ꓡꓴ‐ꓘ꓿5ꓽ21‐43
“ꓮ ꓟꓲꓽꓳ꓾ ꓠꓴ ꓙꓵꓻ ꓠꓲ, ꓡꓰ ꓠꓴ ꓔꓯ ꓓꓻ ꓡꓰ ꓝꓲꓳ꓿ ꓧꓪ. ꓧꓪꓸꓼ ꓙꓰ꓿ ꓠꓴ ꓠꓬ ꓠꓻ ꓓꓴ ꓗꓪ ꓐꓰ ꓩꓴ ꓗꓷ ꓟꓶ ꓡꓰꓳ”
ꓐꓯ ꓘꓶꓽ ꓕꓱ ꓟ ꓬꓲ. ꓬꓲ ꓢꓲ ꓬꓲ ꓟ. ꓟꓲꓽ ꓠꓬ꓾ ꓞꓳ ꓤ ꓮ ꓙꓵꓽ ꓠꓬ ꓪꓴ‐ꓢ ꓔꓯ ꓙꓵꓻˍ ꓟ ꓙꓵꓻ ꓠꓲ, ꓗꓪ ꓐꓰ ꓚꓬꓴ. ꓙˍ ꓟ ꓟꓶ ꓐ ꓡˍ ꓡꓳ꓿ ꓠꓻ ꓫꓬ, ꓟꓶ ꓐ ꓡˍ ꓡꓳ꓾ ꓐꓯ ꓟ ꓥ ꓡꓳ꓿ ꓣꓳ ꓠꓬ ꓢꓲ ꓒ ꓬꓲ ꓠꓲ, ꓡꓶꓽ ꓙꓳˍ ꓟ ꓐꓰ ꓕꓲ ꓡꓰ, ꓞꓳ ꓙꓳ ꓢꓯ. ꓔꓬ ꓠ, ꓟ ꓐꓱ ꓶ꓾ ꓟꓲ ꓠꓯ ꓕꓱ ꓟ ꓗꓪ ꓣꓳ ꓬꓰ ꓙꓲꓽ ꓙꓳˍ ꓟ ꓮ ꓙꓵꓽ ꓔꓯ ꓔꓱ, ꓜꓳꓽˍ ꓟ ꓚꓱ, ꓗꓪ ꓐꓰ ꓮ ꓡꓲ ꓐ ꓡˍ ꓮ ꓡꓲ ꓣꓱꓽ ꓬꓰ ꓢꓯꓼ ꓕꓵꓼ ꓠꓯ,ˍ ꓟ ꓥ ꓡꓳ꓿ ꓕꓱ ꓕꓲ ꓚꓱ, ꓗꓪ ꓐꓰ ꓡꓰꓽ ꓞꓳ ꓤ ꓮ ꓙꓵꓽ ꓠꓬ꓾ ꓪꓴ‐ꓢ ꓬꓲ ꓣꓱꓽ ꓛꓰꓽ ꓐꓲ ꓞ,ˍ ꓟ꓾ ꓢꓲ ꓡꓲˍ ꓟ ꓐꓰ ꓚꓬꓴ. ꓙˍ ꓟ ꓔꓯ ꓑꓯ, ꓟꓶˍ ꓥꓳ꓿ ꓪꓴ‐ꓢ ꓔꓯ ꓙꓵꓻ ꓢꓲ ꓦ ꓡꓱ ꓐꓳˍ ꓟ ꓗꓪ ꓐꓰ ꓡꓰꓽ ꓣꓳ ꓐꓴ ꓠꓬ꓾ ꓧꓪꓽ ꓖꓳ ꓓꓱꓽ ꓕꓲ ꓒꓳ, ꓗꓪ ꓡꓰꓽ ꓟꓽ ꓞꓲꓺ ꓦꓻ ꓕꓲ ꓒꓳ, ꓗꓪˍ ꓟꓲ ꓠꓻ ꓫꓬ, ꓖꓶˍ ꓟ꓾ ꓓꓻ ꓡꓰˍ ꓟ ꓟꓶˍ ꓥꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓗꓪ ꓪꓴ‐ꓢ ꓔꓯ ꓙꓵꓻˍ ꓟ ꓣꓳ ꓙꓵꓻ ꓠꓲ, ꓠꓬ ꓮ ꓡꓲ ꓟꓬ ꓗꓪ ꓛꓲ ꓠꓯ.ˍ ꓡ꓾ ꓮ ꓡꓲ ꓪꓴ ꓛꓲ ꓙꓳˍ ꓡ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓓꓴ ꓬꓰ ꓡꓯ꓿
