢꓶꓽ ꓠꓯꓸꓼ ꓗꓪ ꓓꓵˍ ꓟ ꓢꓲ, ꓓꓱꓽ ꓔꓯ ꓣꓴ ꓗꓴ. ꓠ, ꓟ ꓐꓱ ꓶ ꓣꓳ ꓔꓯ ꓢꓯꓼ ꓪ ꓖꓶ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓠꓲꓽ ꓢ‐ꓓꓯ ꓔꓯ ꓖꓼ ꓓꓳˍ ꓕꓯ ꓟꓬ ꓔꓶ ꓢꓴ꓾ ꓠ. ꓐꓳꓽ ꓢꓴ ꓔꓯ ꓥˍ ꓟꓲ ꓬꓲ ꓠꓬ ꓟꓽ ꓫꓬ ꓠꓲꓽ ꓔꓯ ꓖꓼ ꓓꓳ ꓗꓷ ꓗ ꓠꓯ. ꓟꓬ ꓔꓶ ꓢꓴ ꓟꓬ ꓢꓶꓽ ꓠꓬꓲ ꓟꓳꓻ ꓡˍ ꓡꓳ꓾ ꓠ. ꓐꓳꓽ ꓢꓴ ꓠ. ꓑꓳ ꓑ ꓙꓽ ꓡˍ ꓡꓳ꓿ ꓕꓱ ꓟˍ ꓡꓰ ꓐꓰ ꓠꓬꓲ. ꓠꓬꓲ ꓣꓳ ꓠꓬ ꓟꓬ ꓢꓶꓽ ꓙꓳˍ ꓥ ꓟꓲ ꓟꓳꓻ ꓟꓽ ꓘꓴ ꓫꓵꓽ꓾ ꓠ. ꓑꓳ ꓙꓳˍ ꓥ ꓟꓲ ꓑ ꓙꓽ ꓟꓽ ꓘꓴ ꓫꓵꓽ ꓮ ꓟꓬ, ꓙꓳˍ ꓡꓳ꓿
ꓣꓳ ꓠꓯꓸꓼ ꓗꓪ ꓙꓳˍ ꓟ ꓣꓳ ꓝꓴꓲ. ꓗꓪ ꓐꓰ ꓟꓽ ꓠꓬꓲ ꓟꓳꓻ ꓡꓰ ꓝꓲ ꓟ꓾ ꓝꓴꓲ. ꓗꓪ ꓐꓰ ꓢꓴ ꓔꓯ ꓙꓲꓻˍ ꓟ ꓟꓳꓻ ꓟꓽ ꓘꓴ ꓟ꓾ ꓢꓴ ꓙꓲꓻˍ ꓟ ꓬꓰ ꓔꓬ ꓥ ꓟꓲ ꓢꓴ ꓧˍ ꓟ ꓬꓰ ꓔꓬ ꓥ ꓟꓲ ꓟꓳꓻ ꓟꓽ ꓘꓴ ꓟ ꓟꓬ ꓢꓶꓽ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓫꓬ, ꓡꓶ. ꓗꓷ ꓝꓲ ꓡꓯ꓿ ꓠꓱ. ꓐꓯ ꓢꓴ ꓙꓲꓻˍ ꓟ꓾ ꓠꓱ. ꓐꓯ ꓢꓴ ꓔꓱ,ˍ ꓟ ꓔꓯ ꓑ ꓙꓽ ꓟꓽ ꓘꓴ ꓟ ꓣꓳ ꓠ. ꓑꓳ ꓔꓯ ꓥˍ ꓟꓲ ꓫꓬ, ꓡꓶ. ꓗꓷ ꓡꓯ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓠꓬ ꓞꓳ ꓤ ꓐꓴ ꓫ. ꓕꓱˍ ꓟ ꓢꓶ. ꓟꓽ ꓞꓲ ꓣꓳ ꓠꓬ ꓬꓲ ꓪ ꓞꓳ ꓙꓳˍ ꓟ ꓔꓯ ꓡꓳ. ꓠꓬꓲ꓿ ꓝꓮꓲ ꓣꓳ ꓥ ꓟꓲ ꓣꓳ ꓠꓲ, ꓟ ꓠꓯꓸꓼ ꓗꓪ ꓓꓯ,ˍ ꓟ꓾ ꓟꓬ ꓢꓶꓽ ꓠꓯꓸꓼ ꓗꓪ ꓓꓯ, ꓟ ꓟꓽ ꓔꓱ, ꓟꓽ ꓜꓳꓽ ꓟ ꓔꓯ ꓡꓳ ꓦ ꓗꓷ ꓢꓲ ꓠꓬꓲ ꓪꓴ‐ꓢ ꓐꓰ ꓕꓲ ꓛꓳˍ ꓞꓳ ꓙꓳˍ ꓥꓳ ꓐꓯ ꓠꓬ ꓣꓳ ꓤꓶꓻ ꓠꓬ ꓟꓲ ꓠꓯ ꓕꓱ ꓟ ꓗꓪ ꓔꓬ ꓕꓯ ꓡꓰ ꓢꓲ ꓡꓲ ꓡꓲˍ ꓐꓰ ꓞꓳ ꓙꓳ ꓟꓶ ꓢꓲ ꓠꓬꓲ꓾ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓟꓶˍ ꓥꓳ꓿ ꓮ ꓙꓵꓽ ꓢꓴ ꓢꓯꓼ ꓕꓵꓼ ꓙꓰ ꓡꓯ꓿
