1997 ꓘꓳꓼ ꓕꓯ ꓟꓲ ꓠꓯ ꓕꓱ ꓟ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓻ ꓡ ꓟ ꓚꓱꓹ ꓔꓯ ꓟꓳꓸ ꓖꓪ ꓙꓱꓻ ꓠꓹ ꓟ ꓐꓱ ꓶ ꓙꓮꓑꓮꓠ ꓗꓴꓷꓼ ꓔꓳꓗꓬꓳ ꓗꓪ ꓖꓪ ꓙꓱꓻ ꓜꓲꓼ ꓓꓴ ꓓꓽ ꓟ ꓬꓰ ꓗꓷꓳ= ꓖꓳ ꓕꓲ ꓙꓵꓹ ꓮꓟꓰꓣꓲꓚꓮ ꓗꓴꓷꓼ ꓠꓬ ꓙꓼ ꓶꓻ ꓤ ꓐꓰ ꓢꓯꓼ ꓟꓴˍ ꓟ ꓬꓲꓸ ꓜꓴ ꓬꓲꓸ ꓟꓯꓼ ꓚꓮꓣꓐꓳꓠ ꓚꓡꓴꓐ ꓐꓯ ꓢꓲ ꓬꓲꓸ ꓜꓴ ꓔꓶꓻ ꓔ ꓟ ꓥꓳ= ꓖꓳ ꓕꓲ ꓜꓴ ꓠꓬ ꓟꓲꓽ ꓦꓲꓻ ꓔꓯ ꓟꓽ ꓢꓲ ꓟꓽ ꓫꓬ ꓗꓷ ꓡꓰ ꓝꓲˍ ꓟ꓾ ꓕꓱ ꓡꓱ ꓫꓵꓽ ꓔꓯ ꓞꓳ ꓤ ꓮ ꓙꓵꓽ ꓠꓬ ꓟꓶꓽ ꓡꓰ ꓠ꓾ ꓟꓽ ꓙꓳ ꓡꓰ ꓠ ꓢꓯꓼ ꓕꓵꓼˍ ꓟ ꓔꓯ ꓬꓲ ꓪ ꓠꓬ ꓟꓽ ꓠꓲꓹ ꓫꓵ꓿ ꓮ ꓡꓲꓳ ꓐꓯ ꓠꓬ ꓬꓲꓸ ꓪ ꓠꓬ ꓙꓼ ꓶꓻ ꓤ ꓮ ꓟꓬꓹ ꓣꓱꓽ ꓔꓬ ꓟ ꓪꓴꓸ ꓠꓬꓲ ꓥ ꓡꓳ=
ꓖꓳ ꓟ ꓑꓶ. ꓓꓴ ꓙꓼ ꓶꓻ ꓤ ꓣꓱꓽ ꓢꓲ ꓟꓴꓽ ꓘꓴ ꓮ ꓟꓬꓹ ꓓꓳꓺ ꓡ ꓢꓲ꓾ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓝꓲˍ ꓟ ꓕꓱ ꓡꓱ ꓫꓵꓽ ꓬꓰˍ ꓟ ꓔꓯ ꓠꓽ ꓡꓰ ꓠ ꓬꓰˍ ꓟ ꓕꓱ ꓟ ꓖꓪ ꓙꓱꓻ ꓞꓷꓹ ꓔ ꓟ ꓟꓽ ꓓꓳꓺ ꓡ ꓠꓹ ꓟ ꓐꓱ ꓶ ꓮ ꓘꓶꓸ ꓢꓯꓼ ꓕꓵꓼ ꓗꓷꓳ= ꓬꓲ ꓪ ꓠꓬ ꓞꓳ ꓤ ꓮ ꓟꓬꓹ ꓢꓷꓸ ꓡꓰ ꓠ ꓒꓴ ꓮ ꓟꓬꓹ ꓣꓱꓽ ꓢꓲ ꓠꓬꓲ ꓕꓱ ꓟ ꓙꓼ ꓶꓻ ꓤ ꓣꓱꓽ ꓢꓲ ꓟꓲꓽ ꓦꓲꓻ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓝꓲˍ ꓟ ꓕꓱ ꓟ ꓔꓯ ꓦꓽ ꓡꓰ ꓝꓲˍ ꓠꓬ ꓞꓳ ꓤ ꓮ ꓟꓬꓹ ꓠꓬ ꓫꓸ ꓓꓴ ꓔꓳꓹ ꓜꓳꓽ ꓡ ꓥꓳ꓾ ꓐꓰ ꓕꓱ ꓡꓱ ꓐꓯˍ ꓡꓳ=