ꓝꓮꓲ ꓬꓰ‐ꓢꓴ ꓠꓬ ꓠꓴ ꓮꓽ ꓟ ꓥ ꓡ꓾ ꓮ ꓫꓵꓽ ꓥ ꓡ꓾ ꓐꓯ ꓟ ꓔꓯ ꓬꓲ ꓟꓽ ꓡꓳ. ꓠꓬꓲ꓿ ꓠꓴ ꓠꓬ ꓞꓲꓼ ꓣꓳˍ ꓥ ꓟꓲ ꓞꓲꓼ ꓪꓴꓽˍ ꓥ ꓟꓲ꓾ ꓙꓳꓺ ꓗꓴ. ꓢꓴ ꓫ. ꓔꓳ ꓗꓴ. ꓢꓴ ꓥˍ ꓟꓲ꓾ ꓧꓳꓽ ꓣꓱꓽ ꓢꓴ ꓥˍ ꓟꓲ ꓗ ꓠꓯ. ꓛꓳ ꓢꓴ ꓥˍ ꓟꓲ꓾ ꓕꓱ ꓟ ꓔꓯ ꓬꓲ ꓟꓽ ꓡꓳ. ꓠꓬꓲ꓿ ꓠꓴ ꓮ ꓟ ꓥˍ ꓟꓲ ꓮ ꓫꓵꓽ ꓥˍ ꓟꓲ ꓬꓲ ꓠꓬ ꓠꓴ ꓔꓯ ꓢꓷ. ꓢꓲ꓾ ꓠꓴ ꓔꓯ ꓠꓲ, ꓠꓵˍ ꓡꓳ꓿ ꓠꓴ ꓔꓯ ꓬꓲ ꓙꓽ ꓗꓳ.ˍ ꓡꓳ꓿ ꓠꓴ ꓣꓱꓽ ꓞ, ꓔꓬ ꓟ꓾ ꓙꓳꓺ ꓔꓬ ꓟ꓾ ꓫ. ꓙꓵ ꓔꓬ ꓟ ꓔꓯ ꓬꓲ ꓡꓰ ꓢꓷ. ꓢꓲ ꓠꓬꓲ ꓬꓲ ꓠꓬ ꓠꓴ ꓔꓯ ꓬꓰ ꓙ ꓠ, ꓟ ꓙꓽ ꓖꓶ ꓔ ꓡꓳ꓿ ꓬꓲ ꓠꓬ ꓠꓴ ꓐꓯ ꓖꓶˍ ꓟ ꓔꓯ ꓠ ꓠ, ꓢꓲ ꓠꓬꓲ ꓖꓳ ꓟ ꓔꓯ ꓖꓶ ꓠ, ꓟ ꓬꓲ ꓡꓰ ꓙꓽ ꓖꓶ ꓔ ꓡꓳ꓿
ꓖꓳ ꓡꓱ ꓠꓬꓲ ꓣꓳ ꓠꓬ ꓮ ꓫꓵꓽ ꓣꓱꓽ ꓞ, ꓔꓬ ꓡ꓾ ꓣꓳ ꓠꓬ ꓮ ꓡꓲ ꓫꓵꓽ ꓗꓪ ꓫ. ꓙꓵ ꓔꓬ ꓡ꓾ ꓕꓱ ꓟ ꓮ ꓙꓵꓽ ꓬꓰ‐ꓢꓴ ꓔꓬ ꓗꓪ ꓔꓯ, ꓙꓰ ꓡꓯ꓿ ꓣꓳ ꓐꓱ ꓶ ꓮ ꓡꓲ ꓫꓵꓽ ꓫꓵꓽ ꓪꓴ ꓥ ꓟꓲ꓾ ꓖꓳ ꓟ ꓔꓯ ꓢꓲ ꓒ ꓔꓬ ꓗꓪ ꓔꓯ, ꓙꓰ꓿ ꓬꓲ ꓠꓬ ꓣꓳ ꓔꓯ ꓠꓲ, ꓠꓵˍ ꓡꓳ꓿ ꓬꓲ ꓠꓬ ꓣꓳ ꓐꓱ ꓶ ꓦꓰꓼ ꓔꓴ ꓔꓬ ꓡꓳ꓿ ꓬꓲ ꓠꓬ ꓣꓳ ꓔꓯ ꓡꓳ. ꓠꓬ,꓾ ꓦꓴꓻ ꓠꓬ, ꓔꓬ ꓡꓳ꓿
