ꓬꓲꓼ ꓤ ꓠꓬꓲ ꓤ ꓐꓴꓳ ꓟ‐ꓕꓲ ꓕꓳꓽ ꓶ 20ꓽ1‐16 ꓔꓯ ꓠꓴ ꓠ ꓠ, ꓠꓬꓲˍ ꓕꓯ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓮ ꓡꓲ ꓚꓬ, ꓟꓶˍ ꓡ꓿ ꓕꓲ ꓖ ꓕꓲ ꓧꓪ, ꓖꓳ ꓟ ꓔꓯ ꓟꓲ ꓡꓰ, ꓢꓲ ꓠꓬꓲ ꓠꓴ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓕꓲ ꓫꓵꓽ ꓫꓵꓽ ꓓꓵꓽ ꓙ ꓠꓬꓲ ꓗꓴ.ˍꓡ꓿ ꓢꓲꓽ ꓫꓬ ꓕꓳꓽ ꓶ ꓘꓴꓽ ꓗꓪ ꓣꓳ ꓮ ꓫꓵꓽ ꓑ ꓙꓽˍ ꓐꓯ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓟꓴ ꓗꓪ ꓗꓴꓷꓼ ꓠꓬ ꓞꓳ ꓤ ꓕꓲ ꓣꓳ ꓬꓲ ꓐꓱ ꓗꓪ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓗꓶ ꓝꓲꓼ ꓗꓪ ꓙꓰ ꓢꓲ ꓠꓬꓲ ꓞꓳ ꓤ ꓔꓯ ꓧꓪˍ ꓟ ꓚꓱ, ꓔꓯ ꓔꓯ ꓥꓳꓽ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓐꓯ ꓟꓳ. ꓖꓶ ꓔ ꓡꓳ꓿
ꓡ ꓞꓳ ꓒ ꓖꓳ ꓟ ꓠꓬ ꓠꓯꓼ ꓠꓯꓼ 9 ꓙꓵ, ꓗꓪ ꓙꓰ ꓢꓲ ꓠꓬꓲ ꓡ ꓞꓳ ꓔꓯ ꓬꓲ ꓐꓱ ꓗꓪ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓘꓴˍ ꓡꓳ꓿ ꓖꓳ ꓗꓪ ꓙꓰˍ ꓕꓯ ꓟꓬꓱꓽ ꓟꓽ ꓬꓰ ꓬꓰ ꓐꓰ ꓡꓳ. ꓔꓬ ꓟ ꓞꓳ ꓤ ꓕꓲ ꓣꓳ ꓔꓯ ꓥꓪ ꓐꓱ ꓗꓪ ꓙꓰ ꓢꓲ ꓟꓬꓱꓽ ꓬꓰ꓿ ꓥꓪ ꓠꓴ ꓔꓯ ꓒꓴ ꓖꓶˍ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿ ꓕꓱ ꓟˍ ꓡꓰ ꓐꓰ 12 ꓙꓵ, ꓗꓪ ꓙꓰ ꓢꓲ ꓠꓬꓲ ꓪꓽ ꓤ ꓧꓪˍ ꓡꓳ꓿ ꓕꓱ ꓟˍ ꓡꓰ ꓐꓰ ꓮ ꓧꓪ, 5 ꓙꓵ,꓾ ꓟꓶꓽ ꓘꓶꓼ 6 ꓙꓵ, ꓗꓪ ꓛꓲ ꓬꓲ ꓠꓬ ꓕꓰ ꓡꓰ ꓙꓰ ꓢꓲ ꓠꓬꓲ ꓞꓳ ꓤ ꓔꓯ ꓧꓪ ꓢꓲ ꓠꓬꓲ ꓬꓲ ꓐꓱ ꓗꓪ ꓟꓬꓱꓽ ꓬꓰ ꓠ, ꓟ ꓝꓲ ꓩꓴˍ ꓡꓳ꓿
