ꓣꓳ ꓤꓶꓸꓹ ꓗꓪ ꓡꓳ ꓩꓴ ꓗꓷ ꓠꓹ ꓔꓽ ꓟ ꓕꓲ ꓐꓱ
ꓣꓳ ꓐꓴ ꓠꓬ ꓣꓳ ꓚꓲꓸ ꓛꓬ ꓔꓯ ꓙꓲꓻˍ ꓟ ꓟꓳ ꓠꓹ ꓟ ꓕꓯꓽ ꓢꓲ ꓢꓴ ꓔꓯ ꓙꓲꓻˍ ꓟ ꓟꓳꓻˍ ꓡꓳ= ꓢꓴ ꓡꓳꓸ ꓐꓲˍ ꓟ ꓔꓯ ꓡꓰꓽ ꓟꓳꓻˍ ꓡꓳ꓾ ꓟꓽ ꓞꓲ ꓢꓴ ꓗꓹ ꓛꓲꓽˍ ꓟ ꓔꓯ ꓡꓰꓽ ꓟꓳꓻˍ ꓡꓳ= ꓣꓳ ꓤꓶꓸꓹ ꓗꓪ ꓗꓹ ꓛꓲꓽ ꓠꓲꓹ ꓫꓵˍ ꓠꓬ ꓕꓱ ꓡꓱ ꓫꓵꓽ ꓔꓯ ꓣꓳ ꓠꓲꓹ ꓟ ꓪꓴꓽ ꓠꓶ. ꓗꓪ ꓐꓰ ꓡꓳ ꓩꓴ ꓗꓷ ꓠ ꓗꓹ ꓡꓳ= ꓕꓱ ꓡꓱ ꓡꓳ ꓩꓴ ꓗꓷ ꓠꓹ ꓟ ꓠꓬ ꓟꓽ ꓢꓻ ꓐꓭ ꓥꓳ= ꓖꓳ ꓡꓰ ꓥ ꓟꓲ ꓬꓲ ꓙꓵꓹ ꓣꓴ ꓢꓲ꓾ ꓢꓯꓼ ꓕꓵꓼ ꓠ ꓗꓹ ꓡꓳ= ꓟꓲ ꓠꓯ ꓗꓪ ꓔꓬ ꓢꓴ ꓞꓳ ꓤ ꓮ ꓙꓵꓽ ꓠꓬ ꓥꓳꓽ ꓡꓰ ꓟ ꓙꓳˍ ꓡꓳ= ꓟꓽ ꓥꓳꓽ ꓡꓰ ꓠꓬꓲ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ=
ꓥꓪ ꓠꓬ ꓞꓳ. ꓡꓰ ꓢꓴ ꓥꓳ꓾ ꓮ ꓫꓵꓽ ꓟꓲ ꓬꓰ ꓟꓽ ꓐ ꓡ ꓐꓰ ꓐꓯ ꓢꓲ꓾ ꓟꓽ ꓢꓯꓼ ꓕꓵꓼ ꓕꓽ ꓔꓬ= ꓣꓳ ꓛꓲ ꓚꓬ ꓖꓳ ꓓꓱꓽ ꓠꓲꓹ ꓟ ꓔꓯ ꓙꓲꓻˍ ꓟ ꓡꓳꓸ ꓟꓳ ꓝꓲ= ꓢꓴ ꓡꓰ ꓠꓴ ꓠꓬ ꓮ ꓫꓵꓽ ꓡꓲ ꓬꓰ ꓟꓽ ꓐ ꓡ ꓐꓰ ꓐꓯ ꓡ ꓕꓯ ꓠꓴ ꓠꓲꓹ ꓟ ꓔꓯ ꓢꓯꓼ ꓙꓳ ꓙꓳ ꓡꓰꓽ ꓗꓷ ꓡꓰ ꓝꓲ꓾ ꓠꓲꓹ ꓟ ꓕꓽ ꓐꓬ ꓡꓰ ꓝꓲ= ꓟꓲ ꓠꓯ ꓗꓪ ꓠꓬ ꓠꓴ ꓔꓯ ꓬꓲꓸ ꓚꓱꓹ ꓮ ꓟꓬꓹ ꓫꓵꓽ ꓗꓪ ꓐꓰ ꓤ, ꓠꓬꓲ ꓡ ꓥꓳ= ꓖꓳ ꓡꓰ ꓐꓯ ꓥ ꓟꓲ ꓠꓲꓹ ꓟ ꓕꓽ ꓐꓬ ꓡꓰ ꓝꓲ= ꓣꓳ ꓤꓶꓸꓹ ꓗꓪ ꓣꓳ ꓚꓲ. ꓛꓬ ꓡꓰꓽ ꓦ ꓡꓱ ꓖꓴ ꓥ ꓡꓳ= ꓣꓳ ꓠꓯꓸꓼ ꓗꓪ ꓙꓳˍ ꓟ ꓔꓯ ꓠꓲꓹ ꓘꓪ ꓫꓵ= ꓢꓴ ꓠꓯꓸꓼ ꓗꓪ ꓙꓳˍ ꓟ ꓔꓯ ꓕꓽ ꓠꓲꓹ ꓠ= ꓟꓲ ꓠꓯ ꓗꓪ ꓣꓳ ꓪ ꓠꓲꓹ ꓫꓵˍ ꓟ ꓮ ꓙꓵꓽ ꓔꓯ ꓪ ꓠꓹ ꓟ ꓠꓬ ꓟꓽ ꓢꓻ=