ꓕꓱ ꓡꓱ ꓐꓯ ꓢꓴ ꓐꓴ ꓠꓬ ꓮꓟꓰꓣꓲꓚꓮ ꓗꓪ ꓐꓰ ꓰꓢꓢꓳ ꓐꓯ ꓟ ꓟꓳ-ꓓꓳ ꓫꓬꓹ ꓔ ꓟ ꓚꓳꓟꓑꓮꓠꓬ ꓐꓴ ꓡꓰꓽ ꓟꓽ ꓞꓲ ꓢ-ꓔꓲ꓾ ꓮ-ꓡꓴ-ꓟꓲ-ꓠꓲ-ꓬ꓾ ꓡꓯꓹ꓾ ꓖꓳ ꓟ ꓡꓰꓽ ꓟꓽ ꓞꓲ ꓮ ꓔꓳꓸ ꓪ ꓠꓹ ꓟ ꓐꓱ ꓶ ꓬꓰˍ ꓟ ꓥ ꓕ ꓑꓳꓸ ꓚꓳꓟꓑꓮꓠꓬ ꓮ ꓟꓬꓹ ꓐˍ ꓟ ꓔꓯ ꓡꓳꓸ ꓟꓳ ꓪˍ ꓡꓳ=
ꓬꓲ ꓪ ꓠꓬ ꓓꓳꓡꓡꓮꓣ 100 ꓫꓬꓹ ꓖꓴ ꓠ ꓬꓰ ꓢꓲ ꓠꓬꓲ ꓔꓦ ꓗꓪ ꓐꓰ ꓞꓳ ꓤ ꓮ ꓟꓬꓹ ꓢꓷꓸ ꓡꓰ ꓠ ꓬꓰ ꓢꓲ꓾ ꓕꓱ ꓡꓱ ꓟꓴꓽ ꓘꓴꓽ ꓔꓯ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓝꓲˍ ꓟ ꓙꓼ ꓔꓯ ꓠꓽ ꓩꓴ ꓠꓬ ꓫꓸ ꓡ ꓟ ꓚꓱꓹ ꓔꓯ ꓔꓦ ꓗꓪ ꓐꓰ ꓐꓯ ꓑꓶ ꓩꓴ ꓡ ꓟ ꓔꓯ ꓡꓳꓸ ꓟꓳ ꓪ ꓡꓳ= ꓖꓳ ꓟ ꓠꓬ ꓔꓳꓗꓬꓳ ꓗꓪ ꓐꓰ ꓖꓪ ꓙꓱꓻ ꓜꓲꓼ ꓓꓴ ꓔꓯ ꓟꓽ ꓪ ꓐꓯˍ ꓟ ꓬꓲꓸ ꓟꓸ ꓟꓲꓽ ꓓꓳꓺ ꓡ ꓟ ꓥ ꓡꓳ= ꓟꓲꓽ ꓦꓲ ꓔꓯ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓝꓲˍ ꓟ ꓚꓮꓣꓐꓳꓠ ꓓꓳꓺ ꓡ ꓝꓲˍ ꓟ ꓕꓱ ꓡꓱ ꓫꓵꓽ ꓔꓯ ꓠꓽ ꓩꓴ ꓠꓬ ꓞꓳ ꓤ ꓮ ꓟꓬꓹ ꓠꓬ ꓟꓬꓱꓽ ꓟꓽ ꓙꓳ ꓗꓷ ꓡꓰ ꓢꓲ꓾ ꓝꓲꓸ ꓗꓼˍ ꓟ ꓮ ꓟꓬꓹ ꓒꓬꓱꓼ ꓡ ꓓꓴ ꓥꓳ ꓐꓰ ꓕꓱ ꓡꓱ ꓐꓯˍ ꓡꓳ=
