ꓝꓲ ꓓꓴ ꓐ˗ꓕꓳ˗ꓡꓱ˗ꓟꓲ ꓑꓮꓲ (
ꓮ ꓙꓵꓽ ꓢꓴ ꓔꓯ ꓧꓪꓸ ꓧꓪ ꓠꓬꓲꓸ ꓠꓬꓲ ꓠꓬ ꓢꓲꓺ ꓒ ꓬꓰ˗ꓢꓴ ꓝꓲ ꓓꓴ (12) ꓣꓳ ꓗꓪ ꓐꓰ ꓟ ꓕꓲ ꓣꓳ ꓥ ꓟ ꓝꓲ ꓓꓴ ꓐ˗ꓕꓳ˗ꓡꓱ˗ꓟꓲ ꓚꓱꓹ ꓔꓯ ꓚꓺ ꓟꓸ ꓖꓶ ꓓꓴ ꓥ ꓡꓳ꓿
ꓝꓲ ꓓꓴ ꓐ˗ꓕꓳ˗ꓡꓱ˗ꓟꓲ ꓚꓱꓹ ꓔꓯ ꓢꓲꓽ ꓫꓬ ꓕꓳ ꓶ ꓐꓳ ꓒꓽ ꓟ˗ꓕꓲ꓾ ꓟ˗ꓘꓳ꓾ ꓐꓰ ꓡꓴ˗ꓘ ꓕꓳ ꓶ ꓗꓪ ꓐ˗ꓕꓳ˗ꓡꓱ˗ꓟꓲ ꓐꓰ ꓡꓳꓸ ꓟꓳ ꓪ ꓟ ꓥ ꓢꓲ ꓠꓬ ꓬꓲ ꓟꓬꓱꓺ ꓬꓲ ꓚ ꓠꓬ ꓠꓮꓔꓧꓮꓠꓰꓡ ꓥ ꓟ ꓔꓯ ꓝꓲ ꓓꓴ ꓬꓳ˗ꓦ ꓡꓰ ꓐꓳ ꓔ ꓟ ꓢꓲꓽ ꓫꓬ ꓕꓳ ꓶ ꓗꓪ ꓡꓳꓸ ꓟꓳ ꓪ ꓟ ꓥ ꓡꓳ꓿
ꓐ˗ꓕꓳ˗ꓡꓱ˗ꓟꓲ ꓟꓬꓱꓺ ꓠꓬ ꓮꓣꓮꓟꓮꓲꓚ ꓥꓳꓽ ꓫꓵꓽ ꓗꓪ ꓐꓰ ꓣꓴ ꓔ ꓟ ꓟꓬꓱꓺ ꓥ ꓡꓳ꓿
ꓬꓲ ꓠꓬ ꓢꓲꓺ ꓒ ꓬꓰ˗ꓢꓴ ꓔꓯ ꓜꓲꓼ ꓗꓷ ꓟ ꓙꓵꓹ ꓕꓯ ꓠ˗ꓕ˗ꓠꓰ ꓡꓰ ꓬꓲ ꓔꓯ ꓠꓴ ꓮ ꓡꓲ ꓐꓰ ꓥꓪ ꓔꓯ ꓢꓷꓸ ꓡ? ꓐꓰ ꓠ ꓠꓬꓲˍ ꓕꓯ ꓬꓰ˗ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ ꓒꓲ˗ꓡꓲ ꓠꓴ ꓔꓯ ꓟꓽ ꓘꓴ ꓢꓰꓽ ꓕꓯ꓾ ꓠꓴ ꓠꓬ ꓘꓶꓽ ꓢꓶꓽ ꓜꓲꓹ ꓠꓯ ꓘꓪ ꓔꓬ ꓕꓯ ꓡꓰ ꓠꓴ ꓔꓯ ꓥꓪ ꓟꓳꓸ ꓗꓷꓳ ꓐꓰ ꓐꓯ ꓖꓶ ꓡꓳ꓿
ꓠ˗ꓕ˗ꓠꓰ ꓡꓰ ꓟꓸ ꓒꓽꓳ ꓠꓴ ꓠꓽ ꓪꓴ˗ꓢ ꓮ ꓐꓲ ꓬꓲ˗ꓢꓷ˗ꓡꓰ ꓪ ꓔꓲ ꓥ ꓡꓳ ꓐꓰ ꓐꓯ ꓖꓶ ꓡꓳ꓿ (ꓬꓳ˗ꓦ 1ꓽ28˗49) ꓡꓳ. ꓟꓳ ꓪ ꓟ ꓥ ꓡꓳ꓿
ꓪꓴ‐ꓢ ꓟꓬꓱꓽ ꓬꓰ ꓗꓷ ꓟ ꓠꓬ ꓟꓵꓽ ꓗꓳ ꓓꓵ ꓓꓵ ꓗꓪ ꓙꓰ ꓢꓲꓠꓬꓲ ꓪꓴ‐ꓢ ꓟꓬꓱꓽ ꓟꓯ ꓗꓷꓳ꓿ ꓮ‐ꓠꓱ ꓙꓲ‐ꓢꓴ ꓢꓲꓺ ꓤ ꓐꓴ ꓚꓺ ꓟꓲꓽ ꓗꓪ ꓝꓲ ꓓꓴ ꓐ‐ꓕꓳ‐ꓡꓱ‐ꓟꓲ ꓠꓬ ꓲꓠꓓꓲꓳ ꓗꓴꓷꓼ ꓗꓪ ꓛꓲ ꓪꓴ‐ꓢ ꓶꓼ ꓓꓳ ꓫꓱ, ꓚꓺ ꓗꓷꓳ꓿
