ꓦꓲ ꓘꓴꓽ ꓐꓱ ꓶ ꓢꓷꓸ ꓡꓰ ꓓꓴ ꓫꓸ ꓕꓱ ꓘꓶꓽ 10 ꓘꓶꓽ ꓔꓯ ꓐꓯ ꓟꓸ ꓖꓶ ꓩꓴ ꓡ ꓠꓲꓹ ꓫꓵˍ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓔꓲ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓟꓲ ꓠꓯ ꓗꓪ ꓙꓳˍ ꓟ ꓕꓲ ꓦꓲꓻ ꓘꓴꓽ ꓢꓴ ꓐꓴ ꓐꓱ ꓶ ꓠ ꓡꓳꓸ ꓛꓳ ꓫꓱꓽ ꓠꓯꓹˍ ꓟ ꓐꓯ ꓘꓶꓽ 10 ꓘꓶꓽ ꓐꓯ ꓟꓸ ꓖꓶ ꓔ ꓡꓳ= ꓮ ꓙꓵꓽ ꓐꓱ ꓶ ꓬꓳꓸ ꓚꓵˍ ꓟˍ ꓟꓲ ꓥ ꓡꓳ= ꓬꓲ ꓙꓲꓻ ꓵ ꓠꓬꓲ ꓠ ꓗꓹ ꓡꓳ= ꓬꓲ ꓙꓲꓻ ꓔꓱꓹ ꓕ ꓠꓬꓲ ꓠ ꓗꓹ ꓡꓳ= ꓗꓹ ꓛꓲꓽ ꓓꓴ ꓔꓯ ꓥˍ ꓟꓲ ꓘꓳ ꓣꓴ ꓟꓶ ꓝꓲ=

ꓕꓱ 10 ꓚꓱꓹ ꓟ ꓠꓬ

ꓦꓲ ꓘꓴꓽ ꓠꓬ ꓞꓳ ꓤ ꓐꓴ ꓞꓳ ꓙꓳ ꓢꓯꓸ ꓔꓬ ꓟ ꓬꓲ ꓝꓳꓹ ꓟꓶ ꓬꓲ ꓪꓴꓸ ꓟ ꓥ ꓡꓳ꓾ ꓐꓰ ꓔꓲ ꓒ ꓪ ꓔꓲ ꓡꓰ ꓐꓯ ꓔ ꓡꓳ=

ꓦꓲ ꓘꓴꓽ ꓡ ꓞꓳ ꓐꓰ ꓕꓲ ꓡꓰꓹ ꓔꓬ ꓪˍ ꓟ ꓠꓬ ꓮ ꓘꓶꓸ ꓒꓵꓽˍ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓞꓳ ꓤ ꓗꓳ ꓡꓳ ꓠꓬ ꓙꓲꓻˍ ꓟ ꓕꓲ ꓒꓳꓹ ꓗꓪ ꓐꓰ ꓥˍ ꓟꓲ꓾ ꓐꓲꓻˍ ꓟ ꓕꓲ ꓒꓳꓹ ꓗꓪ ꓐꓰ ꓥˍ ꓟꓲ ꓪ ꓜꓲ ꓕꓶ ꓞꓹ ꓡ ꓔꓬ ꓟ ꓑꓶꓸ ꓓꓴ ꓥ ꓡꓳ= ꓚꓲꓸ ꓛꓬ ꓦꓲꓻ ꓘꓴꓽ ꓔꓯ ꓕꓶ ꓕꓶꓽ ꓡꓰ ꓫꓬꓹ ꓜꓶ ꓐ ꓡˍ ꓕꓯ ꓠꓬ ꓟꓲ ꓠꓯ ꓥˍ ꓟꓲ ꓮ ꓟꓬꓹ ꓪꓴꓽ ꓡ ꓟꓴ ꓡˍ ꓥꓳ꓾ ꓐꓰ ꓬꓲ ꓡꓰ ꓐꓯ ꓡꓳ=

2 ꓦꓲꓻ ꓘꓴꓽ ꓠꓬ ꓪꓴ-ꓢ ꓬꓲ ꓡꓯꓼ ꓓꓴ ꓐꓰ ꓫꓬꓹ ꓔ ꓟ ꓮ ꓘꓶꓸ ꓡꓳꓸ ꓐꓲˍ ꓟ ꓕꓲ ꓟ ꓥ ꓡꓳ꓾ ꓐꓰ ꓐꓯ ꓡꓳ=

ꓪꓴ-ꓢ ꓠꓬ ꓠꓵꓻ ꓠꓲꓹ ꓥ ꓟ ꓪꓴꓸ ꓠꓬꓲ ꓟꓲ ꓠꓯ ꓔꓯ ꓟꓽ ꓚꓰꓼ ꓗꓷ ꓢꓰꓽ ꓕꓯ ꓡꓰ ꓪꓴ-ꓢ ꓠꓬ ꓠꓲꓹ ꓠꓵꓻ ꓗꓷꓳ= = ꓪꓴ-ꓢ ꓠꓯꓸꓼ ꓗꓪ ꓠꓵꓻ ꓠꓲꓹ ꓮ ꓟꓬꓹ ꓓꓵˍ ꓡꓳ= ꓠꓵꓻ ꓠꓲꓹ ꓕꓱ ꓟ ꓠꓬ ꓐꓹ ꓐ꓾ ꓤ ꓔꓲꓸ꓾ ꓢꓲꓽ-ꓫꓬ-ꓟ-ꓦ꓾ ꓢ ꓣꓳ ꓕꓲ ꓖꓳ ꓓꓱꓽ ꓠꓯꓸꓼ ꓗꓪ ꓙꓳ ꓔꓬ ꓡꓳ= ꓠꓵꓻ ꓠꓲꓹ ꓠꓬ ꓮ ꓘꓶꓸ ꓪꓽ ꓠꓬꓲˍ ꓡꓳ= ꓮ ꓟꓬꓹ ꓐꓲ ꓡꓶꓽ ꓡꓰ ꓔꓬ ꓡꓳ=ꓪꓴ-ꓢ ꓘꓴꓽ ꓠꓯꓸꓼ ꓗꓪ ꓙꓳˍ ꓟ ꓠꓵꓻ ꓠꓲꓹ ꓠꓬ ꓮ ꓘꓶꓸ ꓪꓴꓽˍ ꓟ ꓑꓶꓸ ꓓꓴ꓾ ꓠꓵꓻ ꓠꓲꓹ ꓕꓱ ꓟ ꓔꓯ ꓡ ꓞꓳ ꓕꓲ ꓣꓳˍ ꓡꓰꓽ ꓣꓱꓽ ꓠꓹ ꓟ ꓮ ꓡꓲ ꓥˍ ꓟꓲ ꓒꓬꓱꓼ ꓡ ꓟꓽ ꓓ= ꓠꓵꓻ ꓠꓲꓹ ꓕꓱ ꓟ ꓠꓯꓸꓼ ꓗꓪ ꓐꓰ ꓡꓲꓹ ꓓꓳ ꓙꓰ ꓢꓲ꓾ ꓠꓱ ꓫꓳꓸ ꓟꓸ ꓗꓪ ꓙꓳˍ ꓟ ꓔꓯ ꓪꓴ-ꓢ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ ꓠꓲꓹ ꓠꓵ ꓠ ꓗꓹ ꓡꓳ= ꓠꓵꓻ ꓠꓲꓹ ꓗꓪ ꓐꓰ ꓚꓰꓼ ꓔ ꓟ ꓮ ꓘꓶꓸ ꓡꓳꓸ ꓐꓲꓻˍ ꓟ ꓠꓬ ꓦꓲ ꓘꓴꓽ ꓥ ꓡꓳ ꓐꓰ ꓢꓲꓽ ꓫꓬ ꓕꓳꓽ ꓗꓪ ꓐꓯ ꓔ ꓡꓳ=  

ꓪꓴ-ꓢ ꓠꓬ ꓬꓲ ꓚꓰꓼ ꓔ ꓟ ꓮ ꓙꓵꓽ ꓔꓯ ꓦꓲ ꓘꓴꓽ ꓕꓲ ꓦꓲ ꓔꓯ ꓡꓯꓼ ꓙꓱ ꓗꓷ ꓟ ꓥ ꓡꓳ= ꓪꓴ-ꓢ ꓔꓯ ꓙꓳˍ ꓟ ꓠꓵꓻ ꓠꓲꓹ ꓮ ꓙꓵꓽ꓾ ꓪꓴ-ꓢ ꓔꓯ ꓙꓳˍ ꓟ ꓐꓲꓻˍ ꓟ ꓮ ꓙꓵꓽ꓾ ꓪꓴ-ꓢ ꓔꓯ ꓙꓳˍ ꓟ ꓔꓱꓹ ꓚꓵˍ ꓟ ꓮ ꓙꓵꓽ ꓦꓲ ꓘꓴꓽ ꓔꓯ ꓖꓶ ꓗꓷ ꓟ ꓥ ꓡꓳ= ꓦꓲ ꓘꓴꓽ ꓕꓲ ꓦꓲ ꓘꓴꓽ ꓠꓬ ꓕꓱ ꓠꓵꓻ ꓠꓲꓹ ꓮ ꓙꓵꓽ ꓔꓯ ꓚꓵ ꓚꓵ ꓘꓳ ꓣꓴ ꓐ ꓡˍ ꓕꓯ ꓢꓲ ꓡꓰꓽ ꓔꓱꓹ ꓚꓵˍ ꓟ ꓦꓲ ꓘꓴꓽ ꓒꓬꓱꓼ ꓡˍ ꓡꓳ꓾ ꓐꓰ ꓔꓲ ꓒ ꓪ ꓔꓲ ꓡꓰ ꓐꓯ ꓡꓳ=

3 ꓪꓴ-ꓢ ꓠꓬ ꓬꓲ ꓖꓶˍ ꓟ ꓠꓵꓻ ꓠꓲꓹ ꓔꓯ ꓘꓳ ꓣꓴ ꓠꓹ ꓟ ꓠꓲꓹ ꓟ ꓙꓳ ꓢꓴ ꓟꓲ ꓠꓯ ꓕꓱ ꓟ ꓗꓪ ꓟ ꓦꓲ ꓘꓴꓽ ꓕꓲ ꓟ ꓔꓬ ꓗꓪ ꓬꓲ ꓕꓲ ꓣꓳˍ ꓟ ꓬꓲ ꓤ ꓔꓲꓸ ꓔꓯ ꓝꓲ ꓩꓴ ꓗꓷˍ ꓡꓳ꓾ ꓐꓯ ꓟ ꓥ ꓡꓳ=