1997 ꓘꓳꓼ 10 ꓦ ꓟ 29 ꓠꓬꓲ ꓕꓯ ꓐꓳ ꓛꓱ ꓩꓴ ꓡˍ ꓟ ꓖ-ꓓꓲ-ꓬ ꓐꓯˍ ꓟ ꓕꓳ ꓶ ꓗꓪ ꓠꓬ꓾ ꓐꓳ-ꓐꓣꓳꓪꓟ ꓐꓯ ꓢꓴ ꓡꓰ ꓕꓱ ꓡꓱ ꓔꓳꓗꓬꓳ ꓖꓪ ꓙꓱꓻ ꓜꓲꓼ ꓓꓴ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓝꓲˍ ꓟ ꓔꓯ ꓠꓽ ꓩꓴ ꓓꓴ ꓕꓱ ꓟ ꓔꓯ ꓟꓽ ꓪ ꓐꓯ ꓟ ꓢꓷꓸ ꓡꓰ ꓝꓲˍ ꓟ ꓠꓬ ꓗꓴꓷꓼ ꓔꓯ ꓙꓵꓽ ꓢꓴ ꓐꓴ ꓥ ꓟꓲ ꓕꓱ ꓟ ꓔꓯ ꓕꓽ ꓐ ꓐꓰ ꓐꓯˍ ꓟ ꓬꓲꓸ ꓟꓸ ꓟꓲꓽ ꓓꓳꓺ ꓡꓰ ꓝꓲˍ ꓟ ꓥ ꓡꓳ ꓐꓰ ꓕꓱ ꓡꓱ ꓐꓯˍ ꓡꓳ=
ꓚꓮꓣꓐꓳꓠ ꓚꓡꓴꓐ ꓐꓯˍ ꓟ ꓕꓱ ꓟ ꓔꓳꓗꓬꓳ ꓖꓪ ꓙꓱꓻ ꓜꓲꓼ ꓓꓴ ꓔꓯ ꓟꓽ ꓪ ꓐꓯ ꓢꓴ ꓕꓱ ꓕꓲꓽ ꓜꓴ ꓠꓬ ꓞꓳ ꓤ ꓬꓲ ꓜꓴꓻ ꓬꓲ ꓟꓯꓼ ꓔꓯ ꓥ ꓟꓲ ꓠꓲꓹ ꓟ ꓐꓬ ꓡꓰ ꓠ ꓬꓰ ꓢꓲ ꓓꓳꓽ ꓐꓳ ꓑꓶ ꓡ ꓟ ꓟꓰꓓꓲꓮ ꓗꓪ ꓐꓰ ꓕꓱ ꓟ ꓔꓯ ꓟꓽ ꓪ ꓐꓯˍ ꓟ ꓔꓯ ꓕꓱ ꓡꓱ ꓬꓰ ꓡꓳ= ꓖꓳ ꓡꓱ ꓬꓰ ꓕꓯ ꓬꓲ ꓪ ꓠꓬ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓔꓯ ꓒꓴ ꓮ ꓟꓬꓹ ꓖꓶ ꓢꓲ꓾ ꓟꓴꓽ ꓘꓴꓽ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓝꓲˍ ꓟ ꓚꓮꓣꓐꓳꓠ ꓖꓣꓰꓰꓠ ꓧꓳꓴꓢꓰ ꓖꓮꓢ ꓐꓯ ꓟ ꓕꓱ ꓟ ꓔꓯ ꓠꓽ ꓗꓷ ꓠꓬ ꓞꓳ ꓤ ꓮ ꓟꓬꓹ ꓫꓸ ꓡ ꓟ ꓚꓱꓹ ꓔꓯ ꓟꓬꓽ ꓠꓬꓲ ꓐꓯ ꓑꓶ ꓠꓹ ꓟ ꓢꓯꓼ ꓕꓵꓼˍ ꓟ꓾ ꓖꓳ ꓟ ꓡꓰˍ ꓟꓽ ꓞꓲ ꓗꓴꓷꓼ ꓙꓵꓽ ꓢꓴ ꓢꓲ ꓒꓽ ꓐꓴ ꓟꓬ ꓠꓬꓲ ꓐꓶ ꓠꓬꓲ ꓮꓽ ꓠꓱ ꓟ ꓗꓴꓷꓼ ꓙꓵꓽ ꓚꓱꓹ ꓔꓯ ꓟꓬꓽ ꓠꓬꓲ ꓠꓲꓹ ꓫꓵ ꓢꓴ ꓕꓱ ꓡꓱ ꓫꓵꓽ ꓔꓯ ꓛꓵꓽ ꓔꓴ ꓢꓲ ꓟꓽ ꓪ ꓐꓯ ꓟ ꓔꓯ ꓒꓬꓱꓼ ꓡ ꓠ ꓢꓯꓼ ꓕꓵꓼ ꓟ ꓥ ꓡꓳ= ꓡꓳꓹ ꓬꓰ ꓟ ꓞꓲ ꓥꓪꓽ ꓘꓳꓼ ꓕꓯ ꓧꓶꓽ ꓟꓵꓽ ꓗꓪ ꓚꓮꓣꓐꓳꓠ ꓓꓲꓳꓫꓲꓓꓰ ꓐꓯ ꓟ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓝꓲˍ ꓟ ꓠꓬ ꓮ ꓘꓶꓸ ꓟꓬꓽˍ ꓟ ꓥ ꓡꓳ=
ꓔꓯ ꓥꓳꓽ ꓐꓯ ꓠꓬ ꓮꓟꓰꓣꓲꓚꓮ ꓗꓴꓷꓼ ꓠꓬ ꓫꓸ ꓢꓴ ꓟꓷꓼ ꓢꓴ ꓐꓴ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓝꓲˍ ꓟ ꓚꓮꓣꓐꓳꓠ ꓔꓯ ꓗꓽ ꓕˍ ꓟ ꓠꓯꓸꓼ ꓗꓪ ꓮ ꓘꓶꓸ ꓗꓸ ꓠꓯꓸ ꓢꓲ ꓗꓪ ꓞꓰꓻ ꓡꓰ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓮꓟꓰꓣꓲꓚꓮ ꓗꓴꓷꓼ ꓗꓪ ꓞꓳ ꓤ ꓕꓲꓽ ꓣꓳ ꓠꓬ ꓕꓲꓽ ꓘꓳꓼ ꓬꓲꓸ ꓘꓴꓽ ꓗꓪ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓝꓲˍ ꓟ ꓚꓮꓣꓐꓳꓠ ꓔꓯ 5 ꓔꓮꓠ ꓛꓲ ꓣꓱꓽˍ ꓟ ꓥ ꓢꓲ꓾ ꓲ-ꓓꓲ-ꓬ ꓗꓪ ꓠꓬ 1 ꓔꓮꓠ ꓡꓲ ꓟꓽ ꓐꓲ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ=ꓖꓳ ꓟ ꓑꓶ. ꓓꓴ ꓮꓟꓰꓣꓲꓚꓮ ꓗꓪ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓟꓽ ꓫꓬ ꓡꓰ ꓝꓲˍ ꓟ꓾ ꓟꓴꓽ ꓘꓴꓽ ꓔꓯ ꓓꓳꓺ ꓡꓰ ꓝꓲˍ ꓟ ꓠꓬ ꓮ ꓘꓶꓸ ꓟꓬꓽˍ ꓟ ꓔꓯ ꓡꓳꓸ ꓟꓳ ꓪ ꓡꓳ=
