ꓣꓱꓽ ꓙˍ ꓟ ꓐꓰ ꓪꓽ ꓘꓴˍ ꓟ꓾ ꓟꓬꓱꓽ ꓬꓰˍ ꓟ ꓐꓰ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓟ ꓗꓪ ꓮ ꓡꓲ ꓕꓲ ꓫꓵꓽ ꓠꓬ ꓪ ꓜꓲ ꓬꓳ. ꓚꓰꓽˍ ꓡ꓿ ꓡꓴ‐ꓘ 10ꓽ38‐42 ꓗꓪ ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓧꓶ. ꓕꓯ ꓠ ꓠ, ꓡꓯ꓿
ꓬꓰ‐ꓢꓴˍ ꓐꓰ ꓬꓲ ꓛꓳꓽ ꓒꓯ, ꓐꓴ ꓠꓬ ꓘ, ꓕꓲ ꓘ, ꓗꓪ ꓫꓱꓽ ꓛꓲ ꓬꓰˍ ꓡꓳ꓿ ꓖꓳ ꓗꓪ ꓟ‐ꓕ꓾ ꓟꓬꓱ ꓔ ꓟ ꓤ ꓟꓶ ꓤ ꓕꓲ ꓣ ꓡꓰ ꓬꓰ‐ꓢꓴ ꓔꓯ ꓬꓲ ꓦꓲ ꓗꓪ ꓘꓳ ꓣꓴˍ ꓡꓳ꓿ ꓟ‐ꓕ ꓬꓲ ꓠꓬꓲ ꓟ ꓟ‐ꓡꓲ ꓟꓬꓱ ꓔ ꓢꓴ ꓕꓲ ꓣꓳ ꓠꓬ ꓬꓰ‐ꓢꓴ ꓟꓲ ꓙꓬꓽ ꓢꓲ ꓗꓪ ꓠꓬꓲ. ꓠ. ꓢꓲ ꓬꓲ ꓐꓯ ꓘꓶ ꓔꓯ ꓠ ꓠ, ꓡꓳ꓿ ꓖꓳ ꓡꓱ ꓥˍ ꓟꓲ ꓟ‐ꓕ ꓠꓽ ꓟꓬꓱꓽ ꓟꓬꓽˍ ꓟ ꓗꓪ ꓐꓰ ꓠꓲ, ꓟ ꓢꓴ ꓔꓴ ꓡ ꓠꓬꓲ ꓬꓰ‐ꓢꓴ ꓔꓯ ꓡ ꓢꓲ꓾ ꓢꓲ ꓒꓽꓳ꓾ ꓥꓪ ꓠꓬꓲ ꓟ ꓠꓬ ꓥꓪ ꓕꓲ ꓣꓳ ꓔꓯˍ ꓡꓰꓽ ꓣꓱꓽ ꓙ ꓟꓬꓱꓽ ꓣꓱꓽ ꓔꓬ ꓝꓲˍ ꓟ ꓠꓴ ꓥꓪ ꓔꓯ ꓟꓽ ꓫꓱ. ꓤ ꓡ? ꓬꓲ ꓥꓪ ꓔꓯ ꓬꓰ ꓙ ꓡ ꓠ, ꓟ ꓐꓯ ꓖꓶ꓾ ꓐꓯˍ ꓡꓳ꓿
ꓢꓲ ꓒ ꓠꓽ ꓬꓲ ꓔꓯ ꓒꓳ, ꓖꓶ ꓢꓲ꓾ ꓟ‐ꓕꓺꓳ꓾ ꓟ‐ꓕꓺꓳ꓾ ꓠꓴ ꓠꓬ ꓟꓬꓱꓽ ꓮꓽ ꓟꓬ, ꓫꓵꓽ ꓟ ꓪꓴ. ꓠꓬꓲ ꓙꓽ ꓫ. ꓔꓬ ꓐꓷ꓿ ꓖꓳ ꓡꓱ ꓥ ꓟꓲ ꓟꓽ ꓙꓳ ꓟꓽ ꓓ ꓟ ꓠꓽ ꓕꓲ ꓫꓵˍ ꓡꓰꓽ ꓙꓳˍ ꓡꓳ꓿ ꓟ‐ꓡꓲ ꓠꓬ ꓟꓬꓽ ꓠ ꓬꓲꓲ ꓙꓲˍ ꓟ ꓖꓳ ꓕꓲ ꓐꓱꓻ ꓔꓯ ꓢꓲ ꓣꓴ ꓗꓷ ꓠꓬꓲ꓾ ꓬꓲ ꓔꓯˍ ꓐꓰ ꓣꓴ ꓔꓯ, ꓙꓰ ꓟꓽ ꓓ꓾ ꓐꓯ ꓖꓶˍ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓐꓯ ꓘꓶ ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓡꓲ ꓕꓲ ꓫꓵꓽ ꓥˍ ꓟꓲ ꓪꓴ‐ꓢ ꓡꓯꓽ ꓒꓯ, ꓗꓪ ꓡꓰꓽ ꓓ, ꓡꓳ꓾ ꓐꓯˍ ꓟ ꓠꓲ, ꓟ ꓗꓪ ꓐꓰ ꓣꓳ ꓠꓬ ꓪꓽ ꓘꓴ ꓠ ꓗ, ꓡꓳ꓿ ꓖꓳ ꓟˍ ꓡꓰ ꓐꓰ ꓮ ꓡꓲ ꓕꓲ ꓫꓵꓽ ꓥˍ ꓟꓲ ꓣꓳ ꓡꓯꓽ ꓒꓯ, ꓗꓪ ꓓ, ꓡꓳ꓾ ꓐꓯˍ ꓟ ꓠꓲ, ꓟ ꓗꓪ ꓐꓰ ꓟꓬꓱꓽ ꓬꓰ ꓠ ꓗ, ꓡꓳ꓾ ꓐꓰ ꓙꓲꓻ ꓫꓬ ꓢꓴ ꓮꓴꓖꓴꓢꓔꓲꓠꓰ ꓡꓰ ꓐꓯ ꓔˍ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓟ‐ꓕ ꓣꓱꓽ ꓬꓰ ꓔꓬ ꓟ ꓠꓬ ꓟꓽ ꓙꓲꓻ ꓐꓰ ꓐꓯˍ ꓟ ꓟꓽ ꓥ ꓥ꓾ ꓟ‐ꓕ ꓬꓲ ꓓꓵꓽ ꓙꓽ ꓪꓴꓽ ꓧꓶ ꓔꓬ ꓟ꓾ ꓠꓲ, ꓟ ꓘꓶꓻ ꓡꓶ ꓔꓬ ꓟ ꓔꓯ ꓫꓬ, ꓔꓱ, ꓖꓶ ꓔꓬ ꓟ ꓥ ꓡꓳ꓿ ꓪꓽ ꓘꓴˍ ꓟ ꓐꓯˍ ꓟ ꓪꓴ‐ꓢ ꓔꓯ ꓮ ꓡꓲ ꓕꓲ ꓫꓵꓽ ꓥˍ ꓟꓲ ꓡꓯꓼ ꓙꓱˍ ꓟ ꓠꓬ ꓣꓳ ꓕꓲ ꓠꓬꓲ ꓣꓱꓽ ꓬꓰˍ ꓟ ꓟꓬꓱꓽ ꓟꓽ ꓬꓰ ꓧꓶ. ꓕꓯ ꓬꓰ ꓠ ꓔˍ ꓟ ꓥ ꓡꓳ꓿ ꓙꓲ‐ꓢꓴ ꓢꓲ ꓤ ꓤꓶꓻ ꓐꓯˍ ꓟ ꓠꓬ ꓪꓽ ꓘꓴˍ ꓟ ꓤꓶꓻ ꓠꓯꓸꓼ ꓗꓪ ꓞꓳ ꓙꓳ ꓔꓬ ꓪˍ ꓡꓳ ꓟꓽ ꓥ ꓡ꓿