ꓪꓴ-ꓢ ꓡꓰ ꓚꓰꓼ ꓔ ꓟ ꓞꓳ ꓑ ꓤ ꓐꓰ ꓤ ꓟꓶ ꓤ ꓐꓴ ꓠꓬ ꓝꓴꓲꓸ ꓬꓰ ꓗꓷ ꓕꓯ ꓪꓴ-ꓢ ꓐꓰ ꓶꓽ ꓤ ꓗꓷꓹ ꓡꓰꓳ= ꓖꓳ ꓡꓱ ꓥˍ ꓟꓲ ꓪꓴ-ꓢ ꓠꓬ ꓬꓲ ꓪ ꓔꓯ ꓟꓽ ꓡꓳ ꓔ= ꓪꓴ-ꓢ ꓠꓬ ꓠꓵꓻ ꓠꓲꓹ ꓐꓲꓻ ꓡꓶꓽˍ ꓟ ꓑꓶꓸ ꓓꓴ ꓞꓳ ꓤ ꓐꓴ ꓕꓲ ꓡꓰꓹ ꓧꓳꓹ ꓡꓯ ꓘꓳ ꓡꓰ ꓠꓹ ꓟ ꓐꓱ ꓶ ꓬꓲ ꓚꓲꓸ ꓛꓬ ꓡꓰ ꓢꓯꓼ ꓕꓵꓼ ꓗꓷ ꓟ ꓥ ꓡꓳ= ꓪꓴ-ꓢ ꓡꓰ ꓬꓲ ꓦꓬꓼ ꓠꓬꓲ ꓛꓲ ꓡ ꓗꓪ ꓛꓲ ꓞꓳ ꓤ ꓐꓰ ꓕꓲ ꓡꓰꓹ ꓔꓬ ꓗꓷꓳ= ꓪꓴ-ꓢ ꓬꓲ ꓪꓴꓽ ꓓꓰ ꓡꓰˍ ꓟ ꓠꓵꓻ ꓠꓲꓹ ꓥ ꓡꓳ= ꓬꓲ ꓤ ꓔꓲꓸ ꓔꓯ ꓖꓶ ꓗꓷˍ ꓟ ꓗꓪ ꓐꓰ ꓬꓲ ꓠꓵꓻ ꓠꓲꓹ ꓔꓯ ꓟꓲ ꓠꓯ ꓞꓳ ꓤ ꓐꓴ ꓔꓯ ꓖꓶ ꓗꓷꓳ= ꓪꓴ-ꓢ ꓠꓬ ꓬꓲ ꓤ ꓔꓲꓸ ꓔꓯ ꓮ ꓡꓲ ꓐꓰ ꓝꓲ ꓩꓴ ꓗꓷ ꓡ= ꓢꓲꓽ ꓒ ꓪ ꓔꓲ ꓦꓲꓻ ꓗꓪ ꓝꓲ ꓩꓴ ꓗꓷ ꓟ ꓥ ꓡ= ꓶꓻ ꓡꓯꓼ ꓟꓬꓱꓽ ꓬꓰ ꓠꓹ ꓟ ꓐꓱ ꓶ ꓮ ꓘꓶꓸ ꓪꓴꓽˍ ꓟ ꓡꓳ ꓒꓱ ꓓꓽ ꓟ ꓕꓲ ꓟ ꓗꓪ ꓥ ꓡ= ꓪꓴ-ꓢ ꓠꓬ ꓬꓲ ꓤ ꓔꓲꓸ ꓔꓯ ꓦꓲ ꓘꓴꓽ ꓕꓲ ꓟ ꓗꓪ ꓝꓲ ꓩꓴ ꓗꓷ ꓟ ꓥ ꓡꓳ= ꓖꓳ ꓕꓲ ꓦꓲꓻ ꓗꓪ ꓪꓴ-ꓢ ꓠꓬ ꓬꓲ ꓤ ꓔꓲꓸ ꓔꓯ ꓦ ꓡꓱ ꓐꓳ ꓐꓳ ꓡꓰꓽ ꓝꓲ ꓩꓴ ꓗꓷ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓖꓳ ꓕꓲ ꓦꓲ ꓠꓬ ꓪꓴ-ꓢ ꓬꓲ ꓠꓵꓻ ꓠꓲꓹ ꓘꓳ ꓣꓴ ꓠꓹ ꓟ ꓙꓽ ꓖꓶ ꓔ ꓟ ꓦꓲ ꓘꓴꓽ ꓥ ꓟ ꓪꓴꓸ ꓠꓬꓲ ꓥ ꓡꓳ= ꓠꓵꓻ ꓠꓲꓹ ꓔꓯ ꓘꓳ ꓣꓴ ꓠꓹ ꓟ ꓐꓱ ꓶ ꓠꓲꓹ ꓟ ꓗ ꓘꓶꓽ ꓔꓯ ꓬꓲ ꓓꓽ ꓟ ꓒꓴ ꓔ ꓟ ꓦꓲ ꓘꓴꓽ ꓥ ꓡꓳ= 

