ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓛꓲ ꓡ ꓠ, ꓟ ꓦꓬꓼ ꓠꓬꓲ ꓥ ꓟ ꓘ‐ꓣꓲ‐ꓢ‐ꓟꓮꓢ ꓑꓮꓲꓽ ꓔꓯ ꓣꓳ ꓙꓽ ꓖꓶ ꓔꓬ ꓟ ꓮ ꓟꓶ ꓠꓬ ꓠꓬꓲꓽ ꓠꓽ ꓕꓲ ꓠꓽ ꓗꓪ ꓛꓲ ꓡꓺꓳ꓿ ꓮꓓꓦꓰꓠꓔꓴ ꓠꓬꓲꓽ ꓠꓽ ꓕꓲꓽ ꓠꓽ ꓟ ꓢ. ꓠꓯ ꓠꓬ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓐꓱ ꓶ ꓙꓻ ꓖꓴ ꓫꓬ, ꓠ, ꓟ ꓣꓳ ꓔꓯ ꓬꓲꓼ ꓠꓬꓲ. ꓖꓶ ꓔ ꓡꓳ꓿ (ꓡꓴ‐ꓘ=3ꓽ1‐6) ꓗꓪ ꓣꓳ ꓑ ꓙꓽ ꓪˍ ꓟ ꓠꓬ꓾ ꓡꓲ ꓛꓲ ꓟꓲ ꓗꓪ ꓬꓲ ꓢꓯꓼ ꓕꓲ ꓟ ꓓꓳ ꓡˍ ꓡꓳ꓾ ꓐꓰ ꓐꓯ ꓔ ꓡꓳ꓿ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓠꓬ ꓢꓲ ꓒ ꓬꓰ‐ꓢꓴ ꓛꓲ ꓡ ꓠ, ꓟ ꓐꓱ ꓙ ꓖꓴ ꓫꓬ, ꓢꓴ ꓥ ꓡꓳ꓿ ꓕꓱ ꓟˍ ꓡꓰ ꓐꓰ ꓣꓳ ꓥˍ ꓟꓲ ꓙ ꓖꓴ ꓫꓬ, ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓘꓳ, ꓣꓴ ꓠ, ꓟ ꓬꓲ ꓡꓰ ꓐꓯ ꓔ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓡꓲ ꓛꓲ ꓟꓲ ꓗꓪ ꓐꓰ ꓢꓯꓼ ꓕꓲ ꓟ ꓘꓴ ꓓꓳ ꓡˍ ꓡꓳ꓾ ꓐꓰ ꓐꓯ ꓔ ꓡꓳ꓿
