ꓕꓲ ꓠꓬꓲ ꓙꓳˍ ꓕꓯ ꓕꓲ ꓦꓲꓸꓹ ꓫꓵꓽ ꓪꓴ ꓔꓯ ꓠ ꓡꓳ. ꓖꓶ ꓢꓴ ꓢꓷꓸ ꓠꓲ, ꓙꓳ ꓒ ꓕꓲ ꓣꓳ ꓔꓬ ꓡꓳ= ꓖꓳ ꓢꓷꓸ ꓠꓲꓹ ꓙꓳ ꓒ ꓠꓬ ꓕꓲ ꓦꓲꓸꓹ ꓞꓳ ꓗꓪ ꓦꓲꓸꓹ ꓢꓲꓽ ꓒ ꓐꓰ ꓦꓲꓸꓹ ꓢꓲ ꓟ ꓫꓵꓽ ꓪꓴ ꓔꓯ ꓠ ꓡꓳ. ꓖꓶ ꓢꓲ꓾ ꓡ ꓠꓹ ꓟ ꓗꓪ ꓫꓵꓽ ꓪꓴ ꓟꓽ ꓒꓬꓱꓼ ꓡ ꓠꓹ ꓟ ꓐꓱ ꓶ ꓐꓯ ꓟꓸ ꓖꓶ ꓓꓴ ꓬꓰˍ ꓡꓳ= ꓕꓲ ꓦꓲꓸꓹ ꓡ ꓞꓳ ꓠꓬꓲ: ꓫꓵ. ꓠꓬ ꓔꓳ, ꓜꓳꓽ ꓗꓷ ꓟ ꓫꓵꓽ ꓪꓴ ꓮ ꓙꓵꓽ ꓔꓯ ꓐꓯ ꓟꓸ ꓖꓶ ꓡꓳ=
ꓖꓳ ꓕꓯ ꓢꓷꓸ ꓠꓲꓹ ꓙꓳ ꓒ ꓠꓬ ꓤ ꓑ ꓤ ꓔꓯ ꓘꓴꓻ ꓢꓲ ꓕꓱ ꓡꓱ ꓐꓯˍ ꓡꓳ꓾ꓠꓴ ꓠꓬ ꓠꓴ ꓦꓲꓸꓹ ꓢꓲ ꓟ ꓟꓽ ꓙꓲꓻ ꓟ ꓚꓱꓹꓔꓯ ꓡꓰ ꓐꓯ ꓢꓲ꓾ ꓝꓴꓲ ꓓꓰ ꓡꓳ= ꓖꓳ ꓟ ꓪꓴꓸ ꓠꓬꓲ ꓠꓴ ꓦꓲꓸꓹ ꓢꓲ ꓟ ꓠꓯꓸꓹ ꓗꓪ ꓙꓳˍ ꓟ ꓙꓲꓻ ꓚꓱꓹ ꓟꓬꓱꓽ ꓬꓰˍ ꓟ ꓮ ꓙꓵꓹ ꓕꓳꓽ ꓶ ꓕꓱ ꓗꓪ ꓐꓳ ꓡꓯ ꓐꓰ ꓐꓯ ꓩꓴˍ ꓡꓳ=
ꓝꓮꓲ ꓕꓲ ꓧꓪ, ꓤ ꓟꓶ ꓤ ꓔꓯ ꓘꓴꓻ ꓢꓲ꓾ ꓠꓴ ꓥˍ ꓟꓲ ꓠꓴ ꓦꓲꓸꓹ ꓢꓲꓽ ꓒ ꓟꓽ ꓙꓲꓻ ꓟ ꓔꓯ ꓡꓰꓽ ꓐꓯ ꓔꓬ ꓢꓲ ꓝꓴꓲ. ꓓꓰ ꓔꓬ ꓡꓳ= ꓖꓳ ꓟ ꓪꓴꓸ ꓠꓬꓲ ꓠꓴ ꓦꓲꓸꓹ ꓢꓲꓽ ꓒ ꓠꓯꓸꓼ ꓗꓪ ꓙꓳˍ ꓟ ꓙꓲꓻ ꓚꓱꓹ ꓟꓬꓱꓽ ꓬꓰˍ ꓟ ꓮ ꓙꓵ ꓕꓳꓽ ꓶ ꓕꓱ ꓗꓪ ꓐꓳ ꓡꓯ ꓐꓰ ꓐꓯ ꓩꓴꓳ ꓡꓳ=
ꓟꓶꓼ ꓘꓶ ꓛꓲ ꓡ ꓕꓯ ꓦꓲꓸꓹ ꓢꓲꓽ ꓒ ꓠꓬ ꓕꓳꓽ ꓶ ꓕꓲ ꓒꓬꓽ ꓗꓪ ꓬꓲ ꓦꓲꓸꓹ ꓢꓲ ꓟ ꓦꓲꓸꓹ ꓘꓴꓽ ꓔꓯ ꓮ ꓡꓰ ꓢꓲꓽ ꓫꓬˍ ꓟ꓾ ꓤ ꓠꓱ ꓮ ꓡꓰ ꓡꓳꓸ ꓔ ꓟ꓾ ꓜ ꓮ ꓡꓰ ꓚꓬ. ꓔ ꓟ ꓙꓲꓻ ꓚꓱꓹ ꓮ ꓙꓵꓽ ꓔꓯ ꓐꓳˍ ꓡꓳ= ꓕꓱ ꓟ ꓡꓰ ꓐꓰ ꓦꓲꓸꓹ ꓢꓲ ꓟ ꓥ ꓟꓲ ꓦꓲꓸꓹ ꓢꓲꓽ ꓒ ꓙꓲˍ ꓟ ꓟꓬꓱꓽ ꓬꓰ ꓟ ꓮ ꓙꓵꓹ ꓔꓯ ꓕꓳꓽ ꓶ ꓗꓪ ꓐꓳ ꓢꓲ꓾ ꓫꓵꓽ ꓪꓴ ꓚꓱꓹ ꓔꓯ ꓠꓹ ꓡꓳ. ꓖꓶ ꓢꓴ ꓢꓷꓸ ꓠꓲꓹ ꓙꓳ ꓒ ꓔꓬ ꓗꓪ ꓙꓰˍ ꓡꓳ= ꓖꓳ ꓕꓲ ꓠꓬꓲ ꓗꓪ ꓐꓰ ꓦꓲꓸꓹ ꓢꓲꓽ ꓒ ꓦꓲꓸꓹ ꓢꓲ ꓟ ꓠꓬ ꓗꓹ ꓛꓲꓽ ꓛꓲꓽ ꓔꓬ ꓟꓶ ꓡꓰꓳ=
ꓕꓱ ꓚ ꓟꓲꓽ ꓔꓯ ꓣꓳ ꓡꓳꓸ ꓠꓬꓲˍ ꓕꓯ ꓕꓲ ꓦꓲꓸꓹ ꓡ ꓞꓳ ꓘꓴꓽ ꓗꓪ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓟ ꓗꓪ ꓙꓳˍ ꓟ ꓐꓯ ꓠꓲꓹ ꓫꓵˍ ꓟ ꓕꓱ ꓡꓱ ꓫꓵꓽ ꓔꓯ ꓟ ꓐꓯ ꓡꓯ ꓘꓳꓹ ꓟ ꓪꓴ. ꓠꓬꓲ ꓘꓳꓼ ꓮ ꓟꓬꓹ ꓟꓶ ꓫꓵ ꓡ ꓕꓯ ꓠꓲꓹ ꓟ ꓟꓽ ꓢꓻ ꓓꓴ ꓐꓯ ꓡꓯ ꓘꓳ ꓓꓴ ꓫꓵꓽ ꓪꓴ ꓒꓬꓱꓼ ꓡ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓕꓲ ꓦꓲꓸꓹ ꓘꓴꓽ ꓗꓪ ꓕꓲ ꓣꓳ ꓐꓰ ꓕꓲ ꓣꓳ ꓖꓼ ꓖꓶ ꓡꓯ ꓘꓳ꓾ ꓟꓽ ꓞꓲ ꓬꓰ ꓠꓲꓹ ꓫꓵˍ ꓟ ꓟꓬꓱꓽ ꓐꓰ ꓐꓯ ꓠꓲꓹ ꓫꓵˍ ꓟ ꓔꓯ ꓖꓪ ꓙꓱ ꓡꓯ ꓘꓳ꓾ ꓕꓲ ꓡꓱ ꓬꓰˍ ꓠꓬ ꓕꓲ ꓦꓲꓸꓹ ꓘꓴꓽ ꓗꓪ ꓫꓵꓽ ꓪꓴ ꓟꓽ ꓒꓬꓱꓼ ꓡ ꓠꓹ ꓟ ꓔꓯ ꓧꓪꓸ ꓡꓰ ꓓꓴ ꓬꓲ ꓚꓱꓹ ꓥ ꓡꓳ=
