ꓢꓲꓺ ꓒ ꓬꓰ-ꓢꓴ ꓠꓬ ꓣꓱꓽ ꓙˍ ꓟ ꓟꓬꓱꓽ ꓬꓰˍ ꓟ ꓗꓪ ꓐꓰ ꓬꓲ ꓠꓬ ꓟꓲ ꓠꓯ ꓞꓳ ꓤꓽ ꓕꓲꓽ ꓛꓱꓽ ꓔꓯ ꓢꓲ ꓮ ꓕꓯ ꓥˍ ꓟꓲ ꓣꓳ ꓟꓲ ꓠꓯ ꓞꓳ ꓤ ꓐꓱ ꓶ ꓦꓰꓼ ꓔꓬ ꓡꓳ ꓐꓯˍ ꓟ ꓢꓷꓸ ꓡꓰ ꓝꓲˍ ꓟ ꓥ ꓪ= ꓬꓲꓸ ꓕꓱ ꓡꓰ ꓣꓱꓽ ꓙˍ ꓟ ꓟꓬꓱꓽ ꓗꓪ ꓐꓰ ꓬꓲ ꓠꓬ ꓫꓸ ꓙꓵ ꓟꓶꓽ ꓙꓵ ꓓꓴ ꓔꓯ ꓔꓳꓹ ꓜꓳꓽ ꓢꓲ ꓢꓯꓼ ꓟꓬ ꓖꓶ ꓗꓷ ꓗꓪ ꓛꓲ ꓣꓳꓽ ꓐꓱ ꓶ ꓕꓱ ꓡꓰ ꓣꓱꓽ ꓙ ꓡꓳ ꓬꓰ ꓟ ꓥ ꓪ= ꓖꓳ ꓟ ꓑꓶꓸ ꓓꓴ ꓢꓲꓺ ꓒ ꓬꓰ-ꓢꓴ ꓠꓬ ꓝꓴꓲ ꓙꓳ ꓢꓴ ꓟꓲ ꓠꓯ ꓞꓳ ꓤꓽ ꓐꓱ ꓶ ꓬꓲꓸ ꓢꓯꓼ ꓟꓬ ꓔꓯ ꓖꓶ ꓗꓷꓳ=
ꓦꓲ-ꓐꓱ-ꓣꓴ 9ꓽ 12 ꓗꓪ ꓝꓲ ꓓꓴ ꓒꓳ-ꓡꓳ ꓡꓰ ꓢꓲꓺ ꓒꓽ ꓬꓰ-ꓢꓴ ꓠꓬ ꓟꓲ ꓠꓯ ꓞꓳ ꓤꓽ ꓒꓬꓱꓼ ꓡˍ ꓟ ꓚꓱꓹ ꓔꓯ ꓟꓳꓸ ꓐꓳ ꓔ ꓡꓳ= ꓒꓲ-ꓡꓲ-ꓒꓲ 2ꓽ5-7꓾ ꓘꓳ-ꓡꓱ-ꓕꓴ 1ꓽ15-20 ꓗꓪ꓾ ꓢꓲꓺ ꓒ ꓬꓰ-ꓢꓴ ꓙꓳˍ ꓟ ꓠꓲꓹ ꓟ ꓡꓰ ꓐꓰ ꓕꓲꓽ ꓡꓰ, ꓠꓴ ꓪꓽ ꓠꓯꓸꓼ ꓗꓪ ꓥˍ ꓟꓲ ꓗꓶ ꓔ ꓐꓰ ꓕꓱ ꓡꓰ ꓐꓳ ꓔ ꓡꓳ= ꓐꓯ ꓠꓲ, ꓫꓵˍ ꓟ ꓠꓬ ꓣꓳ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓡꓰ ꓣꓱꓽ ꓙˍ ꓟ ꓠꓲꓹ ꓟ ꓙꓳ ꓠ, ꓟ ꓐꓯ ꓠꓲꓹ ꓫꓵˍ ꓟ ꓥ ꓪ=
ꓢꓲꓺ ꓒ ꓬꓰ-ꓢꓴ ꓠꓬ ꓪꓴ-ꓢ ꓚꓵ ꓚꓵ ꓥˍ ꓟꓲ ꓪꓴ-ꓢ ꓡꓰ ꓐꓰ ꓟꓽ ꓔꓬ꓾ ꓬꓲ ꓙꓳˍ ꓟ ꓮꓽ ꓙꓵ ꓡꓳ ꓗꓷ ꓢꓲ ꓚꓳ ꓑꓸ ꓕꓲꓽ ꓣꓳ ꓡꓰ ꓐꓰ ꓣꓱꓽ ꓙ ꓢꓴ ꓕꓲ ꓣꓳ ꓡꓰ ꓐꓰ ꓬꓲ ꓠꓬ ꓟꓲ ꓠꓯ ꓗꓪ ꓬꓯꓼ ꓡ ꓢꓲ ꓒꓬꓱꓽ ꓟꓳ ꓗꓷꓳ ꓐꓰ ꓒꓲ-ꓡꓲ-ꓒꓲ 2ꓽ5-7 ꓗꓪ ꓕꓱ ꓡꓰ ꓐꓳ ꓔ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓟꓸ ꓖꓶ ꓡˍ ꓟ ꓪꓴꓸ ꓓꓵ ꓣꓱꓽ ꓢꓴ ꓐꓯˍ ꓟ ꓠꓬ ꓣꓱꓽ ꓙˍ ꓟ ꓗꓪ ꓐꓰ ꓪꓴꓸ ꓓꓵ ꓣꓱꓼˍ ꓟ ꓐꓯˍ ꓟ ꓡꓰꓮꓓꓰꓣꓢꓧꓲꓑ ꓳꓝ ꓢꓰꓣꓦꓲꓚꓰꓢ ꓐꓯˍ ꓟ ꓕꓱ ꓡꓱ ꓫꓵꓽ ꓔꓯ ꓟꓸ ꓖꓶ ꓠꓲꓹ ꓫꓵˍ ꓟ ꓥ ꓪ=