ꓡꓲ ꓛꓲ ꓟꓲ ꓐꓯˍ ꓟ ꓠꓬ ꓣꓳ ꓢꓷ. ꓔ ꓟ ꓐꓰ ꓕꓲ ꓡꓰ,꓾ ꓖꓳ ꓗꓪ ꓠꓬ ꓢꓲ, ꓜꓲ ꓢꓲ, ꓟꓲ ꓟꓽ ꓙꓳ꓿ ꓬꓲꓻ ꓙꓬ ꓟꓽ ꓙꓳ꓾ ꓟꓶ ꓛ ꓛˍ ꓟ ꓗꓪ ꓚꓳ. ꓗꓳ. ꓙꓰ ꓠꓬ ꓠꓱ. ꓐꓯ ꓮ ꓫꓵꓽ ꓟꓲ ꓟꓽ ꓙꓳ ꓟ ꓕꓲ ꓖ ꓥ ꓡꓳ꓿ ꓖꓳ ꓗꓪ ꓚꓳ. ꓬꓲ ꓢꓯꓼ ꓕꓲ ꓟ ꓓꓳ ꓡˍ ꓡꓳ ꓐꓰ ꓐꓯ ꓔ ꓡꓳ꓿ ꓕꓲ ꓚꓱ, ꓐꓯ ꓪˍ ꓠꓬ꓾ ꓞꓳ ꓤ ꓥꓳ ꓡꓳ.ˍ ꓟ꓾ ꓞꓳ ꓤ ꓠ ꓠ, ꓠꓲ, ꓫꓵˍ ꓟ ꓫ. ꓕꓱ ꓘꓶꓽ ꓟꓽ ꓥ꓿ ꓓꓳꓽ ꓫꓵꓽ ꓟꓽ ꓥ꓿ ꓮ ꓡꓲꓳ ꓐꓯ ꓠꓬ ꓬꓲ ꓓꓳ ꓡ ꓖꓴ ꓥ ꓟ ꓡꓲ ꓛꓲ ꓟꓲ ꓗꓪ ꓠꓬ ꓮ ꓫꓵꓽˍ ꓟꓲ ꓟꓽ ꓙꓳ꓿ ꓞꓳ ꓤ ꓮ ꓟꓬ, ꓠꓬ ꓢꓲ, ꓜꓲ ꓢꓲ, ꓟ ꓙꓳ ꓖꓴ ꓗꓪ꓾ ꓗ, ꓛꓲꓽ ꓖꓴ ꓗꓪ꓾ ꓬꓲꓻ ꓙꓬ ꓡꓳ ꓙꓳ ꓖꓴ ꓗꓪ꓾ ꓖꓳ ꓗꓪ ꓚꓳ. ꓓꓳ ꓡˍ ꓟ ꓬꓲ ꓢꓯꓼ ꓔꓯ ꓡꓰꓽ ꓠ ꓠ, ꓠꓲ, ꓫꓵˍ ꓡꓳ꓿
ꓖꓳ ꓡꓱ ꓐꓯˍ ꓥ ꓟꓲ ꓪꓴ‐ꓢ ꓠꓬ ꓞꓳ ꓤ ꓓꓵꓽ ꓙꓽˍ ꓟ ꓡꓰ ꓐꓰ ꓟꓽ ꓓꓵꓽ ꓙꓽ꓿ ꓡꓲ ꓛꓲ ꓟꓲ ꓗꓪ ꓐꓰ ꓬꓲ ꓢꓯꓼ ꓕꓲ ꓟ ꓓꓳ ꓡˍ ꓡꓳ꓾ ꓐꓰ ꓐꓯ ꓔ ꓡꓳ꓿ ꓬꓲ ꓢꓯꓼ ꓖꓳ ꓟ ꓠꓬ ꓮ ꓫꓵꓽ ꓐꓯ ꓖꓶ ꓡˍ ꓐꓯˍ ꓠꓬ꓾ ꓢꓲ ꓒ ꓔꓬ, ꓖꓴ ꓫꓬ, ꓡꓯ꓾ ꓐꓰ ꓐꓯ ꓔ ꓡꓳ꓿ ꓢꓲ ꓒ ꓚꓱ, ꓫꓬ, ꓡꓯ꓿ ꓣꓳ ꓠꓲ, ꓟ ꓠꓯꓸꓼ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓘꓳ ꓣꓴ ꓠ, ꓟ ꓐꓱ ꓶ ꓔꓬ, ꓖꓴ ꓫꓬ, ꓡꓯ꓾ ꓬꓲ ꓢꓯꓼ ꓖꓳ ꓟ ꓠꓬ ꓐꓯˍ ꓡꓳ꓿