ꓔꓲ ꓒ ꓪ ꓔꓲꓸ ꓡꓰ ꓐꓯˍ ꓟ 4 ꓘꓶꓽ ꓕꓲ ꓘꓶꓽ ꓟ ꓠꓬ꓾ ꓦꓲ ꓘꓴꓽ ꓢꓴ ꓕꓲ ꓣꓳ ꓡꓰ ꓕꓲ ꓣꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓠꓵ ꓡꓯ ꓘꓳꓹˍ ꓟ ꓪꓴ-ꓢ ꓔꓯ ꓫꓱꓸ ꓢꓴ ꓐꓴ ꓡꓰ ꓐꓰ ꓢꓷꓸ ꓠꓲꓹ ꓟꓸ ꓖꓶ ꓠꓹ ꓟ ꓪꓴ-ꓢ ꓠꓲꓹ ꓡꓶꓽ ꓙꓳˍ ꓡꓳ꓾ ꓐꓯ ꓟ ꓥ ꓡꓳ=

ꓪꓴ-ꓢ ꓠꓬ ꓣꓳ ꓠꓲꓹ ꓟ ꓗ ꓘꓶꓽ ꓔꓯ ꓮ ꓕꓯ ꓟꓲ ꓲ’ ꓔꓬ ꓡꓳ= ꓕꓱ ꓡꓱ ꓬꓰ ꓠꓹ ꓟˍ ꓟꓲ ꓪꓴ-ꓢ ꓠꓬ ꓠꓲꓹ ꓒꓴˍ ꓡꓳ= ꓕꓱ ꓡꓱ ꓬꓰˍ ꓟ ꓠꓬ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓓꓳ ꓡˍ ꓟ ꓥ ꓡꓳ= ꓪꓴ-ꓢ ꓠꓬ ꓮ ꓡꓲ ꓕꓲ ꓙꓰꓽ ꓔꓯ ꓟꓬꓽ ꓠꓬꓲ ꓠꓲꓹ ꓠꓵˍ ꓡ ꓐꓯ ꓟ ꓔꓯ ꓠꓴ ꓢꓷꓸˍ ꓡ= ꓦꓲ ꓗ ꓘꓶꓽ ꓔꓯ ꓲ’ ꓢꓲ ꓕꓲ ꓠꓲꓹ ꓕꓲ ꓪ ꓙꓳˍ ꓟ ꓪꓽ ꓡꓯ ꓘꓳ ꓕꓽ ꓡꓯ ꓘꓳˍ ꓟ ꓦꓲꓻ ꓘꓴꓽ ꓔꓯ ꓧꓪ ꓪˍ ꓟ꓾ ꓦꓲ ꓘꓴꓽ ꓡ ꓞꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓠꓵ ꓡꓯ ꓘꓳˍ ꓟ ꓦꓲꓻ ꓘꓴꓽ ꓔꓯ ꓧꓪˍ ꓟ꓾ ꓦꓲ ꓘꓴꓽ ꓢꓴˍ ꓟꓲ ꓚꓲꓸ ꓛꓬ ꓤ ꓠꓱ ꓐꓴ ꓔꓯ ꓗꓪꓼ ꓫꓵ ꓛꓵꓹ ꓔꓴ ꓖꓶˍ ꓟ꓾ ꓢꓷꓸ ꓠꓲꓹ ꓟꓸ ꓖꓶˍ ꓟ꓾ ꓕꓱ ꓡꓱ ꓟꓲ ꓙꓬ ꓙꓰ ꓠꓹ ꓟ ꓬꓰ ꓙˍ ꓟ ꓦꓲ ꓘꓴꓽ ꓔꓯ ꓧꓪˍ ꓟ ꓙꓲꓻˍ ꓟ ꓞꓳ ꓜꓴꓻ ꓕꓲ ꓜꓴꓻ ꓫꓬꓹ ꓔꓶˍ ꓟ ꓦꓲꓻ ꓘꓴꓽ꓾ ꓔꓱꓹ ꓚꓵˍ ꓟ ꓐꓲꓻˍ ꓟ ꓔꓯ ꓫꓬꓹ ꓔꓶˍ ꓟ ꓦꓲ ꓘꓴꓽ ꓔꓯ ꓧꓪˍ ꓟ ꓗꓪ ꓮ ꓘꓶꓸ ꓠꓲꓹ ꓘꓪꓽ ꓫꓵˍ ꓟ ꓪꓴ-ꓢ ꓥ ꓡꓳ꓾ ꓐꓰ ꓔꓲ ꓒ ꓪ ꓔꓲ ꓡꓰ ꓐꓯ ꓡꓳ=

5 ꓠꓬ ꓦꓲ ꓘꓴꓽ ꓠꓯꓸꓼ ꓗꓪ ꓫ ꓓꓴ ꓙꓳ ꓢꓲ ꓖꓳ ꓟ ꓔꓯ ꓠꓵꓻ ꓠꓲꓹ ꓗꓪ ꓐꓰ ꓗꓳꓸ ꓘꓳ ꓙꓰ ꓠꓯꓹ ꓡꓳ꓾ ꓐꓯ ꓟ ꓥ ꓡꓳ=

ꓦꓲꓻ ꓘꓴꓽ ꓠꓯꓸꓼ ꓗꓪ ꓫꓸ ꓓꓴ ꓔꓳꓹ ꓜꓳꓽˍ ꓥꓳ= ꓦꓲꓻ ꓘꓴꓽ ꓗꓪ ꓓꓵꓽ ꓙ ꓚꓱꓹ ꓟꓽ ꓫꓱꓸ ꓡꓯ ꓘꓳ ꓠꓬꓲ ꓐꓯ ꓡꓯ ꓘꓳˍ ꓟˍ ꓟꓲ ꓙꓳˍ ꓥꓳ= ꓕꓲ ꓖ ꓕꓲ ꓧꓪꓹ ꓦꓲꓻ ꓘꓴꓽ ꓗꓪ ꓙꓳˍ ꓟ ꓶꓻ ꓤ ꓚꓬ ꓢꓲꓸ ꓐꓴ ꓔꓯ ꓡꓳ ꓦ ꓗꓷˍ ꓟˍ ꓟꓲ ꓙꓳˍ ꓥꓳ= ꓦꓲꓻ ꓘꓴꓽ ꓠꓯꓸꓼ ꓗꓪ ꓡꓯꓼ ꓐꓳ ꓔꓶꓸ ꓓꓴ ꓠꓬ ꓮ ꓕꓯ ꓟꓲ ꓙꓳˍ ꓥꓳ= ꓐꓹ ꓐ ꓔꓯ ꓠꓲꓹ ꓠꓵꓻˍ ꓟ꓾ ꓐꓹ ꓐ ꓬꓲ ꓤ ꓔꓲꓸ ꓔꓯ ꓠꓲꓹ ꓠꓵꓻˍ ꓟ ꓥˍ ꓟꓲ ꓡꓯꓼ ꓐꓳ ꓔꓶꓸ ꓓꓴ ꓙꓻ ꓖꓴ ꓔꓯ ꓫꓬꓹ ꓒꓴ ꓔꓬ ꓟ ꓥ ꓡꓳ= ꓦꓲ ꓘꓴꓽ ꓠꓯꓸꓼ ꓗꓪ ꓤ ꓟꓳ ꓟꓽ ꓠ ꓟˍ ꓟꓲ ꓙꓳˍ ꓥꓳ= ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓗꓷ ꓗ ꓠꓯꓸ ꓕꓯ ꓠꓬ ꓢꓯꓸ ꓬꓲꓼ ꓡˍ ꓟ ꓔꓯ ꓟꓶˍ ꓥꓳ= ꓙꓻ ꓖꓴ ꓕꓱ ꓟ ꓗꓪ ꓪꓴ-ꓢ ꓬꓲ ꓤ ꓔꓲꓸ ꓡꓰ ꓫꓱꓽ ꓗꓷ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓦꓲ ꓘꓴꓽ ꓐꓯ ꓟ ꓠꓬ ꓥꓳ ꓡꓳꓸ ꓓꓴ ꓔꓯ ꓫꓬꓹ ꓖꓶ ꓖꓴ ꓕꓲ ꓟ ꓥ ꓡꓳ꓾ ꓐꓰ ꓥꓪ ꓔꓯꓺ ꓠꓲꓹ ꓫꓵˍ ꓡꓳ= ꓥꓳ ꓡꓳꓸ ꓓꓴ ꓕꓱ ꓟ ꓠꓬ ꓠꓴ ꓥꓳ ꓡꓳꓸ ꓔ ꓟ ꓐꓰ ꓢꓯꓸ ꓬꓲꓼ ꓡˍ ꓟ ꓔꓯ ꓫꓬꓹ ꓖꓶˍ ꓟ ꓥ ꓡꓳ= ꓪꓴ-ꓢ ꓠꓬ ꓙꓻ ꓖꓴ ꓕꓱ ꓟ ꓔꓯ ꓒꓴ ꓢꓴ ꓥ ꓡꓳ=

ꓦꓲꓻ ꓘꓴꓽ ꓠꓯꓸꓼ ꓗꓪ ꓫꓸ ꓓꓴ ꓔꓳꓹ ꓜꓳꓽ ꓪˍ ꓥꓳ=ꓫꓸ ꓓꓴ ꓕꓱ ꓟ ꓔꓯ ꓠꓵꓻ ꓠꓲꓹ ꓡꓰ ꓧꓪꓸ ꓡꓰ ꓝꓲ ꓠꓯꓹ ꓡꓳ= ꓠꓲꓹ ꓜꓳˍ ꓟ ꓠꓲꓹ ꓟ ꓗꓪ ꓐꓰ ꓠꓬ ꓫꓸ ꓙꓵ ꓓꓴ ꓔꓯ ꓧꓪꓸ ꓡꓰ ꓟꓽ ꓐ ꓡ= ꓟꓽ ꓪꓽ ꓡꓯ ꓘꓳ ꓟꓽ ꓕꓽ ꓡꓯ ꓘꓳ ꓕꓯ ꓥˍ ꓟꓲ ꓮ ꓡꓲ ꓫꓵꓽ ꓫꓸ ꓙꓵ ꓓꓴ ꓔꓯ ꓧꓪꓸ ꓡꓰ ꓟꓽ ꓐ ꓡ= ꓠꓵꓻ ꓠꓲꓹ ꓠꓬ ꓗꓹ ꓛꓲꓽ ꓠꓲꓹ ꓥ ꓡꓳ= ꓠꓵꓻ ꓠꓲꓹ ꓠꓬ ꓟꓲ ꓙꓬ ꓙꓰ ꓓꓴ ꓥ ꓡꓳ ꓔꓲ ꓒ ꓪ ꓔꓲ ꓡꓰ ꓐꓯ ꓡꓳ=

6 ꓠꓬ ꓤ ꓠꓱ ꓤ ꓐꓰ ꓞꓳ ꓟꓳꓽ ꓐꓴ ꓔꓯ ꓗꓪꓼ ꓫꓵꓼ ꓖꓶ ꓐꓯ ꓟ ꓥ ꓡꓳ=

ꓣꓳꓽ ꓐꓴ ꓠꓬ ꓤ ꓠꓱ ꓤ ꓐꓰ ꓞꓳ ꓟꓳꓽ ꓐꓴ ꓔꓯ ꓟꓬꓽ ꓠꓬꓲ ꓗꓪꓼ ꓫꓵꓼ ꓠ ꓔ ꓡꓳ= ꓤ ꓠꓱ ꓤ ꓐꓴ ꓐꓰ ꓞꓳ ꓡꓱ ꓤ ꓐꓴ ꓠꓬ ꓡ ꓠꓹ ꓟ ꓤꓶꓻ ꓥ ꓡꓳ= ꓬꓲ ꓪ ꓐꓴ ꓠꓬ ꓢꓯꓼ ꓪ ꓥ ꓡꓳ= ꓣꓳ ꓐꓴ ꓔꓯ ꓟꓲ ꓙꓬ ꓙꓰ ꓠꓹ ꓟ ꓐꓱ ꓶ ꓧꓳꓽ ꓙꓰ ꓢꓴ ꓐꓴ ꓥ ꓡꓳ= ꓬꓲ ꓪ ꓐꓴ ꓠꓬ ꓣꓳꓽ ꓥꓳ ꓡꓳꓸ ꓓꓴ ꓗꓶ ꓔ ꓖꓴ ꓥ ꓡꓳ= ꓞꓳ ꓟꓳꓽ ꓐꓴ ꓠꓬ ꓦꓲꓻ ꓘꓴꓽ ꓗꓪ ꓚꓲꓸ ꓟꓶ ꓓꓴ ꓕꓲ ꓟ ꓥ ꓡꓳ= ꓬꓲ ꓪ ꓠꓬ ꓣꓳ ꓐꓴ ꓔꓯ ꓙꓵꓻ ꓠꓲꓹ ꓬꓲ ꓫꓵꓸ ꓖꓶ ꓡ ꓢꓴ꓾ ꓥ ꓡꓳ꓾ ꓐꓰ ꓔꓲ ꓒ ꓪ ꓔꓲ ꓡꓰ ꓐꓯ ꓡꓳ=

7 ꓢꓲꓽ ꓫꓬˍ ꓟ ꓐꓰ ꓠꓵꓻ ꓠꓲꓹ ꓠꓬ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓱꓽ ꓬꓰ ꓔꓬ ꓟ ꓔꓯ ꓖꓴ ꓟꓸ ꓖꓶ ꓔꓬ ꓟ ꓥ ꓡꓳ ꓐꓯ ꓟ ꓥ ꓡꓳ=

ꓗꓹ ꓛꓲꓽ ꓓꓴ ꓡꓰ ꓐꓰ ꓢꓲꓽ ꓫꓬˍ ꓟ ꓥˍ ꓟꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓔꓬ ꓟ ꓗꓪ ꓟꓽ ꓙꓳ ꓟꓽ ꓓ ꓟ ꓥ ꓡꓳ= ꓮ ꓡꓲ ꓫꓵꓽ ꓞꓳ ꓙꓳ ꓚꓱꓹ ꓥˍ ꓟꓲ ꓣꓳ ꓦꓲꓻ ꓘꓴꓽ ꓠꓯꓸꓼ ꓗꓪ ꓐꓰ ꓢꓳ ꓣꓴˍ ꓟ ꓥ ꓡꓳ= ꓟꓶꓽ ꓘꓶ ꓟꓽ ꓬꓲꓼ ꓔ ꓕꓯ ꓪꓽ ꓘꓴˍ ꓟ ꓗꓪ ꓐꓰ ꓪꓴ-ꓢ ꓠꓵꓻ ꓠꓲꓹ ꓔꓯ ꓘꓳ ꓣꓴˍ ꓟ꓾ ꓟꓽ ꓥ ꓠꓬ ꓕꓲ ꓠꓬꓲ ꓡꓱꓸꓼ ꓟꓬꓱꓽ ꓬꓰ ꓪꓴꓽ ꓧꓶ ꓢꓲ ꓬꓲꓼ ꓡˍ ꓕꓯ ꓠꓲꓹ ꓡꓱ ꓡꓱ ꓡꓰ ꓪꓳ ꓫꓳꓸˍ ꓟ ꓔꓯ ꓟꓶˍ ꓟ ꓡꓰ ꓐꓰ ꓥ ꓡꓳ꓾ ꓐꓰ ꓐꓯ ꓡꓳ=