ꓝꓮꓲ ꓮꓣꓟꓰꓠꓲꓮ ꓗꓴꓷꓼ ꓗꓪ ꓪꓴ‐ꓢ ꓶꓼ ꓓꓳ ꓫꓱ, ꓓꓳ ꓚꓺ ꓢꓲ ꓠꓬꓲ ꓓꓽ ꓪꓴ. ꓢꓲꓺ ꓒ ꓬꓰ‐ꓢꓴ ꓔꓯ ꓘꓳ,ꓣꓴ ꓡ ꓟ ꓗꓴꓷꓼ ꓒꓬꓱꓼ ꓡ ꓗꓷ ꓟ ꓥ ꓡꓳ꓿ꓐ
ꓝꓮꓲ ꓠꓱ. ꓐꓯꓼ ꓗꓴꓷꓼ ꓗꓪ ꓥ ꓟ ꓲ‐ꓣ ꓗꓴꓷꓼ ꓮꓝꓣꓲꓚꓮ ꓟꓵꓽ ꓲ‐ꓔꓲ‐ꓬꓴ‐ꓐꓲ‐ꓬ ꓟꓵꓽ ꓗꓪ ꓛꓲ ꓪꓴ‐ꓢ ꓟꓬꓱꓽ ꓬꓰ ꓗꓷꓳ꓿
ꓝꓲ ꓓꓴ ꓐ‐ꓕꓳ‐ꓡꓱ‐ꓟꓰ ꓠꓬ ꓮ‐ꓟꓯ‐ꓠꓲ‐ꓬ ꓗꓴꓷꓼ ꓗꓪ ꓪꓴ‐ꓢ ꓟꓬꓱꓽ ꓬꓰ ꓔꓬ ꓟ ꓙꓵ, ꓕꓯ ꓪ ꓔꓲ ꓑꓳꓡꓬꓟꓲꓢꓴꓢ ꓐꓰ ꓑ ꓫꓬ ꓐꓴ ꓮ ꓟꓬ, ꓔꓯ ꓙꓲ‐ꓢꓴ ꓢꓲꓺ ꓤ ꓐꓴ ꓒꓬꓱꓼ ꓡ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓗꓷꓳ꓿
ꓖꓳ ꓡꓱ ꓥ ꓟꓲ ꓪ ꓔꓲ ꓠꓬ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓳ ꓬꓰ ꓗ. ꓠꓯ ꓪ ꓔꓲ ꓠꓬꓲꓽ ꓤ ꓗꓴꓷꓼ ꓙꓵꓽ ꓡ ꓟ ꓙꓵ, ꓕꓯ ꓪ ꓔꓲ ꓠꓬ ꓠꓲꓽ ꓔꓯ ꓦꓻ ꓡꓱ ꓟ ꓔꓯ ꓠꓲ, ꓫꓵˍ ꓟ ꓑꓶ. ꓓꓴ ꓝꓲ ꓓꓴ ꓐ‐ꓕꓳ‐ꓡꓱ‐ꓟꓰ ꓔꓯ ꓐꓱ ꓓꓴ ꓗꓪ ꓓꓵ ꓡꓰ ꓝꓲꓳ꓿
ꓕꓱ ꓡꓱ ꓐꓰ ꓮ ꓘꓶ. ꓛꓲ ꓫ. ꓟꓳ ꓫ. ꓙꓵˍ ꓠ, ꓟ ꓬꓰ ꓢꓲ ꓠꓬꓲ ꓧꓪꓽ ꓔꓯ ꓮ ꓔꓳ ꓛꓴꓽ ꓡꓯꓼ ꓐꓳ ꓔꓶ. ꓓꓴ ꓗꓪ ꓝꓲ ꓓꓴ ꓐ‐ꓕꓳ‐ꓡꓱ‐ꓟꓰ ꓔꓯ ꓢꓰꓼ ꓗꓷꓳ꓿
ꓙꓲꓻ ꓫꓬ ꓢꓴ ꓐ‐ꓕꓳ‐ꓡꓱ‐ꓟꓰ ꓔꓯ ꓟꓬꓱꓽ ꓓꓳꓽ ꓖꓶ ꓟ ꓑꓮꓲꓽ ꓔꓯ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓘꓴ ꓜꓲꓼ ꓞꓳ ꓠꓬ 8 ꓦ ꓟ 24 ꓠꓬ ꓕꓯ ꓑꓮꓲꓽ ꓔꓯ ꓬꓰ ꓔꓬ ꓟ ꓥ ꓡꓳ꓿