ꓒꓴ ꓖꓶ ꓝꓲ. ꓛꓲ ꓡ ꓕꓯ ꓐꓱ ꓢꓲ ꓒ ꓖꓳ ꓟ ꓠꓬ ꓮ ꓙꓵꓽ ꓠꓯꓼ ꓠꓯꓼ 9 ꓙꓵ, ꓗꓪ ꓚꓳ. ꓟꓬꓱꓽ ꓬꓰ ꓢꓴ ꓔꓯ ꓥˍ ꓟꓲ ꓒꓴ ꓕꓲ ꓡꓰ,꓾ ꓟꓶꓽ ꓘꓶꓼ ꓙꓵ, ꓗꓪ ꓛꓲ ꓡ ꓢꓲ ꓫꓵꓽ ꓫꓵ 1 ꓙꓵ, ꓤ ꓟꓬꓱꓽ ꓬꓰ ꓢꓴ ꓔꓯ ꓥ ꓟꓲ ꓬꓲ ꓒꓵꓽ ꓠꓬ ꓕꓲ ꓡꓰ, ꓖꓶˍ ꓡꓳ꓿ ꓖꓳ ꓕꓯ ꓪꓽ ꓤ ꓐꓴ ꓠꓬ ꓠꓲ, ꓟ ꓫˍ ꓟ ꓟꓬ ꓔꓳˍ ꓟ ꓔꓯ ꓣꓳ ꓑ ꓙꓽˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓔꓯ ꓣꓳ ꓵꓻ ꓠꓬꓲˍ ꓕꓯ ꓟꓴ ꓗꓪ ꓗꓴꓷꓼ ꓠꓬ ꓕꓰ ꓡꓰ ꓗ, ꓟ ꓑꓶ. ꓓꓴ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓮ ꓘꓶ. ꓠꓲ, ꓘꓪꓽ ꓟꓽ ꓫꓵ ꓫꓵ ꓥ ꓟ ꓲ ꓗ, ꓗꓴ. ꓗꓴˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓠꓯꓼ ꓠꓯꓼ 9 ꓙꓵ, ꓗꓪ ꓟꓬꓱꓽ ꓬꓰ ꓪꓴ. ꓔꓬ ꓟ ꓟꓶꓽ ꓛ ꓛ ꓢꓲ ꓠꓬꓲ ꓕꓲ ꓠꓬꓲ ꓶꓽ ꓡꓶ ꓚꓵ. ꓬꓲꓻ ꓓꓳ ꓢꓲ ꓬꓰ ꓔꓬ ꓟ ꓕꓲ ꓣꓳ ꓥˍ ꓟꓲ ꓮ ꓧꓪ, ꓟꓶꓽ ꓘꓶꓼ ꓕꓲ ꓑ, ꓤ ꓡ ꓢꓴ ꓔꓯ ꓥˍ ꓟꓲ ꓬꓲ ꓒꓵꓽ ꓕꓲ ꓡꓰ, ꓖꓶˍ ꓟ ꓑꓶ. ꓓꓴ ꓣꓳ ꓠꓲ, ꓟ ꓘꓴꓽ ꓗꓪ ꓕꓱ ꓟ ꓠꓬ ꓔꓱ, ꓚꓵˍ ꓟ ꓟꓽ ꓥ ꓐꓰ ꓓꓵꓽ ꓙ ꓟꓶ ꓔꓬ ꓗꓴ.ˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ‐ꓢꓴ ꓐꓯ ꓟꓳ. ꓖꓶ ꓠꓲ, ꓫꓵˍ ꓟ ꓟ. ꓟꓲꓽ ꓕꓱ ꓟ ꓘꓴꓽ ꓗꓪ ꓠꓬ ꓟꓴ ꓗꓪ ꓗꓴꓷꓼ ꓠꓬ ꓕꓰ ꓡꓰ ꓗ, ꓡꓳ ꓐꓰ ꓐꓯˍ ꓟ ꓠꓬ꓾ ꓬꓲ ꓪ ꓬꓰ ꓟꓶˍ ꓟ ꓪꓽ ꓒꓵꓽ ꓚꓵ ꓟꓽ ꓥ ꓐꓯ ꓟ ꓢꓷ. ꓠ ꓗ, ꓡꓳ꓿
