ꓔꓲꓺ ꓒ ꓓꓽ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓐꓰ ꓮ ꓙꓵ ꓔꓯ ꓚꓲ. ꓛꓬ ꓠꓲ, ꓟ ꓘꓴꓽ ꓗꓪ ꓬꓲ. ꓔꓶ. ꓖꓶ ꓠ ꓗ, ꓡꓳ꓾
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓣꓳ‐ꓟ ꓗꓪ ꓔꓲꓺ ꓒ ꓓꓽ ꓐꓴ ꓔꓯ ꓙꓲ_ ꓟ ꓮ ꓣꓳ ꓡꓳ. ꓒꓽ ꓢꓲ ꓒ ꓬꓰ‐ꓢꓴ ꓠꓲ, ꓟ ꓡꓰ ꓐꓰ ꓠꓲ, ꓟ ꓙꓳ ꓠ, ꓟ ꓐꓰ ꓮ ꓟꓶ ꓒꓳ, ꓡꓶ. ꓔꓬ ꓟ ꓕꓱ ꓟꓲ ꓠꓯ ꓗꓪ ꓮ ꓩꓵ ꓕꓯ ꓚꓲ. ꓛꓬ ꓠꓲ, ꓟ ꓘꓴꓽ ꓠꓯꓼ ꓗꓪ ꓬꓲ. ꓔꓶ. ꓖꓶ ꓠ, ꓟ ꓢꓯꓼ ꓖꓶ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓠꓽ ꓡꓲ. ꓠꓬꓲ ꓕꓯ “ꓮ ꓟꓶ ꓟ ꓟꓲ ꓠꓯ ꓐꓰ ꓘꓴ ꓜꓲꓼ ꓞꓳ ꓘꓴꓽ ꓠꓯꓼ ꓗꓪ ꓕꓲ ꓠꓲ, ꓕꓲ ꓪ ꓗꓷ ꓡꓰ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓛꓳ ꓫꓱꓽ ꓔꓬ ꓟ ꓔꓲꓺ ꓒ ꓓꓽ ꓐꓴ” ꓐꓰ ꓐꓯ_ ꓟ ꓬꓲ. ꓕꓲ ꓟꓴ ꓜꓲꓼ ꓓꓴ ꓗꓪ ꓐ ꓔꓬ ꓟ ꓔꓲꓺ ꓒ ꓓꓽ ꓐꓴ ꓐꓰ ꓜꓲ ꓗꓷ ꓟ ꓥꓳ꓿
ꓔꓲꓺ ꓒ ꓪ ꓔꓲ ꓡꓰ ꓔꓲꓺ ꓒ ꓓꓽ ꓫꓵꓼ ꓘꓳ, ꓣꓴ ꓟꓶ ꓢꓴ ꓐꓴ ꓠꓬ ꓬꓲꓼ ꓠꓬꓲ ꓤ ꓠꓲ, ꓟ ꓐꓰ ꓕꓲꓽ ꓣꓳ ꓐꓰ ꓕꓲ ꓣꓳ ꓙꓻ ꓡꓯ ꓘꓳ ꓢꓲ ꓮ ꓕꓯ ꓥ ꓟꓲ ꓕꓲꓽ ꓣꓳ_ ꓡꓰ ꓙꓻ ꓫꓱꓽ ꓔꓬ ꓢꓴ ꓐꓴ ꓟꓽ ꓥ ꓐꓰ ꓐꓯ ꓔ ꓡꓳ꓿ ꓚꓲ. ꓛꓬ ꓠꓯꓼ ꓗꓪ ꓡꓯꓼ ꓙꓱ ꓔ ꓟ ꓪꓴ‐ꓢ ꓞꓳ ꓫꓵ ꓐꓴ ꓐꓱ ꓶ ꓥꓳ ꓡꓳ. ꓓꓴ ꓐꓰ ꓔꓶꓻ ꓙꓱꓼ ꓔꓯ ꓕꓲ ꓣꓳ ꓐꓰ ꓕꓲ ꓣꓳ ꓙꓻ ꓡꓯ ꓘꓳ ꓠ, ꓟ ꓥ ꓡꓳ꓿ “ꓮ ꓙꓵ ꓠꓬ ꓔꓲꓺ ꓒ ꓓꓽ ꓕꓲꓽ ꓣꓳ ꓠꓲ, ꓟ ꓘꓴꓽ ꓠꓯꓼ ꓗꓪ ꓬꓲ. ꓔꓶ. ꓕꓲ ꓔꓶ. ꓔꓬ ꓠ ꓔ ꓡꓳ꓿ꓮ ꓫꓵ ꓑꓶ ꓓꓴ ꓐꓯ ꓠꓬ ꓮ ꓙꓵ ꓠꓬ ꓢꓲ ꓒ ꓬꓰ‐ꓢꓴ ꓠꓲ, ꓟ ꓠꓯꓼ ꓗꓪ ꓬꓲ. ꓔꓶ. ꓔꓬ ꓟ ꓑꓶ ꓓꓴ ꓥ ꓡꓳ꓿” ꓐꓰ ꓢꓯꓼ ꓖꓶ ꓔ ꓡꓳ꓿
ꓔꓲꓺ ꓒ ꓓꓽ ꓐꓴ ꓐꓱ ꓶ ꓮ ꓘꓶ. ꓣꓳ. ꓚꓵ_ ꓟ ꓠꓬ ꓢꓲ ꓒ ꓬꓰ‐ꓢꓴ ꓐꓰ ꓕꓲꓽ ꓪ ꓔꓬ ꓟ ꓥ ꓡꓳ꓾ ꓢꓲ ꓒ ꓬꓰ‐ꓢꓴ ꓐꓰ ꓔꓬ ꓟ ꓙꓵ, ꓔꓯ ꓮ ꓕꓯ ꓟꓲ ꓒꓵꓽ ꓗ, ꓬꓰ ꓓꓴ ꓬꓰ ꓡꓯ꓾ ꓢꓲ ꓫꓬ ꓑ ꓑ꓾ ꓪꓴ‐ꓢ ꓐꓯ ꓘꓶꓽ ꓶꓼ ꓓꓳ ꓫꓱ, ꓓꓳ꓾ ꓪꓽ ꓘꓴ_ ꓟ ꓐꓰ ꓪꓴ‐ꓢ ꓟꓲ ꓕꓯ ꓗꓪ ꓛꓳ ꓒꓯ, ꓕꓲꓽ ꓣꓳ ꓡꓰ ꓐꓰ ꓠꓲ, ꓟ ꓐꓰ ꓢꓲ ꓡꓲ, ꓐꓰ ꓔꓬ ꓐ ꓡ ꓟ ꓬꓲ. ꓙꓵ, ꓔꓯ ꓞꓳ ꓒꓵꓽ ꓓꓴ ꓬꓰ ꓡꓯ꓿ ꓚꓲ. ꓛꓬ ꓢꓲ ꓒꓽ ꓠꓯꓼ ꓗꓪ ꓐꓰ ꓠꓵꓻ ꓠꓲ, ꓪ ꓟꓶ ꓠ, ꓟ ꓚꓲ. ꓛꓬ ꓔꓱ, ꓚꓲ ꓛꓻ ꓗ. ꓘꓶꓽ ꓒꓴ ꓔ ꓓꓴ ꓬꓰ ꓡꓯ꓿
ꓔꓲꓺ ꓒ ꓓꓽ ꓕꓲꓽ ꓣꓳ ꓠꓬ ꓚꓲ. ꓛꓬ ꓞꓳ ꓫꓵ ꓔꓯ ꓟꓬ ꓠꓬꓲ ꓠꓲ, ꓠꓵꓻ ꓠ, ꓟ ꓢꓳꓺ ꓣꓴ ꓠ ꓔ ꓡꓳ꓾ ꓬꓲ ꓪ ꓗ, ꓛꓲ_ ꓟ꓾ ꓠꓲ, ꓟ ꓫ. ꓟ ꓬꓲ ꓪ ꓔꓶꓻ ꓙꓱꓼ ꓔꓯ ꓕꓲꓽ ꓪ ꓙꓻ ꓖꓶ_ ꓟ꓾ ꓙꓲ‐ꓢꓴ ꓢꓲ ꓤ ꓐꓴ ꓟꓬ ꓡ ꓔꓬ ꓕꓯ ꓕꓲꓽ ꓪ ꓗ, ꓛꓲ ꓢꓴ ꓥ ꓡꓳ꓾ꓔꓲꓺ ꓒ ꓓꓽ ꓐꓴ ꓠꓬ ꓔꓲꓺ ꓒ ꓐꓴ ꓓꓰꓮꓚꓳꓠ ꓐꓴ ꓔꓯ ꓙꓵꓽ ꓪ ꓖꓶ_ ꓕꓯ꓾ ꓠꓲ, ꓟ ꓐ_ ꓢꓴ ꓞꓳ ꓡꓱ ꓐꓴ ꓐꓰ ꓜꓲ ꓕꓯ꓾ ꓫ. ꓟ ꓗꓳ, ꓡꓳ ꓗꓪ ꓐꓰ ꓙꓲ‐ꓢꓴ ꓢꓲ ꓤ ꓐꓴ ꓐꓰ ꓕꓲ ꓪ ꓙꓻ ꓫꓱ_ ꓕꓯ ꓪꓴ‐ꓢ ꓡꓰ ꓡꓯꓼ ꓙꓱ ꓔ ꓢꓴ ꓮ ꓙꓵ ꓔꓯ ꓠꓲ, ꓠꓵꓻ ꓠ ꓔ ꓡꓳ꓿
ꓮ ꓟꓶ ꓤꓶꓻ ꓦꓬꓼ ꓠꓬꓲ (Artificial Intelligence) ꓮꓲ ꓑꓶ ꓓꓴ ꓪꓴꓽ ꓟꓴ ꓡ ꓚꓱ, ꓟꓬ ꓡ ꓥ ꓟꓲ ꓕꓱ ꓟ ꓠꓬ ꓝꓴꓲ ꓗꓪ ꓐꓰ ꓡꓲ, ꓖꓶ ꓝꓲ ꓟꓽ ꓐ ꓡ꓾ ꓖꓳ ꓟ ꓑꓶ ꓓꓴ ꓕꓱ ꓟꓲ ꓠꓯ ꓮ ꓟꓬ ꓪꓴꓽ ꓟꓴ ꓡ ꓢꓲ ꓒꓳ, ꓡꓶ. ꓥ ꓟꓲ ꓔꓲꓺ ꓒ ꓓꓽ ꓐꓴ ꓠꓬ ꓮ ꓙꓵ ꓔꓯ ꓚꓬꓴ ꓙ ꓟ ꓶꓼ ꓓꓳ ꓫꓱ, ꓓꓳ ꓔꓯ ꓚꓺ ꓒꓬꓱꓽ ꓠ ꓔ ꓡꓳ꓿
ꓮ ꓙꓵ ꓐꓱ ꓶ ꓚꓲ ꓛꓬ ꓠꓲ, ꓟ ꓔꓯ ꓒꓴ ꓔ ꓓꓴ ꓬꓰ ꓡꓯ꓾ ꓐꓰ ꓢꓯꓼ ꓖꓶ ꓔ ꓡꓳ꓿ “ꓣꓳ ꓠꓬ ꓞꓳ ꓫꓵ ꓐꓴ ꓐꓰ ꓕꓲ ꓪ ꓙꓻ ꓫꓱꓽ ꓓꓴ ꓬꓰ ꓡꓯ꓾ ꓬꓲ ꓪ ꓐꓰ ꓕꓲ ꓪ ꓪꓽ ꓘꓴ ꓓꓴ ꓬꓰ ꓡꓯ꓾ ꓬꓲ ꓪ ꓐꓰ ꓕꓲ ꓪ ꓪꓴ‐ꓢ ꓐꓯ ꓘꓶꓽ ꓶꓼ ꓓꓳ ꓫꓱ, ꓓꓳ ꓔꓯ ꓠ ꓠ, ꓓꓴ ꓬꓰ ꓡꓯ꓾ ꓬꓲ ꓪ ꓐꓰ ꓕꓲ ꓪ ꓢꓲ ꓫꓬ ꓑ ꓑ ꓔꓯ ꓘꓳ, ꓣꓴ ꓓꓴ ꓬꓰ ꓡꓯ꓾ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓬꓲ ꓪ ꓐꓰ ꓕꓲ ꓪ ꓪꓴ‐ꓢ ꓒꓬꓱ ꓟꓬ ꓔꓯ ꓧꓪ ꓓꓴ ꓬꓰ ꓡꓯ꓾ ꓐꓰ ꓢꓯꓼ ꓖꓶ ꓔ ꓡꓳ꓿
