ꓢꓲ ꓒ ꓬꓰ‐ꓢꓴ ꓖꓳ ꓓꓱꓽ ꓔꓲ,ˍ ꓟ ꓑꓮꓲꓽ ꓢꓲ‐ꓒ‐ꓦꓬꓼ‐ꓠꓬꓲ
ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓚꓲ. ꓛꓬ ꓠꓬ ꓝꓴꓲ. ꓟꓽ ꓙꓳ ꓥ ꓟꓲ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓔꓬ ꓗꓪ ꓙꓰ ꓢꓲ ꓠꓬꓲ ꓖꓳ ꓓꓱꓽ ꓔꓲ, ꓙꓰˍ ꓡꓳ꓿ ꓕꓱ ꓡꓱ ꓖꓳ ꓓꓱꓽ ꓔꓲ, ꓙꓰˍ ꓟ ꓠꓬ ꓣꓳ ꓔꓯ ꓮ ꓫꓵꓽ ꓐꓯ ꓟꓳ. ꓖꓶ ꓡ ꓔꓬ ꓡ꓾ ꓬꓲ ꓚꓲ. ꓛꓬ ꓠꓬ ꓝꓴꓲ. ꓟꓽ ꓙꓳ꓾ ꓖꓳ ꓡꓱ ꓐꓯ ꓥ ꓟꓲ ꓬꓲ ꓠꓬ ꓟꓷꓽ ꓠꓷ, ꓝ ꓢꓴ ꓡꓰ ꓐꓯ ꓔ ꓟ ꓖꓳ ꓕꓲ ꓣꓳ ꓮ ꓠꓱ ꓕꓯ ꓡꓰ ꓬꓲ ꓠꓬ꓾ ꓮ ꓠꓱ ꓕꓯ ꓡꓰ ꓟꓷꓽ ꓠꓷ, ꓝ ꓢꓴ ꓐꓴ ꓡꓰ ꓐꓯ ꓔ ꓟ ꓖꓳ ꓕꓲ ꓣꓳ ꓥ ꓡꓳ ꓐꓯˍ ꓟ ꓟꓳ. ꓖꓶ ꓠ, ꓫꓵˍ ꓡꓳ꓿ ꓝꓮꓲ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓬꓲ ꓬꓰˍ ꓟ ꓮ ꓙꓵꓽ ꓠꓬ ꓔꓱ, ꓜꓳꓽˍ ꓡꓳ꓾ ꓬꓲ ꓖꓴ ꓟ. ꓖꓶˍ ꓟ ꓖꓳ ꓕꓲ ꓣꓳ ꓠꓬ ꓚꓵ ꓚꓵ ꓪꓴ‐ꓢ ꓮ ꓐꓲ ꓥꓳ꓾ ꓐꓯ ꓟ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿
ꓝꓮꓲ ꓕꓲ ꓫꓵꓽ ꓟ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓖꓳ ꓓꓱꓽ ꓔꓲ,ˍ ꓟ ꓗꓪ ꓐꓰ ꓬꓲ ꓠꓬ ꓞꓳ ꓤ ꓕꓲ ꓒꓳ, ꓥ ꓟ ꓡꓰꓽ ꓟꓽ ꓞꓲ ꓪꓴ‐ꓢ ꓕꓲ ꓒꓳ,ˍ ꓟꓲ ꓥ ꓡꓳ꓿ ꓖꓳ ꓡꓱ ꓠꓬꓲ ꓞꓳ ꓤ ꓕꓲ ꓣꓳ ꓠꓬ ꓮ ꓡꓲ ꓥˍ ꓟꓲ ꓖꓳ ꓓꓱꓽ ꓔꓲ, ꓠ ꓗ, ꓡꓳ꓾ ꓐꓯˍ ꓟ ꓣꓳ ꓔꓯ ꓟꓳ. ꓖꓶ ꓡ ꓔꓬ ꓡꓳ꓿ ꓖꓳ ꓓꓱꓽ ꓟꓽ ꓔꓲ, ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓛꓲ ꓬꓰ꓿ ꓐ, ꓐ꓾ ꓤ ꓔꓲ.꓾ ꓢꓲꓽ ꓫꓬ ꓟ ꓦ ꓟꓬꓱ ꓗꓪ ꓐꓰ ꓖꓳ ꓓꓱꓽ ꓟꓽ ꓔꓲ, ꓢꓴ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓛꓲ ꓬꓰ꓾ ꓐꓰ ꓐꓯ ꓟꓳ. ꓖꓶ ꓡ ꓔꓬ ꓟ ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓖꓳ ꓓꓱꓽ ꓔꓲ,ˍ ꓟ ꓑꓮꓲꓽ ꓗꓪ ꓣꓳ ꓔꓯ ꓢꓯꓼ ꓖꓶ ꓪ ꓖꓶ ꓡˍ ꓟ ꓠꓬ꓾ ꓖꓳ ꓓꓱꓽ ꓔꓲ, ꓗꓷ ꓗ ꓠꓯ. ꓣꓳ ꓠꓬ ꓪꓴ‐ꓢ ꓤ ꓠꓱ ꓒꓬꓱꓼ ꓡꓺꓳ꓿ ꓟꓴꓽ ꓗꓪ ꓗꓪ ꓟ ꓐ, ꓐ ꓪꓴ‐ꓢ ꓡꓰ ꓬꓲ ꓮ ꓐꓲ ꓢꓲ ꓒ ꓬꓰ‐ꓢꓴ ꓔꓯ “ꓠꓴ ꓠꓬ ꓥꓪ ꓮ ꓘꓶ. ꓠꓲ, ꓠꓵˍ ꓟ ꓥꓪ ꓤ ꓥꓳ” ꓐꓰ ꓐꓯˍ ꓟ ꓐꓯ ꓘꓶꓽˍ ꓡꓰ ꓐꓰ꓾ ꓠꓬꓲ. ꓠꓬꓲ ꓣꓳ ꓖꓳ ꓓꓱꓽ ꓔꓲ, ꓟꓶ ꓔ ꓢꓴ ꓮ ꓙꓵꓽ ꓠꓬ ꓐ, ꓐ ꓬꓲ ꓤ ꓠꓱ ꓒꓬꓱꓼ ꓙꓰˍ ꓡꓳ꓿ ꓬꓲ ꓔꓯ ꓙꓵꓻ ꓢꓴ ꓬꓲ ꓔꓯ ꓠꓲ, ꓠꓵꓻ ꓢꓴ꓾ ꓬꓲ ꓔꓯ ꓘꓳ ꓣꓴ ꓢꓴ ꓠꓬ ꓚꓵ ꓚꓵ ꓬꓲ ꓤ ꓬꓲ ꓠꓱ ꓒꓬꓱꓼ ꓙꓰꓳ ꓐꓯˍ ꓟ ꓣꓳ ꓔꓯ ꓟꓳ. ꓖꓶ ꓡ ꓔꓬ ꓡꓳ꓿
