ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓠꓱ. ꓐꓯ ꓢꓴ ꓐꓰ ꓕꓽ ꓡꓯ ꓘꓳ ꓠꓲ, ꓫꓵˍ ꓡꓳ꓿ ꓣꓳ ꓬꓰˍ ꓟ ꓥ ꓡ꓾ ꓠꓱ. ꓐꓯ ꓢꓴ ꓥ ꓟꓲ ꓣꓳ ꓔꓯ ꓮ ꓡꓲ ꓐꓰ ꓟꓳˍ ꓡ ꓐꓯˍ ꓟ ꓔꓯ ꓓꓵꓽ ꓙꓽ ꓔꓬ ꓗꓴ.ˍ ꓡꓳ꓿ ꓕꓲ ꓖ ꓕꓲ ꓧꓪ, ꓗꓪ ꓠꓬ ꓖꓳ ꓡꓱ ꓓꓵꓽ ꓙꓽ ꓠꓬꓲ ꓐꓰ ꓠꓱ. ꓐꓯ ꓢꓴ ꓔꓯ ꓫꓱ. ꓡꓰ ꓠ, ꓟ ꓚꓲ. ꓛꓬ ꓚꓳꓽ ꓚꓲ. ꓛꓬ ꓒꓳ, ꓡꓶ. ꓗꓷ ꓗꓴ.ˍ ꓡꓳ꓿
ꓖꓳ ꓡꓱ ꓐꓯˍ ꓥ ꓟꓲ ꓠꓬꓲ. ꓠꓬꓲ ꓗꓪ ꓥꓪ ꓢꓯꓼ ꓖꓶ ꓠꓲ, ꓫꓵˍ ꓟ ꓠꓬ ꓣꓳ ꓠꓬ ꓠꓱ. ꓐꓯ ꓢꓴ ꓥ ꓕ ꓑꓳꓸꓼ ꓟ ꓐꓰ ꓫꓱ. ꓟꓽ ꓛꓵ꓾ ꓐꓯˍ ꓟ ꓥ ꓡꓳ꓿
ꓣꓳ ꓟꓽ ꓠꓲ, ꓠꓵ ꓟ ꓟꓽ ꓧꓳ, ꓟ ꓔꓯ ꓠꓱ. ꓐꓯ ꓢꓴ ꓡꓰ ꓠꓵˍ ꓟ ꓑꓶ. ꓓꓴ ꓖꓼ ꓬꓰ ꓟꓽ ꓛꓵ ꓟˍ ꓡꓰ ꓐꓰ꓾ ꓣꓳ ꓟꓽ ꓙꓵꓻ ꓟ ꓔꓯˍ ꓥ ꓟꓲ ꓠꓱ. ꓐꓯ ꓢꓴ ꓐꓴ ꓡꓰ ꓙꓵˍ ꓟ ꓑꓶ. ꓓꓴ ꓖꓼ ꓢꓲ ꓙꓵꓻ ꓟꓽ ꓛꓵ꓿ ꓚꓲ. ꓛꓬ ꓐꓱ ꓶ ꓬꓳ. ꓚꓰꓽˍ ꓟ ꓚꓲ. ꓛꓬ ꓙꓵꓻ ꓔˍ ꓟ ꓠꓯꓸꓼ ꓗꓪ ꓚꓲ. ꓛꓬ ꓠꓲ, ꓟ ꓐꓰ ꓚꓲ. ꓛꓬ ꓖꓳ ꓓꓱꓽ ꓦꓰꓼ ꓕꓶ ꓠ, ꓟ ꓡꓰꓽ ꓣꓱꓽ ꓞ, ꓡꓳ꓿
ꓖꓳ ꓡꓱ ꓐꓯ ꓥ ꓟꓲ “ꓥꓪ ꓠꓬ ꓮ ꓟꓬ, ꓔꓯ ꓟꓽ ꓫꓱ.” ꓐꓯ ꓢꓲ ꓮ ꓫꓵꓽ ꓬꓰˍ ꓥ ꓟꓲ ꓒꓳ, ꓔꓳ, ꓢꓲ ꓬꓰ ꓟꓽ ꓛꓵ꓿
ꓢꓴ ꓔꓯ ꓫꓱ. ꓡꓰ ꓠ ꓟꓽ ꓓꓻ ꓟꓽ ꓞꓽ ꓢꓯꓼ ꓕꓵꓼˍ ꓟ꓾ ꓥ ꓠꓬ꓾ ꓢꓴ ꓔꓯ ꓕꓲ ꓔꓲ.ˍ ꓡꓰ. ꓟꓽ ꓫꓱ. ꓡꓰ ꓠ ꓢꓯꓼ ꓕꓵꓼˍ ꓟ꓾ ꓕꓱ ꓠꓬꓲꓽ ꓙꓰꓽ ꓡꓱꓸꓼ ꓠꓬ ꓣꓳ ꓐꓱ ꓶ ꓪꓴꓽ ꓧꓶ ꓓꓴ ꓥ ꓡꓳ꓿
ꓚꓵ ꓚꓵ ꓣꓳ ꓐꓱ ꓶ ꓢꓻˍ ꓟ ꓠꓬ ꓠꓱ. ꓐꓯ ꓢꓴ ꓠꓲ, ꓒꓴˍ ꓟ ꓡꓰ ꓟꓽ ꓔꓬ ꓟ꓾ ꓠꓱ. ꓐꓯ ꓢꓴ ꓔꓯ ꓟꓽ ꓫꓱ. ꓠ ꓗꓽ ꓟꓽ ꓫꓵ. ꓫꓵ. ꓟꓽ ꓬꓰ ꓟ꓾ ꓑ, ꓤꓲ ꓠꓲ ꓬꓰ ꓟꓽ ꓬꓰ ꓟ ꓥ ꓡꓳ꓿ ꓚꓲ. ꓛꓬ ꓠꓬ ꓮ ꓫꓵꓽ ꓔꓯ ꓙꓵˍ ꓡ꓾ ꓮ ꓡꓲ ꓟ ꓔꓯ ꓟꓶ ꓠꓲ, ꓫꓵˍ ꓡ꓾ ꓮ ꓡꓲ ꓟ ꓔꓯ ꓟꓶ ꓠꓲ, ꓟꓽ ꓫꓵ ꓡ ꓐꓯˍ ꓟ ꓚꓲ. ꓛꓬ ꓖꓳ ꓓꓱꓽ ꓡꓰ ꓢꓷ. ꓢꓲ ꓠꓬꓲ ꓖꓳ ꓡꓱ ꓞꓳ ꓙꓳˍ ꓟ ꓥ ꓡꓳ꓿
ꓕꓲ ꓖ ꓕꓲ ꓧꓪ, ꓞꓳ ꓤ ꓐꓴ ꓠꓬ ꓣꓳ ꓔꓯ ꓠꓵˍ ꓥꓳ꓾ ꓧꓳˍ ꓥꓳ꓿ ꓕꓲ ꓖ ꓕꓲ ꓧꓪ, ꓠꓽ ꓟꓽ ꓠꓵ꓾ ꓟꓽ ꓧꓳ,꓿ ꓕꓱ ꓟ ꓥˍ ꓟꓲ ꓣꓳ ꓐꓱ ꓶ ꓮ ꓕꓯ ꓟꓲ ꓬꓳ. ꓚꓰꓽˍ ꓟ ꓟꓽ ꓥ꓿
ꓬꓳ. ꓚꓰꓽˍ ꓟ ꓠꓬ ꓣꓳ ꓠꓬ ꓠꓱ. ꓐꓯ ꓢꓴ ꓮ ꓡꓲ ꓒꓬꓱꓼ ꓡꓰ ꓝꓲ ꓠꓲ, ꓫꓵˍ ꓟ ꓞꓳ ꓤ ꓟꓽ ꓥ ꓥ ꓐꓰ꓾ ꓣꓳ ꓚꓲ. ꓛꓬ ꓮ ꓡꓲ ꓒꓬꓱꓼ ꓡ ꓠꓲ, ꓫꓵˍ ꓟ ꓞꓳ ꓤ ꓒꓬꓱꓼ ꓡ ꓠ, ꓟ ꓥ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓣꓳ ꓮ ꓡꓲ ꓒꓬꓱꓼ ꓡ ꓠꓲ, ꓫꓵˍ ꓟ ꓔꓯ ꓢꓷ. ꓠ, ꓟ ꓠꓽ ꓟꓽ ꓢꓻ꓿ ꓕꓲ ꓖ ꓕꓲ ꓧꓪ, ꓣꓳ ꓠꓲ, ꓫꓵˍ ꓟ ꓥꓳ ꓐꓰ ꓓꓵꓽ ꓙ ꓔˍ ꓟˍ ꓟꓲ ꓚꓵ ꓚꓵ ꓠꓱ. ꓐꓯ ꓢꓴ ꓡꓰ ꓣꓳ ꓔꓯ ꓒꓬꓱꓼ ꓡꓰ ꓝꓲ ꓠꓲ, ꓫꓵˍ ꓟ ꓒꓬꓱꓼ ꓡˍ ꓟˍ ꓟꓲ ꓙꓳ ꓗꓴ.ˍ ꓡꓳ꓿
ꓖꓳ ꓟ ꓑꓶ. ꓓꓴ ꓕꓲ ꓖ ꓕꓲ ꓧꓪ, ꓚꓲ. ꓛꓬ ꓚꓳꓽ ꓚꓲ. ꓛꓬ ꓠ ꓠꓬꓲ ꓠ ꓗ, ꓡꓳ꓿ “ꓥꓪ ꓚꓵ ꓚꓵ ꓮ ꓫꓵꓽ ꓔꓯ ꓟꓶ ꓠꓲ, ꓫꓵˍ ꓡ꓿ ꓥꓪ ꓠꓬ ꓮ ꓡꓲ ꓫꓵꓽ ꓡ ꓞꓳ ꓒꓬꓱꓼ ꓡ ꓠꓲ, ꓫꓵˍ ꓡ꓿” ꓐꓰ ꓠ ꓠꓬꓲ ꓠ ꓗ, ꓟ ꓥꓳ꓿ ꓣꓳ ꓠꓬ ꓮ ꓟꓬ, ꓔꓯ ꓫꓱ. ꓡꓰ ꓟꓽ ꓛꓵ꓿ ꓟꓽ ꓫꓱ. ꓡꓰ ꓠ ꓟꓲ ꓑ, ꓤꓲ ꓠꓲ ꓬꓰ ꓟꓽ ꓛꓵ꓾ ꓗꓽ ꓟꓽ ꓫꓵ. ꓫꓵ. ꓬꓰ ꓟꓽ ꓛꓵ꓿ ꓣꓳ ꓠꓬ ꓣꓳ ꓒꓬꓱꓼ ꓠ, ꓟ ꓡꓰꓽ ꓬꓳ. ꓚꓰꓽˍ ꓡꓳ꓿
