ꓟꓷꓽ ꓠꓷ, ꓝ. ꓢꓴ ꓐꓴ ꓗꓪ ꓐꓰ ꓬꓲ ꓑ ꓫꓬ ꓐꓴ ꓔꓯ ꓫ. ꓕꓱ ꓩꓴ ꓡˍ ꓟ ꓪꓴ‐ꓢ ꓬꓲ ꓐꓯ ꓘꓶꓽ ꓮ ꓙꓵꓽ ꓠꓬ ꓠꓵꓻ ꓠꓲ,꓾ ꓫꓱ. ꓤ ꓠꓲ, ꓐꓰ ꓖꓼ ꓖꓶ ꓠꓲ, ꓥ ꓡꓳ꓿ ꓖꓳ ꓡꓱ ꓥˍ ꓟꓲ ꓮ ꓟꓬ, ꓘꓳꓼ ꓗꓳ. ꓘꓳ ꓡ ꓗ ꓠꓯ. ꓕꓯ ꓠꓬ꓾ ꓑ ꓫꓬ ꓮ ꓟꓬ, ꓐꓱ ꓶ ꓟꓯꓻ ꓡꓲꓽˍ ꓟ ꓶꓻ ꓒꓬꓱꓼ ꓡꓰ ꓝꓲˍ ꓟ ꓙꓵꓽ ꓗ ꓐꓰ ꓙꓵꓻ ꓠꓲ, ꓚꓱ, ꓠꓯꓸꓼ ꓗꓪ ꓛꓳ ꓫꓱꓽ ꓠ ꓔ ꓟ ꓛꓳ ꓫꓱꓽ ꓚꓱ, ꓮ ꓟꓬ, ꓙꓳ ꓡ ꓟ ꓑꓶ. ꓓꓴ ꓙꓲꓻˍ ꓟ ꓪꓴ‐ꓢ ꓐꓯ ꓘꓶꓽ ꓬꓲ ꓬꓲ ꓢꓲ ꓥ ꓟ ꓠꓵꓻ ꓠꓲ,꓾ ꓫꓱ. ꓤ ꓠꓲ, ꓐꓰ ꓖꓼ ꓖꓶ ꓠꓲ, ꓠꓬ ꓖꓳ ꓟ ꓠꓯꓸꓼ ꓗꓪ ꓒꓲꓼ ꓬꓰꓳ꓾ ꓔꓵ. ꓡꓰꓳ꓿ ꓪꓴ‐ꓢ ꓟ. ꓟꓲꓽ ꓮ ꓟꓬ, ꓢꓳ ꓔ ꓟ ꓙꓵꓽ ꓗ ꓟ. ꓒ ꓐꓴ ꓔꓲ ꓒ ꓪꓴ. ꓓꓵ ꓣꓱꓽ ꓢꓴ ꓐꓴ ꓠꓬ ꓙꓵꓽ ꓗ ꓕꓱ ꓟꓬ ꓔꓯ ꓛꓳ ꓫꓱꓽ ꓠ, ꓟ ꓢꓯꓼ ꓕꓵꓼ ꓗꓷ ꓢꓲ ꓠꓬꓲ꓾ ꓠꓱ. ꓐꓯ ꓔꓯ ꓥ ꓟꓲ ꓖꓳ ꓟ ꓡꓰ ꓬꓰ ꓠ, ꓟ ꓟ. ꓖꓶˍ ꓡꓳ꓿ ꓖꓳ ꓡꓱ ꓠꓬꓲ ꓠꓲ, ꓟ ꓠꓯꓸꓼ ꓗꓪ ꓟꓽ ꓓꓯ, ꓓꓯ, ꓕꓯꓽ ꓢꓲ ꓕꓲ ꓒꓳ, ꓗꓪ ꓡꓰꓽ ꓛꓳ ꓫꓱꓽ ꓔꓬ ꓟ ꓬꓲ ꓪ ꓛꓳ ꓫꓱꓽ ꓚꓱ, ꓠꓬ ꓢꓲ ꓒ ꓬꓰ‐ꓢꓴ ꓟꓲꓽ ꓕꓯꓽ ꓗꓪ ꓮ ꓘꓶ. ꓡꓳ. ꓫ. ꓓꓴ ꓕꓲ ꓫꓵꓽ ꓒꓬꓱꓼ ꓡˍ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ (ꓟ‐ꓘꓳ 7ꓽ1‐13) ꓔꓯ ꓵꓻ ꓠꓬꓲˍ ꓕꓯ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓴ ꓠꓬ ꓜꓽ ꓓꓴ ꓟꓽ ꓜꓽ ꓧꓶ. ꓕꓯ ꓡꓯꓽ ꓒꓯ, ꓞꓲꓽ ꓠꓯ, ꓟ ꓡꓲꓽ ꓒꓰꓼ ꓔꓯ ꓟꓽ ꓛꓳ ꓟ ꓔꓯ ꓙꓵꓽ ꓗ ꓟ. ꓒ ꓐꓴ ꓒ‐ꓡꓲ‐ꓢꓷ ꓐꓴ ꓡꓰ ꓟꓳꓻ ꓡꓰ ꓢꓲ꓾ ꓝꓴꓲ. ꓐꓯˍ ꓟ ꓔꓯ ꓣꓳ ꓑ ꓙꓽ ꓪˍ ꓥꓳ꓿ ꓖꓳ ꓡꓱ ꓠꓬꓲ ꓬꓰ‐ꓢꓴ ꓠꓬ ꓬꓲ ꓪ ꓐꓴ ꓔꓯ ꓟ. ꓖꓶˍ ꓡꓳ꓿ ꓬꓲ ꓪ ꓐꓴ ꓠꓬ ꓞꓳ ꓤ ꓡꓲꓽ ꓔꓯ ꓛꓳˍ ꓥ ꓟꓲ ꓪꓴ‐ꓢ ꓙꓵꓽ ꓗ ꓔꓯ ꓠꓽ ꓬꓲ ꓪ ꓡꓳ ꓔ ꓡꓳ꓿ ꓬꓲ ꓪ ꓠꓬ ꓪꓴ‐ꓢ ꓔꓯ ꓟꓷꓽ ꓠꓷ, ꓘꓶꓽ ꓗꓪ ꓡꓰꓽ ꓦ ꓡꓱ ꓔꓬ ꓢꓲ ꓠꓬꓲ꓾ ꓬꓲ ꓪ ꓠꓲ, ꓟ ꓠꓬ ꓠꓵꓻ ꓠꓲ, ꓢꓲ ꓒ ꓥ ꓟ ꓪꓴ‐ꓢ ꓐꓰ ꓶꓽ ꓤ ꓗꓶ, ꓶꓽ ꓞ, ꓡꓳ꓿ ꓧꓷ, ꓚ ꓢꓲ ꓐꓯˍ ꓠꓬ ꓬꓲ ꓪ ꓠꓽ ꓬꓲ ꓪ ꓠꓲ, ꓟ ꓐꓰ ꓬꓲ ꓪ ꓛꓳ ꓫꓱꓽ ꓔꓬ ꓟ ꓠꓬ ꓟꓽ ꓫꓱ. ꓡꓯ ꓘꓳ꓿
ꓜꓽ ꓓꓴ ꓟꓽ ꓜꓽ ꓧꓶ. ꓕꓯ ꓡꓯꓽ ꓒꓯ, ꓔꓯ ꓞꓲꓽˍ ꓟ ꓠꓬ ꓖꓳ ꓓꓱꓽ ꓕꓲ ꓒꓳ, ꓗꓪ ꓢꓲꓽ ꓫꓬ ꓠ, ꓟ ꓐꓱ ꓶ ꓣꓱꓽ ꓞ, ꓥˍ ꓟꓲ꓾ ꓢꓲꓽ ꓫꓬ, ꓟ ꓠꓲ, ꓟ ꓠꓬ ꓪ ꓜꓲ ꓬꓳ. ꓚꓰꓽˍ ꓟ ꓥ ꓡꓳ꓿ ꓪꓴ‐ꓢ ꓠꓬ ꓣꓳ ꓒꓬꓱꓽ ꓢꓶ. ꓟꓽ ꓞꓲꓺ ꓣꓳ ꓔꓶ ꓙꓱꓼ꓾ ꓣꓳ ꓠꓲ, ꓟ ꓔꓯ ꓪ ꓜꓲ ꓡꓳ. ꓠꓬꓲˍ ꓡꓳ꓿ ꓬꓲ ꓠꓬ ꓣꓳ ꓐꓯ ꓘꓶꓽ ꓐꓰ ꓣꓳ ꓛꓳ ꓫꓱꓽˍ ꓟ ꓔꓯ ꓡꓳ. ꓢꓲ ꓠꓬꓲ꓾ ꓣꓳ ꓠꓬ ꓬꓲ ꓔꓯ ꓠꓲ, ꓠꓵˍ ꓡ꓾ ꓟꓽ ꓠꓲ, ꓠꓵ ꓡ ꓐꓯ ꓟ ꓔꓯ ꓐꓯ ꓞꓷ,ˍ ꓡꓳ꓿ ꓚꓵ ꓚꓵ꓾ ꓠꓵꓻ ꓠꓲ, ꓒ ꓐꓲꓸꓼ ꓓꓯ,ˍ ꓟ ꓠꓲ, ꓟ ꓠꓬ ꓣꓳ ꓫ. ꓕꓱˍ ꓟ ꓐꓰ ꓣꓳ ꓛꓳꓽ ꓫꓱꓽ ꓚꓱ, ꓠꓯꓸꓼ ꓗꓪ ꓬꓲ ꓚꓲ. ꓛꓬ ꓡꓰ ꓖꓴ ꓟ. ꓖꓶˍ ꓡꓳ꓿ ꓣꓳ ꓫ. ꓕꓱˍ ꓟ ꓐꓰ ꓣꓳ ꓛꓳꓽ ꓫꓱꓽ ꓚꓱ, ꓠꓯꓸꓼ ꓗꓪ ꓡꓰꓽ ꓠꓵꓻ ꓠꓲ, ꓓꓯ,ˍ ꓟ ꓣꓳ ꓠꓲ, ꓟ ꓔꓯ ꓖꓴ ꓟ. ꓖꓶˍ ꓟ ꓥ ꓡꓳ꓿
ꓕꓲ ꓣꓳ ꓐꓰ ꓕꓲ ꓣꓳ ꓙꓻ ꓡꓯ ꓘꓳ ꓓꓴ ꓐꓱ ꓶ ꓐꓯ ꓘꓶꓽ ꓫ. ꓕꓱ ꓘꓶꓽ ꓣꓱꓽ ꓞ, ꓟ ꓥ ꓡꓳ꓿ ꓐꓯ ꓘꓶꓽ ꓐꓴ ꓠꓬ ꓣꓳ ꓠꓲ, ꓟ ꓗꓪ ꓮ ꓡꓲ ꓗ, ꓔꓬ ꓟ꓾ ꓓꓵꓽ ꓙˍ ꓟ ꓐꓰ ꓣꓳ ꓔꓶ ꓙꓱꓼ ꓮ ꓡꓲ ꓫꓵꓽ ꓬꓰ ꓠꓲ, ꓫꓵˍ ꓟ ꓒꓬꓱꓼ ꓡ ꓠꓲ, ꓫꓵˍ ꓟ ꓔꓯ ꓖꓴ ꓟ. ꓖꓶˍ ꓡꓳ꓿ ꓙꓲꓻˍ ꓟ ꓐꓯ ꓘꓶꓽ ꓥ ꓡ꓾ ꓟꓽ ꓙꓲꓻ ꓟ ꓐꓯ ꓘꓶꓽ ꓥ ꓡ ꓐꓯ ꓟ ꓠꓬ ꓐꓯ ꓢꓴ ꓐꓰ ꓠ ꓠ, ꓢꓴ ꓕꓯꓽ ꓢꓲ ꓗꓪ ꓡꓰꓽ ꓥꓳꓺ ꓞ, ꓟ ꓥ ꓡꓳ꓿ ꓟꓬꓽ ꓠꓬꓲ ꓬꓳ. ꓚꓰꓽˍ ꓟ ꓠꓬ ꓐꓯ ꓘꓶꓽ ꓮ ꓟꓬ, ꓠꓬ ꓠꓲ, ꓟ ꓗꓪ ꓐꓰ ꓡˍ ꓟ ꓥ ꓡꓳ꓿ ꓣꓳ ꓠꓬ ꓣꓳ ꓐꓯ ꓠꓲ, ꓫꓵˍ ꓟ ꓔꓯ ꓔꓱ, ꓔꓱ, ꓟꓽ ꓐꓯ ꓐꓯ ꓠꓱ. ꓐꓯ ꓕꓲ ꓙꓰꓽ ꓔꓯ ꓐꓯ ꓢꓲ ꓢꓴ ꓔꓯ ꓗꓶ.ˍ ꓕꓯ꓾ ꓣꓳ ꓠꓬ ꓢꓴ ꓔꓯ ꓡꓰꓽ ꓟꓽ ꓞꓲꓺ ꓣꓳ ꓚꓲ. ꓛꓬ ꓔꓯ ꓥˍ ꓟꓲ ꓠꓻ ꓡꓰ ꓝꓲ ꓟ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓡꓰ ꓝꓮꓲ ꓐꓯ ꓔ ꓡꓳ “ꓥꓪ ꓔꓯ ꓢꓲ ꓒꓽꓳ꓾ ꓢꓲ ꓒꓽꓳ꓾ ꓘꓴ ꓢꓴ ꓮ ꓙꓵꓽ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓓꓵꓽ ꓡꓰ꓿ ꓟꓴ ꓗꓪ ꓗꓪ ꓔꓬ ꓟ ꓥꓪ ꓐ, ꓐ ꓠꓲ, ꓡꓶꓽ ꓛꓳ ꓢꓴˍ ꓡꓰꓽ ꓓꓵꓽ ꓡꓰˍ ꓥꓳ(ꓟ‐ꓕꓲ 7ꓽ21)” ꓐꓰ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓣꓳ ꓣꓱꓽ ꓬꓰ ꓚꓱ, ꓠꓬ ꓣꓳ ꓐꓯ ꓘꓶꓽ ꓔꓯ ꓛꓳ ꓠ ꓗ, ꓟ ꓔꓯ ꓐꓯ ꓟ. ꓖꓶ ꓡ ꓔꓬ ꓡꓳ꓿ ꓬꓲ ꓚꓰ ꓬꓲ ꓪꓴ. ꓕꓳꓽ ꓶ ꓗꓪ꓾ ꓪꓴ‐ꓢ ꓠꓬ ꓟꓲ ꓠꓯ ꓔꓯ ꓚꓰꓼˍ ꓕꓯ꓾ ꓪꓴ‐ꓢ ꓬꓲ ꓐꓯ ꓘꓶꓽ ꓐꓯ ꓗꓷ ꓗ ꓠꓯ. ꓞꓼ ꓐꓰ ꓟꓲ ꓠꓯ ꓒꓬꓱꓼ ꓡˍ ꓟ ꓔꓯ ꓣꓳ ꓓꓵꓽ ꓙ ꓟꓶ ꓠ ꓗ, ꓡꓳ꓿ ꓪꓴ‐ꓢ ꓠꓬ ꓣꓳ ꓔꓯꓺ ꓢꓳ ꓓꓴ ꓥ ꓡꓳ꓿ ꓪꓴ‐ꓢ ꓠꓬ ꓬꓲ ꓟꓽ ꓬꓰ ꓖꓶ ꓡ ꓟ ꓮ ꓡꓲ ꓕꓲ ꓫꓵꓽ ꓔꓯ ꓥˍ ꓟꓲ ꓬꓲ ꓣꓳ ꓔꓯ ꓟꓽ ꓐꓯ ꓖꓶ ꓡ꓿ ꓬꓲ ꓐꓯ ꓔ ꓟ ꓡꓰ ꓬꓲ ꓬꓰˍ ꓡꓳ꓾ ꓬꓲ ꓛꓳ ꓫꓱꓽˍ ꓡꓳ꓿ ꓣꓳ ꓔꓯ ꓠꓵꓻˍ ꓟ ꓬꓲ ꓠꓵꓻ ꓠꓲ, ꓑꓶ. ꓓꓴ ꓣꓳ ꓐꓱ ꓶ ꓫꓵꓻ ꓙ ꓗꓷ ꓟ ꓔꓯ ꓥ ꓟꓲ꓾ ꓧꓶ. ꓕꓯ ꓡꓰ ꓬꓲ ꓐꓯ ꓘꓶꓽ ꓙꓳ ꓗꓷ ꓟ ꓥ ꓡꓳ꓿
ꓐꓯ ꓘꓶꓽ ꓗꓪ ꓐꓰ ꓡꓰꓽ ꓟꓽ ꓡꓳꓼ ꓟ ꓪꓴ‐ꓢ ꓢꓷ.ˍ ꓡꓳ꓿ ꓖꓳ ꓡꓱ ꓠꓬꓲ ꓐꓯ ꓘꓶꓽ ꓥ ꓟ ꓬꓰ‐ꓢꓴ ꓬꓲ ꓚꓲ. ꓛꓬ ꓠꓬ ꓧꓪꓽ ꓖꓳ ꓓꓱꓽ ꓒꓬꓱꓼ ꓡ ꓗꓷꓳ꓿ ꓪꓴ‐ꓢ ꓠꓬ ꓬꓲ ꓙ ꓟꓳ ꓘꓶꓽ ꓖꓶ ꓔ ꓟ ꓮ ꓙꓵꓽ ꓒꓬꓱꓼ ꓡ ꓝꓲˍ ꓡꓳ꓿ ꓪꓴ‐ꓢ ꓬꓲ ꓐꓯ ꓘꓶꓽ ꓠꓬ ꓚꓵ ꓚꓵ ꓒꓬꓱꓼ ꓡˍ ꓟ ꓗꓪ ꓐꓰ ꓣꓳ ꓠꓬ ꓝꓴꓲ. ꓚꓳ ꓑ. ꓬꓰˍ ꓟ ꓗꓪ ꓐꓰ ꓚꓬꓴ. ꓙˍ ꓟ ꓟꓶ ꓗꓷꓳ꓿
ꓖꓳ ꓡꓱ ꓠꓬꓲ꓾ ꓣꓳ ꓠꓯꓸꓼ ꓗꓪ ꓐꓰ ꓮ ꓟꓬ ꓣꓳ ꓛꓲ ꓠꓬ꓾ ꓐꓯˍ ꓟ ꓡꓰ ꓣꓳ ꓛꓳ ꓫꓱꓽ ꓗꓷ ꓡ꓾ ꓢꓴ ꓔꓯ ꓟ. ꓖꓶˍ ꓟ ꓡꓰ ꓙꓲꓻˍ ꓟ ꓮ ꓡꓲ ꓟꓬ ꓛꓲ ꓬꓰ ꓗꓷ ꓡ꓾ ꓢꓲꓽ ꓫꓬ ꓕꓳ ꓶ ꓗꓪ ꓟ. ꓖꓶ ꓔ ꓟ ꓡꓰ ꓮ ꓟꓬ ꓣꓳ ꓠꓬ ꓞꓳ ꓙꓳ ꓗꓷ ꓡ꓾ ꓐꓯ ꓟ ꓔꓯ ꓠꓬꓲ. ꓠꓬꓲ ꓗꓪ ꓣꓳ ꓓꓵꓽ ꓙ ꓠꓬꓲ ꓓꓴ ꓬꓰ ꓡꓯ꓿
