ꓔꓯ‐ꓑ‐ꓬ ꓢꓶꓽ ꓙꓲꓻ ꓖꓴ ꓙꓳˍ ꓟ ꓚꓱ,

ꓣꓳ ꓟꓬ‐ꓟ ꓜꓽ ꓫꓵꓽ ꓪꓳꓽ ꓒꓬꓽ ꓑꓯ. ꓜꓽ ꓫꓳꓽ ꓜꓽˍ ꓕꓯ ꓔꓯ‐ꓑ‐ꓬ ꓢꓶꓽ ꓐꓰ ꓟ‐ꓙꓲ, ꓢꓶꓽ ꓔꓯ ꓧꓳꓽ ꓜꓽ ꓔꓬ ꓟ ꓥꓳ꓿ ꓔꓯ‐ꓑ‐ꓬ ꓢꓶꓽ ꓠꓬ ꓬꓲ ꓐꓵꓽ ꓫꓬꓺˍ ꓟ (ꓛꓱꓽ ꓠꓱ ꓗ, ꓛꓲꓽˍ ꓟ) ꓑꓶ. ꓓꓴ ꓪꓳꓽ ꓒꓬꓽ ꓬꓲ ꓐꓵꓽ ꓔꓯ ꓥ ꓟꓲ ꓖꓳ ꓟꓬ ꓟꓽ ꓛꓱꓽ ꓠꓱ ꓝꓲ ꓟ ꓥ ꓡꓳ꓿ ꓠꓲ, ꓶˍ ꓟ ꓜꓽ ꓫꓵꓽ ꓜꓽ ꓗꓷ ꓕꓯ꓾ ꓪꓴ. ꓟꓶ ꓟꓶ ꓡ ꓕꓯ ꓔꓯ‐ꓑ‐ꓬ ꓬꓲꓻ ꓔꓯ ꓓꓳꓻ ꓗꓷ ꓠꓬ ꓪꓴ. ꓓꓵ ꓔꓯ ꓫꓬꓽ ꓡꓰ ꓝꓲ ꓐ ꓡˍ ꓡꓳ꓿ ꓗ, ꓘꓶꓽ ꓓꓳ ꓙꓰˍ ꓕꓯ ꓥ ꓟꓲ ꓟꓳ‐ꓓꓳ ꓬꓲꓼ ꓡ ꓕꓯ ꓔꓯ‐ꓑ‐ꓬ ꓢꓶꓽ ꓬꓲ ꓐꓵ ꓠꓱꓽ ꓗꓷ ꓠꓬ ꓔꓬ ꓢꓻ ꓡꓰˍ ꓡꓳ꓿ ꓕꓱ ꓡꓱ ꓣꓱꓽ ꓬꓯꓼ ꓖꓴ ꓮ ꓟꓬ, ꓙꓳˍ ꓟ ꓔꓯ‐ꓑ‐ꓬ ꓢꓶꓽ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓮ ꓡꓲ ꓕꓲ ꓒꓳ, ꓗꓪ ꓐꓰ ꓙꓲꓻ ꓖꓴ ꓖꓶ ꓔꓬ ꓡ꓾ ꓐꓯ ꓟ ꓔꓯ ꓠ ꓡꓳ. ꓓꓴ ꓬꓰ ꓡꓯ꓿

