ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓛꓳ ꓢꓴ ꓐꓴ ꓮ ꓡꓲ ꓬꓰ ꓠꓯˍ ꓟ (Daily reflection)
ꓧꓪ. ꓧꓪ ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 9ꓽ57‐62 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓗ. ꓠꓯ ꓢꓲ ꓛꓳ ꓙꓰ ꓠꓬ ꓫ. ꓕꓱ ꓘꓶꓽ ꓐꓰ ꓡꓰ ꓢꓲꓺ ꓒ ꓗ. ꓠꓯ ꓢꓲ ꓛꓳ ꓙꓰ ꓟ ꓟꓽ ꓥ ꓕꓲ ꓤꓶꓻ ꓢꓲꓺ ꓒ ꓐꓱ ꓶ ꓡꓯꓼ ꓙꓱ ꓢꓲ ꓠꓬꓲ ꓛꓳ ꓙꓰ ꓠ, ꓟ ꓐꓯ ꓖꓶ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓢꓲ, ꓛꓳ ꓙꓰ ꓟ ꓠꓬ ꓢꓲ, ꓡꓲ ꓐꓰ ꓔꓬ ꓠ, ꓟ ꓐꓱ ꓶ ꓡꓰ ꓢꓲ, ꓟ ꓟꓽ ꓥ꓾
ꓢꓲꓺ ꓒ ꓬꓰ‐ꓢꓴ ꓡꓰ ꓪꓴ. ꓓꓵꓽ ꓟꓵꓽ ꓮ‐ꓠ ꓐꓱ ꓶ ꓬꓲ ꓔꓬ ꓖꓴ ꓬꓲ ꓘꓴ ꓙꓳ ꓡꓳ꓿ ꓟꓵꓽ ꓪꓴꓽ ꓗꓪ ꓟ ꓠꓬ, ꓤˍ ꓟꓲ ꓬꓲ ꓘꓶ ꓙꓳ ꓡꓳ꓿ ꓖꓳ ꓡꓱ ꓥ ꓟꓲ ꓡ‐ꓞꓳ‐ꓮ‐ꓐꓲ ꓠꓽ ꓪꓴ. ꓓꓵ ꓗꓴ ꓖꓴˍ ꓟꓲ ꓟꓽ ꓙꓳ ꓐꓰ ꓐꓯ ꓖꓶ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓣꓳ ꓙꓵꓻ ꓠꓲ, ꓙ ꓖꓴ ꓗꓪ ꓫ. ꓓꓴ ꓟꓷ ꓓꓴ ꓙꓳ ꓡ ꓥ ꓟꓲ ꓪꓴ‐ꓢ ꓙꓵꓻ ꓢꓲ ꓠꓬꓲ ꓣꓳ ꓙꓵꓻ ꓠꓲ, ꓔꓯ ꓟꓽ ꓟꓶ ꓡꓰ ꓟꓽ ꓐꓬ ꓡꓰ ꓠ, ꓟ ꓙ ꓫꓱ, ꓠ, ꓟ ꓥ ꓡꓳ꓿
ꓣꓳ ꓤꓶꓻ ꓠꓯ, ꓗꓪ ꓪꓴ‐ꓢ ꓡꓰ ꓘꓴ ꓟ ꓢꓯꓼ ꓔꓯ ꓓꓽ ꓪꓴ. ꓛꓳ ꓫꓱ, ꓠ, ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓛꓳ ꓠꓲ, ꓫꓵˍ ꓢꓴ ꓞꓳ ꓡꓱ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬ ꓥꓪ ꓢꓲꓺ ꓒ ꓗ. ꓠꓯ ꓛꓳ ꓥꓳ꓿ ꓖꓳ ꓡꓱ ꓥ ꓟꓲ ꓥꓪ ꓐ, ꓐ ꓔꓯ ꓧꓶ. ꓕꓯ ꓔꓵ. ꓬꓰ ꓝꓲ ꓡꓯ ꓐꓰ ꓐꓯ ꓖꓶ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓞꓳ ꓫꓵꓻ ꓔꓯ ꓠꓬ ꓬꓲ ꓪ ꓞꓳ ꓫꓵꓻ ꓡꓰ ꓔꓵ. ꓝꓲ꓿ ꓠꓴ ꓠꓽ ꓪꓴ‐ꓢ ꓗꓴꓷꓼ ꓚ ꓒꓬꓱꓼ ꓙꓰ ꓐꓯ ꓖꓶ ꓡꓳ꓿