8 ꓦꓲꓻ ꓘꓴꓽ ꓠꓬ ꓙꓵꓻ ꓠꓲꓹ ꓔꓯ ꓟꓸ ꓖꓶ ꓢꓲ ꓙꓵꓻ ꓠꓲꓹ ꓔꓯ ꓪꓴꓽ ꓡ ꓝꓲˍ ꓡꓳ꓾ ꓐꓯ ꓟ ꓥ ꓡꓳ=

ꓙꓵꓻ ꓠꓲꓹ ꓠꓬ ꓠꓵꓻ ꓠꓲꓹ ꓠꓯꓸꓼ ꓗꓪ ꓢꓯꓸ ꓔꓬ ꓢꓲ ꓪ ꓜꓲ ꓪꓴꓽ ꓡˍ ꓡꓳ= ꓖꓳ ꓡꓱ ꓠꓬꓲ ꓣꓳ ꓦꓲꓻ ꓘꓴꓽ ꓐꓴ ꓠꓬ ꓣꓳ ꓦꓲꓻ ꓘꓴꓽ ꓡ ꓞꓳ ꓐꓰ ꓗꓴꓸ ꓙꓲ ꓙꓳˍ ꓟ ꓪꓽ ꓘꓴ ꓦꓲꓻ ꓥ ꓡꓳ= ꓕꓱ ꓟ ꓠꓬ ꓣꓳ ꓙꓵꓻ ꓠꓲꓹ ꓔꓯ ꓚꓵ ꓚꓵ ꓪꓴꓽ ꓡ ꓝꓲ ꓖꓴ ꓥ ꓟˍ ꓡꓰ ꓐꓰ ꓙꓵꓻ ꓠꓲꓹ ꓠꓯꓸꓼ ꓗꓪ ꓞꓳ ꓙꓳ ꓚꓱꓹ ꓪꓴꓽ ꓡ ꓟꓴ ꓡ ꓝꓲ ꓖꓴˍ ꓟꓲ ꓥ ꓡꓳ꓾ ꓐꓰ ꓐꓯ ꓡꓳ=

9 ꓙꓲˍ ꓟ ꓬꓲ ꓫꓱꓸ ꓠꓬ ꓟꓲ ꓠꓯ ꓗꓪ ꓢꓲ ꓒ ꓬꓰ-ꓢꓴ ꓬꓲ ꓙꓳ ꓔꓬ ꓟ ꓔꓯ ꓖꓴ ꓟꓸ ꓖꓶ ꓔꓬ ꓟ ꓑꓶꓸ ꓓꓴ ꓙꓲˍ ꓟ ꓬꓲ ꓫꓱꓸ ꓗꓪ ꓞꓳ ꓫꓱꓽ ꓠꓹ ꓟ ꓢꓲ ꓒ ꓬꓰ-ꓢꓴ ꓡꓰ ꓕꓵꓼ ꓪ ꓖꓶ ꓔꓬ ꓡꓳ꓾ ꓐꓯ ꓟ ꓥ ꓡꓳ=

ꓢꓲ ꓒ ꓬꓰ-ꓢꓴ ꓠꓬ ꓣꓳ ꓤꓶꓻ ꓔꓯ ꓞꓳ ꓙꓳ ꓢꓯꓸ ꓔꓬ ꓠꓹ ꓟ ꓓꓰꓽ ꓔꓬ ꓡꓳ= ꓣꓳˍ ꓟ ꓟꓬꓱꓽ ꓔꓯ ꓬꓰ ꓢꓲ ꓦꓲꓻ ꓘꓴꓽ ꓠꓯꓸꓼ ꓗꓪ ꓣꓱꓽ ꓙ ꓠꓹ ꓟ ꓔꓲ ꓒ ꓪ ꓔꓲ ꓡꓰ ꓕꓵꓼ ꓪ ꓖꓶ ꓔ ꓡꓳ=