ꓔꓯ‐ꓑ‐ꓬ ꓢꓶꓽ ꓠꓬ ꓦꓲꓔꓮꓟꓲꓠ ꓚ ꓮ ꓟꓬ, ꓓꓵˍ ꓟ ꓢꓲ, ꓢꓶꓽ ꓕꓲ ꓙꓰꓽ ꓥ ꓡꓳ꓿ ꓝꓲꓐꓰꓣ ꓢꓯꓼ ꓐꓰ ꓚꓮꓡꓚꓲꓴꓟ꓾ ꓲꓣꓳꓠ ꓢꓯꓼ꓾ ꓑꓳꓔꓮꓢꓢꓲꓴꓟ꓾ ꓚꓳꓑꓑꓰꓣ꓾ ꓟꓮꓖꓠꓰꓢꓲꓴꓟ ꓕꓱ ꓡꓱ ꓫꓵꓽ ꓟꓲꓠꓰꓣꓮꓡꓢ ꓢꓯꓼ ꓮ ꓟꓬ, ꓓꓵˍ ꓟ ꓡꓰꓽ ꓟꓽ ꓞꓲ ꓬꓲ ꓗꓴ, ꓙꓲꓻ ꓗꓪˍ ꓟꓲ ꓑꓳꓡꓬꓑꓧꓰꓠꓳꓡ ꓐꓰ ꓔꓰꓣꓑꓰꓠꓰ ꓐꓴˍ ꓡꓰ ꓐꓰ ꓑꓧꓬꓔꓳꓚꓧꓰꓟꓲꓚꓮꓡ ꓢꓯꓼ ꓙꓳˍ ꓟ ꓥ ꓡꓳ꓿

ꓔꓯ‐ꓑ‐ꓬ ꓢꓶꓽ ꓬꓲ ꓙꓲꓻ ꓖꓴ ꓐꓴ ꓠꓬ꓾

ꓖꓳ ꓓꓱꓽ ꓗꓪ ꓦꓲꓔꓮꓟꓲꓠ ꓚ ꓬꓲ ꓢꓯꓼ ꓠꓲ.ˍ ꓟ ꓑꓶ. ꓓꓴ ꓒꓬꓱꓼ ꓡ ꓟ ꓢꓚꓴꓣꓦꓬ ꓠꓻ ꓔꓯ ꓓꓻ ꓡꓰ ꓝꓲ ꓐ ꓡˍ ꓡꓳ꓿

ꓝꓮꓲ ꓧꓪꓽ ꓗꓴ, ꓙꓲꓻ ꓐꓱ ꓶ ꓥˍ ꓟꓲ ꓮ ꓘꓶ. ꓙꓲˍ ꓟ ꓥ ꓡꓳ꓾

ꓔꓯ‐ꓑ‐ꓬ ꓢꓶꓽ ꓔꓯ ꓬꓲ ꓬꓲꓻ ꓫꓬ, ꓢꓲ ꓓꓳꓻ ꓐ ꓡˍ ꓟ ꓡꓰꓽ ꓟꓽ ꓞꓲꓻ ꓧꓪꓽ ꓗꓴ, ꓙꓲ ꓐꓱ ꓶ ꓥˍ ꓟꓲ ꓮ ꓟꓬ, ꓚꓱ, ꓣꓱꓽ ꓐ ꓡˍ ꓟ ꓥ ꓡꓳ꓿ ꓦꓲꓔꓮꓟꓲꓠ ꓚ ꓑꓶ. ꓓꓴ ꓧꓪꓽ ꓗꓴ, ꓙꓲ ꓔꓯ ꓬꓲ ꓫꓵꓼ ꓗꓷ ꓡꓰ ꓝꓲ ꓢꓲ ꓠꓻ ꓚꓲ. ꓡˍ ꓟ ꓗꓪ ꓐꓰ ꓗꓽ ꓕ. ꓙ ꓖꓶˍ ꓡꓳ꓿ ꓖꓳ ꓓꓱꓽ ꓚꓵ, ꓬꓲꓻ ꓬꓲ ꓐꓵꓽ ꓛꓱꓽ ꓠꓱˍ ꓟ ꓔꓯ ꓥˍ ꓟꓲ ꓓꓻ ꓡꓰ ꓝꓲˍ ꓡꓳ꓿ ꓔꓯ‐ꓑ‐ꓬ ꓢꓶꓽ ꓗꓪ ꓮꓠꓔꓲꓳꓫꓲꓓꓮꓠꓔ ꓐꓰ ꓐꓶꓽ ꓓꓲ ꓢꓰꓼ ꓐ ꓡˍ ꓟ ꓬꓲ ꓢꓯꓼ ꓙꓳˍ ꓟ ꓑꓶ. ꓓꓴ ꓧꓪꓽ ꓗꓴ, ꓙꓲ ꓗꓪ ꓣꓱꓽˍ ꓕꓯ ꓧꓪꓽ ꓗꓴ, ꓙꓲꓻ ꓚꓰꓡꓡ ꓬꓲ ꓫꓵꓻ ꓔꓯ ꓞ, ꓦˍ ꓟ ꓗꓪ ꓮ ꓘꓶ. ꓙꓲꓻˍ ꓟ ꓥ ꓡꓳ꓿

ꓜꓽ ꓓꓴ ꓙꓲꓺ ꓐ ꓡ ꓡꓳ꓾

ꓔꓯ‐ꓑ‐ꓬ ꓢꓶꓽ ꓠꓬ ꓟꓷꓽ ꓠꓷ, ꓘꓴꓽ ꓗꓪ ꓟꓶꓽ ꓶ ꓪ ꓜꓲ ꓓꓳꓻ ꓡ ꓝꓲ ꓐ ꓡˍ ꓟ ꓪꓴ. ꓠꓬꓲ ꓜꓽ ꓓꓴ ꓙꓲꓺˍ ꓟ ꓗꓪ ꓬꓰ ꓙ ꓔꓳ, ꓙ ꓖꓶˍ ꓡꓳ꓿ ꓔꓯ‐ꓑ‐ꓬ ꓢꓶꓽ ꓗꓪ ꓓꓵˍ ꓟ ꓮꓚꓲꓓ ꓢꓯꓼ ꓐꓰ ꓝꓡꓮꓦꓳꓠꓳꓲꓓꓢ ꓢꓯꓼ ꓑꓶ. ꓓꓴ ꓜꓽ ꓓꓴ ꓙꓲꓺˍ ꓟ ꓔꓯ ꓡꓵ, ꓫꓴ ꓖꓶ ꓢꓲ꓾ ꓦꓰꓼ ꓟ ꓙꓲꓺ ꓖꓶˍ ꓟ ꓮꓚꓲꓓ ꓔꓯ ꓪ ꓜꓲ ꓓꓳ ꓡ ꓝꓲˍ ꓡꓳ꓿

ꓖꓳ ꓓꓱꓽ ꓦꓯ. ꓡꓰ ꓠ ꓝꓱ ꓡꓰ ꓠ ꓬꓰ ꓙ ꓖꓶˍ ꓡꓳ꓾

ꓔꓯ‐ꓑ‐ꓬ ꓕꓲ ꓢꓶꓽ ꓧꓳꓽ ꓔ ꓟ ꓬꓲꓻ ꓡꓱ ꓕꓲ ꓗꓶ. ꓠꓬ ꓖꓳ ꓓꓱꓽ ꓦꓯ. ꓡꓰ ꓠ ꓝꓱ ꓡꓰ ꓠ ꓬꓰˍ ꓟ ꓗꓪ ꓮ ꓘꓶ. ꓙꓲꓻˍ ꓟ ꓕꓲ ꓚꓱ, ꓥ ꓟ ꓡꓰ ꓐꓰ꓾ ꓪꓴ. ꓓꓵ ꓫꓬꓽ ꓡꓰ ꓝꓲˍ ꓟ ꓓꓳꓻ ꓓꓴ ꓕꓲ ꓙꓰꓽˍ ꓟꓲ ꓥ ꓡꓳ꓿ ꓕꓲ ꓠꓬꓲ ꓗꓪ ꓠꓬꓲꓽ ꓗꓶ. ꓓꓳꓻ ꓖꓶˍ ꓠꓬ ꓕꓲ ꓠꓽ ꓘꓴꓽ ꓠꓯꓸꓼ ꓗꓪ ꓢꓷ. ꓓꓻ ꓓꓻ ꓡꓰ ꓦꓯ. ꓡ ꓝꓱ ꓡˍ ꓥꓳ꓾ ꓐꓰ ꓐꓯ ꓡꓳ꓿