ꓖꓳ ꓡꓰ ꓟ ꓑꓶꓸ ꓓꓴ ꓣꓳ ꓠꓯꓸꓼ ꓗꓪ ꓙꓳˍ ꓟ ꓔꓯ ꓠꓲꓹ ꓘꓪ ꓫꓵ ꓠ ꓗꓹ ꓡꓳ= ꓠꓴ ꓠꓯꓸꓼ ꓗꓪ ꓫꓸ ꓓꓴ ꓙꓳˍ ꓡ ꓐꓯ ꓥˍ ꓟꓲ ꓠꓴ ꓕꓯꓽ ꓢꓲ ꓗꓪ ꓫꓸ ꓢꓴ ꓮ ꓟꓬꓹ ꓔꓬ ꓟ ꓔꓯ ꓓꓵꓽ ꓙ ꓪ ꓡꓰ ꓝꓲ= ꓟꓲ ꓠꓯ ꓗꓪ ꓮ ꓟꓬ ꓗꓪ ꓛꓲ ꓧꓪ. ꓡꓰ ꓢꓴ ꓕꓲ ꓣꓳ ꓥ ꓟꓲ ꓬꓲꓸ ꓠꓯꓸꓼ ꓗꓪ ꓙꓳˍ ꓟ ꓔꓯ ꓠꓲꓹ ꓘꓪꓽ ꓟꓽ ꓫꓵ ꓢꓴ ꓟꓲ ꓙꓳˍ ꓡꓳ= ꓗꓹ ꓛꓲꓽ ꓓꓴ ꓐꓯˍ ꓟ ꓠꓬ ꓒꓴ ꓫꓵ ꓙꓳˍ ꓕꓯ ꓢꓲ ꓟꓽ ꓥ= ꓪ ꓔ ꓟ ꓤꓶꓸꓹ ꓔꓯ ꓗꓹ ꓛꓲꓽ ꓛꓲꓽ ꓔꓬ꓿ ꓣꓳ ꓚꓲ. ꓛꓬ ꓔꓱꓹ ꓚꓲ. ꓛꓬ ꓙ ꓫꓸ ꓔ ꓟ ꓚꓱꓹ ꓮ ꓙꓵꓽ ꓔꓯ ꓡꓳ ꓩꓴ ꓗꓷ= ꓙꓲˍ ꓟ ꓞꓳ ꓤ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼ= ꓡꓳꓹ ꓬꓰ ꓟ ꓕꓲ ꓙꓵꓹ ꓔꓯ ꓬꓰ ꓗꓷ ꓥꓳꓽ ꓗꓷ ꓟ ꓝꓴꓲꓸ ꓗꓪ ꓐꓰ ꓔꓯ ꓥꓳꓽ ꓣꓴ ꓢꓲ꓾ ꓡ ꓠꓹ ꓟ ꓗꓪ ꓕꓱ ꓡꓱ ꓟꓽ ꓬꓰ ꓥꓳꓽ ꓡꓰ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓡꓯ= ꓣꓳ ꓔꓯ ꓙꓲꓻ ꓢꓴ ꓔꓯ ꓡꓰꓽ ꓙꓲꓻ ꓪ ꓡꓰ ꓝꓲ=
ꓟꓲ ꓠꓯ ꓤꓶꓸꓹ ꓠꓬ ꓕꓲ ꓑ, ꓤ ꓡꓰꓽ ꓥ ꓡꓳ= ꓣꓳ ꓒ ꓕꓲ ꓗꓪ ꓔꓬ ꓢꓲ꓾ ꓣꓳ ꓔꓯ ꓢꓯꓼ ꓖꓶ ꓡ ꓢꓴ ꓬꓰ ꓙ ꓡ ꓢꓴ ꓙ ꓖꓴ ꓧꓳꓽ ꓟꓳꓸ ꓖꓶ ꓡ ꓢꓴ ꓐꓴ ꓐꓰ ꓕꓲ ꓠꓲꓹ ꓕꓲ ꓪ ꓔꓬ ꓪ ꓡꓰ ꓝꓲ= ꓣꓳ ꓡꓰ ꓬꓰ ꓙ ꓔ ꓢꓴ ꓐꓴ ꓣꓳ ꓫꓸ ꓓꓴ ꓔꓳꓹ ꓜꓳꓽ ꓔꓬ ꓟ ꓕꓲ ꓙꓵꓹ ꓗꓪ ꓟꓽ ꓬꓰ ꓙ ꓡ ꓢꓴ ꓔꓯ ꓠꓲꓹ ꓟ ꓗꓪ ꓐꓰ ꓡꓳ ꓩꓴ ꓗꓷ ꓐ ꓡ ꓝꓲ= ꓢꓴ ꓠꓬ ꓣꓳ ꓟꓽ ꓥ=
