ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓚꓲ. ꓛꓬ ꓐꓱ ꓶ ꓢꓲ ꓡꓲˍ ꓟ ꓙꓵ, ꓔꓯ ꓧꓪ ꓢꓲ ꓠꓬꓲ꓾ ꓚꓲ. ꓛꓬ ꓦꓻ ꓐꓱ ꓶ ꓓꓵꓽ ꓙ ꓫꓪ. ꓠꓬꓲ ꓠ ꓔ ꓡꓳ꓿ “ꓥꓪ ꓔꓯ ꓠꓬ ꓮ ꓡꓲ ꓫꓵꓽ ꓙꓲꓻˍ ꓟ꓾ ꓮ ꓡꓲꓽ ꓫꓵꓽ ꓟꓽ ꓙꓲꓻ ꓟ ꓙꓳˍ ꓡ? ꓪꓴ‐ꓢ ꓬꓲ ꓙꓲꓻˍ ꓟ ꓔꓯ ꓥꓪ ꓠꓬ ꓮ ꓡꓲ ꓟꓬ ꓛꓲ ꓢꓷ. ꓢꓲ꓾ ꓖꓳ ꓟ ꓔꓯ ꓢꓷ. ꓙ ꓟꓳ ꓙ ꓗꓷ ꓡ? ꓐꓯˍ ꓟ ꓔꓯ ꓓꓵꓽ ꓙꓽ ꓠꓬꓲˍ ꓟ ꓬꓲ ꓙꓵ, ꓖꓶ ꓠ ꓔ ꓡꓳ꓿
ꓚꓲ. ꓛꓬ ꓐꓱ ꓶ ꓢꓲ ꓡꓲˍ ꓟ ꓬꓲ ꓙꓵ, ꓔꓯ ꓟꓽ ꓧꓪ ꓠꓬ꓾ ꓣꓳꓽ ꓶꓼ ꓟꓬ꓾ ꓣꓳ ꓖꓳ ꓓꓱꓽ ꓠꓬ ꓮ ꓡꓲ ꓥˍ ꓟꓲ ꓢꓲ ꓡꓲ ꓟ ꓟꓽ ꓟꓶ꓿ ꓪꓴ‐ꓢ ꓬꓲ ꓣꓱꓽ ꓛꓰꓽ ꓔꓯ ꓥˍ ꓟꓲ ꓟꓳꓻ ꓟꓽ ꓐ ꓡꓺꓳ꓿ ꓕꓱ ꓟ ꓔꓯ ꓠꓴ ꓐꓰ ꓥꓪ ꓠꓬ ꓢꓷ. ꓠ ꓔ ꓟ ꓥ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ (ꓡꓴ‐ꓘ꓿1ꓽ67‐79) ꓗꓪ ꓢ‐ꓚꓬ‐ꓡꓲ‐ꓬ ꓠꓬ ꓦ ꓐ (9) ꓟ ꓡꓱꓸꓼ ꓫ. ꓕꓱ ꓟꓽ ꓐꓰꓼ ꓡ ꓢꓲ꓾ ꓢꓲ ꓡꓲˍ ꓟ ꓙꓳ ꓙꓳˍ ꓡꓰꓽ ꓔꓬ ꓗꓷꓳ꓿ ꓦ ꓐ (9) ꓟ ꓡꓱꓸꓼ ꓢꓲ ꓡꓲ ꓐꓰ ꓔꓬ ꓪˍ ꓟ ꓑꓶ. ꓓꓴ꓾ ꓦꓬꓼ ꓠꓬꓲ ꓖꓳ ꓟ ꓗꓪ ꓬꓲ ꓠꓬ꓾ ꓪꓴ‐ꓢ ꓬꓲ ꓙꓲꓻˍ ꓟ꓾ ꓪꓴ‐ꓢ ꓬꓲ ꓙ ꓟꓳ ꓘꓶꓽ ꓐꓴ ꓔꓯ ꓜꓳꓽ ꓜꓳꓽ ꓓꓵꓽ ꓙꓽ ꓠꓬꓲ ꓐ ꓡ ꓗꓷꓳ꓿ ꓖꓳ ꓟ ꓪꓴ. ꓠꓬꓲ ꓬꓲ ꓫ. ꓕꓱ ꓐꓰꓼ ꓡˍ ꓕꓯ ꓪꓴ‐ꓢ ꓬꓲ ꓣꓱꓽ ꓛꓰꓽ ꓔꓯ ꓫꓱ. ꓖꓶˍ ꓡꓳ꓿ ꓓꓳ ꓟꓴˍ ꓡꓳ꓿ ꓪꓴ‐ꓢ ꓔꓯ ꓥˍ ꓟꓲ ꓕꓲ ꓠꓬꓲ ꓕꓲ ꓒꓳ, ꓟꓬꓽ ꓠꓬꓲ ꓠꓲ, ꓠꓵ ꓐ ꓡ ꓗꓷꓳ꓿
ꓣꓳꓽ ꓐꓴ ꓥˍ ꓟꓲ ꓕꓲ ꓠꓬꓲ ꓡꓱꓸꓼ ꓟꓬꓱꓽ ꓚꓰꓽ ꓔꓬ ꓟ ꓟꓽ ꓬꓰ ꓬꓰ꓾ ꓟꓬꓱꓽ ꓟꓬꓽ ꓔꓬ ꓟ ꓟꓽ ꓬꓰ ꓬꓰ꓾ ꓪꓴ‐ꓢ ꓣꓱꓽ ꓛꓰꓽ ꓔꓯ ꓫꓱ. ꓖꓶ ꓓꓳ ꓟꓴ, ꓐ ꓡ ꓠ, ꓟ ꓐꓱ ꓶ ꓢꓲ ꓡꓲˍ ꓟ ꓬꓲ ꓙꓵ, ꓔꓯ ꓧꓪ ꓢꓲ꓾ ꓪꓴ‐ꓢ ꓔꓯ ꓓꓵꓽ ꓙ ꓟꓶ ꓡꓯ꓿ ꓪꓴ‐ꓢ ꓐꓱ ꓶ ꓬꓲ ꓙꓵ, ꓖꓶ ꓐ ꓡ ꓠ, ꓟ ꓢꓯꓼ ꓕꓵꓼ ꓙꓰ ꓡꓰ꓿ ꓪꓴ‐ꓢ ꓬꓲ ꓙꓲꓻ ꓔꓱ,ˍ ꓟ ꓔꓯ ꓮ ꓕꓯꓽ ꓟꓲ ꓓꓵꓽ ꓙ ꓠꓬꓲ ꓢꓲ ꓞꓳ ꓙꓳ ꓢꓯ. ꓔꓬ ꓓꓴ ꓬꓰ ꓡꓯ꓿