ꓢꓰ,‐ꓛꓬꓳ ꓔꓪꓰ,‐ꓛꓬꓳ ꓠꓻ ꓔꓯ ꓓꓻ ꓡꓰ ꓝꓲˍ ꓡꓳ꓾

ꓔꓯ‐ꓑ‐ꓬ ꓡꓰ ꓐꓰ ꓚꓱ,ˍ ꓟ ꓢꓲ, ꓢꓶꓽ ꓐꓴ ꓠꓬ ꓢꓰ,‐ꓛꓬꓳ ꓔꓪꓰ,‐ꓛꓬꓳ ꓠꓻ ꓙꓳ ꓢꓴ ꓐꓴ ꓐꓱ ꓶ ꓮ ꓘꓶ. ꓙꓲꓻˍ ꓟ ꓢꓲ, ꓢꓶꓽ ꓥ ꓡꓳ ꓐꓰ ꓮ‐ꓟꓰ‐ꓣꓲ‐ꓗ ꓢꓰ,‐ꓛꓬꓳ ꓔꓪꓰ,‐ꓛꓬꓳ ꓠꓻ ꓔꓯ ꓟꓳ. ꓬꓲ ꓜꓴ ꓡꓰ ꓐꓯ ꓡꓳ꓿ ꓝꓲꓐꓰꓣ ꓢꓯꓼ ꓮ ꓟꓬ, ꓓꓵˍ ꓟ ꓑꓶ. ꓓꓴ ꓖꓳ ꓓꓱꓽ ꓗꓪ ꓐꓰ ꓞꓼ ꓛꓵꓻ ꓢꓯꓼ ꓛꓵꓼ ꓣꓴˍ ꓟ ꓔꓯ ꓔꓲ ꓟꓴ. ꓗꓷ ꓡꓰ ꓝꓲ ꓢꓲ ꓠꓬꓲ ꓫꓵꓽ ꓘꓴꓽ ꓗꓪ ꓞꓼ ꓛꓵꓻ ꓢꓯꓼ ꓮ ꓘꓶ. ꓟꓽ ꓟꓴ ꓡꓰ ꓠ꓾ ꓮ ꓘꓶ. ꓟꓽ ꓬꓯꓼ ꓡꓰ ꓠ ꓬꓰ ꓙ ꓖꓶˍ ꓡꓳ꓿

ꓠꓲ, ꓟ ꓠꓻ ꓐꓱ ꓶ ꓥˍ ꓟꓲ ꓙꓲꓻˍ ꓟ ꓥ ꓡꓳ꓾

ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵꓻ ꓢꓯꓼ ꓔꓯ ꓔꓲ ꓟꓴ. ꓗꓷ ꓡꓰ ꓝꓲ ꓐ ꓡˍ ꓟ ꓝꓲꓐꓰꓣ ꓢꓯꓼ ꓪꓴ. ꓠꓬꓲ ꓫꓵꓼ ꓢꓯꓼ ꓔꓯ ꓥˍ ꓟꓲ ꓬꓯꓼ ꓡꓰ ꓝꓲ ꓢꓲ ꓗꓳ‐ꓡꓯ.‐ꓢ‐ꓕ‐ꓣꓮꓪ ꓐꓴ ꓔꓯ ꓣꓴ ꓦ ꓖꓶ ꓐ ꓡˍ ꓡꓳ꓿ ꓖꓳ ꓟ ꓡꓰꓽ ꓟꓽ ꓞꓲ ꓫꓵꓽ ꓙꓴꓽ ꓳʼˍ ꓟ ꓔꓯ ꓥˍ ꓟꓲ ꓠꓲ. ꓡꓰ ꓝꓲˍ ꓟ ꓑꓶ. ꓓꓴ ꓠꓲ, ꓟ ꓠꓻ꓾ ꓠꓲ, ꓟ ꓟꓬꓱꓽ ꓬꓰˍ ꓟ ꓞꓼ ꓠꓽ ꓡꓰˍ ꓟ ꓔꓯ ꓗꓽ ꓕ. ꓙ ꓖꓶˍ ꓡꓳ꓿