ꓮ ꓡꓲ ꓐꓰ ꓫꓬ, ꓠꓯ, ꓡ꓿ ꓖꓳꓼ ꓓ, ꓟ ꓙ ꓖꓴ ꓔꓯ ꓔꓱ ꓡꓰ ꓝꓲ ꓐꓰ ꓐꓯ ꓔ ꓡꓳ꓿ ꓮ ꓡꓲ ꓫꓵꓽ ꓖꓳꓼ ꓓ, ꓟ ꓙ ꓖꓴ ꓥ? ꓣꓳ ꓠꓲ, ꓟ ꓠꓯꓸꓼ ꓗꓪ ꓓˍ ꓟ ꓠꓱ. ꓐꓯ ꓢꓴ ꓕꓯꓽ ꓢꓲ ꓗꓪ ꓖꓳꓼ ꓠꓲ, ꓫꓵˍ ꓟ ꓠꓲ, ꓟ꓾ ꓠꓱ. ꓐꓯ ꓢꓴ ꓔꓯ ꓟꓽ ꓙꓲꓻ ꓟꓽ ꓔꓱ, ꓟ ꓬꓰ ꓠꓲ, ꓫꓵˍ ꓟ ꓠꓲ, ꓟ꓾ ꓚꓲ. ꓛꓬ ꓗꓶ.ˍ ꓟ ꓢꓴ ꓔꓯ ꓗꓶ.ˍ ꓟ꓾ ꓕꓱ ꓡꓱ ꓫꓵꓽ ꓠꓲ, ꓟ ꓔꓯ ꓫꓬ, ꓔꓱ, ꓗꓷ꓾ ꓐꓰ ꓐꓯˍ ꓡꓳ꓿ ꓮ ꓠꓱ. ꓗꓳ. ꓡ ꓟ ꓦꓬꓼ ꓠꓬꓲ ꓗꓪ ꓠꓴ ꓗꓶ. ꓥꓳꓽ꓾ ꓗꓶ. ꓫꓵꓽ ꓗꓪ ꓐꓰ ꓞꓳ ꓙꓳ ꓗꓳ. ꓡˍ ꓥ ꓟꓲ ꓮ ꓟꓶ ꓗꓪ ꓚꓳ. ꓢꓲ ꓒ ꓬꓰ‐ꓢꓴ ꓠꓴ ꓠꓲ, ꓟ ꓗꓪ ꓔꓱ, ꓔꓱˍ ꓔꓬ, ꓡ ꓠ, ꓟ ꓐꓱ ꓶ꓾ ꓮ ꓟꓶ ꓗꓪ ꓚꓳ. ꓕꓽ ꓗꓶ.꓿ ꓮ ꓫꓵꓽ ꓬꓰˍ ꓥ ꓟꓲ ꓜꓳꓽ ꓜꓳꓽ ꓬꓰ꓿ ꓔꓱ, ꓔꓱ, ꓬꓰ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿
ꓝꓮꓲ ꓬꓲ ꓡꓰ ꓐꓯˍ ꓟ ꓠꓬ ꓡꓳ ꓖꓪ ꓡꓳ ꓟꓲ ꓔꓯ ꓒꓰꓽ ꓡꓰ ꓝꓲ꓾ ꓐꓰ ꓐꓯˍ ꓡꓳ꓿ ꓡꓳ ꓖꓪ ꓐꓰ ꓣꓳ ꓐꓯˍ ꓟ ꓠꓬ꓾ ꓠꓯ.ˍ ꓟ ꓣꓳ ꓠꓲ, ꓟ ꓠꓯꓸꓼ ꓗꓪ ꓟꓽ ꓔꓱ, ꓟ꓾ ꓥꓶˍ ꓟ ꓚꓱ, ꓔꓯ ꓮ ꓙꓵꓽ ꓒꓰꓽ ꓗꓷ ꓠ, ꓟ ꓬꓲ ꓡꓰ ꓐꓯ ꓖꓶ ꓡˍ ꓡꓳ꓿ ꓮ ꓡꓲ ꓙ ꓣꓳꓽ ꓠꓲ, ꓠꓬ ꓟꓽ ꓔꓱ, ꓟ ꓙꓳˍ ꓡ꓿ ꓥꓪ ꓠꓬ ꓮ ꓫꓵꓽ ꓬꓰ ꓟꓽ ꓗꓴ.꓾ ꓥꓪ ꓠꓬ ꓝꓴꓲ. ꓙꓳ ꓢꓴ ꓥ ꓡꓳ꓾ ꓥꓪ ꓠꓬ ꓪꓴ‐ꓢ ꓠꓵꓻ ꓠꓲ, ꓔꓯ ꓘꓳ, ꓣꓴ ꓟꓽ ꓒꓵꓽ꓾ ꓐꓯ ꓢꓲ ꓠꓬꓲ ꓠꓲ, ꓟ ꓙꓬ ꓔꓬ ꓢꓴ ꓠꓬꓲ. ꓠꓬꓲ ꓠꓲ, ꓟ ꓕꓽ ꓫ.