2026 ꓘꓳꓼ 8 ꓦ 16 ꓠꓬꓲ꓾ ꓠꓽ ꓦꓬꓼ ꓠꓬꓲ ꓕꓯ Patheinꓡꓳ ꓒꓱ ꓗꓪ ꓙꓳˍ ꓟ ꓙꓲꓻ ꓫꓬ ꓢꓴ ꓒꓲ‐ꓕꓱ ꓪꓽ ꓘꓴ ꓦꓲ ꓗꓪ ꓙꓲ‐ꓢꓴ ꓢꓲ ꓤ ꓮ ꓙꓵꓽ (Christian Ecumenical Fellowship) ꓢꓲꓽ ꓫꓬ ꓕꓳꓽ ꓶ ꓬꓲ ꓠꓬꓲ ꓚꓲ. ꓟꓶ ꓓꓴ ꓑꓮꓲ ꓔꓯ ꓙꓲ‐ꓢꓴ ꓢꓲ ꓤ ꓮ ꓙꓵꓽ ꓗꓪ ꓐꓰ ꓜꓴ ꓙꓵꓽ ꓢꓴ ꓐꓴ꓾ ꓙꓵꓻ ꓢꓴ ꓐꓴ ꓕꓲ ꓪˍ ꓑꓮꓲꓽ ꓬꓰ ꓗꓷꓳ꓿

ꓑꓮꓲ ꓖꓳ ꓟ ꓔꓯ ꓠꓯꓼ ꓠꓯꓼ 10ꓽ30 ꓙꓵ, ꓗꓪ ꓐꓰ ꓬꓰ ꓪꓴ. ꓔꓴ ꓗꓷ ꓢꓲ꓾ ꓡꓳ ꓒꓱ ꓘꓴꓽ ꓠꓯꓸꓼ ꓗꓪ ꓙꓳˍ ꓟ ꓙꓲ‐ꓢꓴ ꓢꓲ ꓤ ꓒꓳ, ꓮ ꓟꓬ, ꓗꓪ ꓐꓰ ꓧꓳꓽ ꓪꓴ. ꓟꓳ ꓢꓴ ꓐꓴ ꓐꓰ ꓢꓲ ꓤ ꓐꓴˍ ꓟꓲ ꓡ ꓗꓷ ꓟ ꓥ ꓡꓳ꓿

ꓗ‐ꓔꓳ‐ꓡꓲ ꓘꓴ ꓜꓲꓼꓗꓪ ꓐꓰ Msgr. ꓔꓲꓺ ꓒ Pius Win Than꓾ ꓔꓲꓺ ꓒ Fidelis ꓐꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓮ ꓟꓬ, ꓔ ꓗꓷꓳ꓿

ꓑꓮꓲ ꓕꓱ ꓟ ꓔꓯ ꓠꓯꓼ 10ꓽ30 ꓗꓪ ꓐꓰ 12ꓽ00 ꓙꓵ, ꓗꓪ ꓛꓲ ꓬꓰ ꓗꓷ ꓢꓲ ꓙꓵ, (14) ꓟ ꓙꓳˍ ꓟ ꓥ ꓡꓳ꓿

Pathein ꓢꓽ‐ꓢꓶ‐ꓠ꓾ ꓙꓲꓻ ꓫꓬ ꓢꓴ ꓒꓲ‐ꓕꓱ ꓪꓽ ꓘꓴ ꓦꓲ ꓔꓳ, ꓙ ꓔꓲꓺ ꓒ Fidelis ꓑꓮꓲ ꓢꓽ ꓡ ꓙꓵꓽ ꓬꓰ ꓢꓲ ꓧꓳꓽ ꓣꓱꓽ ꓗꓷ ꓟ ꓥ ꓡꓳ꓿

ꓪꓴ‐ꓢ ꓬꓲ ꓢꓲꓽ ꓫꓬˍ ꓟ ꓐꓯ ꓘꓶꓽ ꓐꓯ ꓑꓶˍ ꓟ

ꓟ. ꓒ ꓜꓮꓪ‐ꓟꓳꓰ‐ꓢꓰꓲꓠ ꓡꓰ “ꓪꓴ‐ꓢ ꓬꓲ ꓢꓲꓽ ꓫꓬˍ ꓟ ꓐꓯ ꓘꓶꓽ ‐ ꓠꓵꓻ ꓠꓲ, ꓐꓲˍ ꓟ ꓟꓲ ꓠꓯ ꓕꓲ ꓟ ꓔꓯ ꓫꓬ, ꓔꓶˍ ꓟ” ꓐꓯˍ ꓟ ꓬꓲ ꓕꓲ ꓟꓴꓽ ꓗꓪ ꓐꓰ ꓟ. ꓟꓲꓽ ꓚ ꓗꓷꓳ꓿