ꓬꓲ ꓝꓲ. ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓟ꓾

ꓬꓲ ꓝꓲ. ꓬꓲ ꓟꓲ ꓠꓻ ꓡꓰ ꓝꓲˍ ꓟ ꓬꓲ ꓚꓱ, ꓘꓴꓽ ꓠꓯꓸꓼ ꓗꓪ ꓕꓲ ꓟ ꓠꓬ ꓖꓳ ꓓꓱꓽ ꓗꓪ ꓴꓣꓲꓚ ꓮꓚꓲꓓ ꓮ ꓘꓶ. ꓟꓬꓽˍ ꓟ ꓪꓴ. ꓠꓬꓲ ꓥ ꓡꓳ꓿ ꓴꓣꓲꓚ ꓮꓚꓲꓓ ꓐꓯ ꓟ ꓠꓬ ꓖꓳ ꓓꓱꓽ ꓘꓴꓽ ꓠꓯꓸꓼ ꓗꓪ ꓚꓳ. ꓤꓲꓽ ꓐꓰ ꓕꓲ ꓡꓰ, ꓣꓴ ꓓꓳ ꓦ ꓠꓯ, ꓟ ꓥ ꓡꓳ꓿ ꓔꓯ‐ꓑ‐ꓬ ꓢꓶꓽ ꓗꓪ ꓟ ꓚꓲꓣꓲꓔꓚ ꓮꓚꓲꓓ ꓠꓬ ꓴꓣꓲꓚ ꓮꓚꓲꓓ ꓔꓯ ꓙꓲꓺ ꓡꓰ ꓝꓲˍ ꓟ ꓥ ꓢꓲ ꓠꓬꓲ ꓴꓣꓲꓚ ꓮꓚꓲꓓ ꓔꓯ ꓤꓲ ꓐꓰ ꓕꓲ ꓛꓳˍ ꓓꓳꓺ ꓙꓰ ꓝꓲˍ ꓡꓳ꓿

ꓟꓬ ꓢꓶꓽ ꓐꓱ ꓶ ꓥˍ ꓟꓲ ꓙꓲꓻˍ ꓡꓳ꓾

ꓦꓲꓔꓮꓟꓲꓠ ꓚ ꓙꓳˍ ꓟ ꓑꓶ. ꓓꓴ ꓟꓬ ꓢꓶꓽ ꓠꓯꓼ ꓠꓯꓼ ꓶꓻ ꓡꓰˍ ꓟ ꓔꓯ ꓗꓽ ꓕ. ꓙ ꓖꓶ ꓐ ꓡˍ ꓡꓳ꓿

ꓛꓴꓻ ꓢꓯꓼ ꓬꓯꓼ ꓡꓰ ꓝꓲˍ ꓟ꓾

ꓖꓳ ꓓꓱꓽ ꓛꓴꓻ ꓔꓬ ꓢꓴ ꓕꓲ ꓣꓳ ꓐꓱ ꓶ ꓔꓯ‐ꓑ‐ꓬ ꓬꓲꓻ ꓠꓬ ꓮ ꓘꓶ. ꓙꓲꓻˍ ꓡꓳ꓾ ꓐꓰ ꓢꓷ. ꓪ ꓡꓳ꓿ ꓬꓲ ꓬꓲꓻ ꓮ ꓟꓬ, ꓓꓵˍ ꓟ ꓢꓲ, ꓢꓶꓽ ꓐꓴ ꓠꓬ ꓟꓬꓽ ꓠꓬꓲ ꓛꓴꓻ ꓢꓯꓼ ꓬꓯꓼ ꓡꓰ ꓝꓲˍ ꓟ ꓬꓲ ꓢꓯꓼ ꓦꓲꓔꓮꓟꓲꓠ ꓚ ꓮ ꓟꓬ, ꓓꓵˍ ꓟ ꓑꓶ. ꓓꓴ ꓖꓳ ꓓꓱꓽ ꓛꓴꓻˍ ꓟ ꓔꓯ ꓓꓻ ꓡꓰ ꓝꓲˍ ꓟ ꓥ ꓡꓳ꓿