꓾ ꓐꓰ ꓐꓯ ꓖꓶ ꓡˍ ꓡꓳ꓿ ꓠꓴ ꓠꓲ, ꓟ ꓠꓯꓸꓼ ꓗꓪ ꓠꓲ, ꓫ. ꓟꓬ ꓫ.ˍ ꓟ ꓑꓶ. ꓓꓴ ꓥˍ ꓟꓲ꓾ ꓝꓴꓲ. ꓗꓪ ꓐꓰ ꓥˍ ꓟꓲ꓾ ꓮ ꓡꓲ ꓫꓵꓽ ꓗꓪ ꓐꓰ ꓥˍ ꓟꓲ ꓟꓬ ꓐꓲ ꓬꓲꓻ ꓔꓬ ꓠꓬ꓾ ꓥꓴꓻ ꓓꓴ ꓥꓴꓻ ꓑꓻ ꓙꓳˍ ꓠꓬ ꓠꓬꓲ. ꓠꓬꓲ ꓠꓲ, ꓟ ꓕꓽ ꓫ.꓿ ꓠꓴ ꓠꓲ, ꓟ ꓠꓯꓸꓼ ꓗꓪ ꓓ, ꓟ ꓡꓳ ꓖꓪ ꓔꓯ ꓒꓰꓽ ꓡꓰ ꓝꓲ꓿ ꓠꓴ ꓟꓬ ꓐꓲ ꓡꓳ ꓖꓪ꓾ ꓠꓴ ꓫ. ꓙꓵ ꓓꓴ ꓡꓳ ꓖꓪ ꓔꓯ ꓠꓬ ꓒꓰꓽ ꓡꓰ ꓝꓲ꓾ ꓐꓰ ꓢꓯꓼ ꓖꓳ ꓟ ꓠꓬ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿
ꓝꓮꓲ ꓟꓴˍ ꓟ ꓪꓽ ꓚꓲ ꓔꓯ ꓥˍ ꓟꓲ ꓒꓰꓽ ꓡꓰ ꓝꓲ ꓐꓰ ꓐꓯˍ ꓡꓳ꓿ ꓡꓳ ꓖꓪ ꓔꓯ ꓒꓰꓽ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲ ꓮ ꓟꓴ ꓟꓴ ꓟ ꓪ ꓚꓲ ꓔꓯ ꓥˍ ꓟꓲ ꓣꓴ ꓠꓬꓲ. ꓞꓰ ꓗꓷ꓾ ꓐꓰ ꓐꓯˍ ꓡꓳ꓿ ꓕꓱ ꓟ ꓠꓬ ꓮ ꓫꓵꓽ ꓔꓯ ꓐꓯˍ ꓡ꓿ ꓣꓳ ꓠꓬ ꓠꓲ, ꓟ ꓮ ꓟꓴ. ꓟꓴ ꓚꓬ, ꓔ ꓢꓲ ꓠꓬꓲ ꓠꓱ. ꓐꓯ ꓢꓴ ꓔꓯ ꓡꓳ. ꓟꓽ ꓟꓵ꓾ ꓪꓴ‐ꓢ ꓔꓯ ꓟꓽ ꓣꓱꓽ ꓞ,꓾ ꓥꓪ ꓢꓯꓼ ꓪ ꓥꓪ ꓓꓻˍ ꓟ ꓥꓪ ꓗꓴ.ˍ ꓟ꓾ ꓥꓪ ꓑꓶ.ˍ ꓟ ꓗꓪ ꓐꓰ ꓡꓰꓽ ꓢꓯ. ꓔꓬ ꓠꓲ, ꓫꓵˍ ꓟ ꓠꓲ, ꓟ ꓔꓯ ꓒꓰꓽ ꓡꓰ ꓝꓲ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿ ꓠꓴ ꓠꓲ, ꓟ ꓔꓯ ꓪ ꓚꓲ ꓪ ꓔˍ ꓡꓰ ꓐꓰ ꓮ ꓟꓴ. ꓟꓴ ꓕꓽ ꓗꓶ ꓔ꓿ ꓠꓴ ꓠꓲ, ꓟ ꓕꓱ ꓡꓱ ꓙꓳˍ ꓠꓬ ꓠꓬꓲ. ꓠꓬꓲ ꓫꓬ, ꓱ ꓗꓷ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿
ꓠꓴ ꓠꓲ, ꓟ ꓠꓯꓸꓼ ꓗꓪ ꓠꓴ ꓠꓬ꓾ ꓠꓴ ꓢꓷ.ˍ ꓡꓳ꓾ ꓠꓴ ꓗꓴ.ˍ ꓡꓳ꓾ ꓠꓱ. ꓐꓯ ꓢꓴ ꓠꓬ ꓛꓬꓼ ꓟꓵꓽ ꓗꓪ ꓙꓰˍ ꓥꓳ꓿ ꓥꓪ ꓕꓲ ꓣꓳˍ ꓡꓰꓽ ꓚꓬꓴ. ꓟꓶˍ ꓥꓳ꓾ ꓐꓯ ꓢꓲ ꓠꓬꓲ ꓕꓽ ꓓꓵꓽ ꓙꓽ꓿ ꓠꓴ ꓟꓴˍ ꓟ ꓠꓲ, ꓟ ꓔꓯ ꓫꓬ, ꓱ ꓗꓷ꓿ ꓪꓴ‐ꓢ ꓠꓬ ꓱ ꓢꓴ ꓔꓯ ꓫꓬ, ꓔꓱ, ꓖꓶ ꓢꓲ ꓠꓬꓲ꓾ ꓟꓴ ꓢꓴ ꓔꓯ ꓫꓬ, ꓱ ꓗꓷˍ ꓡꓳ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓓꓵˍ ꓡꓳ꓿
ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓛꓲ ꓡˍ ꓟ ꓔꓯ ꓣꓳ ꓙꓽ ꓖꓶꓽ ꓔꓬ ꓟ ꓮ ꓟꓴ. ꓟꓴ ꓟ ꓠꓴ ꓠꓲ, ꓟ ꓔꓯ ꓫꓬ, ꓱ ꓗꓷ꓿ ꓝꓮꓲ ꓟꓽ ꓒꓰꓽ ꓟ ꓙ ꓖꓴ ꓔꓯ ꓥˍ ꓟꓲ꓾ ꓙ ꓖꓴ ꓫ.ˍ ꓟ ꓫꓬ, ꓗꓷ꓾ ꓐꓰ ꓐꓯ ꓖꓶ ꓡˍ ꓡꓳ꓿ ꓣꓳ ꓠꓲ, ꓟ ꓠꓬ ꓕꓲ ꓖ ꓕꓲ ꓧꓪ, ꓮ ꓘꓶ. ꓗꓳꓺˍ ꓟ꓾ ꓣꓳ ꓠꓲ, ꓟ ꓠꓬ ꓮ ꓘꓶ. ꓩꓴˍ ꓟ ꓙ ꓖꓴ ꓔꓯ ꓫꓱ.