ꓬꓲ ꓗꓸ ꓠꓯꓸ ꓢꓲ ꓗꓪ ꓛꓳ ꓢꓴ ꓝꓲ ꓓꓴ ꓐꓴ ꓠꓬ ꓮꓽ ꓟ ꓟꓬꓽ ꓠꓬꓲ ꓪˍ ꓡ꓾ ꓮꓽ ꓟ ꓟꓬꓽ ꓠꓬꓲ ꓙꓵꓽ ꓪꓽ ꓙꓳˍ ꓡ ꓐꓰ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓐꓯ ꓔꓯꓺ ꓡꓯ ꓘꓳ ꓫꓸ ꓪ ꓟꓬꓽ ꓡꓯꓽ ꓘꓳˍ ꓟ ꓕꓱ ꓡꓱ ꓫꓵꓽ ꓙꓳˍ ꓡꓳ= ꓖꓳ ꓕꓯ ꓢꓲꓺ ꓒ ꓬꓰ-ꓢꓴ ꓠꓬ ꓟꓲ ꓠꓯ ꓗꓪ ꓟ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓠꓬ ꓖꓳ ꓟ ꓡꓰ ꓐꓰ ꓕꓲꓽ ꓡꓰꓹ ꓥ ꓪ= ꓖꓳ ꓡꓰ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓡꓰ ꓟꓸ ꓖꓶ ꓡˍ ꓟ ꓪꓴꓸ ꓓꓵ ꓣꓱꓽ ꓢꓴ ꓐꓯˍ ꓟ ꓠꓯꓸꓼ ꓗꓪ ꓠꓬ ꓣꓱꓽ ꓙˍ ꓟ ꓟꓬꓱꓽ ꓗꓪ ꓐꓰ ꓪꓴꓸ ꓓꓵ ꓣꓱꓽ ꓠꓹ ꓟ ꓮ ꓕꓯ ꓥˍ ꓟꓲ ꓬꓲ ꓠꓬ ꓟꓸ ꓖꓶ ꓔꓬ ꓟ ꓥ ꓪ=
ꓐꓶꓽ ꓞꓳ ꓗꓪ ꓟ ꓪ ꓔꓲꓸ ꓐꓴ ꓠꓬ ꓑ ꓫꓬꓽ ꓐꓴ ꓔꓯ ꓥꓲ ꓢꓲ ꓙꓵˍ ꓡꓳ= ꓖꓳ ꓕꓲꓽ ꓘꓴ ꓗꓪ ꓙꓵꓽ ꓢꓴ ꓐꓴ ꓔꓯ ꓠꓬ ꓬꓰ ꓙ ꓔ ꓙ ꓢꓴ ꓫꓸ ꓟꓳ ꓐꓯ ꓒꓵꓽ ꓢꓴ ꓥ ꓡꓳ ꓐꓰ ꓕꓱ ꓡꓱ ꓓꓵꓽ ꓙˍ ꓡꓳ= ꓖꓳ ꓡꓰ ꓥˍ ꓟꓲ ꓠꓴ ꓪ ꓠꓬ ꓕꓱ ꓡꓱ ꓟꓽ ꓥ= ꓠꓴ ꓪ ꓗꓳ ꓡꓳ ꓗꓪ ꓪꓴꓽ ꓢꓴ ꓠꓽ ꓞꓲꓼ ꓣꓳ ꓢꓴ ꓡꓰ ꓐꓰ ꓬꓰ ꓠꓯˍ ꓡꓳ= ꓪꓴꓸ ꓓꓵ ꓣꓱꓽ ꓢꓴˍ ꓟꓲ ꓣꓱꓽ ꓙ ꓢꓴ ꓡꓰ ꓐꓰ ꓬꓰ ꓠꓯˍ ꓡꓳ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓕꓱ ꓡꓱ ꓐꓳ ꓔ ꓡꓳ=