ꓕꓱ ꓫ. ꓕꓱ ꓘꓶꓽ ꓠꓬ ꓣꓳ ꓚꓲ. ꓛꓬ ꓐ, ꓐ ꓟ, ꓟ ꓔꓯ ꓟꓽ ꓠꓲ, ꓠꓵ ꓠ, ꓟ ꓐꓯ ꓔ ꓟ ꓥ ꓟꓽ ꓥ꓿ ꓖꓳ ꓡꓱ ꓥ ꓟꓲ ꓪꓴ‐ꓢ ꓠꓲ, ꓡꓶ ꓪꓴ‐ꓢ ꓡꓰ ꓘꓴˍ ꓟ ꓢꓯꓼ ꓔꓯ ꓠ ꓡꓳ ꓢꓲ ꓠꓬꓲ ꓢꓲꓺ ꓒ ꓠꓯ, ꓗꓪ ꓛꓳ ꓙꓰ ꓠ, ꓟ ꓐꓯ ꓖꓶ ꓔ ꓟ ꓥ ꓡꓳ꓿
ꓗ. ꓠꓯ ꓢꓲ, ꓟꓽ ꓛꓳ ꓢꓲꓺ ꓒ ꓔꓯ ꓛꓳ ꓙꓰ ꓠꓯˍ ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓖꓶ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓦ ꓟꓲ ꓟꓽ ꓓꓴ ꓢꓲ, ꓖꓳꓼ ꓣꓴ ꓔ ꓢꓲ ꓔꓲ. ꓒꓳ, ꓡꓳ. ꓢꓴ ꓮꓽ ꓟ ꓔꓯˍ ꓟꓲ꓾ ꓪꓴ‐ꓢ ꓗꓴꓷꓼ ꓗꓪ ꓣꓱꓽ ꓟꓽ ꓠ꓾ ꓐꓰ ꓐꓯ ꓖꓶ ꓡꓳ꓿
ꓢꓲꓺ ꓒ ꓗ. ꓠꓯ ꓛꓳ ꓫꓱ, ꓟ ꓙꓵ, ꓔꓯ ꓡ ꓞꓳ ꓡꓰ ꓟꓬꓱꓽ ꓓꓳ ꓖꓶ ꓡ ꓟ ꓚꓱ,꓾ ꓜ ꓟꓲ ꓔꓬ ꓗ, ꓛꓲ ꓟ ꓚꓱ,꓾ ꓒꓴ ꓫꓵ ꓔꓯ ꓡꓰ ꓡꓳ. ꓠꓬꓲ ꓢꓲ ꓠꓬꓲ꓾ ꓛꓳꓽ ꓔꓬ ꓟ ꓕꓯ ꓢꓲ ꓢꓲꓺ ꓒ ꓐꓱ ꓶ ꓔꓱ ꓚꓵˍ ꓟ ꓝꓲ ꓓꓴ ꓕꓲ ꓣꓳ ꓡꓰ ꓐꓰ ꓛꓲ ꓫꓱ, ꓠ, ꓟ ꓐꓯ ꓖꓶ ꓔꓟ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓙꓲ‐ꓢꓴ ꓢꓲꓺ ꓤ ꓒꓬꓱꓼ ꓡ ꓝꓲ ꓟ ꓙꓵ, ꓕꓯ ꓣꓳ ꓠꓬ ꓬꓲ ꓐꓰ ꓙ ꓡꓯꓽ ꓘꓳ ꓔꓬ ꓢꓴ ꓒꓬꓱꓼ ꓔꓬ ꓡ?
ꓢꓲꓺ ꓒ ꓡꓰ ꓘꓴ ꓢꓯꓼ ꓔꓯ ꓑ ꓙ ꓗꓷ ꓢꓴ ꓒꓬꓱꓼ ꓔꓬ ꓡ? ꓢꓲꓺ ꓒ ꓠꓲ, ꓡꓶ ꓔꓯ ꓛꓳ ꓢꓴ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓡꓰ ꓐꓰ ꓞꓳ ꓙꓳ ꓢꓯ. ꓔꓬ ꓢꓴ ꓒꓬꓱꓼ ꓡ ꓝꓲˍ ꓐꓰ ꓠ ꓠꓬꓲ ꓔꓬ ꓟ ꓥ ꓡꓳ꓿ ꓢꓲꓺ ꓒ ꓗ. ꓠꓯ ꓢꓲ ꓛꓳ ꓙꓰ ꓢꓴ ꓒꓬꓰꓼ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
