ꓢꓲ ꓒ ꓠꓯꓸꓼ ꓗꓪ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓠ‐ꓕ‐ꓠꓰ ꓐꓰ ꓜꓲ ꓡꓯ ꓘꓳˍ ꓟ ꓚꓱ, ꓔꓯ ꓣꓳ ꓑ ꓙꓽ ꓪˍ ꓥꓳ꓿ ꓠ‐ꓕ‐ꓠꓰ ꓔꓯ ꓢꓲ ꓒ ꓬꓰ‐ꓢꓴ ꓢꓷ.ˍ ꓟ ꓡꓰ ꓐꓰ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓤꓶꓻ꓾ ꓣꓳ ꓠꓲ, ꓟ ꓠꓯꓸꓼ ꓗꓪ ꓮ ꓡꓲ ꓓ,ˍ ꓟ ꓐꓰ ꓣꓳ ꓔꓳ, ꓜꓳꓽ ꓔꓬ ꓟ ꓮ ꓙꓵꓽ ꓔꓯ ꓪꓴ‐ꓢ ꓡꓰ ꓢꓷ.ˍ ꓡꓳ꓾ ꓐꓯˍ ꓟ ꓚꓱ, ꓔꓯ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓠ ꓠ, ꓢꓲ ꓠꓬꓲ ꓕꓲ ꓡꓰ, ꓓꓵꓽ ꓙꓽ ꓠꓬꓲ ꓓꓴ ꓬꓰ ꓡꓯ꓿
ꓬꓳ‐ꓦ ꓕꓳꓽ ꓶ 1ꓽ47‐51 ꓗꓪ ꓛꓲ ꓵˍ ꓥꓳ꓿
ꓠ‐ꓕ‐ꓠꓰ ꓡˍ ꓟ ꓔꓯ ꓬꓰ‐ꓢꓴ ꓟꓳ ꓗꓷ ꓠꓬ ꓬꓲ ꓔꓯ ꓖꓴ ꓢꓲ꓾ ꓠꓬꓲ ꓠ,꓾ ꓖꓳꓼ ꓠꓲ, ꓟꓽ ꓙꓳ ꓟ ꓬꓲ‐ꓢꓷ‐ꓡꓰ ꓡ ꓞꓳ ꓚꓵ ꓕꓲ ꓣꓳ꓾ ꓐꓯˍ ꓡꓳ꓿ ꓠ‐ꓕ‐ꓠꓰ ꓡꓰ ꓬꓲ ꓔꓯ ꓠꓴ ꓮ ꓡꓲ ꓐꓰ ꓥꓪ ꓔꓯ ꓢꓷ.ˍ ꓡ? ꓐꓰ ꓠ ꓠꓬꓲˍ ꓕꓯ ꓬꓰ‐ꓢꓴ ꓡꓰ ꓬꓬꓲ ꓔꓯ ꓒꓳ, ꓖꓶ ꓢꓲ꓾ ꓒ‐ꓡꓲ ꓠꓴ ꓔꓯ ꓟꓽ ꓘꓴ ꓢꓰꓼ ꓕꓯ꓾ ꓠꓴ ꓠꓬ ꓘꓶꓽ ꓢꓶꓽ ꓜꓲ ꓠꓯ. ꓘꓪ ꓔꓬ ꓕꓯˍ ꓡꓰ ꓠꓴ ꓔꓯ ꓥꓪ ꓟꓳꓻ ꓗꓷꓳ꓾ ꓐꓯ ꓖꓶˍ ꓡꓳ꓿ ꓠ‐ꓕ‐ꓠꓰ ꓡꓰ꓾ ꓟ. ꓒꓽꓳ꓾ ꓠꓴ ꓠꓽ ꓪꓴ‐ꓢ ꓮ ꓐꓲ꓾ ꓬꓲ‐ꓢꓷ‐ꓡꓰ ꓪ ꓔꓲ ꓥ ꓡꓳ꓾ ꓐꓯˍ ꓡꓳ꓿
ꓬꓰ‐ꓢꓴ ꓡꓰ ꓬꓲ ꓔꓯ꓾ ꓘꓶꓽ ꓢꓶꓽ ꓜꓲ ꓠꓯ. ꓘꓪ ꓔꓬ ꓕꓯˍ ꓡꓰ ꓠꓴ ꓔꓯ ꓥꓪ ꓟꓳꓻ ꓗꓷꓳ꓾ ꓐꓯˍ ꓟ ꓗꓪ ꓐꓰ ꓠꓴ ꓙꓵꓻˍ ꓡ? ꓕꓱ ꓟ ꓕꓯꓽ ꓢꓲ ꓪꓴꓽˍ ꓡꓳ ꓫꓵꓽ ꓠꓴ ꓟꓳˍ ꓢꓰꓽ ꓥꓳ꓾ ꓐꓯ ꓖꓶˍ ꓡꓳ꓿ ꓝꓮꓲ ꓬꓰ‐ꓢꓴ ꓡꓰ꓾ ꓥꓪ ꓔꓱ, ꓔꓱˍ ꓠꓴ ꓪ ꓔꓯ ꓐꓯ ꓖꓶˍ ꓠꓬꓲ꓾ ꓟꓴ ꓗꓪ ꓒꓴ ꓡˍ ꓟˍ ꓐꓰ ꓪꓴ‐ꓢ ꓬꓲ ꓝꓲ ꓓꓴ ꓐꓴ ꓠꓬ꓾ ꓡ‐ꓞꓳ‐ꓮ‐ꓐꓲ ꓕꓯꓽ ꓢꓲ ꓗꓪ ꓓꓯ ꓓꓯ ꓬꓯꓼ ꓬꓯꓼ ꓬꓰ ꓔꓬ ꓟ ꓔꓯ ꓠꓴ ꓪ ꓟꓳˍ ꓥꓳ꓾ ꓐꓯˍ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓐꓯ ꓘꓶꓽ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓕꓲ ꓖ ꓕꓲ ꓧꓪ, ꓗꓪ “ꓪꓴ‐ꓢ ꓥꓪ ꓔꓯ ꓚꓵ ꓚꓵ ꓢꓷ.ˍ ꓟ ꓥ ꓡ? ꓥꓪ ꓪꓽ ꓘꓴ ꓘꓶ ꓔꓯ ꓬꓲ ꓑ ꓙꓽˍ ꓡꓳ ꓐꓯˍ ꓟ ꓚꓵ ꓚꓵ ꓥ ꓡ? ꓐꓰ ꓣꓳ ꓓꓵꓽ ꓙꓽ ꓟꓶˍ ꓟ ꓬꓲ ꓙꓵ, ꓥˍ ꓟꓲ ꓙꓳ ꓗꓴ.ˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓠ‐ꓕ‐ꓠꓰ ꓚꓱ, ꓔꓯ ꓣꓳ ꓝꓮꓲ ꓡꓳ. ꓠꓬꓲ ꓠꓬꓲ ꓡꓯ꓿ ꓬꓲ ꓟꓽ ꓢꓷ. ꓕꓯ ꓡꓰ ꓬꓰ‐ꓢꓴ ꓠꓬ ꓬꓲ ꓔꓯ ꓢꓷ.ˍ ꓡꓳ꓾ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔˍ ꓡꓳ꓿ ꓣꓳ ꓤꓶꓻ ꓗꓪ ꓥˍ ꓟꓲ ꓖꓳ ꓡꓱ ꓥꓳ꓿ ꓣꓳ ꓗ, ꓛꓲꓽ ꓔꓬ ꓟ꓾ ꓣꓳ ꓠꓲ, ꓫ. ꓟꓬ ꓫ. ꓔꓬ ꓟ꓾ ꓓꓵꓽ ꓙꓽ ꓟꓬꓽ ꓔꓬ ꓟ꓾ ꓮ ꓡꓲ ꓕꓲ ꓣꓳ ꓔꓯ ꓡꓰ. ꓐꓯ ꓟꓳ. ꓖꓶ ꓟꓽ ꓠ ꓟ ꓣꓳ ꓠꓲ, ꓟ ꓠꓯꓸꓼ ꓗꓪ ꓑꓲ. ꓫ ꓔˍ ꓟ ꓮ ꓙꓵꓽ ꓔꓯ ꓥˍ ꓟꓲ ꓪꓴ‐ꓢ ꓡꓰ ꓢꓷ.ˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓠꓬꓲ. ꓠꓬꓲ ꓗꓪ ꓚꓲ. ꓛꓬ ꓤꓶꓻ ꓔꓯ ꓪꓴ‐ꓢ ꓡꓯꓽ ꓒꓯ, ꓗꓪ ꓡꓯꓼ ꓙꓱ ꓗꓷ ꓢꓲ꓾ ꓪꓴ‐ꓢ ꓬꓲ ꓠꓬꓲ ꓙ ꓡꓳ. ꓙ ꓖꓶ ꓡˍ ꓟ ꓐꓰ ꓙ ꓖꓴ ꓟ. ꓖꓶˍ ꓟ ꓔꓯ ꓙꓵꓻ ꓡꓯ꓾ ꓐꓰ ꓮ ꓙꓵꓽ ꓔꓯ ꓢꓯꓼ ꓖꓶ ꓩꓴ ꓡ ꓠꓲ, ꓫꓵˍ ꓡꓳ꓿