ꓬꓲ ꓡꓰ ꓞꓳ ꓤ ꓐꓴ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓗ ꓪꓑ ꓙꓽ ꓪˍ ꓟ ꓬꓲ ꓢꓯꓼ ꓬꓲ ꓫꓵꓽ ꓬꓰ ꓙꓰꓽ ꓐꓰ ꓞꓳ ꓤ ꓫ. ꓕꓱ ꓢꓯꓼ ꓐꓴ ꓔꓯ ꓔꓱ, ꓕ ꓟ. ꓖꓶˍ ꓗꓷꓳ꓿  ꓬꓲ ꓢꓯꓼ ꓕꓲ ꓐꓱ ꓟ ꓠꓬ ꓣꓳ ꓔꓯ ꓪꓴ. ꓓꓵ ꓠꓻ ꓝꓲ ꓢꓲ꓾ ꓕꓲ ꓐꓱ ꓠꓬ ꓠꓲ, ꓟ ꓘꓶꓻ ꓡꓶ ꓡꓰ ꓝꓲˍ ꓡꓳ꓿ ꓕꓲ ꓐꓱ ꓟ ꓬꓲ ꓢꓯꓼ ꓐꓴ ꓠꓬ ꓙꓳꓺ ꓡꓰ ꓝꓲˍ ꓟ ꓡꓰ ꓐꓰ ꓕꓲ ꓐꓱ ꓠꓬ ꓠꓲ, ꓟ ꓫ. ꓡꓰ ꓝꓲˍ ꓡꓳ꓿ ꓬꓲ ꓢꓯꓼ ꓕꓲ ꓐꓱ ꓟ ꓠꓬ ꓠꓲ, ꓟ ꓦꓶ ꓡꓰ ꓝꓲ ꓢꓲ ꓕꓲ ꓐꓱ ꓟ ꓠꓽ ꓗ, ꓛꓲꓽ ꓡꓰ ꓝꓲˍ ꓡꓳ꓿

ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟ ꓤꓶꓻ ꓗꓪ ꓣꓳ ꓗꓳ ꓡꓳ ꓗꓪ ꓔꓬ ꓟ ꓞꓳ ꓤ ꓐꓰ ꓟꓲ ꓠꓯ ꓗꓪ ꓚꓳ. ꓬꓲ ꓢꓯꓼ ꓐꓴ꓾ ꓫ. ꓕꓱ ꓢꓯꓼ ꓬꓲ ꓫꓵꓽ ꓬꓲ ꓙꓰꓽ ꓔꓯ ꓑ ꓙꓽ ꓔꓬ ꓪˍ ꓡꓳ꓿

ꓬꓲ ꓢꓯꓼ ꓕꓱ ꓟꓬ ꓟ ꓘꓴꓽ ꓠꓯꓸꓼ ꓗꓪ ꓪꓴ‐ꓢ ꓬꓲ ꓢꓯꓼ ꓠꓬ ꓮ ꓕꓯ ꓟꓲ ꓙꓳ ꓔꓬ ꓟ ꓟꓽ ꓥ ꓐꓯˍ ꓟ ꓕꓯ ꓥˍ ꓟꓲ ꓖꓴ ꓟ. ꓖꓶ ꓗꓷꓳ꓿ ꓖꓳ ꓟ ꓑꓶ. ꓓꓴ ꓪꓴ‐ꓢ ꓢꓯꓼ ꓔꓯ ꓑ ꓙꓽ ꓠꓲ, ꓫꓵˍ ꓠꓬ ꓢꓲꓽ ꓫꓬ ꓕꓳꓽ ꓶ ꓔꓯ ꓵ ꓠ ꓗ, ꓡꓳ꓾ ꓐꓰ ꓟ. ꓟꓲꓽ ꓚꓺ ꓗꓷꓳ꓿

ꓬꓲ ꓡꓰ “ꓢꓲꓽ ꓫꓬ ꓕꓳꓽ ꓶ ꓠꓬ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓐꓱ ꓶ ꓢꓯꓼ ꓔꓬ ꓪˍ ꓟ ꓬꓲ ꓝꓳ, ꓟꓶ ꓥ ꓢꓲ꓾ ꓙꓲ‐ꓢꓴ ꓢꓲ ꓤ ꓮ ꓙꓵꓽ ꓒꓵꓽ ꓗ ꓬꓰ ꓢꓲ ꓠꓬꓲ ꓫ ꓒꓵꓽ ꓠ ꓗ, ꓟ ꓒꓵꓽˍ ꓟ ꓒꓵꓽ ꓶꓻ ꓕꓲ ꓟ ꓥ ꓡꓳ꓾” ꓐꓰ ꓬꓲ ꓡꓰ ꓐꓯˍ ꓡꓳ꓿

ꓬꓲ ꓡꓰ ꓙꓵꓻ ꓢꓴ ꓙꓲ‐ꓢꓴ ꓢꓲ ꓤ ꓮ ꓙꓵꓽ ꓔꓯ ꓢꓲꓽ ꓫꓬ ꓕꓳꓽ ꓶ ꓵ ꓠ, ꓟ꓾ ꓢꓲꓽ ꓫꓬ ꓕꓳꓽ ꓡ ꓡꓰ ꓟ. ꓖꓶ ꓡˍ ꓟ ꓔꓯ ꓙꓵꓻ ꓠ, ꓟ ꓐꓰ ꓚꓲ. ꓛꓬ ꓞꓳ ꓙꓳ ꓔꓬ ꓟ ꓠꓬꓲ ꓗꓪ ꓡꓯꓼ ꓕꓲ ꓛꓳ ꓫꓱꓽ ꓠ, ꓟ꓾ ꓕꓵꓼ ꓪ ꓖꓶ ꓗꓷꓳ꓿

ꓢꓲꓽ ꓫꓬ ꓕꓳꓽ ꓶ ꓗꓪˍ ꓟꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓠꓵ ꓠ, ꓟ ꓟ. ꓖꓶ ꓔˍ ꓟ ꓔꓯ ꓬꓲ ꓡꓰ ꓐꓯˍ ꓡꓳ꓿ ꓙꓲ‐ꓢꓴ ꓢꓲ ꓤ ꓐꓴ ꓥˍ ꓟꓲ ꓚꓲ. ꓛꓬ ꓔꓯ ꓠꓲ, ꓠꓵ ꓢꓴ ꓔꓯˍ ꓡꓰꓽ ꓠꓲ, ꓠꓵˍ ꓟ ꓡꓰꓽ ꓟ ꓡꓰꓽ ꓟꓽ ꓞꓲꓺ꓾ ꓚꓲ. ꓛꓬ ꓔꓯ ꓟꓽ ꓠꓲ, ꓠꓵ ꓢꓴ ꓔꓯ ꓥˍ ꓟꓲ ꓠꓲ, ꓠꓵ ꓠ ꓗ, ꓡꓳ꓾ ꓐꓰ ꓬꓲ ꓡꓰ ꓬꓲꓼ ꓠꓬꓲ. ꓖꓶ ꓗꓷꓳ꓿

ꓡꓳ, ꓬꓰˍ ꓕꓯ ꓬꓲ ꓡꓰ “ꓣꓳ ꓮ ꓙꓵꓽ ꓠꓵ ꓠꓲ, ꓐꓱ ꓖꓶ ꓢꓴ꓾ ꓠꓵ ꓠꓲ, ꓔꓯ ꓟꓳ. ꓖꓶ ꓢꓴ ꓐꓰ ꓠꓵꓻ ꓠꓲ, ꓗꓪ ꓐꓰ ꓞꓳ ꓙꓳ ꓢꓯ. ꓔꓬ ꓢꓴ ꓒꓬꓱꓼ ꓡꓰ ꓝꓲ꓿ ꓪꓴ‐ꓢ ꓐꓯ ꓘꓶꓽ ꓔꓯ ꓡꓯꓼ ꓕꓲ ꓛꓳ ꓫꓱꓽ ꓢꓲ ꓠꓵ ꓠꓲ, ꓐꓲˍ ꓟ ꓟꓲ ꓠꓯ ꓕꓲ ꓟ ꓔꓯ ꓕꓲ ꓠꓲ, ꓕꓲ ꓪˍ ꓫꓬ, ꓜꓶ ꓡꓯ” ꓐꓰ ꓕꓵꓼ ꓪ ꓖꓶ ꓗꓷꓳ꓿