10 ꓮꓽ ꓐ ꓮ ꓟ ꓐꓴ ꓠꓬ ꓢꓷꓸ ꓠꓲꓹ ꓣꓱꓽ ꓬꓰ ꓚꓱꓹ ꓮ ꓙꓵꓽ ꓠꓯꓸꓼ ꓗꓪ ꓔꓯ ꓢꓳ ꓓꓴ ꓥ ꓠ ꓔ ꓡꓳ꓾ ꓐꓯ ꓟ ꓥ ꓡꓳ=

ꓣꓳ ꓤ ꓠꓱ ꓐꓴ ꓠꓬ ꓣꓳ ꓐꓴ ꓔꓯ ꓬꓲ ꓪ ꓐꓱ ꓶ ꓔꓯꓺ ꓢꓳ ꓓꓴ꓾ ꓪꓽ ꓡꓯ ꓘꓳ ꓕꓽ ꓡꓯ ꓘꓳˍ ꓟ ꓔꓯ ꓢꓯꓼ ꓖꓶ ꓗꓴꓸ ꓢꓴ ꓡꓰ ꓐꓰ ꓮꓽ ꓐ ꓮ ꓟ ꓐꓴ ꓔꓯ ꓟꓳꓻ ꓝꓲ= ꓟꓽ ꓪꓽ ꓡꓯ ꓘꓳ ꓟꓽ ꓕꓽ ꓡꓯ ꓘꓳ ꓠ ꓬꓰ ꓖꓶ ꓢꓴ ꓮꓽ ꓐ ꓮꓽ ꓟ ꓐꓴ ꓡꓰ ꓐꓰ ꓕꓽ ꓟꓳꓻ ꓡꓰ ꓝꓲ= ꓤ ꓠꓱ ꓐꓴ ꓠꓬ ꓮꓽ ꓐ ꓮ ꓟ ꓐꓴ ꓔꓯ ꓐꓹ ꓐ ꓪꓴ-ꓢ ꓠꓲꓹ ꓡꓶꓽ ꓛꓳ ꓢꓴ ꓐꓴ ꓥ ꓡꓳ꓾ ꓐꓰ ꓟꓳꓻ ꓝꓲ=

ꓠꓴ ꓪ ꓚꓲꓸ ꓛꓬ ꓒꓳꓹ ꓠꓹ ꓟ ꓠꓺ ꓠꓬꓲ ꓘꓶꓽ ꓕꓲ ꓟ ꓗꓶ ꓔꓲꓸ ꓬꓰˍ ꓥꓳ= ꓕꓱ ꓟ ꓠꓬ ꓠꓲꓹ ꓟ ꓦꓶˍ ꓟ ꓠꓲꓹ ꓢꓲꓼˍ ꓟ ꓔꓯ ꓐꓯˍ ꓟ ꓡꓰ ꓐꓰ ꓦꓲꓻ ꓗꓪ ꓮ ꓕꓯ ꓟꓲ ꓘꓴꓻ ꓑꓱꓹ ꓔꓬ ꓡ? ꓟꓽ ꓥ ꓠꓬ ꓮ ꓤ ꓤ ꓐꓰ ꓠꓴꓽ ꓠꓴꓽ ꓤ ꓫꓸ ꓕꓱ ꓔꓬ ꓡ? ꓕꓱ ꓟ ꓠꓬ ꓣꓳ ꓠꓵꓻ ꓠꓲꓹ ꓔꓯ ꓔꓯꓺ ꓠꓹ ꓟ ꓙꓲꓻ ꓓꓰ ꓡꓰˍ ꓟ ꓚꓱꓹ ꓥ ꓡꓳ= ꓣꓳ ꓠꓵꓻ ꓠꓲꓹ ꓔꓯ ꓢꓲ ꓒ ꓬꓰ-ꓢꓴ ꓠꓲꓹ ꓡꓶꓽ ꓠꓯꓸꓼ ꓗꓪ ꓙꓳ ꓔꓬ ꓠꓹ ꓟ ꓘꓴ ꓔꓬ ꓡꓳ= ꓞꓳ ꓑ ꓤ ꓐꓰ ꓤ ꓟꓶ ꓤ ꓐꓰ ꓬꓰ ꓔ ꓟ ꓚꓵ ꓘꓶꓽ ꓠꓬꓲꓽ ꓟ ꓡ ꓞꓳ ꓝꓱꓺ ꓡꓯ ꓘꓳˍ ꓟ ꓗꓪ꓾ ꓚꓵꓺ ꓘꓶꓽ ꓖꓳ ꓟ ꓠꓬ ꓢꓯꓼ ꓟꓬ ꓔꓯ ꓦꓵꓻ ꓖꓶ ꓢꓲ ꓪꓴ-ꓢ ꓔꓯ ꓖꓴ ꓟꓳꓸ ꓖꓶˍ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓴ ꓔꓯ ꓢꓲ ꓡꓲˍ ꓟ꓾ ꓠꓲꓹ ꓟ ꓠꓴꓽˍ ꓟ꓾ ꓦꓲꓻ ꓘꓴꓽ ꓡ ꓞꓳ ꓠꓵꓻ ꓠꓲꓹ ꓐꓴ ꓔꓯ ꓕꓲ ꓪ ꓔꓬ ꓠꓹ ꓟ ꓬꓰ ꓙ ꓐ ꓡ ꓝꓲ= ꓣꓳ ꓤ ꓠꓱ ꓤ ꓐꓴ꓾ ꓮ ꓑ ꓮ ꓤ ꓐꓴ ꓔꓯ ꓗꓪꓼ ꓫꓵꓼˍ ꓟ ꓟꓬꓱꓽ ꓐꓴ ꓗꓪ ꓠꓲꓹ ꓟ ꓠꓴꓽ ꓢꓲ꓾ ꓠꓲꓹ ꓟ ꓫꓵꓺ꓾ ꓠꓲꓹ ꓠꓵꓻˍ ꓟ ꓠꓲꓹ ꓟ ꓡꓰ ꓗꓪꓼ ꓫꓵꓼ ꓗꓴꓸ ꓠꓹ ꓟ ꓬꓰ ꓙ ꓖꓶ ꓡ ꓝꓲ꓾ ꓐꓰ ꓐꓯ ꓢꓲ ꓬꓲ ꓢꓷꓸ ꓙ ꓟꓳ ꓘꓶꓽ ꓔꓯ ꓠꓽ ꓗꓷ ꓟ ꓥ ꓡꓳ=