ꓟ‐ꓘꓳ꓿3ꓽ31‐35
ꓖꓳ ꓕꓯ ꓬꓲ ꓟ, ꓟˍ ꓐꓰ ꓬꓲ ꓠꓬꓲ ꓤ ꓐꓴ ꓡ ꓢꓲ꓾ ꓠꓱ ꓫꓱ. ꓗꓪ ꓦꓰꓼ ꓞ, ꓢꓲ ꓠꓬꓲ ꓬꓲ ꓔꓯ ꓘꓴ ꓬꓰ ꓝꓲˍ ꓡꓳ꓿ ꓬꓲ ꓚꓳ ꓡꓳ ꓗꓪ ꓠꓬ ꓞꓳ ꓜꓴ ꓠꓬꓲ. ꓠ. ꓔꓬ ꓡꓳ꓿ ꓬꓲ ꓪ ꓡꓰ ꓬꓲ ꓔꓯ꓾ ꓠꓴ ꓟ, ꓟˍ ꓐꓰ ꓠꓴ ꓠꓬꓲ ꓤ ꓐꓴ ꓠꓬ ꓠꓱ ꓫꓱ. ꓗꓪ ꓠꓴ ꓔꓯ ꓦꓴ ꓠꓬ, ꓔꓬ ꓡꓳ꓾ ꓐꓯ ꓖꓶˍ ꓡꓳ꓿
ꓖꓳ ꓕꓯ ꓬꓲ ꓡꓰ ꓬꓲ ꓪ ꓔꓯ ꓒꓳ, ꓖꓶ ꓢꓲ꓾ ꓥꓪ ꓟ, ꓟˍ ꓐꓰ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓠꓬ ꓮꓽ ꓟ ꓥ ꓡ? ꓐꓰ ꓐꓯ ꓗꓷ ꓠꓬ꓾ ꓬꓲ ꓚꓳ ꓡꓳ ꓗꓪ ꓠꓬꓲ. ꓠ. ꓔꓬ ꓢꓴ ꓐꓴ ꓔꓯ ꓡꓳ. ꓢꓲ꓾ ꓠꓬꓲ ꓠ,꓾ ꓥꓪ ꓟ, ꓟˍ ꓐꓰ ꓥꓪ ꓬꓲꓼ ꓥꓪ ꓠꓬꓲ ꓐꓴ꓾ ꓪꓴ‐ꓢ ꓠꓲ, ꓡꓶ ꓛꓳ ꓢꓴ ꓮꓽ ꓟ ꓥˍ ꓟꓲ ꓥꓪ ꓬꓲꓼ ꓥꓪ ꓠꓬꓲˍ ꓐꓰ ꓥꓪ ꓟ, ꓟ ꓥꓳ꓾ ꓐꓯˍ ꓡꓳ꓿
++++++++++++++
ꓢꓲ ꓒ ꓬꓰ‐ꓢꓴ ꓠꓬ ꓐ, ꓐ ꓪꓴ‐ꓢ ꓠꓬ ꓣꓳ ꓮ ꓐꓽ ꓥ ꓟ ꓐꓰ꓾ ꓪꓴ‐ꓢ ꓗꓴꓷꓼ ꓟ. ꓟꓲꓽ ꓚꓱ, ꓔꓯ ꓬꓲ ꓠꓬ ꓬꓲ ꓙꓵ, ꓙꓳˍ ꓕ ꓑꓳꓸꓼ ꓚ ꓟ. ꓖꓶˍ ꓡꓳ꓿ ꓪꓴ‐ꓢ ꓬꓲ ꓠꓲ, ꓡꓶꓽ ꓠꓬ ꓬꓲ ꓚꓰꓼ ꓔ ꓟ ꓛꓳ ꓫꓵꓽ ꓕꓲ ꓪꓳꓼ ꓡꓰ ꓕꓲ ꓪꓳꓼ ꓔꓯ ꓬꓲ ꓗꓴꓷꓼ ꓗꓪ ꓧꓳꓽ ꓙꓰ ꓠ, ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓬꓰ‐ꓢꓴ ꓠꓬ ꓬꓲ ꓙꓵ, ꓙꓳˍ ꓕ ꓑꓳꓸꓼ ꓪꓴ‐ꓢ ꓐꓰ ꓞꓳ ꓗꓴ. ꓙꓲꓽ ꓙꓳˍ ꓟ ꓚꓱ, ꓔꓯ ꓔꓯ ꓥꓳꓽ ꓮ ꓟꓬ, ꓣꓱꓽ ꓢꓲ ꓟ. ꓖꓶˍ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ꓾ ꓬꓰ‐ꓢꓴ ꓬꓲ ꓟ, ꓟ꓾ ꓮ ꓬꓲꓼ ꓠꓬꓲ ꓤ ꓮ ꓝꓲ ꓠꓬꓲ ꓟ ꓐꓴ ꓠꓬ ꓬꓰ‐ꓢꓴ ꓔꓯ ꓧꓪ ꓡˍ ꓡꓳ꓿ ꓕꓱ ꓟ ꓗꓪ ꓐꓰ ꓬꓰ‐ꓢꓴ ꓠꓬ “ꓪꓴ‐ꓢ ꓠꓲ, ꓡꓶ ꓛꓳ ꓢꓴ ꓮꓽ ꓟ ꓥˍ ꓟꓲ ꓥꓪ ꓬꓲꓼ ꓥꓪ ꓠꓬꓲˍ ꓐꓰ ꓮ ꓝꓲ ꓠꓬꓲ ꓟˍ ꓐꓰ ꓥꓪ ꓟ, ꓟ ꓥꓳ꓾” ꓐꓰ ꓬꓲ ꓟ. ꓟꓲꓽ ꓚˍ ꓟ ꓔꓯ ꓠ ꓠ, ꓔꓬ ꓢꓴ ꓐꓴ ꓔꓯ ꓐꓯ ꓖꓶˍ ꓡꓳ꓿
ꓕꓱ ꓟ ꓠꓬ꓾ ꓪꓴ‐ꓢ ꓟꓬꓱꓽ ꓬꓰ ꓢꓴ ꓠꓬ ꓚꓲ. ꓛꓬ ꓮꓽ ꓐ ꓮ ꓟ ꓮ ꓬꓲꓼ ꓠꓬꓲ ꓤ ꓮ ꓝꓲ ꓠꓬꓲ ꓟ ꓐꓴˍ ꓡꓰꓽ ꓟꓽ ꓞꓲ꓾ ꓪꓴ‐ꓢ ꓑ ꓫꓬ ꓮ ꓙꓵꓽ꓾ ꓙꓵꓻ ꓢꓴ ꓢꓲ ꓤ ꓮ ꓙꓵꓽ ꓔꓯ ꓠꓲ, ꓠꓵ ꓠꓯ, ꓟ ꓔꓯ ꓐꓯ ꓟ. ꓖꓶ ꓔꓬ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓧꓷ, ꓚ ꓢꓲ ꓠꓬꓲ꓾ ꓢ ꓙꓰꓽ ꓟ. ꓖꓶ ꓡ ꓔꓬ ꓡꓳ꓾
ꓬꓲ ꓪꓴ. ꓕꓲꓽ ꓠꓬ꓾ ꓞꓳ ꓤ ꓮ ꓙꓵꓽ ꓠꓬ ꓪꓴ‐ꓢ ꓗꓪ ꓐꓰ ꓡˍ ꓟ ꓥ ꓢꓲ ꓠꓬꓲ꓾ ꓪꓴ‐ꓢ ꓐꓰ ꓟꓬꓽ ꓠꓬꓲ ꓙꓻ ꓡꓯ ꓘꓳ ꓠ ꓗ, ꓡꓳ꓾ ꓪꓴ‐ꓢ ꓔꓯ ꓟꓬꓽ ꓠꓬꓲ ꓠ ꓡꓳ. ꓠ ꓗ, ꓡꓳ꓾ ꓐꓯ ꓟ ꓥ ꓡꓳ꓿
ꓠ‐ꓑ 2 ꓠꓬ꓾ ꓞꓳ ꓤ ꓮ ꓙꓵꓽ ꓠꓬ ꓪꓴ‐ꓢ ꓠꓲ, ꓡꓶꓽ ꓔꓯ ꓧꓪ ꓢꓲ ꓣꓱꓽ ꓬꓰˍ ꓟ ꓗꓪ ꓐꓰ꓾ ꓞꓳ ꓤ ꓮ ꓙꓵꓽ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓙꓻ ꓡꓯ ꓘꓳ ꓟꓶˍ ꓡꓳ꓾ ꓐꓯ ꓟ ꓥ ꓡꓳ꓿