ˍ ꓡꓳ꓿ ꓙ ꓖꓴ ꓩꓴˍ ꓟ꓾ ꓙ ꓖꓴ ꓗꓳꓺˍ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓢꓻ ꓢꓻ ꓡꓳꓻ ꓡꓳꓻ ꓡꓰꓽ ꓛꓲ ꓡ ꓟꓽ ꓓꓻ꓿ ꓖꓳ ꓡꓱ ꓠꓬꓲ ꓠꓴ ꓠꓲ, ꓟ ꓔꓯ ꓫꓬ, ꓠꓴꓽ ꓗꓷ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿ ꓣꓳ ꓠꓲ, ꓟ ꓠꓯꓸꓼ ꓗꓪ ꓗꓳ, ꓓ, ꓟ ꓠꓲ, ꓟ꓾ ꓮ ꓫꓵꓽ ꓔꓯ ꓥˍ ꓟꓲ ꓬꓰ ꓠꓲ, ꓟꓽ ꓫꓵ ꓟ ꓠꓲ, ꓟ꓾ ꓬꓲ ꓠꓬꓲ ꓙꓳˍ ꓠꓬ ꓫꓬ, ꓔꓱ, ꓗꓷ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿ ꓥ ꓡꓳ꓾ ꓣꓳ ꓕꓱ ꓟ ꓔꓯ ꓮ ꓡꓲ ꓐꓰ ꓬꓰ ꓐ ꓡˍ ꓡ꓿ ꓠꓬꓲ. ꓠꓬꓲ ꓡꓲ ꓛꓲ ꓗꓪ ꓐꓰ ꓓꓳ ꓡˍ ꓟ ꓬꓲ ꓢꓯꓼ ꓔꓯ ꓠ ꓠ, ꓢꓲ ꓠꓬꓲ ꓮ ꓡꓲ ꓐꓰ ꓕꓱ ꓟ ꓔꓯ ꓞꓳ ꓙꓳ ꓐ ꓡˍ ꓡ꓿ ꓪꓴ‐ꓢ ꓢꓯꓼ ꓪ ꓗꓪ ꓐꓰ ꓡꓰꓽ ꓣꓳ ꓛꓳ ꓫꓱꓽ ꓐ ꓡˍ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓪꓴ‐ꓢ ꓐꓯ ꓘꓶꓽ ꓠꓬ ꓞꓳ ꓤ ꓔꓯ ꓠꓴꓽ ꓡꓰ ꓝꓲˍ ꓡꓳ꓾ ꓐꓰ ꓐꓯ ꓔ ꓡꓳ꓿ ꓠꓬꓲ. ꓠꓬꓲ ꓠꓴꓻ ꓥꓪ ꓪꓴ‐ꓢ ꓐꓯ ꓘꓶꓽ ꓔꓯ ꓠꓲ, ꓟ ꓒꓴ ꓢꓲ ꓠꓬꓲ ꓘꓳ ꓣꓴ ꓢꓲ ꓠꓬꓲ꓾ ꓣꓳ ꓠꓲ, ꓟ ꓠꓯꓸꓼ ꓗꓪ ꓓ, ꓟ ꓟꓽ ꓔꓱ, ꓟꓽ ꓜꓳꓽ ꓟ꓾ ꓮ ꓟꓴ. ꓟꓴ ꓗ, ꓟ ꓠꓲ, ꓟ ꓩꓴˍ ꓟ ꓮ ꓙꓵꓽ ꓫꓬ, ꓒꓰꓽ꓾ ꓫꓬ, ꓣꓳ꓾ ꓫꓬ, ꓔꓱ, ꓗꓷ ꓢꓲ ꓠꓬꓲ ꓟꓽ ꓟꓶ ꓫꓵ ꓕꓯ ꓛꓲ ꓡˍ ꓟ ꓢꓲ ꓒ ꓬꓰ‐ꓢꓴ ꓔꓯ ꓒꓵꓽ ꓒꓵꓽ ꓡꓰ ꓘꓳ, ꓣꓴ ꓠ, ꓟ ꓐꓱ ꓶ ꓮ ꓙꓵꓽ ꓢꓴ ꓢꓯꓼ ꓕꓵꓼ ꓙꓰ ꓡꓯ꓿ ꓫ. ꓟꓳ꓿