ꓤꓲ ꓚꓱ, ꓗꓪ ꓙꓳˍ ꓟ ꓠꓻ ꓐꓴ ꓔꓯ ꓓꓻ ꓡꓰ ꓝꓲˍ ꓡꓳ꓾

ꓑꓳꓔꓮꓢꓢꓲꓴꓟ ꓮ ꓟꓬ, ꓓꓵˍ ꓟ ꓪꓴ. ꓠꓬꓲ ꓪꓳꓽ ꓓꓲꓻ ꓐꓰ ꓤꓲꓽ ꓒꓴꓽ ꓘꓴꓽ ꓠꓯꓸꓼ ꓗꓪ ꓡꓳꓽ ꓔꓬ ꓟ ꓬꓲ ꓓꓳꓼ ꓐꓴ ꓔꓯ ꓣꓴ ꓦˍ ꓟ ꓗꓪ ꓬꓰ ꓙ ꓖꓶ ꓐ ꓡˍ ꓡꓳ꓿ ꓠꓻ ꓐꓶ ꓓꓲꓻ ꓐꓴ ꓔꓯ ꓫꓵꓻ ꓝꓲˍ ꓟ ꓬꓲ ꓢꓯꓼ ꓓꓵˍ ꓟ ꓪꓴ. ꓠꓬꓲ ꓤꓲꓽ ꓚꓱ, ꓗꓪ ꓐꓶ ꓓꓲꓻ ꓓꓵꓽ ꓡꓰˍ ꓟ ꓔꓯ ꓥˍ ꓟꓲ ꓫꓬ, ꓖꓶ ꓐ ꓡˍ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓤ ꓑ. ꓤ ꓐꓴ ꓗꓪ ꓟꓬꓽ ꓠꓬꓲ ꓒꓬꓱꓼ ꓡˍ ꓟ ꓤꓲꓽ ꓒꓴꓽ ꓠꓻ ꓘꓴ. ꓒꓬꓱꓼ ꓡˍ ꓟ ꓔꓯ ꓗꓽ ꓕ. ꓙ ꓖꓶ ꓢꓲ ꓤꓲꓽ ꓚꓱ, ꓠꓯꓸꓼ ꓗꓪ ꓚꓮꓡꓚꓲꓴꓟ ꓡꓳꓽ ꓔꓬ ꓟ ꓪꓴ. ꓠꓬꓲ ꓬꓲ ꓚꓱ, ꓛꓵꓽ ꓡꓰ ꓟ ꓔꓯ ꓫꓬꓽ ꓡꓰ ꓝꓲˍ ꓡꓳ꓿