ꓝꓮꓲ ꓢ ꓙꓰꓽ ꓕꓲ ꓙꓰꓽ ꓟ ꓠꓬ꓾ ꓪꓴ‐ꓢ ꓬꓲ ꓠꓲ, ꓡꓶꓽ ꓠꓬ ꓪꓴ‐ꓢ ꓗꓴꓷꓼ ꓗꓪ ꓣꓳ ꓮ ꓙꓵꓽ ꓠꓬ ꓮ ꓬꓲꓼ ꓠꓬꓲ ꓤ ꓮ ꓝꓲ ꓠꓬꓲ ꓟ ꓒꓬꓱꓼ ꓡ ꓠ, ꓟ ꓬꓲ ꓝꓳ, ꓟꓶ ꓬꓲ ꓚꓰ ꓥ ꓡꓳ꓾ ꓐꓯ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓗꓪ ꓣꓳ ꓐꓴ ꓠꓬ꓾ ꓪꓴ‐ꓢ ꓠꓲ, ꓡꓶꓽ ꓔꓯ ꓛꓳ ꓠ, ꓟ ꓣꓳ ꓪꓴ‐ꓢ ꓔꓯ ꓠ ꓡꓳˍ ꓟ ꓚꓱ, ꓔꓯ ꓓꓵꓽ ꓙ ꓠꓬꓲ ꓡꓯ꓿ ꓐ, ꓐ ꓪꓴ‐ꓢ ꓐꓰ ꓣꓳ ꓠꓬ ꓮ ꓡꓲ ꓙ ꓡꓯ ꓘꓳ ꓟꓶ ꓔꓬ ꓡ꓿ ꓣꓳ ꓤꓶꓻ ꓠꓯꓸꓼ ꓗꓪ ꓐ, ꓐ ꓬꓲ ꓠꓲ, ꓡꓶꓽ ꓔꓯ ꓮ ꓡꓲ ꓐꓰ ꓧꓪ ꓔꓬ ꓡ꓿ ꓬꓲ ꓠꓲ, ꓡꓶꓽ ꓛꓳ ꓠ, ꓟ ꓣꓳ ꓠꓬ ꓮ ꓟꓬ ꓗꓪ ꓛꓲ ꓢꓴ ꓔꓯ ꓢꓯꓼ ꓖꓶ ꓗꓷ ꓡ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓓꓴ ꓬꓰ ꓡꓯ꓿ ꓢꓲ ꓒ ꓬꓰ‐ꓢꓴꓳ꓾ ꓠꓴ ꓠꓬ ꓐ, ꓐ ꓔꓯ ꓠ ꓡꓳ.ˍ ꓟ ꓤ ꓔꓲ. ꓥ ꓡꓳ꓿ ꓥꓪ ꓠꓴ ꓔꓯ ꓐ, ꓐ ꓠꓲ, ꓡꓶꓽ ꓔꓯ ꓖꓴ ꓟ. ꓖꓶˍ ꓟ ꓢꓲꓽ ꓫꓬ ꓟ ꓦ ꓐꓯ ꓘꓶꓽ ꓔꓯ ꓠ ꓠ, ꓟ ꓬꓲ ꓬꓳ. ꓚꓵˍ ꓟ ꓚꓱ, ꓔꓯ ꓠꓬꓲ. ꓠꓬꓲ ꓠꓴ ꓠꓬ ꓥꓪ ꓠꓴꓽ ꓔꓯ ꓐꓯ ꓟ. ꓖꓶ ꓡꓺꓳ꓿ ꓢꓲ ꓒ ꓠꓴ ꓙ ꓣꓳˍ ꓟ ꓔꓯ ꓔꓯꓺ ꓢꓳ ꓢꓲ ꓠꓬꓲ꓾ ꓐ, ꓐ ꓠꓲ, ꓡꓶꓽ ꓔꓯ ꓮ ꓕꓯ ꓟꓲ ꓛꓳ ꓠꓲ, ꓒꓴˍ ꓟ ꓠꓲ, ꓡꓶꓽ ꓙꓳ ꓠ, ꓟ ꓠꓴ ꓔꓯ ꓥꓪ ꓠꓴꓽ ꓓꓰꓽˍ ꓥꓳ꓿ ꓮ ꓟꓰꓠ꓿ ꓢꓲꓺ ꓒꓽꓳ ꓠꓴ ꓔꓯ ꓥꓪ ꓙꓵꓻˍ ꓡꓳ꓿