ꓕꓲ ꓠꓲ, ꓕꓲ ꓪ ꓬꓰˍ ꓟ ꓠꓲ, ꓟ

ꓢꓲꓽ ꓫꓬ ꓕꓳꓽ ꓶ ꓦꓬꓼ ꓠꓬꓲ ꓚꓲ. ꓟꓶ ꓓꓴ ꓑꓮꓲ ꓠꓬ ꓙꓲ‐ꓢꓴ ꓢꓲ ꓤ ꓘꓴ ꓜꓲꓼ ꓞꓳ ꓮ ꓟꓬ, ꓗꓪ ꓟ ꓢꓲ ꓤ ꓐꓴ ꓔꓯ ꓕꓲ ꓠꓲ, ꓕꓲ ꓪ ꓟ ꓐꓰ ꓫꓱ. ꓡꓯ ꓘꓳˍ ꓟ ꓙꓵꓻ ꓠꓲ, ꓠꓲ, ꓟ ꓗꓪ ꓐꓰ ꓕꓱ ꓡꓱ ꓡꓳꓥꓽ ꓜꓲꓼ ꓐ ꓡ ꓗꓷꓳ꓿ ꓘꓴ ꓜꓲꓼ ꓞꓳ ꓜꓴ ꓕꓲ ꓟ ꓐꓰ ꓕꓲ ꓟ ꓠꓬ ꓮ ꓡꓲ ꓐꓰ ꓟꓽ ꓫꓱ. ꓡꓯ ꓘꓳ ꓓꓴ ꓙꓳˍ ꓐꓯ ꓥ ꓟꓲ ꓙꓲ‐ꓢꓴ ꓢꓲ ꓤ ꓮ ꓙꓵꓽ ꓔꓯ ꓕꓲ ꓠꓲ, ꓕꓲ ꓪˍ ꓗꓷ ꓡꓰ ꓝꓲˍ ꓟ ꓢꓲꓽ ꓫꓬ ꓕꓳꓽ ꓶ ꓬꓲ ꓫꓱ. ꓡꓯ ꓘꓳˍ ꓟ ꓬꓲ ꓚꓰꓺ ꓙꓳˍ ꓟ ꓔꓯ ꓥˍ ꓟꓲ ꓑꓮꓲꓽ ꓖꓳ ꓟ ꓠꓬ ꓫꓬꓽ ꓫꓬꓽ ꓡꓰꓽ ꓟꓳ. ꓖꓶ ꓔ ꓟ ꓥ ꓡꓳ꓿

ꓑꓮꓲ ꓬꓲ ꓙꓵ, ꓔꓯ ꓧꓪ. ꓧꓪꓸꓼ ꓐꓰ ꓬꓰ ꓓꓳ ꓡꓰ ꓗ ꓠꓯ. Msgr. ꓔꓲꓺ ꓒ Pius Win Than ꓡꓰ ꓡꓳ, ꓬꓰˍ ꓟ ꓗꓪ ꓶꓼ ꓥꓳꓽ ꓙꓱꓽ ꓖꓶ ꓷ ꓢꓲ ꓑꓮꓲ ꓬꓲ ꓙꓵ, ꓔꓯ ꓠꓽ ꓗꓷꓳ꓿ Pathein ꓗꓪ ꓬꓰ ꓗꓷ ꓟ ꓕꓱ ꓢꓲꓽ ꓫꓬ ꓕꓳꓽ ꓶ ꓠꓬꓲ ꓚꓲ. ꓟꓶ ꓓꓴ ꓑꓮꓲ ꓠꓬ ꓙꓵꓻ ꓢꓴ ꓐꓴ ꓔꓯ ꓕꓲ ꓠꓲ, ꓕꓲ ꓪˍ ꓗꓷ ꓡꓰ ꓝꓲ ꓠ, ꓟ ꓐꓰ ꓠꓵꓻ ꓠꓲ, ꓐꓲˍ ꓟ ꓟꓲ ꓠꓯ ꓕꓲ ꓟ ꓔꓯ ꓕꓲ ꓡꓰ, ꓫꓬ, ꓔꓶ ꓠ, ꓟ ꓕꓵꓼ ꓪ ꓖꓶ ꓐ ꓡˍ ꓟ ꓪꓴ‐ꓢ ꓐꓯ ꓘꓶ ꓬꓲ ꓪꓽ ꓠꓬꓲˍ ꓟ ꓔꓯ ꓥˍ ꓟꓲ ꓝꓮꓲ ꓕꓲ ꓧꓪ, ꓓꓵꓽ ꓙ ꓛꓲ ꓠ, ꓟ ꓬꓰˍ ꓟ ꓑꓮꓲꓽ ꓕꓲ ꓟ ꓥ ꓡꓳ꓿

By RVA Pwo Karen Service