ꓮ ꓡꓲ ꓫꓵꓽ ꓥˍ ꓟꓲ ꓡꓳꓼ ꓠ ꓛꓲˍ ꓡꓰꓽ ꓣꓱꓽˍ ꓠꓬ ꓠꓯꓻ ꓞꓲꓼ ꓒꓬꓱꓼ ꓡꓰˍ ꓥ ꓟꓲ꓾ ꓣꓱꓽ ꓟꓬꓽ ꓡꓰ ꓕꓯ ꓠꓽ ꓖꓳ ꓓꓱꓽ ꓗꓪ ꓟꓽ ꓙꓲꓻ ꓗꓷ ꓡꓰ ꓝꓲˍ ꓟ ꓪꓴ. ꓠꓬꓲ꓾ ꓔꓯ‐ꓑ‐ꓬ ꓬꓲꓻ ꓠꓬ ꓖꓳ ꓓꓱꓽ ꓐꓱ ꓶ ꓮ ꓘꓶ. ꓙꓲꓻˍ ꓡꓳ ꓐꓯ ꓥ ꓟꓲ ꓓꓳꓻ ꓟꓬꓽ ꓡꓰ ꓠꓬ꓾ ꓢꓶꓽ ꓛꓲ ꓐꓬ ꓡꓰˍ ꓟ꓾ ꓜꓽ ꓓꓴ ꓙꓲꓺ ꓚꓱ, ꓔꓯ ꓠꓻ ꓡꓰ ꓝꓲˍ ꓟ ꓕꓱ ꓡꓱ ꓫꓵꓽ ꓒꓬꓱꓼ ꓡ ꓝꓲˍ ꓡꓳ꓿ ꓔꓯ‐ꓑ‐ꓬ ꓬꓲꓻ ꓗꓪ ꓙꓳˍ ꓟ ꓮꓚꓲꓓ ꓬꓲ ꓢꓯꓼ ꓠꓬ ꓦꓰꓼ ꓟ ꓐꓰ ꓬꓲ ꓪꓴꓻ ꓚꓱ, ꓗꓪ ꓠꓻ ꓡꓰ ꓝꓲˍ ꓡꓳ꓿ ꓔꓯ‐ꓑ‐ꓬ ꓬꓲꓻ ꓓꓳꓻ ꓗꓷˍ ꓕ ꓑꓳꓸꓼ ꓟꓷꓽ ꓠꓷ, ꓔꓯ ꓬꓲꓻ ꓙꓬ ꓡꓰ ꓡꓯ, ꓖꓶ ꓠ ꓔ ꓟ ꓥ ꓡꓳ꓿ ꓝꓮꓲ ꓔꓯ‐ꓑ‐ꓬ ꓬꓲꓻ ꓓꓳꓻ ꓗꓷ ꓗ ꓠꓯ. ꓫꓵꓽ ꓫꓵ ꓕꓲ ꓙꓵ, ꓘꓴꓽ ꓠꓯꓸꓼ ꓗꓪ ꓢꓶꓽ ꓛꓲ ꓞꓲꓽˍ ꓟ ꓔꓯ ꓥˍ ꓟꓲ ꓤ ꓟꓳ ꓠ ꓔ ꓡꓳ꓾ ꓐꓰ ꓢꓶꓽ ꓛꓲ ꓔꓯ ꓟꓳ. ꓠꓯꓻ ꓞꓲꓼ ꓟ. ꓒ ꓐꓴ ꓡꓰ ꓐꓯ ꓔ ꓡꓳ꓿

ꓮ ꓟꓶ ꓐꓯ ꓟꓳ. ꓖꓶ ꓗꓷ ꓟ ꓔꓯ‐ꓑ‐ꓬ ꓬꓲꓻ ꓙꓲꓻ ꓖꓴ ꓙꓳˍ ꓟ ꓚꓱ, ꓔꓯ ꓠꓬ ꓧꓰꓡꓡꓳ ꓢꓮꓬꓮꓣꓪꓴꓠ ꓪꓰꓐꓢꓲꓔꓰ ꓗꓪ ꓐꓯ ꓖꓶ ꓔ ꓟ ꓚꓱ, ꓗꓪ ꓐꓰ ꓠ ꓠ, ꓢꓴ ꓐꓴ ꓐꓱ ꓶ ꓟꓬꓽ ꓠꓬꓲ ꓙꓲꓻˍ ꓟ ꓔꓯ ꓣꓴ ꓢꓲ ꓣꓦꓮ ꓡꓲ‐ꓢꓴ ꓗꓪ ꓚꓳ. ꓐꓯ ꓟ. ꓖꓶ ꓩꓴ ꓡ ꓟ ꓥ ꓡꓳ꓿ ꓮ ꓙꓵꓽ ꓢꓴ ꓗ, ꓛꓲꓽ ꓔꓬ, ꓢꓻˍ ꓟ ꓤꓶꓻ ꓔꓯ ꓘꓳ ꓣꓴ ꓟꓶ ꓝꓲ꓿ ꓧꓪ. ꓧꓪ. ꓔꓬ,꓿